Eblenya 12 - Nouveau Testament bété de Gagnoa

'A "tamale- 'kwɛme -dee 'a -namlɛ "kle 'ye -wɛ

¹ 'Nyakpa 'na -zakpɛ "yitɛ -ye 'dlekukɛleɛ -ko "me -wɛ -bli -anye. Zaa, -anye -bhele ne, -a "pɔ -li 'klekle -ɛ gbɔ "ne -a "ne 'nyiɔ 'yuku -wɛ 'kwlɛ "me, -a "pɔ 'nyinyonoli -ɛ -bubɔ -anye -fa -wɛ 'kwlɛ "me. -A 'pa- 'sokwɛ -se -a "kɛ -dee 'wa ga -ce ylɛ-.

² -A wolo- Zezu "ku 'yiɛ. 'Ɔɔ gbɔ "ne -a kɛle -lɔ 'dleku, 'ɔɔ "kɛ -lɔ gbɔ "ne -anyɛɛ 'dlekukɛleɛ "kɛ -lɔ "me "tamale-. Zezu 'ŋunu- "ku -gbɔ 'ɔ yi klowa "klo kule, zu "no lɔbhɔ-. "Naa-, 'ɔ -gɛ nɛ "kle 'ŋwɛnɛ -ɛ "kɔ 'lɔbhɔ -wɛ 'yli, "ne -dɛmeda, 'ɔ gli- Lagɔ 'na lilikwlɛ -gbɔsɔ "ku.

³ -Ɛɛ, 'a "pɔ Zezu "ku 'dle. 'Nyinyonolinonya -gblo nɛ, -mɔ, -ɛ "no -bɛɛ' -no. Zaa, 'kwɛme te 'anye yɔle-.

⁴ 'A gwegwele- kɔ -se 'a te -kɛ 'nyinyonoli no, -mɔ 'ɛ -namlɛ -kɛ dlu wlɛ-.

⁵ 'De -ye Lagɔ "zo- 'anye "me sɛgbɛɛ 'ɔnɛɛ yua -wɛ ne, "ku 'ye 'a -dlu bha? «'Na yu, Anyinɛnyɔ kɛ -eyi "ku 'gbɔtɔle- ne, -ɛ te -eyi 'kɛle "ku lele-! 'Ɔ kɛ -eyi nuɔ sɔbhɔ, 'kwɛme te -eyi yɔle-!

⁶ 'Nyɔkpɔ 'na -ye Anyinɛnyɔ -wa -wɛ 'ye 'ɔ 'sɔpɔ -lɔ 'guɔ, -ye 'ɔ yibhlele 'klekle sɛgbɛɛ 'ɔnɛɛ yua -wɛ 'ye 'ɔ 'lɔbhɔ -lɔ.»

⁷ 'A "kɛ -kosɛ -nyɛnye 'yi 'tale- za 'a 'gbape -lɔ. Lagɔ -su 'anye sɛgbɛɛ 'ɔnɛɛ yua. Yu 'na -ye 'ɔ 'to "ne 'gbɔtɔle- bhɔ "ku?

⁸ Lagɔ "mɔ 'anye "ku 'gbɔtɔle 'ɔnɛɛ yua 'klekle 'nasɛ ne, 'ɔnɛɛ yua 'ye 'a "ne -lɔ -noɔ, 'nɛmenɛmeyua 'ye 'a -noɔ -lɔ.

⁹ -A -yle 'to 'wɔ dodo ne "ku, 'wa -gbɔtɔle -anye "ku, "ne -a "zoa nɛ 'plome. Zaa, 'diɛɛ yɛ -lɔ, -a yi -a To Lagɔ 'plome "zo "ne 'ɛ yi "ku zi -se -a "kɛ zikpɛ yle.

¹⁰ -Ɛɛ, -a 'to 'wɔ 'gbɔtɔle- 'awɔ -anye "ku 'tekeyi, 'wanɛɛ -ɛ -koa 'wlime -wɛ za. -Mɔ, Lagɔ, -anyɛɛ 'nɛne za 'ɔ 'gbɔtɔle -lɔ -anye "ku. 'Ɔ 'yɔbhɔ -gbɔ 'ɔ "kɛ -anye 'wlewle "zoa- 'ɔnɛɛ sɛ.

