Eblenya 10 - Nouveau Testament bété de Gagnoa

Klise -bhia bɔbɔli -gɔgɔ "ku

¹ Moyize 'na -Lɔ 'ɛ "ne 'tua -ɛ -ko lɔbhɔ -gbaa -wɛ 'ylime, -li 'na -li 'na -ɛ "kɛ bhliji "me yi -wɛ 'na zuzu -fu yɛ -lɔ. 'Ɛ 'yɔbhɔ -gbɔ 'wa bɔbɔ 'ylobɛ 'o 'ylobɛ "ɛ sɛbhele -wɛ. 'Ɛza, 'ɛ "ne -lɔ 'bhɛle- "ne 'ɛ -kɛ -wa 'nyiɔ Lagɔ yɔko -wɛ 'wlele "zoa- gou.

² 'Ɛ kɛ nɛ -sɔbhɔ yɛ, 'wa -ka nɛ -la bɔbɔ 'ylobɛ 'o 'ylobɛ, ''ku -bholo 'na bɔbɔli yua nɛ 'nyinyonoli 'na gbo 'wlime -sɛ -godogodo 'na dɛ. 'Wa -ka nɛ -la 'wanɛɛ 'nyinyonoli 'na 'dlebhɛ 'tu, "ne 'wa -ka nɛ 'ce -la bɔbɔli 'na yɛ -bholo 'wlɛ-.

³ -Mɔ, 'ɛ bɔbɔli ne 'sibha -lɔ 'dle 'nyinyonoli 'na dɛ -se 'ylobɛ yi 'ce -wɛ.

⁴ Sɛko -wɛ, -bhili "ne vɔkoa 'na dlu "ne 'bhɛle -se 'ɛ "kɛ 'nyinyonoli 'na gbo "ku 'titli-.

⁵ -Ɛwɛza, -sɔɔdɛku Klise "kɛ zikpɛ ne "ku yi -wɛ, 'ɔ -bhulɛle -lɔ Lagɔ nɛɛ: «-E "ne 'yɔbhɔ -gbɔ 'wa 'wlɛ bɔbɔli "ne "nyɛnyɛ -bɛɛ', -mɔ, -e "zoa- -ame 'nyɔkpɔ.

⁶ 'Nɛmea -ye 'wa -siɛ bɔbɔledɛ -wɛ, "ne 'nyinyonoli 'na bɔbɔli "ne -eyi -gɛ 'nɛne.

⁷ Zaa, 'e -bhulɛle -eyi nɛɛ: 'Mɔɔ ne lɛ, 'e -yi -se 'e "kɛ -ye -e 'yɔbhɔ -wɛ no, -ɛ 'kɛleɔ- -Lɔ Lagɔ-bɔgo "me 'neɛ dɛku.»

⁸ Sɛne Klise lɛ- -lɔ tɛɛ: «-E "ne 'yɔbhɔ bɔbɔli, "ne "nyɛnyɛ -bɛɛ', "ne 'nɛmea -ye 'wa -siɛ bɔbɔledɛ -wɛ, "ne 'nyinyonoli 'na bɔbɔli "ne -eyi -gɛ 'namale-.» "Ne Moyize 'na -Lɔ 'yɔbhɔ -gbɔ 'wa -sɛ "ɛ bɔbɔli -wɛ 'klekle.

⁹ "Ne Klise yi 'lelee -lɔ sɛne lɛ nɛɛ: «'Mɔɔ ne lɛ, 'e -yi -se 'e "kɛ -ye -e 'yɔbhɔ -wɛ no.» 'Ɔ 'sɛ- "ɛ -soɛ -wɛ, Klise, bɔbɔli -gɔgɔ 'ye 'ɔ -bhia -lɔ "ku, "ne 'ɔ yi -lɔ 'ɔ -nɛ 'ylime 'plealea-.

¹⁰ Zezu Kli -no -ye Lagɔ 'yɔbhɔ nɛ -wɛ. 'Ɔ 'bhale- 'ɔyi "me "ku -bholo -li 'klekle "me, -soɔ 'ye -a -plɛ -lɔ 'wlele.

¹¹ Bɔbɔnyɔ 'nyegblele 'ya -se zle 'ze -wɛ, "ne 'ɔ no -lɔ Lagɔ 'na libhɔ. "Ɛ bɔbɔli -bhele -wɛ 'ye 'ɔ 'nɛme -lɔ yiɛ, -mɔ, "ɛ "ne 'bhɛle- "ne 'ɛ -kɛ 'ce 'nyinyonoli "ku 'titli-.

