Efɛzenya 3 - Nouveau Testament bété de Gagnoa

Pɔle bhulɛ Klise 'na -ɛ -nuna 'dleku 'na weli

¹ -Ame, Pɔle, Zezu Kli 'na -jiɛnyɔ 'ye 'e -noɔ -lɔ, 'anye -wa "ne Zufonya 'waa -wɛ 'na 'ylime.

² 'Diɛɛ, 'a 'no- "me, libhɔ -ye Lagɔ 'na 'dle -wɔtɔ -za, 'ɔ no -gbɔ 'e no 'anyɛɛ za, -se -ye 'ɔ no -gbɔ -ɛ "kɛ -noɔ -wɛ "kɛ 'yli 'wlole-.

³ Lagɔ -vulu 'na 'yli "ku -se 'a "kɛ 'ɔnɛɛ -ye 'ɔ "kɛ nɛ no "ne 'ɛ -ko 'diɛɛ "me -wɛ yibhlele-. 'Ɛyi 'ye 'e -bhulɛle -lɔ 'anye 'tekeyi.

⁴ 'A kɛ 'neɛ "bɔgo ne "me -zɛle ne, 'a 'yi 'ylime 'ye, -se 'e -yi -ye 'ɔ "kɛ nɛ no "ne 'ɛ -ko 'diɛɛ "me "ne 'ɛ -noɔ Klise 'na "ku 'na weli yɛ -wɛ yibhlele-.

⁵ -Ɛ -kɛ nɛ -noɔ "ne 'ɛ -ko -diɛɛ "me ne, Lagɔ "ne 'awɔ -a 'to 'wa 'to 'wɔ 'ylime -tua. -Mɔ, -zeka, 'ɔ -tua -da 'ɔnɛɛ Zuzu "me 'ɔnɛɛ "kɔlepɔnya 'wlewlea -nyɛ "guɔkwɔmenya 'wɔ "bhaa 'ylime.

⁶ 'Denaade za, -wa "ne zufonya 'waa -wɛ -nyɛ zufonya "bhaa 'dlile -li "bhle 'gɔme Klise 'na "ku-koleɛ "me. Ku -bholo 'wa "zo- -da -lɔ, Lagɔ 'na weli -ye 'ɔ -plele Zezu Kli "me -wɛ, 'wa -ko -me 'ɛnɛɛ didi "me.

⁷ Lagɔ 'na "nɛne -ko -za, 'ɔ -gbɔ "ne 'e "zo- "ɛ 'Denaade -wɛ 'na "kulɔbhɔnyɔ. 'Ɔnɛɛ nonoli 'na 'bhɛloɛ za yɛ -me -lɔ -tiaa.

⁸ -Ame Pɔle, 'mɔɔ -noɔ -lɔ 'klecɛnya 'klekle 'na 'glɛme 'na yu yɔ. -Mɔ 'ɛ -ko "ɛ -soɔ "ne 'e -yle lɛ -jɔlo ne: 'E "kɛ -wa "ne zufonya 'waa -wɛ Klise 'na -klɔgbɔ -ɛ "ne "nenidɛ -kɛ -wɛ 'na 'de -sɛle.

⁹ 'E -yle -me 'lelee -jɔlo -se 'e "kɛ -gbɛklɛklɛ 'nyakpa 'klekle 'sloa, -se Lagɔ 'wlolea 'ɔnɛɛ 'diɛɛ weli 'yli -wɛ. 'Ɔyi, Lagɔ, -ɔ noɔ -li 'klekle 'na 'wlɛnyɔ yɔ -wɛ zizi- 'awɔ 'ɔnɛɛ 'diɛɛ weli 'ɔyi "me -godogodo 'ce.

¹⁰ Zaa -Dɛmeda, Lagɔgligbɛ za, "nɔgɔ "me 'na "cifia "ne -wa -kɛ 'bhɛloɛ -wɛ yi Lagɔ 'na "nanoɛ yibhlele-. "Ɛ "nanoɛ -wɛ -see Lagɔ -sloɛ -wɛ -zu kpɛnyee.

¹¹ -Se Lagɔ -waka nɛ "kle -godogodo yɛ -lɔ. -Se 'ɔ -waka -wɛ, sɔbhɔ 'ye 'ɛ 'wlole- -lɔ 'yli Anyinɛnyɔ Zezu Kli "me.

¹² Sɛko -wɛ, Klise "bhaa -a -kole "ku "ne -a -kɔ 'dleku. Zaa, -a yele- kɔ -se -a "kɛ Lagɔ yɔko "nyiɔ 'dlekukɛleɛ "me.

¹³ 'Ɛza 'e bhubhɔ -lɔ 'anye: -Se 'e 'gbape 'anyɛɛ za -wɛ 'te 'ce 'anye 'kwɛme 'yolia-, "ɛ 'gbapeɛ ne nyɛ -lɔ 'anye 'diɛɛ 'na 'ŋlumeɛ.

Klise 'na -waleɛ

¹⁴ 'Ɛza, To Lagɔ 'yliku, 'e 'pɔ -lɔ -kokomini.

¹⁵ 'Ɔnɛɛ 'ylime 'ye -gligbɛ 'klekle -yle -lɔ 'tɔ "nɔgɔ "me "ne dodo ne "ku.

¹⁶ 'E bhubhɔ -se 'ɔ "kɛ 'anye 'kwɛme 'tamalea. 'Ɔnɛɛ Zuzu za, 'ɔnɛɛ 'ŋlumeɛ 'kpɔ kpɛnyee zɛ. 'Ɛ -kɛ sɔbhɔ -ko ne, 'a yi 'ce 'kwɛmetamale -klecɛnya "zo,

¹⁷ Klise 'ko 'anye 'dlezɔ 'dlekukɛleɛ "me! 'E 'yɔbhɔ -gbɔ 'a mi -kpulu -se 'a kɛlekɛlele kɔ -se 'anyɛɛ -waleɛ "tamale- "me.

¹⁸ Sɔbhɔ za, 'a 'bhɛle -se 'a "kɛ Klise 'na -waleɛ 'na -se 'ɛ -le "klo, -se 'ɛ tlo, -se 'ɛ -to "ku "ne -se 'ɛ tlo "me -wɛ "me 'no 'wlewlea 'klekle "bhaa.

¹⁹ 'A yi 'ce Klise 'na -waleɛ, -ɛ -ple -li 'klekle -ye 'wa "kɛ yibhlele- -wɛ yɔko "me, yibhlele-. 'A yi 'ce Lagɔ 'na zikpɛ 'klekle -yle, "ne 'ɔ yi 'ce 'anye "me 'glile- gou.

²⁰ Lagɔ nole -anye libhɔ "me 'ɔnɛɛ 'bhɛloɛ "me. "Ne -a "kɔ -bɛɛ' -zlɛ, 'ɔ 'bhɛle 'ɔ 'cɛ lɔbhɔ 'plea! 'Ɔnɛɛ 'bhɛloɛ ple- wɔkɔsɛ 'klekle yɔko "me!

²¹ 'Ɔ 'bhe- -lɔ 'ŋlumeɛ Lagɔgligbɛ "me, "ne Zezu Kli "me. "Tenye 'klekle "me "ne -godogodo 'na dɛ! Amɛn!