Eblenya 11 - Nouveau Testament bété de Gagnoa

-A 'to 'wa 'to 'wɔ 'na 'dlekukɛleɛ

¹ Lagɔ 'na 'dlekukɛleɛ -ko sɛgbɛɛ -ye -e 'yɔbhɔ -wɛ -ko -eyi kɔ "kle, 'ɛ -ko -me sɛgbɛɛ -li 'na -ye -a "ne 'yli -gɛ -wɛ "ne -a 'gbɛ-.

² 'Wa kɛ -a 'to 'wa 'to 'wɔ 'ji "ku pɛle ne, 'wanɛɛ 'dlekukɛle 'ylime yɛ -lɔ.

³ -A -kɛ Lagɔ 'dleku, zaa, -a -yi sɛ -gbɔ 'ɔnɛɛ bhulɛweli 'wlɛ- -lɔ zikpɛ. -Li -ɛ -gɔ 'yli 'wa -nole -lɔ -li -ɛ "ne 'yli -gɔ -wɛ "me.

⁴ Abɛle -kɛle 'awɔ Lagɔ 'dleku, 'ɛza, 'ɔnɛɛ bɔbɔli 'nɛne- 'awɔ "ne 'ɛ -zi Kayɛ -nɛ "ku. Sɛko -wɛ, Abɛle -kɛ 'awɔ Lagɔ 'dleku za, Lagɔ 'ɔyi-gɛsɛ 'sa- 'ɔnɛɛ bɔbɔli kɔ, "ne 'ɔ yi -lɔ no nɛɛ 'ɔ ŋwinɛle- "me. Abɛle "ku-, "ne 'ɛ -ko sɔbhɔ, "ne 'wa bhulɛ 'ce 'ɔnɛɛ weli yiɛ.

⁵ Enɔke -kɛle 'awɔ Lagɔ 'dleku, zaa 'wa gblɔ- 'awɔ "nɔgɔ "me -se 'ɔ te -kɛ 'kwiɛ yibhlele-. 'Wa -kɔ 'awɔ yle, sɛko -wɛ Lagɔ -kɔmo -lɔ 'ɔyi yɔko. Lagɔ-bɔgo nɛɛ: Enɔke 'gblɛ- 'awɔ "nɔgɔ "me. -Mɔ 'ɛ lɛ- -me 'lele sɛne: -Sɔɔdɛku, 'ɔ -na nɛ 'gblɛ -wɛ, Enɔke 'nɛne 'awɔ Lagɔ -gɛ.

⁶ 'Nyɔkpɔ "ne 'bhɛle "ne 'ɔ "kɛ Lagɔ -gɛ namale-, 'ɔ "mɔ 'dleku -kɛ ne. -Ɔ 'nyiɔ Lagɔ yɔko 'na -ye 'ɔ "kɛ 'dleku kɛle- ne lɛ: Lagɔ -le, "ne 'ɔ 'peɛle -wa 'tɛlo siɛ -wɛ.

⁷ Nowe -kɛle 'awɔ Lagɔ 'dleku. Lagɔ -bhulɛlo -ɛ "kɛ yi "ne 'ɛ "ne -mlɛ 'yli -gɔ -wɛ 'na weli. Nowe "ne Lagɔ 'na weli kɔkubhlile-, 'ɔ -tɛle gɔlo didigbegwli -see 'ɔ "kɛ 'ɔnɛɛ -gligbɛnya 'fuɔ. 'Ɔ "zo- lɛ "ɛ soɔ ne, -glɔnya 'ye 'ɔ gbli- -lɔ gbo 'wlime, "ne 'ɔnɛɛ 'dlekukɛle -ylime, Lagɔ -yibhlele sɛ -gbɔ "meŋwinɛle- -nyɔ yɔ -lɔ.

⁸ Ablame -kɛle 'awɔ Lagɔ 'dleku, zaa, 'ɔ 'ŋunu- 'awɔ Lagɔ 'na laweli "ku, 'ɔ "zo- 'plome. 'Ɔ -me 'du -nyɔ 'na weli -ye Lagɔ -plelo 'awɔ kɔ -wɛ "me, 'ɔ me 'awɔ, -mɔ, 'ɔ "ne 'awɔ -dee 'ɔ me -yi.

⁹ Ablame -kɛle 'awɔ Lagɔ 'dleku, zaa, 'ɔ -me 'du -nyɔ 'na weli Lagɔ -bhulɛlo -wɛ "ku 'glile -ka, 'lowlinyɔ 'nasɛ. "Ɛ 'du -wɛ "me 'ye 'ɔ -ko nɛ -lɔ -gligbɛ zɔ. Izake "ne Zakɔbo -gligbɛ zɔ 'wa -ko -me nɛ -lɔ "ɛ 'du -wɛ "me. 'Wayi 'lele, "ɛ sɛbhele -wɛ 'ye Lagɔ 'plele- -moa -lɔ "ɛ weli -bhele -wɛ kɔ, Ablame 'nasɛ.

