Eblenya 9 - Nouveau Testament bété de Gagnoa

Tɛtɛ -mɛnenoɛ

¹ Tɛtɛ 'mɛnenoɛ 'na bɔbɔsɛ -kɛ 'awɔ 'ɛnɛɛ nosɛ "ne 'ɛ -kɛ 'awɔ 'ɛnɛɛ dodo ne "ku 'na bɔbɔledɛ.

² -Ɛwɛza, 'wa sɔbhɔ- 'awɔ -lɔ -gligbɛ. Tɛtɛ -cibhɛ 'wa la 'awɔ -lɔ 'cibhɛ 'wlewle, "bhle 'ye sadelie, "ne 'tabhlɛ -ye Lagɔ 'na bɔbɔle "fɔlɔ -ko "klo -wɛ -ko -lɔ.

³ "Ne 'ylido keyi, -gligbɛ 'na 'cibhɛ 'na -vinɛ yɛ 'awɔ -lɔ. 'Wa lɛ 'cibhɛ 'wlewle -ɛ zi "ku.

⁴ "Ɛ -doɔ, tablɛ -ko 'awɔ lɔbhɔ, -ye 'wa -no -badlɛ "ku, lɔbhɔ 'ye 'wa 'siɛle -lɔ "wle. 'Mɛnenoɛ 'na -gbako -ye 'wa -pla -badlɛ -ko -me 'lelee lɔbhɔ. "Ɛ -gbako -wɛ "me -badlɛ -slɔ -ye 'mane 'yiɛ- "ku "ne Aalɔ 'na -peyi -ɛ 'gba- 'awɔ 'kwɛle -ko -lɔ "bhle. -Ɛ -gbako -wɛ "me 'tiyi -pɛ -ye 'mɛnenoɛ -weli 'kɛleɔ- 'awɔ "klo -wɛ -ko -me "bhle.

⁵ "Nɔgɔzilia -ye 'wa la selubɛ -wɛ 'na 'yuslokpoa -ko "ɛ -gbako -wɛ 'wli, 'waa- gbɔ -lɔ "ne 'wa yibhlele -lɔ sɛ -gbɔ Lagɔ -ko lɔbhɔ. 'Wanɛɛ -kopi 'na zuzu wale 'awɔ -dee bɔbɔnya slu dlu -se 'ɛ "kɛ Lagɔ 'na 'kɛle 'wetia- -wɛ "ku. -Mɔ, -li 'na "me -seselia dɛku -namlɛ ylɛ.

⁶ "Ɛ -gligbɛ -wɛ -kɛ 'cibhi "sɔ, 'ɛnɛɛ tɛtɛ -cibhɛ -wɛ "me 'ye bɔbɔnya -plɛ -lɔ 'yli 'o -yli -se 'wa "kɛ 'wanɛɛ libhɔ no.

⁷ -Mɔ bɔbɔnyɔ "yitɔ, 'ɔyikɔ -plɛ -lɔ -cibhɛ 'na "sɔnɛ -wɛ "me, "ku -bholo -kpee 'ylobɛ "me. 'Ɔ -su dlu, 'ɔ "kɛ bɔbɔ 'ɔyi-gɛsɛ za "ne 'nyakpa -wa "ne 'sɛ -yi 'na "nyɛnye 'ye 'wa -no -wɛ 'na 'nyinyonoli za.

⁸ -Ye Zuzu Wlewle no -gbɔ 'ɔ kɛ -anye 'ylime tua ne lɛ: -Gwe -ɛ me -dee -ko 'wlewle -namlɛ "ku vuluɔ-, -gligbɛ 'na tɛtɛ -nɛ kɛ -mlɛ lɔbhɔ -ko yiɛ ne.

⁹ -Dɛme 'na -se 'ɛ "kɛ ylɛle -wɛ, 'ɔ tua -lɔ -anye 'ylime nɛɛ "nyɛnyɛ -li "ne bɔbɔ -li -ka -wa yi Lagɔ "zo -ka -wɛ 'na 'dle 'wli 'yiɛ.

¹⁰ "Naa- lilɛ, no "ne -wa "kɛ 'wlele -ko 'na bhudɔ-bhudɛ, 'nyakpa 'na -gbagbɛ -fu -ɛ -ko nɛ -mlɛ lɔbhɔ yɛ -lɔ, -se 'ɛnɛɛ kɔ 'bhelia dɛku "kɛ ylɛ.

