Filiponya 1 - Nouveau Testament bété de Gagnoa

Pɔle 'na bhɛleweli

¹ -Ame, Pɔle -nyɛ Timote "bhaa, Zezu Kli 'na "kulɔbhɔnya 'ye -a -noɔ -lɔ. Lagɔ 'na yua 'klekle -wa -ko Filipo -du "me -wɛ, 'wa -nyɛ "ɛ Lagɔgligbɛ 'na 'yukugɛlenya -nyɛ 'wanɛɛ 'kwɛlekwɛlenya -wɛ 'wɔ "bhaa 'wayi 'ye -a kɛle lɛ "ku.

² -A To Lagɔ "ne Anyinɛnyɔ Zezu Kli 'na -jɔlo -nyɛ "kuwɛtɛ "bhaa 'kwlile- 'anye "ku.

Pɔle bhɛle Lagɔ

³ -Se 'e 'pɔ 'anye "ku 'dle 'yiɛ -wɛ, sɔbhɔ 'ye 'e bhɛle -lɔ Lagɔ.

⁴ -Se 'e bhubhɔ 'ce 'anyɛɛ za 'yiɛ- -wɛ, 'ŋwɛnɛsɛ 'ye 'e bhubhɔ 'ce -lɔ.

⁵ Sɛko -wɛ, tɛtɛ -yli "me 'na -ye 'e -sloa 'anye Lagɔ 'na 'Denaade -wɛ, 'a -kwɛle -ame -kaa "ne 'ɛ -ylɛ lɛ -dɛme.

⁶ 'E -kɛ -bɛɛ' -bholo 'dleku, 'ɛɛ -noɔ -lɔ nɛɛ: Lagɔ -ɔ 'ci- "ɛ libhɔ "namanɔ 'anye 'glɛme "ku ne, 'ɔ 'yi no -kaa, "ne 'ɛ "kɛ 'ce -lɔ Zezu Kli 'na yizle 'wlizɔ bhiɛle-.

⁷ 'Ɛ -ŋwa sɔbhɔ, -se 'e "kɛ soɔ 'anye 'klekle 'na 'ŋwɛnɛ "me 'kɛle- -wɛ. "Naa-, 'e "zo- 'anye 'neɛ 'dlezɔ. Sɛko -wɛ, Lagɔ 'na libhɔ -ye 'ɔ 'je- -ame kɔ -jɔlosɛ -wɛ, 'anye 'klekle 'a -no me. -Dɛme 'na -dee 'e -ko -jiɛ "me ne, 'a no "ɛ Lagɔ 'na libhɔ -wɛ "yiɛ. -Dee 'e -yele nɛ kɔ "ne 'e me nɛ Lagɔ 'na 'Denaade 'na 'gboziɛka -zejilɛku -wɛ, 'e -yi sɛ -gbɔ 'a -ko nɛ -ame keyi.

⁸ -Ɛɛ, Lagɔ 'nabhɛ -yi sɛ -gbɔ 'e -wa 'anye 'klekle kpɛnyee, -see Zezu Kli -wa 'anye -wɛ.

⁹ -Se 'e bhubhɔ 'anyɛɛ za ne lɛ: 'Anyɛɛ -see 'a -kɛkɛle 'ŋwɛnɛ "me -wɛ, 'ɛ 'kpɔmale- 'yiɛ, -se 'a "kɛ -li 'na "me -seseliasɛ yibhlele-, -se 'a "kɛ -li "me 'no 'tee.

¹⁰ Lɔbhɔ 'na dɛku 'a yi -ɛ -noɔ "namanɔ yɛ "ne -ɛ -noɔ "nyɛnye yɛ -wɛ yibhlele-. "Ne 'a -ka 'ce 'nuɔsɔbhɔledɛ kɛle-, Zezu Kli 'na yizle.

¹¹ "Ɛ Zezu Kli yi 'anye kwɛle-, "ne 'anyɛɛ nonoli yi "me ŋwinɛle-, lɔbhɔ 'na dɛku, 'nyakpa yi Lagɔ 'ŋlu kwa, "ne 'wa yu bhlegbi "me "zo.

