Efɛzenya 5 - Nouveau Testament bété de Gagnoa

'A 'ko -zle "ku

¹ Lagɔ 'na -wawayua 'ye 'a -noɔ za, 'a 'didalo.

² 'A -kɛle 'ŋwɛnɛ "me, Klise 'nasɛ: 'Ɔ -wamale -anye, "ne -ɔ 'bhale- 'ɔnɛɛ zikpɛ "me 'anyɛɛ za, sɛgbɛɛ 'nyɛnyɛ -bɛɛ' "ne bɔbɔle -bɛɛ' -ɛnɛɛ 'ŋoni -le lɛ Lagɔ 'ŋwɛnɛ "ku ne.

³ Lagɔ 'bhe- -lɔ 'anye za, 'anyɛɛ moɔ 'wa te -la weli 'na -bedi 'no, sɛgbɛɛ 'wiyliɛ, "tutuliɛ "ne -kosɛ -nyɛnye 'klekle "ne gwlɛplɛɛ.

⁴ 'Ɛ "ne 'nɛne -se 'a "kɛ weli 'na -ɛ -le 'zu "ku -wɛ bhulɛ, 'kpetekli 'na bhulɛbhulɛ, "ne weli -nyɛnye. -Mɔ, 'a "kɛ bhulɛ ne, 'ɛ "zo Lagɔ 'na 'bhɛlebhɛleɛ.

⁵ -Ye 'a "kɛ yibhlele- ne lɛ: 'Wiylinyɔ, "tutulinyɔ "ne gwlɛplɛnyɔ, "ne 'bhɛle- "ne 'wa "kɛ Klise -nyɛ Lagɔ "bhaa 'na -klɔgbɔzikpɛ "me -plɛ -me. "Naa-, -e kɛ no -gbɔ -e "kɛ -eyi 'dle "me 'gugwɔle ne, 'ɛ -ko sɛgbɛɛ "fu 'na Lagɔ -wɛ 'wɔ 'ye -e bɔbɔ.

⁶ 'Nyɔkpɔ te 'ce 'anye bhulɛweli -ɛ "ne -bɛɛ' "me -ko -wɛ "me ylo nole. 'Ɛwɛ 'klekle za, Lagɔ 'pɔle- -lɔ -wa 'sɛ 'ɔnɛɛ 'plome -zo -lo -wɛ 'kɛle yɔko.

⁷ 'A te -kɛ 'wanɛɛ sɛ "zo "me!

⁸ 'Diɛɛ, -watɔ 'na dɛku, 'a -ko 'awɔ titiɛ "me, -mɔ, -dɛmeda, Anyinɛnyɔ "bhaa "ne 'a -kole -lɔ "ku, zaa, zle "ku 'ye 'a -ko -lɔ, 'a 'slu 'ayi zle "ku 'na yua 'nasɛ.

⁹ Zle 'nɛme -lɔ "nɛnekoɛ, "meŋwinɛleɛ, "ne gbɛklɛklɛ.

¹⁰ 'A -tɛle -ɛ 'nɛne Anyinɛnyɔ -gɛ -wɛ 'siɛ.

¹¹ Nonoli -ɛ -ko titiɛ "me -wɛ, 'ɛ "ne "tlo -la 'bhi 'na "namanɔ. Zaa, 'a te 'ɛyi -wɛ 'na 'didi "me 'ko me. -Wa no -wɛ, 'a -soa zɔ!

¹² 'Nyakpa -wɛ 'na -ye 'wa no 'diɛɛ "me -wɛ, 'ɛnɛɛ bhulɛbhulɛ -le 'zu "ku.

¹³ 'Ɛ -ko 'ɛ -soɔ -mɔ -sɔɔdɛku 'wa sɛ -ye 'wa no zɔ -wɛ ne, 'wanɛɛ nonoli zle "ku 'ye 'ɛ yi -lɔ.

¹⁴ "Naa-, -ɛ 'wlo zɔ 'klekle -wɛ, zle "ku 'ye 'ɛ yi -lɔ, 'ɛza 'wa no -lɔ nɛɛ: Glɔ! -Eyi -mɔ 'ŋɔŋo- -wɛ. "Sɔ "ku -glukonya 'glɛme, -se Klise "kɛ -eyi 'ɔnɛɛ zle "ku -lea.

¹⁵ 'A 'luɔle- -kɛ 'anyɛɛ 'nɔŋosɛ "ku, -mɔ, 'a te -kɛ 'ayi -slu sɛgbɛɛ -wa "ne "nɛ, 'a -slu "kɛ 'ayi 'ylimeyamalenya 'na sɛku.

¹⁶ 'Lagɔ 'na "tɛnye -ye 'ɔ 'nyɛ 'anye -wɛ 'a nole -li 'na -li "me. "Naa-, "tɛnye 'na -ye -a -ko "me ne, "tɛnye 'na "nyɛnye yɛ -lɔ.

