Efɛzenya 2 - Nouveau Testament bété de Gagnoa

-A -nyɛ Zezu Kli "bhaa, Lagɔ -sɛ -anye glu

¹ -Watɔ -ce, 'a "ku- 'awɔ 'anyɛɛ "nyɛnye za, "ne -anyɛɛ 'nyinyonoli za.

² 'A -ko 'awɔ 'nyinyonoli "me -sɔɔdɛku 'a -gɛlele 'awɔ dodo ne "ku 'na kosɛ -wɛ. 'A "zo 'awɔ zuzu -nyɛnyea 'na "cifi -ɔ -ko dodo -nyɛ "nɔgɔ "bhaa 'na -jijɛku -wɛ 'plome. "Ɛ "cifi -wɛ, Sata, 'ɔɔ -ko -lɔ -dɛme 'na 'nyakpa -wa "ne "zo Lagɔ 'plome -wɛ 'na zikpɛ "me.

³ 'Watɔ -ce, -anye 'lelee, -a ko -me 'awɔ "ɛ 'nyakpa -wɛ 'glɛme, -sɔɔdɛku -a -gɛlele 'awɔ -anyɛɛ 'dlepɔsɛ -nyɛnye -wɛ. -A "zo 'awɔ -anyɛɛ -kosɛ -nyɛ 'dlepɔsɛ -nyɛnye -wɛ "bhaa 'plome. "Ɛ -anyɛɛ 'nyɔkpɔ -kosɛ 'na 'ylime, Lagɔ yi nɛ -anye 'kɛle yɔko 'pɔle -wawɛ 'nasɛ.

⁴ -Mɔ, Lagɔ 'na "nyɛzedlekɛleɛ tlo- "me, "ne 'ɔ -kɛ -anyɛɛ za 'ŋwɛnɛ "yitɛ "me.

⁵ 'Ɛza, -anye -wa "ku- 'awɔ -anyɛɛ 'nyinyonoli 'na gbo "me -wɛ, Klise "bhaa 'na "kukoleɛ "me, 'ɔ 'je- -anye zikpɛ kɔ. 'Diɛɛ, 'a 'po- Lagɔ 'na "nɛneko 'ylime.

⁶ -A -nyɛ Klise Zezu "bhaa, 'ɔ 'sɛ -anye -glukonya 'glɛme "ne 'ɔyi "bhaa 'lelee 'ɔ yi -lɔ -anye "nɔgɔ "me 'jilɛ.

⁷ Sɔbhɔ "ku, 'ye 'ɔ -tua -lɔ -anye 'ɔnɛɛ "nɛnekoɛ 'ylime Klise Zezu "me, Lagɔ 'yɔbhɔ -gbɔ 'ɔ "kɛ -anye 'ɔnɛɛ "nɛnekoɛ -ɛ "ne wɔkɔle -bɛɛ' -kɛ -wɛ 'ylime -tua -godogodo 'na dɛ.

⁸ "Naa-, -a -yle 'popoɛ Lagɔ 'na "nɛneko 'ylime, 'dlekukɛleɛ -ko 'anye "me zɛ. -Mɔ, 'anye 'ye 'ɛ 'na -kɛ "me 'bhale-, Lagɔ 'je -lɔ 'anye "ɛ 'popoɛ -wɛ kɔ.

⁹ "Ɛ 'popoɛ -wɛ 'anyɛɛ libhɔ 'ye 'ɛ 'na -kɛ "me 'bhale-, zaa, 'nyɔkpɔ te -kɛ 'ɛza 'ɔyi "ku zia-!

¹⁰ 'Diɛɛ, Lagɔ -no -lɔ -anye, 'ɔ 'wlɛ- -lɔ -anye, Klise Zezu "me, -se -a "kɛ -kɛ -li 'na -li no, -li 'na -li -ye 'ɔ -sɛ 'awɔ lɔbhɔ "kle -wɛ no.

Klise Zezu "me 'ye -a "zo -lɔ -bholo

¹¹ 'A 'luɔle- -kɛ -watɔ 'na -see 'a 'ko nɛ -wɛ "ku! Zufonya "ku 'wa "ne 'anye 'gwɛle-. Zufonya la -lɔ 'anye -wa "ne "ku 'diɔ-, "ne 'wa la -lɔ 'wayi "kudiɔnya, -see 'wa -su "kudiɛ 'na -kpakpɛ -wɛ za.