'Denaade -ŋwɛne moɔ 'klekle

¹² "Nowlia 'wanye, 'anye -wa -noɔ 'kleceɛ 'waa -wɛ, 'e "kɛ 'anye weli -cibhɛ bhulɛle-: 'Diɛɛ, -ɛ yle dɛ -ame ne, 'ɛ "ne -bɛɛ' 'na "nyɛnye yɛ, -mɔ, 'ɛ -gbɔ "ne Lagɔ 'na 'Denaade yi -lɔ 'yuku me.

¹³ -Dɛmeda, 'Kamalenyɔ "yitɔ 'na sueme 'na -konya 'klekle, "ne -glɔku 'na 'nyakpa 'klekle -yi -la -dɛme 'sɛ -gbɔ 'e -Lɔbhɔ Klise "ku 'na 'ylime za 'e -ko -lɔ -jiɛ "me.

¹⁴ "Ɛ -ye 'e -ko dɛ Lagɔweli za -jiɛ "me ne, 'ɛ -gbɔ "ne Anyinɛnyɔ 'na yua 'na 'dlekukɛleɛ yi -lɔ "me "tamale-. 'Ɛ -yli "me za, 'wa libhi 'dle -gwli "ku, "ne 'wa "gu -da, "ne 'wa bhulɛ -lɔ Anyinɛnyɔ 'na "kukoweli moɔ 'klekle.

¹⁵ 'Diɛɛ, -bedia sɛle Klise 'na 'Denaade lɔbhɔzonosɛ "ne gbosɛ "ku, -mɔ, 'ɛ -ko sɔbhɔ "ne -wawɛ sɛle 'dlewɔtɔ "me.

¹⁶ "Ɛ -wa sɛle 'dlewɔtɔ "me -wɛ, Lagɔ 'na 'ŋwɛnɛ 'wa -kɛ -lɔ "me. Sɛko -wɛ, 'wa -yi 'sɛ -gbɔ "ɛ -jiɛ ne "me -mee 'e -ko ne, 'e "kɛ Klise 'na 'Denaade 'na gboziɛ za yɛ -lɔ.

¹⁷ -Mɔ, 'wayi -wɛ, lɔbhɔzo -no -wugɔŋo "me 'wa sɛle -lɔ Zezu Kli 'na 'Denaade. 'Wanɛɛ 'dlepɔsɛ "ne 'tee -ko. 'Wa 'pɔ 'dle nɛɛ, 'wa 'cɛ -soɔ 'sa ne, 'wa "kɛ 'neɛ 'gbapegbapeɛ "me "tamalea "ɛ -jiɛ ne za yɛ -lɔ.

¹⁸ -Mɔ -ame, 'ɛ -na -ame -bɛɛ' no! 'Wanɛɛ 'dlepɔsɛ -ko 'tee 'oo, 'ɛ "ne 'tee -ko 'oo, 'neɛ dɛku Klise 'na 'Denaade -wɛ, 'ɛ -sɔɔ. 'Ɛyi 'ye 'e -yi. 'Ɛyi -wɛ -le -lɔ -ame 'ŋwɛnɛ "ku. "Ne "ɛ 'ŋwana -wɛ yi 'ce -ame 'lɔbhɔ 'yiɛ.

¹⁹ "Naa-, 'e -yi sɛ -gbɔ 'anyɛɛ bhubhɔweli "me, "ne Zezu Kli 'na Zuzu Wlewle 'na kwɛlekwɛleɛ "me 'ye 'e 'cɛ 'ce -lɔ 'nu "po.

²⁰ -Ye 'e 'yɔbhɔ -gbɔ 'ɛ 'wlole 'yli "ne 'e -kɛ 'dleku gbigbi -wɛ za, 'neɛ 'klo -ka 'ce 'wli 'kpi zu za. -Mɔ, -dɛme "ne -godogodo, 'neɛ ku "me, 'e -yɛ 'oo, "ne 'e "ku- 'oo, Klise yi 'ce 'ŋlu me "yiɛ.