¹² -Mɔ Klise 'ɔyi, 'ɔ -sɛ bɔbɔli -bholo -anyɛɛ 'nyinyonoli za "bhuɔ ne, 'ɔ yi -lɔ Lagɔ 'na lilikwlɛ -gbɔsɔ "ku 'gli -godogodo 'na dɛ.

¹³ -Dɛmeda, 'ɔ -wo -gbɔ Lagɔ "zo 'ɔnɛɛ -gblenya bhozɔ -se 'ɔ "koa "ku 'nɔŋole-.

¹⁴ "Ku -bholo 'na 'ye 'ɔ -bɔbɔ -wɛ -gbɔ "ne -wa -plɛ 'wlele -wɛ "ne 'nuɔsɔbhɔledɛ -kɛ -godogodo 'na dɛ.

¹⁵ Zuzu Wlewle -piɛle -me 'lelee "ku, "ne 'ɔ yi -lɔ sɛne lɛ nɛɛ:

¹⁶ «Anyinɛnyɔ nɛɛ: 'Yli yɛ kɛ 'ple- ne, 'mɛnenoɛ -ye 'wayi 'wɔ "bhaa -a "kɛ 'mɛnene ne lɛ: 'E yua 'neɛ -Lɔ 'dlezɔ "zo, "ne 'e yua 'wlime kɛle.»

¹⁷ "Ne 'ɔ yi 'lelee -lɔ sɛne lɛ nɛɛ: «'Neɛ 'dle -ka -la 'wanɛɛ 'nyinyonoli "ne 'wanɛɛ "nyɛnye -ye 'wa no -wɛ "ku 'sibhɔ.»

¹⁸ "Ne -sɔɔdɛku 'nyinyonoli 'na gbo 'taleɔ- 'yi -wɛ, 'wa "ne 'wlɛ -la bɔbɔli 'ɛ 'cɛ lɔbhɔ -sɛ -wɛ.

-A te -la 'beme 'wolo-

¹⁹ -Nyɔsɔwanye, -a -yi sɛ -gbɔ -a yi bɔbɔledɛ plɛ, sɛko -wɛ, Zezu slu- 'ɔnɛɛ dlu siɛ.

²⁰ 'Ɔ -sɛ -anyɛɛ za -gwe 'na 'lele -ɛ 'ple "ku -wɛ, "ne 'ɔ -ylɛleɛ -gligbɛ 'na 'ylido "me, 'ɛ sɛ zɔ nɛɛ: 'Ɔyi 'nabhɛ yɔ -lɔ.

²¹ "Ne -a -kɛ bɔbɔnyɔ "yitɔ -ɔ -gɛ Lagɔ 'na -bhudu 'yuku.

²² 'Wa -sɛ -anye -ɛ ylea- -anyɛɛ 'dle gbo 'klekle -wɛ "me, "ne -anyɛɛ ku -wɛleɔ 'ŋu 'wlewle "me. Zaa, -a 'nyiɔ- Lagɔ yɔko 'dle 'na -dle "ne 'dlekukɛleɛ "me.

²³ -A bhulɛ- -ye -a tɛle- 'dle -wɛ 'na weli, 'kwɛme te -anye yɔle-. "Naa-, Lagɔ kɛ weli -ple ne, 'ɔ "ne 'bhɛ "ku.

²⁴ -A 'kwɛle-kwɛlele- -se 'kwɛme "kɛ -anye "tamale- -se -a "kɛ wale-, -se -a "kɛ -li 'na -li no.

²⁵ -A te -anyɛɛ -zakpɛ "me 'bha-, -se -bedia -sɛ -wɛ, -mɔ, -a -ya 'kwɛle-kwɛlele- yiɛ, sɛko -wɛ, 'a -gɛyli, Anyinɛnyɔ 'na yli "ne -kɛ -la dɛtlo-.

²⁶ -A 'ciɛ- gbɛklɛklɛ 'na yibhleleɛ. Zaa, -a kɛ -dudu 'nyinyonoli no ne, bɔbɔli 'na -ɛ 'cɛ "ku 'titli "ne -la -le.

²⁷ -A tɛtɛle-, "ne -a "kɛ -lɔ -ɛ "kɛ yi -wɛ wo: Gbobhleleɛ "ne -kosu "yitɛ -ɛ "kɛ Lagɔ 'na -gblenya siɛ -wɛ.

