Eblenya 7 - Nouveau Testament bété de Gagnoa

Mɛcisedɛke, -klɔgbɔnyɔ "ne bɔbɔnyɔ

¹ 'Ɛ Mɛcisedɛke ne, Salɛme -du "me 'na -klɔgbɔnyɔ yɔ 'awɔ -lɔ, "ne 'ɔ -noɔ -lɔ Lagɔ -ɔ -zi "ku 'na bɔbɔnyɔ yɔ. 'Ɛ dɛ -wɛ "ku, Ablame 'bha- 'awɔ to -ye 'ɔ -lu -klɔgbɔnya "me -wɛ me, "ne "ɛ Mɛcisedɛke yu -lɔ 'sibhɔle -ka me, "ne 'ɔ yi -lɔ Ablame 'ŋu 'pɔ.

² "Ne Ablame yu -lɔ 'ɔ -gwe -to 'na -li -ye 'ɔ yle 'klekle -wɛ 'na -kogbɔ -nɛ kɔ 'je. Mɛcisedɛke sɛ zɔ nɛɛ: «"Me ŋwinɛle- -klɔgbɔnyɔ.» "Ne "ɛ Mɛcisedɛke -noɔ 'lelee -lɔ Salɛme -du "me 'na -klɔgbɔnyɔ yɔ, 'ɛ -sɛ zɔ nɛɛ: «"Kuwɔtɔ -klɔgbɔnyɔ.»

³ 'Ɔ "ne 'to -kɛ, 'ɔ "ne "nɔ -kɛ, 'ɔ "ne ŋeyi -kɛ, 'ɔ "ne gwɛle -yli -kɛ, "ne 'ɔ "ne "ku -yli -kɛ. 'Ɔ 'wlole- Lagɔ Yowli, bɔbɔnyɔ yɔ -lɔ -godogodo 'na dɛ.

⁴ 'A -gɛ 'yli -see Mɛcisedɛke -ko "klo 'kpɔ "me! -A 'to 'wa 'to 'wɔ, Ablame 'nabhɛ 'jo- -li -ye 'ɔ -yle -togwe -ka -wɛ 'na kogbɔ -nɛ kɔ.

⁵ Moyize 'na -Lɔ -no -lɔ nɛɛ: Levi 'na -gligbɛ "ku 'na bɔbɔnya 'wa 'yɔbhɔle- Izlayɛleyua 'na -ye 'wa -kɛ 'klekle -wɛ 'na kogbɔ -nɛ lo. "Ne 'wa "nowlia 'wɔ 'waa -lɔ, "ne 'wa -noɔ me 'lelee -lɔ Ablame 'na -gligbɛ "ku -noa 'waa.

⁶ "Ne "ɛ Mɛcisedɛke, 'ɔyi, 'ɔ "ne nɛ Levi 'na -gligbɛ "ku -nɔ yɔ. 'Ɛ -ko 'ɛ -soɔ, "ne Ablame yu -lɔ -ye 'ɔ -yle 'awɔ -wɛ 'na kogbɔ -nɛ kɔ 'je. "Ne "ɛ Mɛcisedɛke yi -lɔ -ɔ sa- Lagɔ 'na weli -ye 'ɔ -plelo kɔ -wɛ 'ŋu 'pɔ.

⁷ 'Ɛ "ne -la "sɔ -nyɛ ta yɛ, "yitɔ pɔ- -lɔ yu 'ŋu.

⁸ Bɔbɔnya -ye 'wa 'je -li 'na kogbɔ -nɛ kɔ -wɛ, 'nyakpa 'na -wa "kɛ 'yli -bholo "me "ku 'waa -lɔ. Mɛcisedɛke -yle -me 'lelee "ɛ -li -wɛ 'na kogbɔ -nɛ, -mɔ, 'ɔyi, 'ɔ -yɛ gbligbli 'yiɛ, -see Lagɔ-bɔgɔ lɛ -wɛ.

⁹ Levi 'na -gligbɛ "ku 'na 'nyakpa, 'wa 'je -lɔ "ɛ Izlayɛleyua -li 'na kogbɔ -nɛ kɔ. 'Ɛ -ko sɔbhɔ, "ne 'wa yi no -gbɔ Levi, 'ɔyi 'lelee, 'ɔ -ylɛle Ablame "me, "ne 'ɔ yi -lɔ -lɛpo 'peɛle-.

¹⁰ "Naa-, Ablame, 'ɔ 'to 'ɔ 'to yɔ -lɔ. "Ne 'wa -na nɛ -mlɛ Levi 'na gwɛle -de "zo, -sɔɔdɛku Ablame 'sibhɔle- 'awɔ Mɛcisedɛke -wɛ.

¹¹ Izlayɛle 'na -gligbɛnya 'na -Lɔ "me, Levi 'na -gligbɛ "ku 'na 'nyakpa 'wa -tɔ -lɔ bɔbɔnya "ku. 'Wa -noɔ -lɔ bɔbɔnya 'waa Aalɔ 'nasɛ. -Mɔ, -see 'wa -noɔ bɔbɔnya 'waa -wɛ, 'wanɛɛ libhɔ "ne 'wli 'yiɛ-, zaa, sɔɔbɛɛza, 'wa "kɛ nɛ -da bɔbɔnyɔ 'na -vinɔ -ɔ -ko Mɛcisedɛke 'nasɛ -nɔ -wɛ lɔbhɔ -sɛ? 'Ɛyi -wɛ "ne -bɛɛ' "me -ko!

¹² Zaa, 'wanɛɛ libhɔ -nosɛ "mɔ -la -bhele yɛ ne, -Lɔ yi 'lelee kɔ 'bheliɔ- -me.

