Eblenya 3 - Nouveau Testament bété de Gagnoa

Zezu 'kpɔ- "ne 'ɔ -zi Moyize "ku

¹ -Nyɔsɔwanye, Lagɔ la- 'anye, zaa, 'a wolo- Zezu "ku 'tee. Lagɔ -lobho -lɔ, 'ɔ -noɔ -lɔ bɔbɔnyɔ "yitɔ nyɔ 'na Denaade -a -sɛle -glɔnya yɔ.

² Moyize tɛle- 'awɔ Lagɔ-bhudu "me 'dle. "Ɛ sɛbhele -wɛ Zezu tɛle- -me 'awɔ Lagɔ -ɔ "zoɔ- bɔbɔnyɔ "yitɔ -wɛ 'dle.

³ "Ne Zezu -kɛ 'ŋlu "ne 'ɛ -zi Moyize "ku. "Naa-, 'nyɔkpɔ -ɔ sɔbhɔ -bhudu -wɛ -kɛ 'ŋlu me -sɛ "ne 'ɛ -zi "ɛ -bhudu 'nabhɛ "ku.

⁴ -Bhudu 'klekle -kɛ 'sɔbhɔnyɔ, -mɔ, -ɔ sɔbhɔ- li 'klekle, Lagɔ yɔ -lɔ.

⁵ 'Ɛ kɛ Moyize yɔ, Lagɔ 'na "kulɔbhɔnyɔ -ɔ "tɛle- 'ɔnɛɛ libhɔ 'klekle 'dle -bhudu "me yɔ 'awɔ -lɔ. "Ne 'ɔ "kɛ 'awɔ -lɔ -ye Lagɔ "kɛ bhulɛ -wɛ 'na -ɔyeɛdɛ "zo.

⁶ -Mɔ, -dɛmeda, -ye Klise no -wɛ, -see 'ɔ -noɔ yu yɔ -wɛ za yɛ -lɔ, "ne 'ɔ -su Lagɔ 'na -bhudu 'na 'wli. 'Ɔnɛɛ -bhudu -wɛ, -anye 'waa -lɔ, -a kɛ -kɛ 'dlekutamaleɛ kɔ -kɛle "ne -a kɛ -kɛ -ye -a tɛle- 'dle -wɛ "me zligbɔle-.

-A 'bhlɔ Lagɔ 'na nyɔpɔledɛ

⁷ 'Ɛza, -se Zuzu Wlewle bhulɛ -wɛ: -Zeka ne "me, 'a kɛ Lagɔ 'na weli 'no ne,

⁸ 'a te 'anyɛɛ 'dle "ku 'gba, -se 'a sɛ- 'awɔ bhlɛme -ce, 'a kpla- Lagɔ "ne 'a -ciciɔlo 'ylime 'kɔsɛku.

⁹ "Ɛ 'kɔsɛ -wɛ "ku, 'a 'to 'wa 'to 'wɔ 'bea- 'awɔ -ame "me, -se -ye 'e "kɛ 'awɔ no -wɛ, 'wa 'cɛ 'ylime 'ye, "ne 'wa 'ye- 'awɔ -kɛ -ame 'ylime 'ylobɛ -glo "sɔ "me 'na -ye 'e -no -wɛ.

¹⁰ -Ɛwɛza 'e 'pɔle- -lɔ 'wanɛɛ -zakpɛ -wɛ 'kɛle yɔko, "ne 'e yi -lɔ no nɛɛ: 'Wanɛɛ 'dle 'to 'gbi 'yiɛ. -Ye 'e 'yɔbhɔloa -wɛ, 'ɛnɛɛ yibhlele -to "ne lɔbhɔa.

¹¹ 'Neɛ' 'kɛle ne "me, 'e "zo- -biɛ: 'Wa -ka 'ce 'neɛ nyɔpɔledɛ 'plɛ "kpɛ!

¹² -Nyɔsɔwanye, 'a 'luɔle- 'ayi "ku! 'Anye 'glɛme 'nyɔkpɔ te 'dle -nyɛnye -ɛ "ne 'dleku -kɛ -wɛ kɛle-, -se 'ɔ te Lagɔ -ɔ -yɛ gbligbli -wɛ keyi 'glɛ.

¹³ -Zeka -na zɛ, Lagɔ la 'anye 'yiɛ. Zle 'klekle "me, 'a "tamatamale- 'kwɛme, -sɔɔdɛku 'a no "ɛ laweli ne -zeka. Sɔbhɔ za 'nyinyonoli -ka 'anye ylo no, "ne 'anyɛɛ glɛme -bholo -ka 'ɔnɛɛ 'dle "ku 'gba 'nyinyonoli no -za.

¹⁴ "Naa-, Klise "bhaa -a no -da -lɔ -dɛme 'gɔme libhɔ, -a kɛ -kɛ -anyɛɛ "kucidɛ "ku 'na 'dletɛleɛ -ye -a -kɛ 'awɔ -dee -a "zole- 'dlekukɛlenya kɔ -kɛ klekle -kaa "kubhiɛ dɛku.

¹⁵ Sɛne Lagɔbɔgo gbɔ -lɔ nɛɛ: -Zeka ne "me, 'a kɛ Lagɔ 'na weli 'no ne, 'a te 'anyɛɛ 'dle "ku 'gba, -se 'a sɛ- 'awɔ bhlɛme "ne 'a -ciciɔle 'awɔ 'ylime -wɛ.

¹⁶ -Ɔ 'no- bhɔ Lagɔ 'na weli? -Ɔ gba- bhɔ 'ɔnɛɛ 'dle "ku? 'Nyakpa 'klekle -ye Moyize 'wloa- Ezipte -du "me zɔ -wɛ 'waa -lɔ.

¹⁷ Lagɔ pɔ- 'awɔ 'kɛle 'ylobɛ -glo "sɔ 'na dɛ. -Ye 'ɔ "pɔle bhɔ 'kɛle yɔko? 'Nyakpa 'klekle -wa -no 'nyinyonoli -wɛ 'waa -lɔ, "ɛ 'wayi -bhele -wɛ kule- -lɔ 'kɔsɛku.

¹⁸ Lagɔ "zo- nɛ -biɛ -gbɔ 'wa -ka 'ce 'ɔnɛɛ nyɔpɔledɛ plɛ -me "kpɛ. -Ye 'ɔ "zole- bhɔ -biɛ kɔ? -Wa -sɔ 'plome -wɛ 'waa -lɔ.

¹⁹ -Tiaa -ɛne 'ye -a 'ye- -lɔ 'ylime: 'Wa "ne Lagɔ 'na nyɔpɔledɛ "me -plɛ -me "naa- 'wa "ne 'dleku -kɛle zɛ.