¹² 'A yibhlele- -kɛ 'sɛ -gbɔ 'ɛ "tɛnye -wɛ "me, 'a 'tlole- 'awɔ -kɛ Klise dɛ, "ne 'a -noɔ 'awɔ -lɔ 'lowlinya 'waa, 'a "ne nɛ Izlayɛleyua 'glɛme -ko; "ne Lagɔ 'na 'mɛnenoɛ -nyɛ 'ɔnɛɛ weli -ye 'ɔ ple -wɛ, 'ɛ "ne nɛ 'anye -nɛ yɛ, 'a -ko nɛ "ɛ dodo ne "ku -wɛ 'a "ne nɛ -bɛɛ' 'dle tɛle- "ne 'a "ne nɛ Lagɔ -yi.

¹³ -Mɔ, -dɛmeda Klise Zezu "me, 'anye -wa tlo nɛ dɛ -wɛ, 'a "ne -la dɛ tlo-, Klise 'na 'dlu 'na 'siɛsluɛ "me.

¹⁴ 'Diɛɛ, 'ɔyi, 'ɔ 'nɛme -lɔ -anye "kuwɛtɛ. Zufonya "ne -wa "ne Zufonya 'waa -wɛ "bhaa, 'ɔ "zoa- 'nyakpa -bholo. -Ye Klise 'je- 'ɔnɛɛ zikpɛ kɔ klowa "klo -wɛ, -pi -ɛ gbɔ nɛ "ne -a "ne nɛ 'ŋwɛnɛ "me -kɛkɛle "ne 'ɛ 'selia -anye 'ylime -wɛ 'ye 'ɔ -wlɛ -lɔ.

¹⁵ "Ne 'ɔ yi -lɔ Moyize 'na -Lɔ -nyɛ 'ɔnɛɛ gbagbɛ "ne gbɛ "bhaa "ku bhia-. "Ne -wa -noɔ Zufonya 'waa "ne -wa "ne Zufonya 'waa -wɛ "bhaa, Klise yua -lɔ 'nyakpa -lelea -bholo "zoa- 'ɔyi 'wɔ "bhaa 'na "kukoleɛ "me. 'Soɔ -ye 'ɔ 'nɛme- -lɔ "kuwɛtɛ.

¹⁶ -Ye 'ɔ "kule- klowa "klo -wɛ, Zufonya "ne -wa "ne Zufonya 'waa -wɛ 'ye 'ɔ "zo- -lɔ 'wli, ku -bholo -kpee "me, "ne 'ɔ yua -lɔ Lagɔ "bhaa gbo 'selia-. -Ye 'ɔ "kule- klowa "klo -wɛ 'ye 'ɔ -bhiale -lɔ gbo -ɛ -gbɔ nɛ "ne 'wa 'gblegblele nɛ -wɛ "ku.

¹⁷ 'Ɔ -yi -se 'ɔ "kɛ 'Denaade -ɛ 'nyɛ "kuwɛtɛ 'anye -wa tlo nɛ 'dɛ, "ne -wa "ne 'lelee dɛtlo -wɛ 'wɔ "bhaa -sɛle.

¹⁸ "Naa-, -a "kɛ Klise "me ylɛle, -e -noɔ Zufonyɔ yɔ 'oo -e "ne Zufonyɔ yɔ 'oo, -a 'bhɛle -se -a "kɛ To Lagɔ yɔko 'nyiɔ Zuzu Wlewle -bholo -kpee "me.

¹⁹ -Ɛwɛza, 'a "ne -da 'lowlinya 'waa, "ne 'a "ne -da pleplenya 'waa. -Mɔ, Lagɔ 'na -gligbɛnya 'ye 'a -ko me -lɔ 'glɛme. Lagɔ 'na -gligbɛnya 'ye 'a -noɔ -lɔ.

²⁰ "Naa-, 'a -ko sɛgbɛɛ -bhudu -ye 'wa 'sɔbhɔle "kɔlepɔnya "ne "guɔkwɔmenya "klo -wɛ 'na -tikpɛ, Zezu Kli 'nabhɛ -ko sɛgbɛɛ 'ɛnɛɛ 'gwegwe "me 'na 'tiyi.

²¹ Klise "bhaa 'na "kukoleɛ "me 'ye "ɛ -bhudu 'na 'tiyi 'klekle "kɛ -lɔ 'kɔkɛkɛle-. "Ne "ɛ -bhudu -wɛ "kɛ -lɔ 'kpɔmale- "ne 'ɛ "kɛ -lɔ "Mebɔbɔlebhudu 'wlewle "zo Anyinɛnyɔ "me.

²² Klise "bhaa 'na "kukoleɛ "me, 'anye 'lelee, 'wa 'sɔbhɔle- -me 'anye "ɛ -bhudu -wɛ. "Ne -wawɛ 'klekle 'wɔ "bhaa, 'a "zo- -lɔ -bhudu -dee Lagɔ -ko -wɛ, Zuzu Wlewle za.