¹¹ -Sɔɔdɛku, 'wa 'gbɔtɔle -anye "ku -wɛ 'ŋwɛnɛ "ne 'lɔbhɔ -anye, -a -nyɛne "klo. Lɔbhɔ kɛ "me -gwlɛ ne, "ɛ -ye 'wa 'gbɔtɔle "ɛ -soɔ "ku -wɛ, 'wa "zo "meŋwinɛlenya "ne "ɛ -soɔ za 'wa yle "kuwɛtɛ.

¹² -Ɛwɛza, 'a 'glo 'anyɛɛ sɔ -ɛ 'kplɛ -wɛ "me -se 'a "tamalea- 'anyɛɛ kokomini -ɛ tɛtɛle -wɛ "me.

¹³ 'A -sɛ -gwe "namanɔ 'anyɛɛ bho za. -Se 'ɔ bhlile "ku -wɛ 'na bho te -kɛ kɔ ciciɔ-. 'Ɛ kɛ soɔ ylɛle ne, 'ɔ yi yamale-.

'A te 'guɔ ylile-!

¹⁴ 'A tɛle- "kuwɛtɛ siɛ 'nyakpa 'klekle yɔko, 'anyɛɛ kosɛ 'namale- Lagɔ -gɛ. 'Ɛ "mɔ -soɔ -ko ne, 'nyɔkpɔ -ka Anyinɛnyɔ 'ylime 'ye.

¹⁵ 'A luɔ- -kɛ, -se Lagɔ 'na -jɔlɔ -ye 'ɔ 'nyɛ 'anye -wɛ 'nyɔkpɔ te -kɛ 'ɛnɛɛ "ku to-! 'Anye 'glɛme, su -ɛ 'kɛle nu -wɛ te -kɛ mi, -se -ɛnɛɛ 'kɛkɛle -wɛ te -kɛ 'anyɛɛ -zakpɛ -babadi pla-.

¹⁶ 'A luɔ- -kɛ! 'Kpɛtɛklinya "bhaa 'a te -kɛ go-! 'A te -li -ɛ -ko 'wlewle -wɛ 'plome -sɛ, sɛgbɛɛ Ezayu, lilɛslɔ -bholo za, 'ɔ 'pɔ- 'awɔ 'ɔnɛɛ "yitɔzoɛ 'pɔlo "ku!

¹⁷ 'A -yi sɛ, lɔbhɔ kɛ "me -gwlɛ ne, -sɔɔdɛku 'ɔ 'to "kɛ nɛ -ɔ "kɔ 'beme to- -wɛ 'ŋu "pɔ ne, 'ɔyi, 'ɔ 'tu-, "ne 'ɔ -bhubɔ -lɔ 'ɔ 'to -gbɔ 'ɔ "pɔ 'ŋu, -mɔ, 'ɔ 'to -ylialeɔ 'guɔ.

¹⁸ -Sɔɔdɛku, 'a nyiɔ- Lagɔ yɔko -wɛ, tlo -ɛ -kɛ kɔsasɛ -wɛ 'ye 'a "ne lo -mele, sɛgbɛɛ Sinayi 'na tlo -mee -kosu "yitɛ, gutitiɛ, "ne gupepe -ko -wɛ.

¹⁹ 'A "ne lɛglɛ 'na gbɔgbɔweli 'no-. "Ne 'a "ne bhulɛweli 'no-. Izlayɛleyua -wa 'no- "ɛ 'kple -wɛ, 'wa -bhubhɔ -gbɔ 'wa 'te -la 'no.

²⁰ 'Wa "ne weli ne 'na kɔsagbo 'ŋunu-: «-Ɔ kɛ 'ce tlo ne kɔ sa-, nɛmɛ 'ye 'ɛ kɛ 'se -noɔ -ce, 'wa yu 'tiyi nu 'lɔbhɔ "ne 'ɔ yi "ku.»

