Filiponya 2 - Nouveau Testament bété de Gagnoa

Zezu "zoa- 'ɔyi "Kulɔbhɔnyɔ

¹ Klise 'na "kukoleɛ "tamalea bhɔ 'anye 'kwɛme 'a. 'Ɔnɛɛ -waloɛ 'nyɛ bhɔ 'anye 'dlekutamaleɛ 'a, "ne 'ɔnɛɛ Zuzu "zoa bhɔ 'anye -bholo 'a, 'ɛ 'nyɛ bhɔ 'anye 'dlekunamaleɛ 'a, "ne 'a 'pɔ bhɔ 'alua 'na 'nyɛzedle 'a. 'Diɛɛ, 'ɛ "ne bhɔ -ɛyi yɛ?

² Zaa, 'a 'wale -se 'ŋwɛnɛ -ɛ ko -ame 'dlezɔ -wɛ "kɛ 'kpɔmale-. 'Anyɛɛ 'ŋwɛnɛ yle -bholo, -se 'anyɛɛ 'dlepɔsɛ yle -bholo, -se 'a kɛle- 'dle -bholo.

³ 'A kɛ -bɛɛ' no ne, 'a 'te lɔbhɔzowugɔŋ "me nole-, -se 'a 'te 'lelee "kuziwugɔŋ "me nole-. -Mɔ, 'a 'kwlialea- 'ayi "ku, -se 'a "pɔ 'dle -gbɔ 'alua 'kpɔ- "ne 'wa -zi 'anye "ku.

⁴ -Ɔkɔkokɔko te 'ɔyi 'dle "me gugwɔle-, -mɔ, 'ɔ "pɔ me 'ɔlua "ku 'dle.

⁵ 'Ayi 'glɛme, 'a slu 'ayi "ɛ -soɔ, -see 'nyɔkpɔ kɛ Zezu Klise "me -ko 'na -see 'ɔ -su 'ɔyi "ku -wɛ.

⁶ 'Ɔyi Zezu, Lagɔ 'nasɛ 'ye 'ɔ -ko -lɔ -godogodo, -mɔ, 'ɔyi -ɔ -ko Lagɔ 'na ko "me -wɛ, 'ɔ "ne 'ce mamale.

⁷ -Mɔ, 'ɔ 'bhale- 'ɔyi "me, "ne 'ɔ yi -lɔ 'ɔyi "kulɔbhɔnyɔ "zoa- "ne 'ɔ yi -lɔ 'ɔyi 'nyɔkpɔ 'nasɛ slu-. "Ne 'nyakpa yu -lɔ 'ylime 'ye -gbɔ 'ɔ -ko 'diɛɛ 'nyɔkpɔ 'nasɛ.

⁸ 'Ɔ 'kwlialea- 'ɔyi "ku, "ne 'ɔ 'nɔŋole- 'plomezoɛ "me -kaa "ne 'ɔnɛɛ "kwiɛ 'na dɛ yi -lɔ ylɛ, klowa "klo 'wa -kolo -lɔ, "ne 'ɔ yi -lɔ "ku.

⁹ 'Ɛza, Lagɔ 'lubhu- -lɔ 'wli "ku, "ne 'ɔ yu -lɔ 'bhulɛ 'na -ɛ 'kpɔ- "ne 'ɛ zi "ku -wɛ "ku 'jilɛ-, "ne 'ɔ yu -lɔ 'tɔ 'na -ɛ zi 'tɔ 'klekle "ku -wɛ ziɛle-.

¹⁰ -Se 'wa kɛ Zezu Kli "tɔ -sɛ, -kokomni "kɛ 'pɔ- 'ɔnɛɛ "zozoɛ "me, "nɔgɔ "me, "ne dodo ne "ku, "ne 'gbɛmnɛdodo "me.