¹³ 'Ɛ weli ne 'wɔ, Anyinɛnyɔ 'ye 'ɛ me -lɔ "ku. 'Ɔyi, -gligbɛ 'na -vinɛ "ku -nɔ yɔ -lɔ, "ne "ɛ -gligbɛ ne "ku, 'nyɔkpɔ 'na 'ce -zɛ bɔbɔledɛ 'na libhɔ no.

¹⁴ 'Nyakpa 'klekle -yi -sɛ -gbɔ Anyinɛnyɔ, Zuda 'na -gligbɛ "ku 'wa -gwɛlelo -lɔ. "Ne Moyize 'na -Lɔ "ne "ɛ -gligbɛ -wɛ 'na weli -bhulɛ, -sɔɔdɛku, 'ɔ -bhulɛ bɔbɔnya 'na weli -wɛ.

Zezu, Mɛcisedɛke 'nasɛ 'ɔ -noɔ -lɔ bɔbɔnyɔ yɔ.

¹⁵ -See "ɛ -li -wɛ 'wɔ -ko gbɛklɛklɛ ne lɛ: Bɔbɔnyɔ 'na -vinɔ -yi Mɛcisedɛke 'nasɛ.

¹⁶ 'Ɔ "ne bɔbɔnyɔ yɔ -see -Lɔ no -gbɔ -ɛ ylɛle -wɛ, "ne bɔbɔnya 'na -gligbɛ "ku 'ye 'ɔ -na 'bhale. 'Ɔ "zo- bɔbɔnyɔ, 'bhɛloɛ zikpɛ 'na -ɛ -ka 'ce "kubhiɛ -wɛ "me.

¹⁷ 'Diɛɛ, Lagɔ-bɔgɔ bhulɛ nɛɛ: Bɔbɔnyɔ 'ye -e -noɔ -lɔ -godogodo 'na dɛ Mɛcisedɛke 'nasɛ.

¹⁸ -Lɔ -gɔgɔ "ne bhlia- nɛ 'dle, "ne 'ɛ "ne nɛ -bɛɛ' "me -ko, zaa, 'wa -bhiɛ "ku.

¹⁹ "Naa- Moyize 'na -Lɔ "ne bhi 'na -bhi -tlo. -Mɔ, 'ɛ 'je- -anye 'dletɛleɛ 'na "namanɔ kɔ, "ne 'ɛ 'dletɛleɛ -wɛ "me -ye -a 'nyiɔ -lɔ Lagɔ yɔko.

²⁰ "Ne 'lelee, weli-pleɛ -ko nɛ lɔbhɔ. "Ne 'wayi -wɛ, 'wa "ne weli -ple "ne 'wa "zo- bɔbɔnya.

²¹ -Mɔ, Zezu 'na dɛku, Lagɔ -ple weli -sɔɔdɛku 'ɔ bhulɛlo nɛɛ: Anyinɛnyɔ -ple weli, "ne 'ɔ -ka -la 'ɔnɛɛ weli -wɛ "kusɔ "ku libhile. Bɔbɔnyɔ 'ye -e -noɔ -lɔ -godogodo 'na dɛ.

²² -Ɛwɛza Zezu "zo- -lɔ 'mɛnenoɛ -ɛ -zi "ku -wɛ 'na -jijɛ -su.

²³ -Ɛ gbɔ "ne 'ɛ "ne -bhele yɛ ne lɛ: Levi 'na bɔbɔnya -zu kpɛnyee, sɛko -wɛ, 'kwiɛ "ne 'yɔbhɔ -gbɔ 'wa "zo bɔbɔnya -godogodo 'na dɛ.

²⁴ -Mɔ, Zezu, 'ɔyi, 'ɔ -le -godogodo 'na dɛ, "ne 'nyɔkpɔ 'na -vinɔ -ka 'ce 'ɔnɛɛ 'bhulɛ "me bɔbɔnyɔ "zo.

²⁵ -Ɛwɛza, 'ɔ "kɛ -lɔ -wa 'nyiɔ Lagɔ yɔko -wɛ 'fuɔ -godogodo 'ɔnɛɛ 'kwɛle-kwɛleɛ "me. "Naa-, Zezu -yɛ 'gbligbli -godogodo, 'ɔ yi 'wanɛɛ za Lagɔ bhubhɔ -godogodo.

²⁶ Zezu -noɔ -lɔ bɔbɔnyɔ "yitɔ 'na 'ɔ "kɛ nɛ -anye 'yliku -ko -wɛ yɔ. 'Ɔ -ko 'wlewle, 'ɔ "ne gbo 'wlime -kɛ, "ne 'ɔ "ne 'nyinyonoli 'wlime -kɛ, 'ɔ -ylile 'nyinyonolinonya "guɔ, "ne Lagɔ yu -lɔ "nɔgɔ "ku jilɛ-.

²⁷ Zezu "ne -ko sɛgbɛɛ bɔbɔnya "yitia -wɛ. 'Ɔ -ka -la bɔbɔ zle 'o -zle 'ɔnɛɛ 'nyinyonoli za, "ne 'nyakpa -nɛ za. 'Ɔ bɔbɔle- "ku -bholo 'na dɛ "ne 'ɔ 'bhale- 'ɔnɛɛ zikpɛ "me.

²⁸ Bɔbɔnya "yitia -ye Moyize 'na -Lɔ -sɛ lɔbhɔ -wɛ, 'nyakpa 'waa -lɔ, 'wa "ne "me 'tɛ-. -Mɔ 'ye Lagɔ -sɛ lɔbhɔ 'ɔnɛɛ weli-pleɛ -ɛ 'bhale -Lɔ 'beme -wɛ, 'ɔ Yowli -ɔ 'yiɛ- 'wli -godogodo 'na dɛ yɔ -lɔ.