¹⁰ 'Du 'na -ɛ 'pɛleɔ- glu klekle 'ye Ablame "pɔ nɛ -lɔ "ku 'dle. Lagɔ 'ɔyi-gɛsɛ -wɔkɔ -lɔ "ɛ 'du -wɛ "ne 'ɔɔ sɛbhɛ- -lɔ.

¹¹ Sala -kɛle 'awɔ Lagɔ 'dleku, zaa, Lagɔ -gbɔ "ne 'ɔ -gwɛle 'awɔ yu, 'ɔ gɔ- 'awɔ -kɛ kpɛnyee "ne 'ɔ "ne 'gwɛle- 'awɔ, -mɔ, 'ɔ -kɛ 'awɔ -bɛɛ' -bholo 'dleku. 'Ɛɛ -noɔ -lɔ nɛɛ: Lagɔ "ne 'bha- 'ɔnɛɛ bhulɛweli "ku.

¹² -Ɛwɛza, -a 'to 'wa 'to 'wɔ 'na -bholo, Ablame, 'ɔ gɔ- nɛ kpɛnyee, -ɔ "ne nɛ -da zikpɛ "ku 'na 'nyɔkpɔ yɔ -wɛ, 'ɔ 'gwɛle- -lɔ -gligbɛ "yitɛ. "Ɛ -gligbɛ -wɛ "ku 'na yua -zu kpɛnyee sɛgbɛɛ "nɔgɔ "me 'na -zeli "ne jinyɛ yɔko 'na -ylomɛ, -ɛ "ne lɛ zɛlesɛ -kɛ ne.

¹³ "Ɛ 'nyakpa -wɛ 'klekle 'wa -kɛ Lagɔ 'dleku "ne 'wa yi -lɔ "ku. -Li -nyɔ 'na weli 'ye Lagɔ -pleloa kɔ -wɛ, 'wa "ne -yle, -mɔ, 'wa 'ye- "ɛ 'dɛ -tlomale nɛ 'ylime "ne 'wa yi -lɔ 'ɛnɛɛ 'ŋwɛnɛ no. "Ne 'wa yi -lɔ no nɛɛ: Dodo ne "ku 'lowlinya "ne 'pleplenya 'ye -a -noɔ -lɔ.

¹⁴ -Ye 'wa bhulɛ "ɛ soɔ -wɛ, 'wa tua nɛ 'ylime gbaa -gbɔ 'wa 'tɛle nɛ 'wanɛɛ 'du siɛ.

¹⁵ -Mee 'wa 'bha- -wɛ 'wa -na nɛ "ku 'dle "pɔ. 'Ɛ kɛ nɛ sɔbhɔ yɛ ne, 'wa yi nɛ "bhle 'wlizɔ zi.

¹⁶ Sɛko -wɛ, 'du 'na -ɛ 'nɛne- "ne 'ɛ -zi "ku -wɛ 'wa 'tɛle 'awɔ -lɔ 'siɛ, 'ɛɛ -noɔ -lɔ "nɔgɔ "me yɛ. -Ɛwɛza, zu "ne 'lɔbhɔ Lagɔ 'wa kɔ 'wanɛɛ Lagɔ la ne. "Naa-, 'ɔɔ -sɛ lɔbhɔ 'wanɛɛ 'du zɛ.

¹⁷ Ablame -kɛle Lagɔ 'dleku. -Mɔ, Lagɔ 'yɔbhɔ 'awɔ -gbɔ 'ɔ "kɛ 'awɔ -ye Ablame "kɛ 'awɔ no -wɛ 'ylime 'ye, "ne 'ɔ yi 'awɔ -lɔ no -gbɔ 'ɔ bɔbɔlo- 'ɔ Yowli Izake. "Ne Ablame yu -lɔ 'ɔnɛɛ yu -bholo -kpee -wɛ bɔbɔle-, "ne Lagɔ yɔ 'awɔ -kɛ weli kɔ 'plele- "bhuɔ.

¹⁸ "Naa-, Lagɔ -bhulɛlo 'awɔ nɛɛ: «Izake "me, -e yi 'ce yua -wa "kɛ -neɛ' 'tɔ "pɔ -wɛ yle.»