¹¹ -Se 'nyakpa 'klekle "kɛ 'ce no nɛɛ: Zezu Kli -noɔ -lɔ Anyinɛnyɔ yɔ, -se -a To Lagɔ 'na 'tɔ "kɛ 'ŋlu me.

Klecɛnya 'na libhɔ

¹² Zaa, -Awale 'wanye, -ye 'e -ko nɛ 'anye 'glɛme -wɛ, 'a "zo nɛ -ame 'plome, "ne 'a "zo "me nɛ Lagɔ 'plome. 'A "zo 'ce 'plome 'yiɛ. -Dɛme 'na -ye 'e "ne lɔbhɔ -ko ne, 'anyɛɛ 'plomezoɛ 'ɛ "ple lɔbhɔ. Lagɔ 'fuɔ- 'anye, zaa, 'ɔnɛɛ libhɔ, 'a nole 'ɔnɛɛ -gɛguɛ "me, "ne 'ɔnɛɛ 'plomezoɛ "me.

¹³ "Naa-, Lagɔ gbɔ "ne 'a no -li 'na -ɛ 'nɛno 'gɛ -wɛ.

¹⁴ Zaa, -ye 'a no 'klekle -wɛ, 'a te "me 'ŋuŋwɔŋuŋwɔle-, -se 'a te 'ciciɔ-.

¹⁵ 'Ɛɛ "kɛ -lɔ gbɔ "ne 'a -ka -lɔ 'nuɔsɔbhɔledɛ kɛle-, "ne 'a "kɛ -lɔ Lagɔ 'na yua -wa -ko lɛ -kpee "zo, dodo ne "ku 'na 'nyakpa -gbeyia 'glɛme. 'Wayi 'glɛme ne, 'a -ko sɛgbɛɛ "nɔgɔ "me 'na -zeli -ɛ le.

¹⁶ "Naa-, 'a bhulɛ Lagɔ 'na weli -ɛ 'nyɛ zikpɛ 'glɔnya zɛ. 'A 'cɛ soɔ 'sa ne, 'ɛ yi -gbɔ "ne Zezu Kli 'na yizle, 'anyɛɛ za 'e yi 'ce keyi "me 'lɛle, "naa-, 'e "ne "fu libhɔ -no, "ne 'e "ne "fu 'kpɛlɛ- zɛ.

¹⁷ 'Anyɛɛ 'dlekukɛleɛ -ko sɛgbɛɛ Lagɔ 'na bɔbɔle -bɛɛ', 'wa kɛ -ame lɔbhɔ "ne 'e kɛ "ku- ne, 'neɛ 'dlu yi 'ɛ bɔbɔle -bɛɛ' -wɛ "ku 'slu. "Ɛ soɔ 'ye 'ɛ kɛ -ylɛle ne, 'neɛ dɛku, 'ŋwanaweli 'ye 'ɛ "kɛ -lɔ "zo 'na 'ŋwɛnɛ -wɛ ne, 'e 'yɔbhɔ -gbɔ 'ɛ 'lɔbhɔ me 'anye 'klekle.

¹⁸ 'Anye 'lelee, 'a no -me "ɛ 'ŋwɛnɛ -wɛ, -se 'anye 'wɔ "bhaa -a nole "ɛ 'ŋwɛnɛ -wɛ 'gɔme.

Timote -nyɛ Epaflodiite "bhaa 'na libhɔ

¹⁹ Anyinɛnyɔ Zezu Kli kɛ "ku 'ŋunu- ne, 'e yi bhliji "me 'anye Timote "ku lebhele-, -se 'ɔ "kɛ -kɛ -ame 'anyɛɛ 'de -sɛle, -se 'kwɛme "kɛ -kɛ -ame "tamale-.

²⁰ 'Ɛ "mɔ Timote yɔ ne, 'nyɔkpɔ 'na 'ɔ "kɛ 'neɛ sɛne 'dle 'pɔ -wɛ, "ne -ye 'dlebhɛ "kɛ 'lɔbhɔ -dudu 'anyɛɛ za -wɛ "ne -le.

