Efɛzenya 1 - Nouveau Testament bété de Gagnoa

Bhɛleweli

¹ -Ame, Pɔle, Zezu Kli 'na "kɔlepɔnyɔ 'ye 'e -noɔ -lɔ, sɛko -wɛ, Lagɔ 'yɛbhɛ -lɔ zɛ. 'Wlewlea "ne -wa tɛle- Zezu Kli 'dle Efɛze -wɛ 'ye 'e 'kɛle lɛ "ku.

² To Lagɔ "ne Anyinɛnyɔ Zezu Kli "pɔ 'anye 'ŋu, -se 'ɔ 'nyɛ 'anye "kuwɛtɛ!

Lagɔ 'nyɛ- -anye 'ŋupɔli 'klekle Klise "me

³ -A 'kwa Lagɔ 'ŋlu Anyinɛnyɔ Zezu Kli 'ɔ To! 'Ɔ 'pɔ- -anye 'ŋu "ne 'ɔ 'nyɛ- -anye Zuzu Wlewle 'na 'ŋupɛɛ 'klekle, "nɔgɔ "me Klise "me.

⁴ -Sɔɔdɛku zikpɛ -namlɛ 'wlɔ- -wɛ, Lagɔ -tɔ -anye Zezu Kli "me, -se -a "kɛ 'wlewle ko, -se 'ɔyi 'yliku, -a te -kɛ 'nuɔsɔbhɔledɛ kɛle-, -se -a "kɛ 'ɔnɛɛ -waleɛ "me ko.

⁵ "Ne -godogodo 'ce, 'ɔ 'yɔbhɔ -gbɔ -a "kɛ 'ɔnɛɛ yua "zo Zezu Kli "me. 'Ɔnɛɛ "nɛnekoɛ "me 'ye 'ɔ 'yɔbhɔle- -lɔ.

⁶ Zaa, 'a -ya 'dile Lagɔ lo keyi, 'ɔnɛɛ -jɔlo "yitɛ -ye 'ɔ 'nyɛ- -anye 'ɔnɛɛ -wawayu "me -wɛ za.

⁷ Klise "me, 'ɔnɛɛ 'dlu -ɛ -slu 'siɛ -wɛ "me, "nyɛnye 'bha- -anye 'wlime "ne -anyɛɛ 'nyinyonoli 'na gbo "taleɔ- 'yi, Lagɔ 'na "nɛnekoɛ 'kpɔ kpɛnyee 'na 'ylime!

⁸ 'Diɛɛ, Lagɔ 'yiɛle- -anye 'ɔnɛɛ "nɛne "ku. 'Ɔ 'nyɛ- -anye "nanoɛ "ne 'ylimeyamaleɛ 'klekle.

⁹ 'Ɔ -tua -anye -ye 'ɔ "kɛ nɛ no "ne 'ɛ -ko -diɛɛ "me -wɛ 'ylime. 'Ɔnɛɛ "nɛnekoɛ "me, 'ɔ -sɛ nɛ lɔbhɔ "kle -ye 'ɔ no -gbɔ 'ɔ "kɛ no -wɛ Klise za.

¹⁰ -Ɛ "kɛ -noɔ -wɛ, Lagɔ 'yɔbhɔ nɛ -gbɔ 'ɔ 'cɛ yli -ye 'ɔ -sɛ lɔbhɔ -wɛ "me nole. 'Ɔ "kɛ -ɛ -ko "nɔgɔ "me 'klekle, "ne dodo ne "ku 'wli 'yabha-, "cifi -bholo -kpee, Klise zɔ.

¹¹ "Ne Klise "me, Lagɔ 'nyɛ- -anyɛɛ 'popoɛ 'na dɛ. "Ne 'ɔ -sɛ -lɔ -anye lɔbhɔ "kle 'ɔnɛɛ -ye 'ɔ 'yɔbhɔ nɛ -gbɔ 'ɔ "kɛ no -wɛ za. 'Ɔ 'ŋunu- "ku -gbɔ 'ɔ yi no "ne 'ɔ 'yɛbhɛ.

¹² Zaa, -a 'dile Lagɔ lo keyi -se -a 'kwɔ 'ŋlu. -Anye -wa "zo- 'tɛtɛnya 'wa "tɛle- Klise 'dle -wɛ!