¹⁷ Zaa, 'a te "kɛ -ko sɛgbɛɛ -wa "ne lɛ "nɛ-, -mɔ, Anyinɛnyɔ 'na -ye 'ɔ 'yɔbhɔ -wɛ, 'a 'no "me.

¹⁸ 'A te duvɛ 'nɔmɔ kpɛnyee: Duvɛ, 'nyakpa 'ye 'ɛ bhlia -lɔ 'kwlɛ. -Mɔ, Zuzu Wlewle 'yiɛ- 'anye "ku -blɛblɛ.

¹⁹ 'A bhulɛ 'gɔme Some "me, Lagɔ 'na lo, Lagɔ 'na zozo lo -ɛ 'bhale Zuzu Wlewle "me -wɛ, 'a 'dile Anyinɛnyɔ lo keyi -se 'a 'kwɔ 'ŋlu 'anyɛɛ 'dle 'klekle "me.

²⁰ 'A 'bhɛle To Lagɔ -godogodo, "ne -li 'klekle za. Anyinɛnyɔ Zezu Kli 'na 'tɔ "me.

'Ŋwenea -nyɛ 'wa "luwlia "bhaa

²¹ 'A "zozole 'plome -se -a "zo Klise 'plome -wɛ.

²² 'Ŋwenea 'nye 'a 'kwlialea- 'ayi "ku 'a "luwlia 'yliku -se 'a 'kwlialea 'ayi "ku Anyinɛnyɔ 'yliku -wɛ.

²³ "Naa-, 'widi -noɔ -lɔ 'ɔnɛɛ 'ŋɔnɔ 'na "cifi yɔ. -See Klise -noɔ Lagɔgligbɛ 'na "cifi yɔ -wɛ, Klise -noɔ -lɔ Lagɔgligbɛ -ɛ -noɔ 'ɔnɛɛ ku yɛ -wɛ 'na 'fuɔnyɔ yɔ.

²⁴ -See Lagɔgligbɛ "zo Klise 'plome -sɔbhɔ 'ye 'ŋwenea "kɛ -lɔ -li 'klekle "me, 'wa "luwlia 'plome "zo me.

²⁵ 'Widia 'nye, 'a wamale 'anyɛɛ 'ŋwenea -see Klise -wa 'ɔnɛɛ Lagɔgligbɛ, "ne 'ɔ 'bhale- 'ɔnɛɛ zikpɛ "me 'ɛnɛɛ za -wɛ,

²⁶ -se 'ɛ "kɛ 'wlewle -ko: 'Ɔ zoɛ 'wlele 'ŋu "ne bhulɛweli "me.

²⁷ 'Ɔ 'yɔbhɔ -gbɔ 'ɔnɛɛ Lagɔgligbɛ 'ɛ me 'ŋlu 'ɔyi 'yliku, 'ɛ te 'fe -kɛle, -se 'ɛ te 'nyoɔ-, 'ɛ 'te slowli kɛle-. 'Ɔ 'yɔbhɔ -gbɔ 'ɛ ko 'wlewle -se 'ɛ te 'nuɔsɔbhɔledɛ kɛle- gou.

²⁸ -Soɔ 'ye 'widi "kɛ -lɔ 'ɔnɛɛ 'ŋɔnɔ wamale- sɛgbɛɛ 'ɔyigɛsɛ 'na ku. -Ɔ -wa 'ɔnɛɛ 'ŋɔnɔ -wɛ, 'ɔyigɛsɛ 'ye 'ɔ -wa -lɔ.

²⁹ 'Bhɔ, 'nyɔkpɔ -na 'ce -zɛ 'ɔyigɛsɛ 'na ku 'gble-, -mɔ, 'ɔ liɛ, "ne 'ɔ -su 'tee, -see Klise sɛ- 'ɔnɛɛ -gligbɛ za -wɛ.

³⁰ -Ɔkɔkokɔko "ne bhɔ 'ɛ Klise 'na ku -wɛ 'na 'cibhɛ yɔ? Lagɔbɔgo "me 'na -ye 'wa zɛle "me ne lɛ:

³¹ «'Ɛza, 'nyɔkpɔ "kɛ -lɔ 'ɔ To -nyɛ 'ɔ "nɔ "bhaa yɔko 'bha-, "ne 'ɔ "nɔŋɔ "bhaa -wa "kɛ -lɔ zajizaji 'gli "ne 'wayi "sɔ "kɛ -lɔ 'nyɔkpɔ -bholo -kpee "zo.»

³² "Ɛ -ɛ 'nuna 'dleku 'na weli ne 'kpɔ, -mɔ, -ame, 'e bhulɛle 'anye nɛɛ Klise "ne Lagɔgligbɛ 'ye 'wa 'ga -lɔ.

³³ -Soɔ 'ye 'ɛ -ko -me 'lelee -lɔ 'anyɛɛ dɛku: -Ɔkɔkokɔko yi 'ɔnɛɛ 'ŋɔnɔ wamale- -se 'ɔ -wa 'ɔyigɛsɛ 'ɔyi -wɛ "ne 'ŋɔnɔ yi 'ɔnɛɛ 'widi 'plome "zo.