Eblenya 6 - Nouveau Testament bété de Gagnoa

¹ -Ɛwɛza, -a -tle -ayi 'beme tɛtɛ -sloasɛ -ɛ -noɔ Klise 'na "kukoweli yɛ -wɛ, -a 'nyiɔ 'yuku -se 'a "kɛ "yitia "zo. -A te -kɛ sloaweli 'na -kpulu -wɛ 'tole: Nonoli -ɛ kɔme 'nyɔkpɔ 'kwiɛ "me -wɛ, Lagɔ 'na 'dlekukɛleɛ,

² batɛme -wɛ 'wɔ 'na sloasɛ, sɔ 'na 'wli 'piɛ-, gluzɔwloɛ, "ne 'bebhiɛle -gbobhleleɛ.

³ Zaa, -soɔ -ye -a 'cɛ -lɔ 'sa, Lagɔ 'cɛ "ku 'ŋunu- ne.

⁴ -A wolo 'nyakpa -wa -bhlile "kusɔ 'wanɛɛ zikpɛ -gɔgɔ "me -wɛ "ku: Lagɔ 'na zle -leloa "ku. 'Wa 'ye- "nɔgɔ "me 'na -jɔlo nu "ne 'wa -yle Zuzu Wlewle.

⁵ 'Wa 'ye- Lagɔ 'na weli 'nu 'ɛ -nyɛ zikpɛ -ɛ "kɛ yi -wɛ 'na zɛzɛ "bhaa,

⁶ 'ɛ -ko -sɔbhɔ, "ne 'wa -bhli zɔ, 'nyakpa -ka -la gbɔ "ne 'wa "kɛ "kusɔ kɔ 'bheliɔ-. 'Wanɛɛ dɛku Lagɔ Yowli 'wa -kole -lɔ "kusɔ klowa "klo, "ne 'wa ziɔ -lɔ 'dii 'nyakpa 'yliku.

⁷ -Sɔɔdɛku, dodo -ye 'ŋu lɔbhɔle "klo 'yiɛ -wɛ "kɛ gloglo -li 'kwɛle gba- ne, "ɛ dodo -wɛ yle Lagɔ 'na 'ŋupɛɛ.

⁸ -Mɔ, -kpɛcɛ -nyɛ 'ŋwazɛle "bhaa kɛ lɔbhɔ 'pole ne, sɛne 'wa lɛ -lɔ nɛɛ 'ɛ "ne -bɛɛ' "me -ko, 'wa 'cɛ -lɔ "ku 'bhle "ne 'wa 'cɛ -da -lɔ -kosu "me 'pɔ.

⁹ -A bhulɛ "ɛ -soɔ, -mɔ, -a -kɛle 'lelee 'dleku -gbɔ 'anye "nowlia -ye -a -wa, -gwe 'na "namanɔ 'ye 'a bhli -lɔ -doɔ, -gwe -ɛ 'fuɔ -wɛ yɛ -lɔ.

¹⁰ Lagɔ "ne -ɔ "ne "me ŋwinɛle- yɔ, 'ɔ -ka -ye 'a no -wɛ "ku 'dlu, -see 'a -wɔ -wɛ 'a -tuɔ 'ylime, 'ɛ "ne "ku -dlu -nɛ yɛ. Bhlɛme, 'a -tua 'awɔ "ɛ -waleɛ -wɛ 'ylime -dee 'a lɔbhɔ nɛ -wa -noa Lagɔ -noa 'waa -wɛ "ku, "ne 'a 'no -nazɛ -dɛme 'yiɛ.

¹¹ -Ye -a 'yɔbhɔ cuu -noɔ -lɔ -gbɔ 'anye 'glɛme -ɔkɔkokɔko no -li 'klekle -ye 'a tɛle- 'dle -wɛ, 'kwɛmetamaleɛ "me -se 'ɔ -sɛ 'wli. 'Ɛ kɛ sɔbhɔ -ko ne, -li 'klekle -ye 'a tɛle- 'dle -wɛ yi 'ce 'yli 'wlole.

¹² 'A te -kɛ zɔklɔ "ku, -mɔ, 'a -ko sɛgbɛɛ 'nyakpa 'na -wa -kɛ 'dleku "ne -wa 'piɛ- "bhle 'dle -wɛ. 'Wayi -wɛ -yle -lɔ -li 'na -li 'na weli -ye Lagɔ -ple -wɛ.

Lagɔ -ple weli Ablame kɔ

¹³ -Sɔɔdɛku, Lagɔ -ple weli Ablame kɔ -wɛ, 'ɔ zligbɔle 'ɔyi "ku, "naa- -ɔ 'kpɔ- "ne 'ɔ -zu "ku -wɛ "ne -le zɛ.

¹⁴ 'Ɔ nɛɛ: 'Diɛɛ, 'ɛ "ne "ku -kpɛle -nɛ yɛ, 'e yi 'ce -eyi 'ŋu "pɔ "ne 'e yi 'ce -neɛ' yua 'na yua zimalea- kpɛnyee.

¹⁵ Ablame 'piɛ- "bhle 'dle, "ne -nyɔ 'na weli Lagɔ -plelo kɔ -wɛ 'ɔ 'ye- 'ylime.

¹⁶ 'Nyakpa -gba "kɛ zligbɔ ne, 'nyɔkpɔ 'na -ɔ 'kpɔ- "ne 'ɔ -zua "ku -wɛ -ko -lɔ lɔbhɔ. 'Ɛ kɛ -soɔ -ylɛle ne, -vi weli -ka -la -bhulɔ.

¹⁷ Ablame -nɛ -wɛ, 'ɛ sɛbhele -wɛ yɛ -lɔ. Lagɔ nɛɛ 'ɔ "kɛ 'awɔ Ablame 'na yua 'na yua 'dleku "tamalea-. 'Ɛ yua 'na yua -wɛ "kɛ 'awɔ -lɔ -li -nyɔ 'na weli 'ɔ -ple -wɛ yle, 'ɛza 'ɔ -zligbɔ -lɔ -tiaa.

¹⁸ Welipleɛ "ne zligbɔzligbɛ, -li "sɔ 'na 'ye 'wa -ka kɔ 'bhelia- yɛ -lɔ. Lagɔ -ple weli "ne 'ɔ zligbɔ, zaa 'ɔ "ne 'wlɛ yo. 'Ɛyi -wɛ "tamalea- -lɔ -anye 'kwɛme kpɛnyee, 'ɛza -a 'bha- -lɔ -li 'klekle 'beku -se -a "kɛ 'dletɛleɛ -ye 'ɔ 'je- -anye kɔ -wɛ kɔ 'sa.

¹⁹ "Ɛ 'dletɛleɛ -wɛ 'nyegbea -anye glu sɛgbɛɛ kɔwɛlemale -bɛɛ' -ye 'wa "pɔ jinyɛ "me "ne 'ɛ 'nyegbea bato -wɛ. 'Ɛ 'dletɛleɛ -wɛ gbɔ -lɔ "ne -a "kɛ -lɔ -ɛ 'ylido -wɛ "me ylɛle "ne -a "kɛ -lɔ bɔbɔledɛ 'wlewle plɛ.

²⁰ 'Ɛ -doɔ 'ye Zezu -plɛ -lɔ, 'ɔɔ -gɛ -lɔ -anyɛɛ 'yuku -se 'ɔ "kɛ -anyɛɛ -gwe sɛ, "naa- bɔbɔnyɔ "yitɔ yɔ -lɔ Mɛcisedɛke 'nasɛ.