Eblenya 5 - Nouveau Testament bété de Gagnoa

¹ "Naa-, bɔbɔnyɔ "yitɔ 'nyakpa 'glɛme 'wa 'sɔ -lɔ, 'ɔ "kɛ Lagɔ "ku lɔbhɔ 'wanɛɛ za. -Li 'ye 'wa "nyɛ -wɛ 'ɔ tuɛ Lagɔ, "ne 'ɔ -sɛ bɔbɔli 'nyinyonoli za.

² Bɔbɔnyɔ "yitɔ 'ɔyi 'nabhɛ 'ɔ -kɛ 'kwɛme-yɔleɛ -kwleyi. 'Ɔ 'bhɛle- "ne 'ɔ "kɛ 'wa ne -bɛɛ' -yi "ne -wa 'to 'gbi -wɛ "me 'no.

³ 'Nyɔkpɔ 'ye 'ɔ -noɔ -me -lɔ zɛ, 'ɔyi, 'ɔ yi bɔbɔ 'nyinyonoli za, 'ɛ "ne -kɛ 'nyakpa 'wayikɔ nɛ za yɛ, -mɔ, 'lelee 'ɔyi 'nabhɛ nɛ za.

⁴ 'Nyɔkpɔ -na 'ɔyi bɔbɔnyɔ "yitɔ la. Lagɔ la -lɔ, -se 'ɔ la- Aalɔ -wɛ.

⁵ Klise 'na dɛku, "ɛ sɛbhele -wɛ yɛ -lɔ, 'ɔ "ne 'ɔyigɛsɛ, 'ɔyi bɔbɔnyɔ "yitɔ la-. Lagɔ "me 'ye 'ɛ 'bhale- -lɔ. Lagɔ -no -lɔ nɛɛ: -Ame Yowli 'ye -e -noɔ -lɔ, -Zeka, -ame, 'e "zo- -e 'to.

⁶ Lagɔ yi 'lelee -lɔ no nɛɛ: Bɔbɔnyɔ 'ye -e -noɔ -lɔ -godogodo 'na dɛ Mɛcisedɛke 'nasɛ.

⁷ -Sɔɔdɛku Klise -ko dodo ne "ku -wɛ, 'ɔyi, 'ɔ -bhubhɔ Lagɔ, 'ɔ 'tulo- "me, 'ɔ "kpa- "me "yitɛ "ku "ne miɛ 'kwli- -lɔ. 'Ɔ bhubhɔ Lagɔ -ɔ -kɛ 'bhɛloɛ -se 'ɔ "kɔ nɛ 'kwiɛ 'yli -sɛ -wɛ. "Ne Lagɔ 'no- "me, sɛko -wɛ 'ɔ 'tɛlo- 'dle zɛ.

⁸ Klise Lagɔ Yowli yɔ -lɔ, 'diɛɛ, -mɔ 'ɔ 'ciɛ- 'plomezoɛ 'ɔnɛɛ 'gbapeɛ "me.

⁹ Lagɔ -gbɔ "ne 'ɔnɛɛ libhɔ -sɛ 'wli. Zaa, -dɛmeda, -wa "zo Klise 'plome -wɛ, 'wa yle -lɔ 'ɔyi "me 'popoɛ -ɛ -gwlɛ -godogodo -wɛ.

¹⁰ 'Diɛɛ, Lagɔ "zoɔ- -lɔ bɔbɔnyɔ "yitɔ Mɛlekidɛke 'nasɛ.

'A 'luɔle- 'ayi "ku, 'anyɛɛ 'dlekukɛleɛ "tamale- "me

¹¹ "Ɛ weli -wɛ za, -ye -a "kɛ 'anye bhulɛle -wɛ -zu -kɛ kpɛnyee! -Mɔ, 'ɛnɛɛ zɔsɛ -sɛ 'tɛ- "me. "Naa-, 'anye, weli "kɛ 'anye 'dle "ku me ne, lɔbhɔ gwlɛ "me.

¹² 'Anye, 'anye "kɛ nɛ -la -lɔ -dɛme Lagɔweli 'na -sloanya "yitia "zo, -mɔ, -dee 'wa "kɛ 'anye Lagɔweli 'na "kuciledɛ "me -sloa 'ye 'a -ko -la -lɔ -doɔ. Nyeteŋu 'na -nɔmɔdɛ 'ye 'a -ylɛ -lɔ, 'a "ne -la "ku tamale -lilɛ 'na lili -noa 'waa.

¹³ -Ɔ 'nyɛ -nazɛ nyete -wɛ, yu -lele yɔ -lɔ. 'Ɔ nyɔ -wɛ "ne -ɛ ŋwinɛle- "me -wɛ -yi.

¹⁴ -Mɔ, "yitia, lilɛ 'na -ɛ 'tɛ- "ku -wɛ 'wa li -lɔ, 'wa -yi -bɛɛ' 'nasɛ, 'wanɛɛ 'dlepɔsɛ -sua "ne 'wa ciɛ- -li 'na -ɛ 'nɛne "ne -ɛ "ne 'nɛne -wɛ 'na "me -seselia -sɛ.