Kolɔsenya 4 - Nouveau Testament bété de Gagnoa

¹ "Bhenya 'nye, 'a slu 'anyɛɛ 'juyua 'klekle "me ŋwinɛlesɛ. 'Diɛɛ, 'a -yi sɛ -gbɔ 'anye 'lelee, 'a -kɛ -me "Bhenyɔ -bholo "nɔgɔ "me.

'Demezoweli

² 'A 'bhubhɔ -godogodo, 'a 'kwa Lagɔ 'ŋlu -se 'a te 'diɔle.

³ 'A 'bhubhɔ -me 'lelee -anyɛɛ za, -se Lagɔ "kɛ -kɛ -gbɔ -se 'a "kɛ -kɛ 'ɔnɛɛ 'Denaade sɛ, -se 'a "kɛ 'ɔnɛɛ diɛweli gbɛklɛklɛ 'piɛ-. 'Ɛ diɛweli -wɛ Zezu Kli 'na "kukoweli yɛ -lɔ. 'Ɛ weli -wɛ za 'e -ko -lɔ -zeka -jiɛ "me.

⁴ Zaa, 'a 'bhubhɔ, -se 'e "kɛ 'ɔnɛɛ "kukoweli bhulɛ gbɛklɛklɛ.

⁵ -Wa "ne Klise -gɛle -wɛ 'na dɛku, 'a slu 'ayi 'ylimeyamalesɛ. Lagɔ 'na "tɛnye -ye 'ɔ 'nyɛ 'anye -wɛ, 'a 'sɛ kɔ.

⁶ -Se, 'anyɛɛ bhulɛweli 'piɛ 'dle -duku, 'ɛ 'lele- 'ŋwanaku. 'A -sɛ -ɔkɔkokɔko 'na weli keyi 'tee.

Bhɛleweli

⁷ 'Neɛ "kukoweli 'klekle Tisike 'cɛ -lɔ 'anye bhulɛle. 'Ɔ -noɔ -lɔ -ame "nɔwli "ne -ame 'tito yɔ, "kulɔbhɔnyɔ 'na -ɔ tɛle- Lagɔ 'dle "ne -nyɔ "bhaa -a -ko 'ɛ "Bhenyɔ 'na libhɔ ne "me yɔ -lɔ.

⁸ 'Ɔyi 'ye 'e lebhele -lɔ 'anye "ku -tiaa, -se 'ɔ "kɛ 'anye -anyɛɛ "kukoweli bhulɛle-, -se 'ɔ "kɛ 'anye 'kwɛme "tamalea-.

⁹ Onesime "kɛ -lɔ Tisike -gwe "ku kwɛle-. "Nɔwli 'na -ye 'e tɛle- 'dle "ne 'e -wa kpɛnyee yɔ -lɔ; 'Anyɛɛ moɔ 'na 'nyɔkpɔ yɔ -lɔ. 'Gɔme 'ye 'wa "kɛ -lɔ 'anye -ɛ -ko "ɛ mɛne 'klekle -wɛ -sɛle.

¹⁰ Alisetake, -nyɔ "bhaa -a -ko -jiɛ "me ne 'bhɛle 'anye. Malke, Banabase, 'ɔ "nɔwli 'bhɛle "me 'lelee 'anye. Maleke za 'wa "zo- 'anye 'de "me. Zaa, 'ɔ "kɛ -kɛ 'anyɛɛ moɔ -yi, 'a 'sɔ -kɛ 'tee.

¹¹ Zezu, -ye 'wa la Zutuse -wɛ 'bhɛle -me 'lelee 'anye. Zufonya 'glɛme 'na -wa "zo- 'klecɛnya -wɛ, 'wayikɔ "bhaa "ne 'a no -lɔ Lagɔ 'na 'kamale zikpɛ "me 'na libhɔ. 'Wa "tamalea- -ame 'kwɛme.

¹² Epaflase, -ɔ -noɔ 'anyɛɛ moɔ -nɔ yɔ -wɛ 'bhɛle 'anye. Zezu Kli 'na "kulɔbhɔnyɔ, -ɔ bhubhɔ 'anyɛɛ za, "ne 'ɔ "ne 'diɔle -wɛ yɔ -lɔ. 'Ɔ 'yɔbhɔ -gbɔ 'anyɛɛ Lagɔ zikpɛ me "klo "ku -se 'a "kɛ Lagɔ 'na -ye 'ɔ 'yɔbhɔ -wɛ yibhlele-, 'ɛɛ "kɛ -lɔ gbɔ "ne 'a "kɛ -lɔ "me "tamale-.

¹³ 'Ɔ no 'anyɛɛ za libhɔ kpɛnyee, Laodise 'na 'klecɛnya -nyɛ Yiɛlapolise -noa za: 'Mɔɔ -noɔ -lɔ -ɛnɛɛ' 'ɔyeɛdɛ yɔ.

¹⁴ Luke, -a 'tito -dotlɛyu, 'bhɛle 'anye 'ɔ -nyɛ Demase "bhaa.

¹⁵ 'A bhɛle -kɛ "nowlia -nyɛ "nɔyoa -wa -noɔ 'klecɛ 'waa, "ne -wa -ko Laodise -wɛ, Nimefa -nyɛ 'ɔnɛɛ -zakpɛ -wa "zole 'ɔnɛɛ -bhudu "me 'wli -wɛ "bhaa.

¹⁶ 'A kɛ "ɛ "bɔgo ne "me -zɛle "bhuɔ ne, 'a "pɛ Lagɔgligbɛ -ɛ -ko Laodise -wɛ "ku, -se "bhle 'na 'klecɛnya 'cɛ "me zɛle -me. -Se 'anye, "bɔgo -ɛ "kɛ Laodise 'bhale- -wɛ, 'a zɛle -me "me.

¹⁷ 'A bhulɛle Alekipe nɛɛ: «-See Anyinɛnyɔ 'na libhɔ -ye 'e no -gbɔ no -wɛ, no -kɛ 'dlekɛlesɛ!»

¹⁸ -Ame Pɔle, 'neɛ sɔ nu 'ye 'e 'kɛle "lɛ bhɛleweli ne. 'A yibhlele- 'sɛ -gbɔ -jiɛ "me 'ye 'e -ko -lɔ! Lagɔ "pɔ 'anye 'ŋu!