Klise, bɔbɔnyɔ "yitɔ

¹¹ -Mɔ, Klise, 'ɔyi, -li 'na -li -ɛ -ko lɔbhɔ "kle -wɛ 'na bɔbɔnyɔ "yitɔ "ku 'ye 'ɔ -yi -lɔ. 'Ɔ -ylɛle -gligbɛ -ɛ -zi "ku "ne 'ɛ yiɛ- 'wli -wɛ "me, 'nyakpa 'na 'sɔ "ne sɛbhɛ-, 'ɛ sɛ zɔ nɛɛ 'ɛ "ne zikpɛ ne "ku 'na 'wlɛ 'wlɛ -bɛɛ' yɛ.

¹² Klise -plɛle "ku -bholo -kpee "ɛ -gligbɛ -wɛ "me, 'ɔ -su dlu. -Mɔ, -ɛ "ne 'vɔkɔ -nyɛ -bhliayua "bhaa 'na dlu yɛ, -mɔ, 'ɔyi-gɛsɛ 'na dlu nu 'ye 'ɔ -bɔbɔle -lɔ. 'Ɔ "zo- "ɛ -soɔ -wɛ, 'ɔ -sɛ -anye gbo 'wlime -godogodo 'na dɛ.

¹³ -See -li ylɛle "kle -wɛ, 'wa "mɛne vɔkoa -nyɛ -bhilia "bhaa 'na dlu 'siɛ "ne 'nyakpa -wa -yle gbo -wɛ, 'wa "mɛnoa -bhili ŋugɔ -ye 'wa 'siɛ -wɛ 'na 'tɔtɔ "ku. 'Ɛwɛ pla -lɔ ku 'wlele.

¹⁴ -Ɛwɛ kɛ 'diɛɛ yɛ ne, Klise 'na dlu -kɛ 'bhɛloɛ "ne 'ɛ zi "ku. "Naa-, Zuzu Wlewle "me, Klise -bɔbɔle -lɔ, 'ɔ -plele 'ɔyi Lagɔ kɔ, sɛgbɛɛ bɔbɔ -li -ɛ "ne 'nuɔsɔbhɔledɛ -kɛ -wɛ. 'Ɔɔ "kɛ 'ce -lɔ -anyɛɛ 'dlezɔ -mee -plɛ 'fe -li -nyɛnye 'na nonoɛ "me -wɛ 'wlele "zoa-. Zaa, -a yi -da Lagɔ -ɔ -yɛ 'gbligbli -wɛ "ku lɔbhɔ-.

Dlu -noɔ -lɔ 'mɛnenoɛ 'na 'be 'ye 'ɛ 'tle

¹⁵ -Ɛwɛza, Klise -ko -lɔ 'mɛnenoɛ -lele 'na 'jijeku, weli -lele. 'Ɔ "ku- -se 'ɔ "kɛ 'nyakpa -wa -yle gbo -sɔɔdɛku tɛtɛ -mɛnenoɛ -ko nɛ lɔbhɔ -wɛ 'na 'galu 'di. Zaa, -ye Lagɔ la- -wɛ yi -li 'na -li -nyɔ 'na weli -ye Lagɔ -ple 'awɔ -wɛ -yle.

¹⁶ 'Nyɔkpɔ kɛ weli -tle, "ne 'ɛ kɛ 'kɛleɔ-, 'wa kɛ 'sɛ yibhlele- -gbɔ 'ɔ "ku- ne, 'ye "ɛ weli -wɛ -noɔ -lɔ weli yɛ.

¹⁷ "Naa-, 'nyɔkpɔ -ɔ -bhulɛ weli "ne 'ɛ 'kɛleɔ- -wɛ kɛ "ku- ne, -ye 'ɔ -bhulɛ -wɛ 'tole -lɔ lɔbhɔ. -Mɔ 'ɔ kɛ -namlɛ -yɛ ne, "fu yɛ -lɔ.

¹⁸ -Ɛwɛza, tɛtɛ -mɛnenoɛ -wɛ 'cile- -lɔ dlu "me "ku.