¹⁹ -Mɔ, Ablame 'pɔ- 'dle nɛɛ: Lagɔ 'bhɛle- 'ɔ "kɔ 'golia-. 'Ɛza, Lagɔ 'jo- -lɔ kɔ, sɛgbɛɛ gluzɔ 'ye 'ɔ 'wlo-.

²⁰ Izake -kɛle 'awɔ Lagɔ 'dleku, zaa, 'ɔ 'pɔ- 'awɔ Zakɔbo "ne Ezayu 'ŋu, -ɛ "kɛ bhliji "me yi -wɛ za.

²¹ Zakɔbo -kɛle 'awɔ Lagɔ 'dleku, zaa, 'ɔnɛɛ "ku -dɛku -ylɛ lɛ ne, 'ɔ pɔ- Zozɛfo 'na yua 'klekle 'ŋu -bholo -bholo. "Ne 'ɔ yi -lɔ 'ɔnɛɛ -zu "nyegbele-, "ne 'ɔ yi -lɔ Lagɔ bɔbɔ-.

²² Zozɛfo -kɛle 'awɔ Lagɔ 'dleku, zaa, 'ɔnɛɛ kudɛ -ylɛ lɛ ne, 'ɔ -bhulɛ -sɔɔdɛku Izlayɛleyua "kɛ nɛ Ezipte 'bha- -wɛ 'na weli. "Ne 'ɔ yi -lɔ -see 'wa "kɛ 'ɔnɛɛ -gɛzɛnɔ 'sa -wɛ 'na weli 'tle-.

²³ Moyize 'ɔ 'to 'wɔ -kɛle 'awɔ Lagɔ 'dleku, zaa, -sɔɔdɛku 'wa -gwɛlo -wɛ, 'wa zizu- 'ce ta 'na dɛ. 'Wa 'ye 'ylime -gbɔ "ɛ yu -wɛ 'nɛne- nɛ kpɛnyee. Zaa, 'wa "ne 'gu- "ne 'wa yi -lɔ -klɔgbɔnyɔ 'na bhulɛweli 'plome -sɛ.

²⁴ Moyize -kɛle 'awɔ Lagɔ 'dleku, zaa, -sɔɔdɛku, 'ɔ kpɔmale- -wɛ, 'ɔ "ne 'yɔbhɔ- -gbɔ 'wa -lɔ Ezipte 'na -klɔgbɔnyɔ 'na 'ŋuyu 'na yu.

²⁵ -Mɔ, 'ɔ 'ŋunu- "ku -gbɔ Lagɔ 'na yua "bhaa 'wa yi 'gɔme gbapele-, "ne 'ɔ yi nɛ -kɛ 'ɔnɛɛ zikpɛ no 'nyinyonoli "me "tɛnye 'tekeyi 'na dɛ, -mɔ Lagɔ 'ye 'ɔ "kɛ nɛ -lɔ 'plome -sɛ.

²⁶ Ezipte 'na -klɔgbɔ 'kpɔ- 'awɔ. -Mɔ, Moyize 'na dɛku, 'wa "kɔ 'yli-, ŋwlɛŋwlɛyu 'na -see 'wa "kɔ 'yli- -wɛ, 'ɛ 'kpɔ "ne 'ɛ zi "ku. "Naa-, 'yuku 'ye 'ɔ wlo 'awɔ lɛ -ce, -me 'peɛleɛ -ɛ "kɛ yi -ko -wɛ.

²⁷ Moyize -kɛle 'awɔ Lagɔ 'dleku, zaa, 'ɔ "ne 'awɔ -klɔgbɔnyɔ 'na 'kɛle -gɛ gu-, "ne 'ɔ yi -lɔ Ezipte 'bha-. 'Ɔ 'nyegbe 'ɔnɛɛ weli "ku sɛgbɛɛ Lagɔ -ye 'wa "ne 'ye 'ylime -wɛ 'ye 'ɔ 'ye- 'ylime.

²⁸ Moyize -kɛle 'awɔ Lagɔ 'dleku, zaa, 'ɔ -gbɔ "ne 'wa yi -lɔ Paake 'na -jajo 'gwlɛle-, "ne 'ɔ yi -lɔ 'nyakpa bhulɛle- -gbɔ 'wa "zo dlu -bhudu-gbulɛ yɔko. 'Ɛ -gbɔ "ne "nɔgɔ-zilɔ -ɔ -kɛ 'kwiɛ 'na 'bhɛloɛ -wɛ "ne Izlayɛle 'na 'tɛtɛyua kɔ sa-.

²⁹ Izlayɛleyua -kɛle 'awɔ Lagɔ 'dleku, zaa, 'wa 'to- 'awɔ -lɔ jinyɛ -zɛle sɛgbɛɛ dodo 'sɔku 'wa 'nɔŋo. -Mɔ, -sɔɔdɛku, Ezipte 'na 'nyakpa no -gbɔ 'wa "kɛ -li me 'ylɛ -see 'wa "kɛ 'ple me -wɛ, 'ŋu lobhoa 'klekle.

