Eblenya 2 - Nouveau Testament bété de Gagnoa

'Popo weli

¹ 'Ɛza, -a 'luɔle- weli -ye -a no- "me -wɛ "ku, 'ɛ "mɔ -kɛ sɔbhɔ yɛ -a yi -kɛ gbi 'to.

² Sɛko -wɛ, weli -ye Lagɔ -ylalea "nɔgɔzilia "me -wɛ 'diɛɛ yɛ -lɔ. -Bedia "ne 'yliku "zolea-, 'wa "ne 'plome "zo-, "ne 'wayi 'klekle 'wa yi -lɔ 'wanɛɛ 'ɛ -ŋwa "ku -wɛ yle.

³ "Ne -anye "na? -See -a "kɛ bhɔ "zo "ne 'ɛ -ka -anye yle-, -a kɛ "ɛ 'popoweli "yitɛ -wɛ yɔko ylɛle? "Ɛ 'popoweli ne, Anyinɛnyɔ 'ci- -lɔ 'ɛnɛɛ -sɛ -ku. "Ne 'wa 'no- "ɛ 'popoweli ne "me -wɛ yi 'lelee -lɔ -anye bhulɛle- -se 'ɛ -noɔ 'diɛɛ yɛ.

⁴ Lagɔ 'nabhɛ -tua -see 'wanɛɛ bhulɛweli -noɔ 'diɛɛ yɛ: 'Nyeanyeali, nonoli -ɛ sɛ geji "ku "ne zɛzɛ 'na -ye 'nyɔkpɔ -ka no -wɛ, "ne 'ɔ yua -lɔ Zuzu Wlewle 'na 'bhɛloɛ 'dlialea- -se 'ɔ 'yɔbhɔ -wɛ.

Zezu "ku- 'nyakpa 'klekle za

⁵ Zikpɛ -ɛ "kɛ yi 'na weli 'ye -a bhulɛ -lɔ. "Nɔgɔzilia 'ye Lagɔ "ne -kɛ "ɛ zikpɛ ne 'na sluslueɛ kɔ 'je-.

⁶ "Naa-, 'wa -bhulɛle dɛne -bholo Lagɔweli "me nɛɛ: -Ye 'nyɔkpɔ -noɔ bhɔ "ne -eyi Lagɔ, 'e 'pɔ bhɔ "ku 'dle 'a? -Ye 'nyɔkpɔ 'na yu -noɔ bhɔ "ne -eyi Lagɔ 'e "zoleɔ bhɔ 'yli "ku 'a?

⁷ 'E 'kwlilea- 'nyɔkpɔ "ku "tɛnye 'tekeyi 'na dɛ "nɔgɔzilia 'yliku, "ne 'ɔ yi -lɔ 'ŋlumeɛ -nyɛ -klɔgbɔ "bhaa 'pɔ-.

⁸ -E "zoa- 'ɛyi 'klekle 'bhozɔ 'wa 'cɛ kamalea. 'A -gɛ bhɔ 'yli 'a? Lagɔ 'je- 'nyakpa li 'klekle 'na kamaleɛ kɔ. -Bɛɛ' 'na -ɛ -to -la 'beme "ne 'ɔ "noa kɔ 'je -me "ne -le. 'Ɛ -ko sɔbhɔ -zeka, -mɔ 'ɛ "ne -mlɛ 'yli -gɔ.

⁹ -Mɔ, -anye -ye -a -gɛ -me bhɔ 'lelee 'yli 'a? Zezu kwlilea- 'ɔyi "ku "tɛnye 'tekeyi 'na dɛ "nɔgɔzilia 'yliku. -Mɔ, -dɛmeda, 'ɔ me 'ŋlu "ne 'ɔ 'pɔ -klɔbgɔ. Sɔɔbɛɛza bhɔ? Sɛko -wɛ, 'ɔ 'gbape-, "ne 'ɔ "ku-. "Ne Lagɔ 'na 'nɛne -ko -ylime, Zezu "ku- 'nyakpa 'klekle za.

¹⁰ Lagɔ wlɛ- -lɔ zikpɛ, "ne 'ɔnɛɛ za zikpɛ -le -lɔ. 'Ɔ 'yɔbhɔ -gbɔ 'ɔnɛɛ yua 'na 'kwleyia ko -me 'ɔnɛɛ 'ŋlumeɛ 'na 'didi "me. Zezu 'fua -kɛ 'se za, Lagɔ 'yɔbhɔ gbɔ 'ɔ ylɛle 'gbapeɛ "me -se 'ɛ "kɛ 'wli 'ye.

¹¹ Zezu 'pla -lɔ 'nyakpa 'wlele 'wanɛɛ 'nyinyonoli za. Zaa, 'ɔ 'pla 'wlele "ne -wa "zo- 'wlele -wɛ 'klekle, To -bholo 'wa -kɛ -lɔ. -Ɛwɛɛ za zu "no 'lɔbhɔ -lɔ -se 'ɔ "koa 'ɔ "nowlia la.

¹² "Naa-, sɛne Zezu bhulɛle -lɔ Lagɔ nɛɛ: 'E yi 'ce -neɛ' 'tɔ -ame "nowlia 'sloa. 'E yi 'ce -eyi lo keyi 'dile, 'nyakpa 'na -zakpɛ 'glɛme.

¹³ Zezu yi 'lelee -lɔ no nɛɛ: -Ame, 'e yi Lagɔ 'dleku -kɛle kpɛnyee. "Ne 'ɔ yi 'lelee -lɔ no nɛɛ: 'Mɔɔ ne lɛ, -ame -nyɛ Lagɔ 'na yua -ye 'ɔ 'je- -ame kɔ -wɛ "bhaa.

¹⁴ "Ɛ yua ne -kɛ -bɛɛ' -ye 'wa -gbale "ku, nyakpa 'waa -lɔ. Zuzu -nyɛnye -kɛ nɛ 'bhɛloɛ se 'ɔ "koa 'kwiɛ "me 'piɛ. 'Ɛza, Zezu "zo- me 'lelee -lɔ 'nyɔkpɔ 'wanɛɛ -sɛ -se 'ɔ "kɛ Zuzu -nyɛnye -gla -sɛ 'kwiɛ "me ylɛleɛ -me.

¹⁵ 'Nyakpa -ko 'awɔ sɛgbɛɛ 'juyua, 'wanɛɛ zikpɛ 'klekle "me, "naa- 'wa 'gu 'awɔ 'kwiɛ -gɛ zɛ. Zezu "ku- 'lelee -se 'ɔ "koa kɔ 'yelea-.

¹⁶ "Naa-, 'ɔ "ne -yi -se 'ɔ "kɛ "nɔgɔzilia kwɛle-, -mɔ, 'ɔ -yi -se 'ɔ "kɛ Ablame 'na -gligbɛnya kwɛle-.

¹⁷ -Ɛwɛza, 'ɔ "kɛ nɛ -lɔ 'ɔ "nowlia 'wlole -li 'klekle "me -se 'ɔ "kɛ bɔbɔnyɔ "yitɔ 'na -ɔ -ko 'nɛne "ne -ɔ tɛle- lagɔlibhɔ 'dle, -se 'ɔ "kɛ 'nyakpa 'na 'nyinyonoli 'na gbo "ku 'titli.

¹⁸ 'Diɛɛ, Zezu gbape-, 'ɔyi 'nabhɛ, 'wa 'beɔ- -me "me. Zaa, 'ɔ 'bhɛle- -se 'ɔ "kɛ -ye 'wa 'bea "me -wɛ kwɛle-.