Eblenya 4 - Nouveau Testament bété de Gagnoa

¹ -Mɔ, Lagɔ -plele -anye weli kɔ: -A yi 'ce 'ɔnɛɛ nyɔpɔledɛ plɛ, "ne "ɛ weli -ye 'ɔ -ple ne -ko lɔbhɔ yiɛ. Zaa, 'a 'luɔ- -kɛ, "naa-, -anye 'glɛme 'nyɔkpɔ te -kɛ 'dle 'pɔ -gbɔ -zle -fla za 'ɔ -ka "bhle plɛ -me!

² 'Wa -sɛle -anye 'Denaade -see 'wa -sɛle -me -a 'to 'wa 'to 'wɔ, -mɔ, weli -ye 'wa 'no- -wɛ "noa 'awɔ -bɛɛ' -no. -Sɔɔdɛku 'wa 'no- -wɛ, 'wa "ne 'dleku -kɛle.

³ -Anye, -a -kɛle 'dleku, zaa -a 'bhɛle -se -a "kɛ Lagɔ 'na nyɔpɔledɛ -ce -plɛ 'ɛnɛɛ za 'ɔ -bhulɛ -lɔ sɛne nɛɛ: 'Neɛ 'kɛle ne "me, 'e "zo- -biɛ: 'Wa -ka 'ce 'neɛ nyɔpɔledɛ -ye 'e -sɛ lɔbhɔ 'wanɛɛ za -wɛ plɛ "kpɛ! 'Ɔ bhiɛ- lɛ zikpɛ 'wlɛ -kɔ ne, Lagɔ bhiɛ- 'ɔnɛɛ libhɔ kɔ.

⁴ "Naa-, Lagɔbɔgo "me sɛne 'wa bhulɛ -lɔ 'yli 'na 'gbɔsɔ -nɛ 'na weli nɛɛ: Lagɔ -no libhɔ 'klekle, 'yli 'na 'gbɔsɔ -nɛ -wɛ "me -ye 'ɔ -nyɔpɔ -lɔ.

⁵ "Ne Lagɔ bhulɛ -me 'lelee 'ɛnɛɛ "ku 'na weli sɛne nɛɛ: 'Wa -ka 'ce 'neɛ nyɔpɔledɛ -plɛ "kpɛɛ!

⁶ -Wa 'no- 'Denaade tɛɛ -wɛ 'wa "ne Lagɔ 'na nyɔpɔledɛ -plɛ, "naa- 'wa -sɛ 'ɛnɛɛ 'plome -zo -lo. -Bedia yi -namlɛ "bhle -plɛ.

⁷ 'Ɛnɛɛ za, Lagɔ -sɛ 'lelee -lɔ lɔbhɔ 'yli -bholo, "ne 'ɔ lɛ- -lɔ «-Zeka.» "Ɛ 'yli -wɛ 'na weli -gwlɛ "me, "ne 'ɔ yi -lɔ 'ɛnɛɛ weli bhulɛ-, Davide 'na nuɛ "me, weli -ɛ bhulɛ nɛ "kle -wɛ "me: -Zeka ne "me, 'a kɛ Lagɔ 'na weli 'no- ne, 'a te 'anyɛɛ 'dle "ku 'gba.

⁸ Zozue kɛ 'awɔ -gbɔ "ne 'nyakpa kɛ 'awɔ nyɔpɔ- ne, Lagɔ -ka nɛ 'yli 'na -vinɛ 'na weli -bhulɛ.

⁹ 'Ɛ sɛ zɔ nɛɛ: Lagɔ 'na 'nyakpa za nyɔpɔledɛ -le -mlɛ 'yiɛ. 'Ɛ 'wlole- 'yli 'gbɔsɔ -zle 'na nyɛpɛ nyɛpɛɛ.

¹⁰ "Naa- -ɔ -plɛ Lagɔ 'na nyɔpɔledɛ -wɛ, 'nyɔpɔ 'ye 'ɔ nyɔpɔ -me 'lelee -lɔ, 'ɔnɛɛ libhɔ -ye 'ɔ -no -wɛ za, sɛgbɛɛ Lagɔ 'na -se 'ɔ -nyɔpɔ 'ɔnɛɛ libhɔ za -wɛ.

¹¹ 'Ɛnɛɛ za, -a -ya tɛle- 'siɛ 'dle "namanɔ "me -see -a "kɛ "zo "ne -a "kɛ "ɛ nyɛpɛ nyɛpɛɛ -wɛ yle. -Se 'nyɔkpɔ te -kɛ zɔ bhli -wa -sɛ 'plome -wɛ 'nasɛ.

¹² Lagɔ 'na weli -yɛ 'gbligbli, "ne 'ɛ 'tɛ- 'kwɛme klekle. 'Ɛ plɛ "ne 'ɛ -zi -jijigbɛlɛ "ku. Lagɔ 'na weli plɛ -anye "me "ne 'ɛ wlo bhle. 'Ɛ me -kaa -anyɛɛ 'dlezɔ, 'ɛ sibhɔ 'bhle -anyɛɛ 'jeleadɛ "me "ne 'ɛ wlo 'kwɛme 'na "mumlɛ "ku, "ne 'ɛ seselia -anyɛɛ 'wugɔŋo -nyɛ zuzu "bhaa 'ylime. 'Ɛ 'bhlele 'dlepɔsɛ "ne 'dlezɔ 'na -ɛ -ko "bhle -wɛ gbo.

¹³ -Ɛ zizɔ- "ku Lagɔ za -wɛ "ne -le. 'Ɔ 'ye -li 'klekle 'ylime. "Ne 'ɔ -yi 'ye -a "kɛ -lɔ 'de -sɛle.

-A -ya 'nyiɔ Lagɔ yɔko 'dlekukɛleɛ "me

¹⁴ -A -kɛ bɔbɔnyɔ "yitɔ, -ɔ zi "ne -ɔ -ylɛ Lagɔ yɔko: Zezu yɔ -lɔ, Lagɔ Yowli. Zaa, -anyɛɛ 'dlekukɛleɛ -a kɛle kɔ -se 'ɛ "tamale- -kɛ "me kpɛnyee.

¹⁵ Sɛko -wɛ -a -kɛ bɔbɔnyɔ "yitɔ, -ɔ 'bhɛle- "ne 'ɔ "kɛ -anyɛɛ sɛ 'gbape -me -anyɛɛ 'kwɛme-yɔleɛ 'na za. "Naa- -anyɛɛ sɛ, 'wa 'beɔ- -li 'klekle za "me, -mɔ 'ɔyi, 'ɔ "ne 'nyinyonoli -no.

¹⁶ Zaa, -a -ya kɛle- 'dleku, -a te "gu -se -a 'nyiɔ- Lagɔ 'na 'leyli -gbɔglo yɔko, lɔbhɔ 'ye -jɔlo -ko -lɔ. 'Ɔyi yɔko, 'ɔ yi -anyɛɛ 'nyɛze 'dle "pɔ "ne -a yi 'ɔnɛɛ -jɔlo yle, -se 'ɔ "kɛ -anye kwɛle- lɔbhɔ kɛ 'ce -ylɛ ne.