²¹ -Wawɛ 'klekle, 'wayi 'wa gugwɔle -lɔ 'dle "me, -mɔ, 'wa "ne gbɔ Zezu Kli 'na gbo.

²² 'Anye 'nabhɛ, 'a -yi sɛ, -see Timote lɔbhɔ Lagɔ "ku 'tee: -See yu no 'ɔ 'to yɔko libhɔ -wɛ, sɔbhɔ 'ɔ -nyɛ 'wɔ "bhaa -a -lɔbhɔ -lɔ Lagɔ "ku "ne -a -blia -lɔ Lagɔ 'na 'Denaade -glɔ.

²³ 'Ɛza 'e no -lɔ -gbɔ 'e yu 'anye "ku lebhele-, -mɔ, 'e "kɛ -na "ɛ -jiɛ ne "me 'na weli 'na -see 'ɛ "kɛ "ku bhli -wɛ 'ylime 'ye "bhuɔ.

²⁴ "Ne -ame 'nabhɛ 'e -kɛ 'dleku, Anyinɛnyɔ 'na 'tɔ "me, -gbɔ, 'e yi 'bhobhlo 'anye 'ylime 'ye ka yi.

²⁵ -Mɔ, 'e 'ye- -la lɛ 'ylime ne, 'ɛ -leɛ -a "nɔwli Epaflodiite, 'neɛ libhɔnonyɔ, 'neɛ kwɛlenyɔ, 'ye 'e "kɛ -la -lɔ 'anye -nɛme. 'Ɔyi 'ye 'a 'pɔ- -lɔ -ame -gwe "ku -ye 'e 'tɛle nɛ kwɛlenyɔ 'siɛ -wɛ.

²⁶ "Naa-, 'ɔ 'yɔbhɔ -gbɔ 'ɔ "kɛ 'anye 'ylime 'ye klepaa, 'ɛnɛɛ za 'dlebhɛ 'lɔbhɔ, "naa- 'a 'no- 'awɔ 'ɔnɛɛ gulɔbhɔde zɛ.

²⁷ -Ɛɛ, "ɛ gu 'lɔbhɔ- 'awɔ 'diɛɛ, 'ɔ -siɛle glu. -Mɔ, Lagɔ 'pɔ- 'ɔnɛɛ 'nyɛzedle. 'Ɛ "ne -kɛ 'lelee 'ɔyikɔ yɔ, -mɔ, -ame 'nabhɛ 'ɔ 'pɔ- -me 'neɛ 'nyɛzedle, 'ɛ "mɔ nɛ -kɛ sɔbhɔ yɛ ne, 'neɛ 'nyɛze yi nɛ -kɛ lɔbhɔ 'ple.

²⁸ 'Ɛza, 'e "pulɔpulɔle -lɔ "ku -se 'e "kɔ 'anye -gwe "ku "pɔ, -se 'a "kɔ -kɛ 'ylime 'ye, -se 'ŋwɛnɛ "kɛ -kɛ 'anye 'lɔbhɔ, -se -ame, 'neɛ 'nyɛze "kɛ -kɛ 'lelee "ku -seliɔ -me.

²⁹ Zaa, 'a "sɔ -kɛ kɔ 'tee 'ŋwɛnɛsɛ, -see 'wa 'sa Anyinɛnyɔ "me 'na "nowlia -wɛ. 'Nyakpa 'na -wa -ko -me 'ɔnɛɛ sɛ -wɛ, 'a "kpɔmaloa- -me "ku.

³⁰ Klise 'na libhɔ za, 'ɔ 'na "ku, 'ɔ -siɛle glu. 'Ɔ 'bhale- 'ɔnɛɛ zikpɛ "me, "ne 'ɔ yi -lɔ -ye 'a "kɛ nɛ 'ayigɛsɛ -ame -nɛme -wɛ, -nɛme.