Efɛzenya 4 - Nouveau Testament bété de Gagnoa

Zuzu Wlewle "zoa- -anye 'nyɔkpɔ -bholo

¹ -Ye 'e 'yɔbhɔle 'anye lo "ne 'e piɛle "ku ne lɛ, -ame 'mɔɔ -ko -jiɛ "me Anyinɛnyɔ za -wɛ: Anyinɛnyɔ 'na 'laweli -ye 'a 'no- "me -wɛ, 'a 'nɔŋo "ku.

² 'A 'kwliale- 'ayi "ku, 'a wɔtɔ- 'dle, -se -a 'piɛ "bhle 'dle, 'a -sluslule 'ŋwɛnɛsɛ.

³ 'A 'tɛle -godogodo "kukoleɛ 'siɛ Zuzu Wlewle "me, -ɔ "zoa lɛ 'anye -bholo, "ne 'ɔ 'nyɛ -lɔ 'anye "kuwɛtɛ.

⁴ Ku -yle -bholo -kpee, "ne Zuzu Wlewle -yle -bholo -kpee. Lagɔ la- -me 'lelee 'anye 'dletɛleɛ -bholo -kpee "ku.

⁵ Anyinɛnyɔ -yle -bholo -kpee, 'dlekukɛleɛ -yle -bholo -kpee, batɛme -yle -bholo -kpee.

⁶ Lagɔ -yle -bholo -kpee, "ne 'ɔ -noɔ -lɔ 'nyakpa 'klekle 'wa To yɔ, "ne 'ɔ zi -li 'klekle "ku. 'Ɔ no 'loa -li 'klekle "me, "ne 'ɔ -koa "me 'klekle.

⁷ Lagɔ -no -anye -li 'na -li 'wli, -mɔ, Klise wɔkɔ -ɔkɔkokɔko -nɛ.

⁸ Lagɔbɔgɔ "me, sɛ ne 'wa lɛ -lɔ nɛɛ: -Sɔɔdɛku 'ɔ 'gblɛ "nɔgɔ -didigba "me -wɛ, 'ɔ -kɔme -jiɛnya, 'ɔ -dlilea 'nyakpa -li.

⁹ 'Ɔ 'gblɛ. -Se 'ɛ sɛ bhɔ zɔ? 'Ɔ nɛ "kɛ 'gblɛ -wɛ, Klise -plɛ dodo 'na 'mene "bhuɔ.

¹⁰ -Ɔ -kwli -wɛ, 'ɔ 'gblɛ- -me 'lelee -lɔ, "ne 'ɔ yi -lɔ "nɔgɔ yɔko "me 'ple, -soɔ 'ye 'ɔ -ŋwɛne -lɔ -glɔ 'klekle "ku.

¹¹ -Ye Klise -nyɛ -wɛ ne lɛ: -Bedia "zo- "kɔlepɔnya, "guɔkwɔmenya, "ne 'Denaade 'na -sɛnya. 'Dlekukɛlenya 'na 'yukugɛlenya, "ne Lagɔweli 'na -sloanya.

¹² "Ɛ 'nyɛnyɛ -bɛɛ' -wɛ "me, Klise 'yɔbhɔ -gbɔ 'ɔ "kɛ -wa -noɔ Lagɔ -noa 'waa -wɛ -sloa. 'Ɛ -kɛ -soɔ -ko, 'wa "kɛ 'klecɛ libhɔ no -se Lagɔgligbɛ -ɛ -noɔ Klise -nɛ yɛ -wɛ "kɛ 'yuku "me.

¹³ Zaa, 'gɔme, -a yi 'ce 'dlekukɛleɛ -bhele, "ne Lagɔ Yowli 'na yibhleleɛ -bhele -yle 'je 'je. 'Ɛ kɛ 'bhiɛ -ka me ne, -a yi 'klecɛnya "yitia "zo, "ne -a yi Klise 'na -dee 'ɔ -gɛ -wɛ -ylɛ.

¹⁴ -A -ka -la nyeanyea -yua "me yilile-. 'A -ka -la gɔlo 'tekeyi -ye jinyɛ 'na -gbɔkɔle 'sile -moɔ 'klekle -wɛ 'wlole. 'Dlepɔsɛ -gbeyi -ka -la -anye "moɔ 'klekle kɔme sɛgbɛɛ 'pepe glɛ gɔlo "bhuɛyi 'kwlɛ. 'Nyakpa -ka -la -anye 'wanɛɛ 'yo -wɛ 'wɔ "me wlɛle.

¹⁵ -Mɔ, -a kɛ gbɛklɛklɛ bhulɛ -waleɛ "me ne, -a yi -li 'klekle "me 'kpɔmale Klise 'nasɛ, 'ɔyi -ɔ -noɔ ku 'na 'wli yɔ -wɛ za.

¹⁶ Klise za, "ɛ ku -wɛ 'klekle -glɛglɛle -lɔ "ne 'ɛ "zo -lɔ -bholo. 'Jeleadɛme 'na 'gbagbo gbɔ -lɔ "ne "ɛ ku "zo -lɔ -bholo, "ne "ɛ ku 'na -cibhɛ -bholo kɛ 'ɛnɛɛ libhɔ no ne, "ɛ ku 'kpɔmale "ne -waleɛ "me 'ɛ me -lɔ 'yuku.