²¹ -Ye 'wa 'ye- nɛ 'ylime -wɛ -le nɛ nyanɔ "ku. "Ne Moyize yi -lɔ no nɛɛ: «'Ɛ -le -ame nyanɔ "ku "ne 'e tɛtɛle.»

²² -Mɔ, 'anye, 'a nyiɔ- Sinyɔ 'na tlo "ne Lagɔ -ɔ -yɛ 'gbligbli -wɛ 'na 'du yɔko. "Nɔgɔ "me 'na Zeluzalɛme yɛ -lɔ, -mee "nɔgɔzilia -kwleyia no -jajo -wɛ,

²³ "ne 'anye, 'a nyiɔ- Lagɔ 'na tɛtɛyua -ye 'ɔ -gwɛle 'na -zakpɛ yɔko -nyɔ 'na 'tɔ kɛleɔ- "nɔgɔ "me -wɛ. 'A nyiɔ- Lagɔ -ɔ 'bhlele -glɔ 'klekle gbo -wɛ yɔko. 'A nyiɔ- 'nyakpa -wa ŋwinɛle- "me "ne 'wa "ku- "ne 'wa "zo- wlewle -wɛ yɔko.

²⁴ 'A nyiɔ- -me 'lelee Zezu yɔko, 'ɔɔ slu- -lɔ 'ɔnɛɛ dlu siɛ -se -a "kɛ 'wlele ko. 'Ɔɔ -ko -lɔ Lagɔ "bhaa -anyɛɛ mɛnenoɛ -lele 'na jijɛku. "Ne 'ɔnɛɛ dlu -ɛ -slu -siɛ -wɛ kpa "me "ne 'ɛ zi Abɛle -nɛ "ku.

²⁵ 'A luɔ- -kɛ! -Ɔ bhulɛle 'anye -wɛ, 'a 'fo 'yukwli! Dodo ne "ku, Moyize -sɛ 'awɔ -kɛ Izlayɛleyua 'yukwli fete, -mɔ, 'wa "no 'awɔ -kɛ 'yukwli -fo "ne -ɛ "kɛ 'awɔ lɔbhɔ ylɛ -wɛ -ylɛle 'awɔ lɔbhɔ. -Anye, "nɔgɔ "me, Lagɔ -ɔ bhulɛle -anye -wɛ -ko -lɔ. -A kɔ keyi -glɛ ne, -a -cɛ nu "po, -a kɛle- 'dleku!

²⁶ Bhlɛme, Lagɔ 'na bhulɛweli -tɛtɛlia 'awɔ dodo. -Zeka ne "me, Lagɔ -ple weli: «"Kusɔ 'lelee, 'e yi -yi, "ne 'e yi dodo tɛtɛlia-, -mɔ, "ɛ "ne -kɛ dodo 'ɛyikɔ yɛ, "nɔgɔ yi -kɛ tɛtɛle- -me.»

²⁷ «-Ɛ kɛ "kusɔ 'plele ne» sɛne 'ye 'ɛ lɛ -lɔ nɛɛ: -Li -ɛ 'wlɔ- "ne 'ɛ "kɛ 'gblikiɔ- -wɛ yi 'ce "kubhiɛ. Sɔbhɔ -li -ɛ "ne 'bhɛle- "ne 'ɛ "kɛ 'gblikiɔ- -wɛ yi 'ce lele- yiɛ.

²⁸ -Anye, -a yi -klɔgbɔdu -ye 'nyɔkpɔ "ne 'bhɛle- "ne 'ɔ 'cɛ 'gblicia- -wɛ yle. Zaa, -a 'bhɛle- Lagɔ -se -a lɔbhɔ- "ku, -see 'ɛ 'nɛno -gɛ -wɛ, 'dletɛleɛ "me, "ne 'plomezoɛ "me.

²⁹ Sɛko -wɛ, -anyɛɛ Lagɔ -ko sɛgbɛɛ -kosu -ɛ nyimɔ -li.