²¹ -Ame, 'neɛ dɛku, Klise -noɔ -lɔ zikpɛ yɔ, "naa-, "ku- 'ye 'e kɛ "ku-, 'e 'yi -bɛɛ' 'na "namanɔ "me ylele- zɛ.

²² -Mɔ, 'e kɛ -na -kɛ -yɛ -me ne, 'e yi bhɔ libhɔ -na "namanɔ no 'a, 'e "ne -kɛ -la -ye 'e "kɛ tɔ- -wɛ -yi.

²³ "Ɛ -ɛne "sɔ ne 'na -gwegba "me 'ye 'e -ko lɛ. -Ame 'neɛ dɛku ne, 'e 'yɔbhɔ nɛ -gbɔ 'e "kɛ nɛ zikpɛ ne "ku 'bha- -se Zezu Kli "bhaa -a "kɛ nɛ "ku 'glile-, "naa-, 'neɛ dɛku 'ɛyi -wɛ, 'ɛɛ 'nɛne -lɔ.

²⁴ -Mɔ, 'e kɛ 'lelee "ɛ dodo ne "ku -ko, 'e "kɛ 'anye 'kwɛle za 'ɛ 'nɛne 'lelee kpɛnyee.

²⁵ 'E -yi sɛ -gbɔ 'e yi 'ce 'anye yɔko -ko "ne 'anye 'wɔ "bhaa -a yi 'ce "ku 'glile-, -se 'e "kɛ 'anye kwɛle -se 'ŋwɛnɛ "kɛ 'anye 'lɔbhɔ 'yiɛ 'dlekukɛleɛ "me.

²⁶ -Se 'e kɛ 'ce "kusɔ 'anye 'glɛme -yi, "ɛ 'neɛ yiyiɛ -wɛ "kɛ gbɔ -se 'ŋwɛnɛ "kɛ 'ce 'anye 'lɔbhɔ "yiɛ, 'anye -nyɛ Zezu Kli "bhaa 'na "kukoleɛ "me.

'Denaade 'na "kukoweli

²⁷ Zaa, 'a ko -see Klise 'na 'Denaade 'yɔbhɔ -gbɔ 'a ko -wɛ. -Se 'e -kɛ -yi, 'e "kɛ 'ce 'anye 'ylime 'ye, "ne 'e "mɔ 'ce -yi, 'e yi 'ce "fu 'anyɛɛ weli "me 'no. "Ne 'e yi 'lelee 'sɛ yibhlele- -gbɔ 'a -kole "ku "ne 'a -wale. 'Denaade 'na -ye 'dlekukɛleɛ -nɛme -wɛ 'a -su 'tee "ne 'a nole 'lelee Lagɔlibhɔ 'dle -wɔtɔ "me.

²⁸ 'E yi 'lelee 'sɛ yibhlele- -gbɔ 'a "ne "gu 'anyɛɛ -gblenya -gɛ: 'Ɛɛ "kɛ -lɔ -gbɔ "ne 'wa "kɛ -lɔ 'luɔ- -gbɔ "kwlɛ 'wa bhli -lɔ. 'Anyɛɛ dɛku 'ɛɛ "kɛ -lɔ -gbɔ "ne 'a "kɛ -lɔ 'sɛ yibhlele- -gbɔ 'wanɛɛ "kwlɛbhliɛ "ne 'anyɛɛ "popoɛ Lagɔ "me 'ye 'ɛ 'bhale -lɔ. 'Ɛyi 'klekle Lagɔ "me 'ɛ 'bhale -lɔ.

²⁹ Lagɔ 'nyɛ -lɔ 'anye -jɔlo, 'ɛ "ne -kɛ Klise 'na 'dlekukɛleɛ 'ɛyikɔ yɛ, -mɔ, 'a yi -kɛ 'lelee 'ɔnɛɛ za "gbape -me.

³⁰ 'Anye 'wɔ "bhaa 'gɔme 'ye -a 'kplɛle -lɔ. 'Anye 'yliku 'ye 'e 'kplɛle- 'awɔ -lɔ 'watɔ, "ne 'a -yi sɛ -gbɔ 'e 'kplɛ -nazɛ 'yiɛ.