²⁸ 'Nyɔkpɔ "mɔ Moyize 'na -Lɔ 'plome "zo ne, -wayeɛdɛ "sɔ "ne ta yi no -gbɔ 'ɔ -no "nyɛnye. Lɔbhɔ 'na dɛku, 'wa -ka 'ɔnɛɛ 'nyɛzedle "pɔ "ne 'wa yu 'lɔbhɔ "ne 'ɔ yi "ku.

²⁹ 'Ɛ "kɛ -da zi, -ɔ -ziɛ Lagɔ Yowli 'dii -wɛ, 'wa yu 'kle 'yea- "ne 'ɛ yi "ku zi. "Naa-, 'ɔyi -wɛ "ne 'mɛnenoɛ -dlu -ɛ "zoɔ- 'wlele 'nyinyonoli za -wɛ 'plome "zo- zɛ. Zuzu Wlewle -ɔ sloa -anye Lagɔ 'na 'nɛne -wɛ 'ye 'ɔ 'yli -lɔ.

³⁰ 'Diɛɛ, -a -yi -ɔ -bhulɛ sɛne -wɛ: «-Ame, 'mɔɔ -noɔ -lɔ 'beme 'sibhɔnyɔ yɔ, 'e yi 'ce -ɛ -ŋwa -ɔkɔkokɔkɔ "ku -wɛ kɔ 'je!» 'Ɔ lɛ- -me 'lelee sɛne nɛɛ: «Anyinɛnyɔ yi 'ce 'ɔnɛɛ 'nyakpa gbobhlele-.»

³¹ -E kɛ Lagɔ -ɔ -yɛ 'gbligbli -wɛ gbo kɔ -ylele, 'ɛ -le -nyanɔ "ku!

³² 'Anyɛɛ 'dle 'sibhɔ- -watɔ 'na -ɛ 'ple -wɛ "ku. -Sɔɔdɛku, 'anyɛɛ 'yli -vuluɔ "ku "ne 'a 'no- Lagɔ 'na weli "me -wɛ, 'a "tamale- "me "yitɛ "ku, 'a 'gbape- 'kpenyee, -mɔ, 'a 'gwele- 'ayi kɔ.

³³ 'Wa 'yli- 'anye, "ne 'wa 'gbapea- 'anye 'nyakpa 'klekle 'yliku, "ne 'a -kwɛle -me 'lelee -ye 'wa 'gbapea- 'anyɛɛ sɛku -wɛ.

³⁴ Sɛko -wɛ, 'a -nyɛ -wa -ko -jiɛ "me -wɛ 'wɔ "bhaa, 'a 'gbapele- 'gɔme. 'A 'ŋunu- 'ŋwɛnɛsɛ "ku, "ne 'wa yi -lɔ 'anyɛɛ -li kɔ -sɛ, sɛko -wɛ, 'a -yi nɛ sɛ -gbɔ: 'A -kɛ nɛ -klɔgbɔ -ɛ 'kpɔ "ne 'ɛ zi "ku, "ne -ɛ "ne bhiɛ "ku -wɛ.

³⁵ Zaa, 'anyɛɛ 'dletɛleɛ te "me yɔle-, 'ɛɛ "kɛ -lɔ gbɔ "ne 'a "kɛ -lɔ 'anyɛɛ "peɛleɛ "yitɛ yle.

³⁶ 'A "tamale- 'dleku, 'a no Lagɔ 'na -ye 'ɔ 'yɔbhɔ -wɛ, -see 'a "kɛ -nyɔ 'na weli -ye 'ɔ -plele 'anye kɔ -wɛ yle.

³⁷ "Naa-, Lagɔ-bɔgo "me, sɛne 'wa lɛ -lɔ nɛɛ: «Lɔbhɔ "ne -la dɛtlo, lɔbhɔ "ne -la dɛtlo gou» «-se -ɔ yi -wɛ "kɛ 'du -plɛ, 'ɔ yi -la yi.

³⁸ Lagɔ nɛɛ: -Ɔ -kɛ -ame 'dleku -wɛ 'ɔ ŋwinɛle- "me, 'ɛyi "me 'ɔ yi zikpɛ yle. -Mɔ, -ɔ -kɛ 'wlizɔ -zi ne, 'neɛ 'ŋwɛnɛ -kɔ -la "me ko.»

³⁹ -Anye, -a "ne -wa zi 'wlizɔ, "ne 'wa bhli "kwlɛ -wɛ 'waa. -Mɔ, -a -kɛ Lagɔ 'dleku, -a yi 'po.