¹³ Klise "me, 'anye 'lelee, 'a no- -diɛnadiɛ 'na bhulɛweli "me, 'Denaade -ɛ 'fuɔ 'anye -wɛ. 'Ɛ 'ple- lɛ "bhuɔ ne, 'a 'kɛle- Klise 'dleku, "ne Lagɔ yi -lɔ 'anye 'be "klo "zo. 'Ɛ 'be -wɛ, Zuzu Wlewle -ye 'ɔ 'no -gbɔ 'ɔ yi yi -wɛ yɔ -lɔ.

¹⁴ "Ɛ Zuzu Wlewle ne -noɔ -lɔ -li -ye Lagɔ "kɛ -anye kɔ 'je -wɛ 'na tɛtɛnɔ yɔ. -A 'yi 'ce slu -zle -a -kɛ 'ce "nyɛnye "me 'bha gou. Zaa, -a 'dile Lagɔ lo keyi -se -a 'kwɔ 'ŋlu.

Pɔle 'bhubhɔ Efɛze 'na 'klecɛnya za

¹⁵ -Ye 'e 'ciɛ- ne lɛ: 'A -kɛ Anyinɛnyɔ Zezu 'dleku, "ne 'a -wa 'ɔnɛɛ 'nyakpa 'klekle -wa -kɔ 'dleku -wɛ. 'Ɛnɛɛ za, 'e -yibhlele 'awɔ 'bhle sɛ 'ce,

¹⁶ 'e sɔbhɔle- -lɔ 'anyɛɛ 'tɔ 'e kɛ 'bhubhɔ, "ne 'e bhɛle -lɔ Lagɔ, "ne 'e "ne 'diɔle -lɔ 'anyɛɛ za.

¹⁷ 'E 'yɔbhɔle Anyinɛnyɔ Zezu Kli 'na Lagɔ, To -ɔ 'bhe- lɛ 'ŋlumeɛ -gbɔ 'ɔ 'nyɛ 'anye 'ylimeyamaleɛ. -Se 'ɔ "kɛ 'anye Lagɔ 'ylime -tua, -se 'a "kɔ -diɛnadiɛ yibhlele-.

¹⁸ 'Ɔ vulu 'anyɛɛ 'dle "ku -se 'a "kɛ 'ɔnɛɛ zle 'ylime 'ye. 'Ɛ kɛ -soɔ -ko, 'a yi 'ce 'dletɛleɛ -ye 'ɔ 'je 'anye kɔ -sɔɔdɛku, 'ɔ la 'anye -wɛ yibhlele-. 'A yi 'ce -klɔgbɔ-li 'na "namanɔ -ye 'ɔ -sɛ lɔbhɔ -wa -noɔ 'ɔnoa 'waa -wɛ za yibhlele-.

¹⁹ 'A yi 'ce 'ɔnɛɛ 'bhɛloɛ "yitɛ -ye 'ɔ 'pɔ -anye -wa -kɔ 'dleku -wɛ za yibhlele-. "Ɛ 'bhɛloɛ -wɛ 'nabhɛ 'ye Lagɔ -nole -lɔ 'kwɛmetamaleɛ "yitɛ "me.

²⁰ Lagɔ -tua 'ylime Klise "me, -sɔɔdɛku 'ɔ 'wloɔ- gluzɔ -wɛ, "ne 'ɔ 'jilɔ- "nɔgɔ "me 'ɔnɛɛ lilikwlɛ -gbɔsɔ "ku.

²¹ "Cifia 'na 'kamaleɛ 'klekle, "ne 'bhɛloɛ 'klekle, 'kwɛmetamaleɛ 'klekle, 'kamalenya "yitia 'klekle, -soɔ 'ye Klise gblua- -lɔ 'wlime. 'Ɔ 'gbli- -ɛ -le "kle -wɛ 'kwlɛ 'wlime, 'ɛ "ne -kɛ -zeka 'na zikpɛ ne 'ɛyikɔ yɛ, -mɔ, zikpɛ 'na -ɛ "kɛ 'lelee yi -wɛ -ko -me -kɛ 'bhle.

²² 'Diɛɛ, Lagɔ "zo- Klise -li 'klekle bhozɔ, "ne 'ɔ yu -lɔ Lagɔgligbɛ 'na 'yukugɛlenyɔ "zoa-.

²³ Lagɔgligbɛ -noɔ -lɔ Klise 'na ku yɛ. 'Ɛyi "me 'ye Klise -ko -lɔ gou, "ne 'ɔyi, Lagɔ 'yiɛ 'ɔyigɛsɛ 'nabhɛ "ku gou.