¹⁹ -Glɔnya 'klekle 'yliku, Moyize -zɛle -lɔ gbagbɛ 'klekle "me, sɛko -Lɔbɔgo "me -wɛ. "Ne 'ɔ yi -da -lɔ -bhilia -nyɛ 'vɔkoa "bhaa 'na dlu "ne 'ŋu "ku 'libhi. "Ne 'ɔ yi -lɔ dlu -nyɛ 'ŋu "bhaa -ɛ -bhlebhlele lo -wɛ 'sidɔ -klɛ -nyɛ lokwi -pɛ -zɛle "bhaa "me 'ŋwa, "ne 'ɔ 'yi -lɔ -Lɔbɔgo "ne -glɔnya 'klekle "bhaa "ku 'wale-.

²⁰ "Ne 'ɔ yi -lɔ no -gbɔ: «'Ɛyi ne 'mɛnenoɛ -dlu -ye Lagɔ no -gbɔ 'a "zo 'plome yɛ -lɔ.»

²¹ "Ne "ɛ sɛbhele -wɛ, 'ɔ yi -lɔ dlu -gligbɛ "ne -li 'klekle -ye 'wa nole Lagɔ-libhɔ "me -wɛ "ku 'wale-.

²² -Lɔ "me 'na dɛku, 'ɛyi 'klekle, dlu -wɛ zoɛ- -lɔ 'wlele. -Mɔ, dlu "mɔ 'siɛ 'mɛneɔ- ne, 'nyinyonoli "ne "ku 'titliɔ-.

Klise 'gblɛ- "nɔgɔ "me -anyɛɛ za

²³ Soɔ 'ye 'wa kɛ "nɔgɔ "me 'na -li 'na 'didale 'wlele pla- ne, lɔbhɔ 'na dɛku "nɔgɔ "me 'na -li 'na 'wlelezoɛ 'na bɔbɔli yi "ku zi.

²⁴ "Naa-, Klise "ne se bɔbɔ-bhudu -ye 'nyakpa sɔbhɔ- -wɛ "me -plɛ. "Ɛ soɔ 'na bɔbɔbɔbɔ-bhudu, "nɔgɔ "me -nɛ 'ce 'na 'didale yɛ -lɔ. -Mɔ, "nɔgɔ "me 'nabhɛ 'ye Klise 'gblɛ- -lɔ -se 'ɔ "kɛ -anyɛɛ za -dɛme Lagɔ 'yliku 'sibhɔ.

²⁵ -Se 'ylobɛ yi 'yiɛ -wɛ, bɔbɔnyɔ "yitɔ plɛ -lɔ bɔbɔledɛ "me, dlu -ɛ "ne 'ɔnɛɛ yɛ -wɛ "bhaa. -Mɔ, Klise, 'ɔyi, 'ɔ -plɛ "nɔgɔ "me "ku -bholo, -se 'ɔ "kɛ 'ɔyi Lagɔ bɔbɔle, -se 'ɔ "kɛ 'nyinyonoli 'na gbo bhia.

²⁶ 'Ɛ "mɔ nɛ -soɔ yɛ ne, Klise yi nɛ 'gbape "ku -vu 'na dɛ, -se zikpɛ "mɔ 'awɔ 'wlo-. "Naa-, -dɛmeda, 'bebhiɛle -yli ne "me, Klise -tua 'ɔyi "ku -bholo -kpee 'na dɛ. 'Ɔ "zoa- 'ɔyi bɔbɔle -bɛɛ', -se 'ɔ "kɛ 'nyinyonoli "ku bhia-.

²⁷ 'Nyɔkpɔ "kule "ku -bholo -kpee, "ne Lagɔ "kɔ -lɔ gbo 'bhlele, lɔbhɔ kɛ -ylɛ ne.

²⁸ "Ɛ sɛbhele -wɛ, Klise 'bhale- 'ɔnɛɛ zikpɛ "me "ku -bholo 'na dɛ, -se 'ɔ "kɛ 'nyakpa -kwleyia 'na 'nyinyonoli lɔbhɔ -sɛ. 'Ɔ yi 'ce "kusɔ 'ɔyi 'tua-, 'nyinyonoli 'ye 'ɔ -na -kɛ lɔbhɔ -sɛ -ka yi, -mɔ 'ɔ "kɛ 'wa -wo -wɛ 'fuɔ.