Eblenya 1 - Nouveau Testament bété de Gagnoa

Lagɔ -bhulɛle -anye 'ɔ Yowli "me

¹ -Watɔ -ce, "guɔkwɔmenya "me 'ye Lagɔ -bhulɛle 'awɔ -lɔ -a 'to 'wa 'to 'wɔ, "ne 'ɔ 'titliloa 'awɔ -lɔ 'yukwli "me -godogodo.

² -Dɛmeda, 'bebhiɛle- -yli ne "me, Lagɔ -bhulɛle -anye 'ɔ Yowli "me. 'Ɔ yowli "me 'ye 'ɔ wlɛle- -lɔ zikpɛ, "ne 'ɔyi 'ye Lagɔ -tɔ -lɔ -se 'ɔ "kɛ -li 'klekle slu.

³ Lagɔ 'na 'ŋlu lelo "ku. "Ɛ yu ne -noɔ -lɔ -diɛnadiɛ -ye Lagɔ -noɔ yɔ, "ne 'ɔnɛɛ bhulɛweli 'na 'bhɛloɛ -su -lɔ zikpɛ. 'Ɔ bhudua- lɛ 'nyakpa 'wanɛɛ 'nyinyonoli za "bhuɔ ne, "ne ɔ yi -lɔ "nɔgɔ "me Lagɔ -ɔ -kɛ 'bhɛloɛ 'na lilikwlɛ -gbɔsɔ "me 'gli.

⁴ "Ɛ Yu -zi "nɔgɔzilia "ku. "Naa-, Lagɔ -ziɛlo 'tɔ -ɛ 'kpɔ "ne 'ɛ -zi 'wanɛɛ 'tɔ "ku.

⁵ Sɛko -wɛ, 'ɔ -na 'ce -zɛ "nɔgɔzilɔ bhulɛle- nɛɛ: -Ame Yowli 'ye -e -noɔ -lɔ, -Zeka, -ame, 'e "zo- -e 'to. "Ne 'ɔ -na 'ce -zɛ 'lelee "nɔgɔzilɔ bhulɛle- nɛɛ: -Ame, 'e yi 'ce 'ɔ 'to "zo, "ne 'ɔyi, 'ɔ yi 'ce 'neɛ yu "zo.

⁶ -Mɔ -dee 'ɔ -nɛme 'ɔnɛɛ tɛtɛ yu zikpɛ ne "ku -wɛ, "ne 'ɔ yi -lɔ no- nɛɛ: "Nɔgɔzilia 'klekle yu "zo.

⁷ -Ye Lagɔ -bhulɛ "nɔgɔzilia 'na dɛku ne lɛ: 'E -su "nɔgɔzilia sɛgbɛɛ -pepe, "ne 'e -su "kulɔbhɔnya sɛgbɛɛ 'ŋu 'bhle 'yli.

⁸ -Mɔ, Lagɔ -bhulɛle 'ɔ Yowli nɛɛ: E -noɔ Lagɔ yɔ, "ne -neɛ' 'kamaleɛ -ka 'ce "ku bhiɛ godogodo 'na dɛ. "Ne -e yi -neɛ' -gligbɛnya slu "meŋwinɛlesɛ.

⁹ -E -wa -ɛ ŋwinɛle- "me -wɛ, -e "ne "nyɛnye -wa. 'Ɛnɛɛ za Lagɔ, -neɛ' Lagɔ -tɔ -lɔ -eyi 'ɔnɔ "ku, "ne 'ɔ yi -lɔ -eyi -jajo 'na 'ŋwɛnɛ -kpe 'wli slu-. 'Ɔ -wamale -eyi -elua 'glɛme "ne 'ɛ -zi "ku.

¹⁰ Lagɔ -bhulɛ -me 'lelee sɛne: "Kucidɛku, -eyi, Anyinɛnyɔ, -mɔɔ 'wlɛ- -lɔ dodo, "ne 'neɛ sɔ yi -lɔ "nɔgɔ ma.

¹¹ 'Ɛyi 'klekle yi 'ce "kubhiɛ, -mɔ, -eyi, -e -ko lɔbhɔ -godogodo. "Nɔgɔ -nyɛ dodo "bhaa yi 'ce "me bhiɛ sɛgbɛɛ 'koti.

¹² -E 'yi 'ce giglilea- sɛgbɛɛ 'koti, ɛɛ, 'ɛ yi 'ce "me zigbaleɔ- sɛgbɛɛ "me pla- li. -Mɔ, -eyi, -e -ko -godogodo "ɛ sɛbhele -wɛ 'yiɛ, "ne 'neɛ zikpɛ "ne bhiɛ "ku.

¹³ Lagɔ -na 'ce -zɛ "nɔgɔzilɔ bhulɛle- nɛɛ: Yi -se 'gli 'neɛ lilikwlɛ -gbɔsɔ "ku, -se 'e "kɛ -neɛ' -gblenya -eyi bhozɔ "zo.

¹⁴ "Nɔgɔzilia "ne bhɔ Zuzu -wa lɔbhɔ Lagɔ "ku 'klekle -wɛ 'waa? Lagɔ lobhoa libhɔ -no -ka. 'Wa 'kwɛle -wa "kɛ 'popoɛ yle -wɛ.