³⁰ Izlayɛleyua -kɛle 'awɔ Lagɔ 'dleku, za, 'wa bli- 'awɔ Zeliko 'na 'du 'yli -gbɔɔsɔ 'na dɛ, "ne "ɛ 'du -wɛ 'na -pi yi -lɔ 'tutlule-.

³¹ Ylaabo, 'gbozlɛŋɔnɔ, -kɛle 'awɔ Lagɔ 'dleku. 'Ɛza, Lagɔ 'na -gblenya "bhaa 'wa 'no- 'awɔ 'gɔme lɔbhɔle-, sɛko -wɛ, 'ɔ "zolea- Izlayɛleyua 'na 'dedenya 'yliku 'tee.

³² -Ye 'e "kɛ bhɔ 'lelee bhulɛ? 'E kɛ -gbɔ 'e "koa lo mele -bholo -bholo ne, Zedeɔ, Balake, Samesɔ, Zefete, Davide, Samiɛle, "ne "guɔkwɔmenya, -a yi -kɛ dɛne go.

³³ Sɛko -wɛ, "ɛ 'nyakpa -wɛ -kɛle 'awɔ Lagɔ 'dleku, 'ɛza, 'wa -lu -lɔ -glɔ 'wɔ to "me. 'Wa -no -ɛ ŋwinɛle- "me -wɛ, -li -nyɔ 'na weli -ye Lagɔ -pleloa kɔ -wɛ 'wa -yle, "ne 'wa 'gba- slukua 'na nuɛ "ku.

³⁴ 'Wa 'nyimɔ- -kosu -gbagbo, -jijigbɛlɛ "noa 'lɔbhɔ-. Gu 'lɔbhoa- "ne 'wanɛɛ 'kwɛme "tamale-, togwe dɛku, 'wa "tamale- "me, "ne "slojanya -fɔtɔloa nu.

³⁵ 'Ŋwenea -kɛle 'awɔ Lagɔ 'dleku. Sɔbhɔ za 'wa -yle 'awɔ 'wanɛɛ 'nyakpa -wa "ku- -wɛ, "naa- 'wa -glɔ 'awɔ. 'Nyakpa 'na -vinoa, 'wa -zua 'awɔ 'nyɛze, -mɔ, 'wa "ne 'awɔ 'ŋunu- -gbɔ 'wa 'fua. "Naa-, 'wa 'yɔbhɔ 'awɔ -gbɔ 'wa "kɛ 'awɔ gluzɔ 'wlo -se 'wa "kɛ zikpɛ 'na -namanɔ yle.

³⁶ -Bedia 'ŋunu- 'yliyli gbo "ne 'sɛpesɛpe -gbo "ku. 'Wa -gwale -bedia 'gɔgɔ nu "ne 'wa 'poa- -jiɛ "me.

³⁷ 'Wa 'lɔbhoa- 'tiyi nu, 'wa "ku-, 'wa 'di- -bedia "me 'cibhi "sɔ "ne 'wa 'lɔbhoa- -jiji -gbɛlɛ nu, -bedia 'bha- dɛ "ne 'wa me dɛ, 'wa -pla 'bhlɛbhlea "ne wlia 'na ku "me. 'Wa "ne 'awɔ -bɛɛ' -kɛ gou. 'Wa 'gbapoa- nɛ kpɛnyee "ne 'wa -zua 'nyɛze.

³⁸ "Ne "ɛ zikpɛ ne, "ne -kɛ "ɛ 'nyakpa -wɛ "ku -ŋwa. 'Wa 'bha- dɛ "ne 'wa me dɛ, 'kɔsɛku, -gaga 'vli, 'tiyi "me "ne dodo 'na 'mene.

³⁹ 'Wa -kɛle 'awɔ Lagɔ 'dleku 'klekle, -ɛwɛza, Lagɔ 'pɛloa- 'awɔ -lɔ 'ji "ku, -mɔ, 'wa "ne 'awɔ -nyɔ 'na weli Lagɔ -pleloa 'awɔ kɔ -wɛ -yle -me.

⁴⁰ "Naa-, Lagɔ -sɛ 'awɔ 'lelee lɔbhɔ -bɛɛ' 'na -ɛ 'nɛne "ne 'ɛ zi "ku -wɛ -anyɛɛ za. Lɔbhɔ -wɛ 'na dɛku 'wa -ka nɛ -kpee -ko, -a "mɛ "me -ko -me ne.