Eblenya 13 - Nouveau Testament bété de Gagnoa

'Diɛɛ -na 'diɛɛ 'na Lagɔgligbɛ

¹ 'A wale- 'yiɛ 'nayuasɛ.

² 'A te -kɛ 'nyakpa -wa yi 'anyɛɛ -moɔ -wɛ 'na 'tee -sɛɛ "ku dlu. -Wa -no "ɛ -soɔ -wɛ 'na -bedia sa- 'awɔ "nɔgɔzilia 'tee "ne 'wa "ne 'awɔ sɛ -yibhlele.

³ 'A "pɔ -jiɛnya "ku 'dle sɛgbɛɛ -jiɛ "me 'wayi 'wɔ "bhaa 'a kole- 'gɔme. 'A "pɔ -ye 'wa ziɛ 'nyɛze -wɛ "ku 'dle sɛgbɛɛ 'anye 'wa ziɛ 'nyɛze.

⁴ 'Nyakpa 'klekle "zo 'sueplɛɛ 'plome. 'Widi -nyɛ 'ŋɔnɔ "bhaa te gbo zlɛ. Lagɔ yi 'ce -wa -nyɛ -kpɛtɛklinya "bhaa 'wa go, "ne -wa zlɛ gbo -wɛ 'wɔ gbobhlele-.

⁵ 'A te 'dlasi 'mamale-, -mɔ, -ye 'a -kɛ -wɛ lele- 'anye 'ŋwana "ku. "Naa-, Lagɔ 'ɔyigɛsɛ nɛɛ: «'Bhɔ, 'e -ka 'ce -eyi 'yi 'tale-, 'e -ka 'ce -eyi "me 'bhale-.»

⁶ Zaa, 'dletɛleɛ "me -a yi no nɛɛ: «Anyinɛnyɔ -noɔ -lɔ 'neɛ "kuyinyɔ yɔ, "ne 'ɔ 'kwɛle -lɔ -ame, zaa, 'e -ka 'ce 'gu. "Ne 'nyɔkpɔ -ka -ame "nyɛnye no.»

⁷ 'Anyɛɛ 'dle 'sibhɔ 'se 'anyɛɛ "yitia -gɔgɔa -wa -sɛle 'anye Lagɔ 'na 'Denaade -wɛ "ku. 'A wolo- -see 'wanɛɛ zikpɛ -bhiɛ 'wlizɔ -wɛ "ku, -se 'a 'didale- 'wanɛɛ -see 'wa -kɛle Lagɔ 'dleku -wɛ.

⁸ Zezu Kli, -bhele -wɛ yɔ -lɔ, kugblɛ "ku, -zeka "ne -godogodo 'na dɛ.

⁹ 'A te -kɛ "ku 'ŋunu-, -se 'wa te -kɛ 'anye ylo no, -se 'wa te -kɛ 'anye weli 'na -vinɛ 'na 'kwleyi 'wlime "zo. Lagɔ 'na "nɛnekoɛ kɛ -anye 'kwɛme "tamalea- ne, 'ɛ 'nɛne "ne 'ɛ -zi lilɛ 'na gbɛ "ku pɛɛ "ku. -Mɔ, lilɛ 'na gbɛ "ku pɛɛ -na 'ce -zɛ -wa -kɛ kɔ -wɛ -bɛɛ' no.

¹⁰ -Anye, -a -kɛ bɔbɔledɛ, Zufonya 'na bɔbɔnya "ne 'bhɛle- "ne 'wa "kɛ -ɛ 'bhale "ɛ bɔbɔledɛ -wɛ li. "Naa-, 'wayi, -gligbɛ zɔ 'wa no -lɔ libhɔ zɛ.

¹¹ "Ɛ doɔ, bɔbɔledɛ 'wlewle -wɛ, lɔbhɔ 'ye zufonya 'na bɔbɔnyɔ "yitɔ nɛme -lɔ 'nɛmea 'na dlu, -se 'ɛ "kɛ 'nyinyonoli "ku "titli, "ne "ɛ 'nɛmea -wɛ 'wɔ 'wa moa -lɔ -gbɛte keyi siɛle -ka.

¹² -Ɛwɛza, Zezu, 'ɔyi 'lelee, 'ɔ "kule- -me -lɔ Zeluzalɛme 'na -pi keyi, -se 'ɔ "kɛ 'nyakpa 'na 'nyinyonoli 'na 'gbo "ku "titli 'ɔyigɛsɛ 'na dlu nu.

