Efɛzenya 6 - Nouveau Testament bété de Gagnoa

'Yua "ne 'wanɛɛ gwɛlenya

¹ Yua 'nye, 'a "zo 'anyɛɛ 'gwɛlenya 'plome, -se Anyinɛnyɔ 'yɛbhɛ -wɛ, -ɛ -ŋwa lɔbhɔ yɛ -lɔ.

² "Zo -e 'to -nyɛ -e "nɔ "bhaa 'plome, tɛtɛ -gbagbɛ -ye Lagɔ 'nyɛ- "ne 'ɔ -ple weli yɛ -lɔ zɛ.

³ "Ɛ weli -ye 'ɔ -ple -wɛ ne lɛ: «'Ŋwɛnɛ yi -eyi lɔbhɔ "ne -e yi dodo ne "ku gwlɛ-.» .

⁴ "Ne 'anye 'to 'wɔ, 'a te 'anyɛɛ yua 'dle nuɛ 'yiɛ. 'A 'bhoa 'tee, 'a 'sibhoa -gwe 'na -gwe "ku, -se 'a "zoa 'de -ɛ 'bhale Anyinɛnyɔ "me -wɛ "me.

'Juyua "ne "bhenya

⁵ 'Juyua 'nye, dodo ne "ku, 'a "kpɔmalea 'anyɛɛ "bhenya, 'a "zoa 'plome "me kpɛnyee, 'dlezɔ -ko 'anye 'buu, -se 'a "zo Klise 'plome -wɛ.

⁶ -Dee 'wa -kole 'anye "klo -wɛ 'ɛyikɔ 'ye 'a -na 'toa "kɛ "ku lɔbhɔ sɛgbɛɛ 'nyakpa 'na -gɛnanoɛ 'ye 'a 'tɛle 'siɛ. -Mɔ, 'a "zoa 'plome -see Klise 'na "kulɔbhɔnya 'sɛ 'wanɛɛ 'dle 'klekle "me -wɛ. -Se Lagɔ 'yɛbhɛ -wɛ yɛ -lɔ.

⁷ 'A lɔbhɔ 'anyɛɛ "bhenya "ku 'dlewɔtɛ "me sɛgbɛɛ Anyinɛnyɔ 'ye 'a lɔbhɔ "ku, -mɔ, 'nyakpa 'ye 'a 'na -kɛ "kulɔbhɔ.

⁸ 'A -yi sɛ nɛɛ: 'Juyu 'ye -e kɛ 'se -noɔ -ce 'kɔyelenyɔ 'ye -e kɛ 'se -noɔ -ce, -li 'na -li -ye -ɔkɔkokɔko no -wɛ, 'ɔ 'yi 'ce Anyinɛnyɔ yɔko -ylele.

⁹ "Ne 'anye, "bhenya -wɛ, 'a 'slu -me "ɛ sɛbhele -wɛ 'anyɛɛ 'juyua. 'A 'toa 'ylime ko. 'Anye 'nabhɛ, 'a -yi sɛ: 'Wayi, "ne -anye "Bhenyɔ -bholo -wɛ 'ye 'a -kɛ -lɔ "nɔgɔ "me, "ne 'ɔyi, 'ɔɔ 'seselia -kɛ 'nyakpa "me.

'A 'libhi Lagɔ 'na togwekosu "ku!

¹⁰ 'A "tamale 'kwɛme Anyinɛnyɔ 'na "ku -koleɛ "me, "ne 'ɔnɛɛ 'bhɛloɛ "yitɛ "me.

¹¹ 'A 'libhi Lagɔ 'na togwekosu 'klekle "ku, -se 'a "kɛ -kɛ Sata 'na ylonoli 'yliku 'nyenyi.

¹² 'Bhɔ, 'nyakpa "bhaa "ne -a -gba "kɛ -kɛ 'gwe. -Mɔ, zuzu -nyɛnyea 'na 'bhɛloɛ -ɛ -ŋnɛ kpɛnyee -wɛ "bhaa yɛ -lɔ. -Wa -kɛ 'bhɛloɛ "ne 'wa 'kamalea "ne -wa -su 'sabo -titiɛ "me zikpɛ -wɛ 'waa -lɔ, zuzu -nyɛnyea -wa -ko "nɔgɔ -nyɛ dodo "bhaa 'na gbanyede -wɛ "bhaa "ne -a 'gwe -lɔ.