'A ko zikpɛ -lele Klise "me "ku

¹⁷ 'Ɛnɛɛ za, 'e bhulɛle lɛ 'anye -ɛne, "ne 'e 'totole -lɔ lɔbhɔ "me Anyinɛnyɔ 'na 'tɔ "me: 'A te 'ayi -slu sɛgbɛɛ -wa "ne "zo Lagɔ -wɛ 'nasɛ. 'Wanɛɛ 'dlepɔsɛ "ne -nɛmoa -bɛɛ' "ku.

¹⁸ 'Wa "ne 'no -ɛ -ko gbɛklɛklɛ -wɛ "me, "ne 'wa "ne Lagɔ 'na zikpɛ -ye 'ɔ 'nyɛ -wɛ "me -ko -me. "Naa-, 'wa "ne -yi. Sɛko -wɛ, 'wanɛɛ 'dle 'gbɔ- "ku zɛ.

¹⁹ 'Wa "ne -la -ɛ 'nɛne, "ne -ɛ "ne 'nɛne -wɛ -yi, "ne 'wa -su -lɔ 'wayi -se 'wa 'yɔbhɔ -wɛ. 'Wi 'na libhɔ 'wa -plɛ -lɔ. "Ne 'wa no 'ce -lɔ -li 'na -ɛ "ne 'wlele -ko -wɛ "ne 'wa "ne 'diɔle.

²⁰ 'Anye, -soɔ 'ye 'wa "ne 'anye Klise 'na yibhleleɛ -sloa.

²¹ 'Ɔnɛɛ "ku 'na weli 'wa -bhulɛle bhɔ 'diɛɛ 'anye? -Se 'a -noɔ 'klecɛnya 'waa -wɛ za, 'wa -sloa -lɔ 'anye gbɛklɛklɛ -ɛ -ko Zezu "me -wɛ

²² Zaa, 'a yi 'anyɛɛ -watɔ 'na zikpɛ -ce 'yi 'tale-. -Watɔ -ce, 'a -wa nɛ 'dlepɔsɛ -nyɛnye -ɛ no ylo, "ne 'ɛ lɔbhɔ nɛ 'anye "ku -wɛ. Zaa, -se 'a -ko 'awɔ -watɔ -ce, 'a 'tale -sɔbhɔ 'yi sɛgbɛɛ "koti -gɔgɔ.

²³ 'A "no "ɛ -li -wɛ 'wɔ sɛ -lele "me, Lagɔ Zuzu 'na -se 'ɛ 'yɔbhɔ -wɛ.

²⁴ 'A "zo 'nyɔkpɔ -lele sɛgbɛɛ 'koti -lele 'ye 'a -pla "me. "Ɛ 'nyɔkpɔ -lele ne 'wlɔ -see Lagɔ 'yɔbhɔ -wɛ. Gbɛklɛklɛ zoɔ "me 'ŋwinɛlenyɔ "ne 'wlewle.

²⁵ Zaa, 'a te -ka -la 'yo 'wlɛ. -Ɔ 'kɔkokɔko bhulɛle -kɛ -la 'ɔluyu gbɛklɛklɛ, sɛko -wɛ, ku -bholo -ye 'a -glɛ -lɔ 'glɛ 'klekle.

²⁶ 'A kɛ 'kɛle "pɔ ne, 'a te 'nyinyonoli no. -Bhle ylo 'na -mlɛ bhli- 'anyɛɛ kɛle bhiɛ-.

²⁷ 'A te Sata 'na bhulɛ 'tekeyi 'ayi "me tle-.

²⁸ -Ɔ 'yli nɛ 'wi -wɛ te kɛ -la 'wi 'yli, 'ɔyi 'ye 'ɔ "kɛ -lɔ kɔ gwele, "ne 'ɔ "kɛ -lɔ 'ɔyigɛsɛ 'na libhɔ no 'tee. 'Ɛ kɛ -soɔ -ko, 'ɔ yi 'ce 'nyɔkpɔ 'na -ɔ 'tɛle 'kwɛle-kwɛleɛ 'siɛ -wɛ "ku yi.

²⁹ Weli -nyɛnye 'na yɛ -bholo te -kɛ -la 'anye 'nu 'bhale-. 'A bhulɛ weli 'na -ɛ -kɛ bhulɛsɛ, "ne 'ɛ "kɛ -bedia kwɛle-, "ne 'wa "kɛ 'dlekukɛleɛ "me 'kpɔmale -wɛ, "ne 'ɛ no -wa -fo 'anye 'yukwli -li 'na -li 'wli -wɛ.

³⁰ Lagɔ "zo- 'anye 'ɔnɛɛ Zuzu Wlewle 'na 'be "klo, zaa, 'a te -kɛ "ɛ Zuzu Wlewle ne 'dle 'nuɔ 'yiɛ. "Naa-, 'ɔyi, 'ɔ 'nyɛ -lɔ 'anye 'dlekutamaleɛ -gbɔ 'yli -bholo "me, Lagɔ yi 'ce 'anye 'nyinyonoli 'wlime -sɛ gou.

³¹ 'A te "nyɛnye -ye 'wa -no 'anye -wɛ 'dlezɔ kulɛle-, "klo nyɛneɛ, 'kɛle, "mekpɛɛ, 'yliyliɛ. "Nyɛnye 'na -se 'ɛ "mɔ -le "ne -se 'ɛ "kɛ -le, 'a 'ylialea- 'ayi "guɔ 'klekle.

³² 'A ko 'nɛne -ɔ 'kɔkokɔko za, 'a -slu 'dlewɔtɛ. 'A "taletale 'kɛle yi, -see Lagɔ 'tale- 'anyɛɛ 'kɛle yi Klise "me -wɛ.