¹³ Zaa, -a 'wlo zɔ, -se -a "kɔ -pi keyi 'sibhɔle- -ka me, 'wa kɛ -anye 'yli ne, -a 'ŋunu "ku Zezu 'nasɛ.

¹⁴ Dodo ne "ku, 'du 'na -ɛ -ka lɔbhɔ ko -godogodo 'ye -a gli- -lɔ "ku, -mɔ, 'du 'na -ɛ "kɛ yi -wɛ 'ye -a 'tɛle -lɔ 'siɛ.

¹⁵ Zezu "me, -a 'nyɛ Lagɔ -anyɛɛ bɔbɔli, 'ŋlukwɛɛ "me, 'ɛ sɛ zɔ nɛɛ: -A 'dilo lo -ɛ 'yibhlelo -gbɔ 'ɔ -noɔ Anyinɛnyɔ yɔ -wɛ "me.

¹⁶ 'A te -kɛ -li 'na -li 'na nonoɛ "ne 'nyakpa -nyɛɛ "ku dlu, 'ɛyi -wɛ -noɔ -lɔ bɔbɔli -ɛ 'nɛne Lagɔ -gɛ -wɛ yɛ.

¹⁷ 'A "zo 'anyɛɛ 'yukugɛlenya 'plome, -se 'a kwlilea- 'ayi "ku 'wayi 'yli "ku. "Naa-, 'waa- -kole -lɔ 'anye "klo, sɛko -wɛ, 'waa- "kɛ 'ce -lɔ Lagɔ 'de -sɛle. Zaa, 'a "koa 'plome "zo, 'wa yi 'wanɛɛ libhɔ 'ŋwɛnɛsɛ no. 'Ɛ "mɔ -kɛ sɔbhɔ yɛ, 'wa 'ŋuŋwɔŋuŋwɔle "me "ne 'wa "kɛ -lɔ "ɛ libhɔ -wɛ no, "ne 'a -ka "bhle -bɛɛ' ylele-.

¹⁸ 'A bhubhɔ- -anyɛɛ za, -mɔ, -anye, -a -kɛ 'dleku -gbɔ -a "ne 'anye weli kɔ -nyimɔle, "naa-, -li 'na -li 'na nonoɛ 'ye -a 'tɛle -lɔ siɛ -godogodo.

¹⁹ 'E bhubhɔ 'anye kpɛnyee, 'a bhubhɔ- 'neɛ za, -se 'e "kɛ 'anye 'glɛme 'wlizɔ zi 'bhobhlo.

Bhubhɔweli

²⁰ Lagɔ 'nyɛ -lɔ -anye "kuwɛtɛɛ. 'Ɔ -sɛ -lɔ Anyinɛnyɔ Zezu, -ɔ -noɔ wliagɛlenyɔ "yitɔ yɔ -wɛ -glukonya 'glɛme. 'Ɔnɛɛ dlu -ye 'ɔ slu- siɛ -wɛ -gbɔ -lɔ "ne -a yi -lɔ 'mɛnenoɛ -ɛ -ka "kubhiɛ -wɛ yle.

²¹ "Ɛ Lagɔ -wɛ, 'ɔ gbɔ -se -a "kɛ -godogodo -li 'na -li no, -see 'ɔ 'yɔbhɔ -wɛ! Lagɔ ylɛle- Zezu Kli "me, -se -a "kɛ -ye 'ɔ 'yɔbhɔ -wɛ no, Zezu 'bhe- -lɔ 'ŋlumeɛ -godogodo! Amɛn!

Bhɛleweli

²² -Nyɔsɔwanye, 'a 'piɛ "bhle 'dle -se 'a "kɛ -kɛ "ɛ 'kwɛme -tamaleweli ne 'yukwli fo. "Naa-, 'neɛ "bɔgo -ye 'e kɛle- 'anye "ku ne "ne "me tlo.

²³ 'E bhulɛle 'anye -gbɔ 'wa 'tale- -a "nɔwli Timote 'yi. 'Ɔ kɛ 'bhobhlo -yi ne, 'ɔyi "bhaa -a yi 'anye 'ylime 'ye ka yi.

²⁴ 'A 'bhɛle- -wa -su 'anye -wɛ, 'wa -nyɛ -wa -noɔ Lagɔ -noa 'waa -wɛ "bhaa. Itali 'na 'nyakpa 'bhɛle 'anye.

²⁵ Lagɔ 'na -jɔlo ko 'anye "ku 'klekle!