¹³ 'Ɛza, 'a 'libhi Lagɔ 'na togwekosu 'klekle "ku, -se 'yli 'na "nyɛnye "kɛ 'ce -ylɛ, 'a yi 'ce 'nyenyi "ne 'a "kɛ 'gwe -kaa, "ne 'a "kɛ 'ce -lɔ 'wli "ku to-.

¹⁴ Zaa, 'a -sɔ "ku! 'A 'libhi gbɛklɛklɛ "ku sɛgbɛɛ 'anyɛɛ 'bɛto, 'a 'libhi "meŋwinɛleɛ "ku sɛgbɛɛ 'anyɛɛ togwekoti.

¹⁵ -Se 'a zɛkɛ Lagɔ 'na 'Denaade -ɛ 'nyɛ "kuwɛtɛ 'na -sɛ -za -wɛ, 'a 'libhi "ku sɛgbɛɛ 'anyɛɛ 'bho 'na -kpɔklo.

¹⁶ 'Dlekukɛleɛ -na "zo 'anyɛɛ 'kpluku, -Godogodo "ne -moɔ 'klekle, 'ɛ 'kpluku -wɛ "kɛ -lɔ gbɔ "ne Sata 'na 'gbe -ɛ 'siɛ -wɛ, 'a 'cɛ -lɔ 'nyimɔ.

¹⁷ 'A 'libhi me 'popoɛ "ku sɛgbɛɛ togwedagbilɛ -ɛ 'fuɔ -wɛ, 'a 'libhi Lagɔ 'na weli "ku sɛgbɛɛ -jijigbɛlɛ 'ye Zuzu Wlewle 'nyɛ -wɛ.

¹⁸ 'A bhubhɔ -se 'a te -kɛ 'diɔle. 'Anyɛɛ bhubhɔweli "ne 'anyɛɛ zlɛweli 'klekle 'a -ylɛle Zuzu Wlewle "me! 'A 'luɔ- -kɛ, -se 'a bhubhɔ -godogodo 'wlewlea 'klekle za, -se 'a te 'diɔle.

¹⁹ 'A bhubhɔ -me 'lelee 'neɛ za, -se Lagɔ "kɛ -ame 'ɔnɛɛ weli nu "zo. -Se 'e "kɛ 'yliku "tamale- -se 'e "kɛ -ɛ -ko 'diɛɛ "me 'Denaade za -wɛ -sɛ.

²⁰ 'Na 'jɛ -ko -jiɛ "me ne, 'mɔɔ -noɔ -lɔ Zezu Kli 'na -lebhelebhenyɔ yɔ, "ɛ 'Denaade ne za. 'A bhubhɔ -se 'kwɛme "kɛ -ame "tamale -se 'e 'cɛ no -wɛ.

Bhɛleweli

²¹ 'E 'yɔbhɔ -gbɔ 'anye 'lelee, 'a yibhlele- -ye 'e -ko "ɛ mɛne "ku "ne -ye 'e no -wɛ. Tisike, -ame "nɔwli, 'neɛ 'tito, -ɔ lɔbhɔ 'dletɛleɛ "me Anyinɛnyɔ "ku ne, yi 'anye 'de 'klekle -sɛle.

²² -Dudu 'ye 'e lebhelo -lɔ 'anyɛɛ moɔ -se 'a "kɛ -anyɛɛ -kosɛ yibhlele-, -se 'ɛ "kɛ 'anye 'kwɛme "tamalea-.

²³ To Lagɔ "ne Anyinɛnyɔ Zezu Kli -nyɛ "nowlia "ne "nɔyoa 'klecɛ 'wɔ "kuwɛtɛ, -waleɛ "ne 'dlekukɛleɛ!

²⁴ Lagɔ "pɔ 'nyakpa 'klekle -wa -wa Anyinɛnyɔ Zezu Kli -wɛ 'ŋu, -waleɛ 'na -ɛ "ne -bhiɛ lɛ "ku -wɛ "me!