Kolɔsenya 3 - Nouveau Testament bété de Gagnoa

-Zikpɛ -gɔgɔ "ne zikpɛ -lele

¹ Klise "bhaa 'wa -goliale -lɔ 'anye -glukonya 'glɛme, 'a -yi sɛ. Zaa, 'a tɛle- "nɔgɔ "me 'na -li 'siɛ, -dee Klise -ko, "ne 'ɔ 'gli- Lagɔ 'na lilikwlɛ -gbɔsɔ "ku -wɛ.

² 'Anyɛɛ zikpɛ 'na 'wlisɛledɛ, "nɔgɔ "me yɛ -lɔ, -mɔ, 'ɛ "ne dodo ne "ku yɛ.

³ 'Diɛɛ, "kwiɛ 'ye 'a -ylɛle -lɔ "me, "ne 'anyɛɛ zikpɛ zizɔ- Klise "me Lagɔ kɔ.

⁴ Klise -noɔ -lɔ 'anyɛɛ zikpɛ yɔ. -Zle 'ɔ -kɛ 'ce dodo ne "ku -yi, 'ɔ yi 'ce 'ɔyi -glɔnya 'ylime -tua, "ne 'anyɛɛ Lagɔ zikpɛ yi 'ce 'yli ple "ne 'a yi 'ce 'ɔnɛɛ 'ŋlumeɛ -wɛ 'na 'didi "me -ko -me.

⁵ -Ɛwɛza, -ɛ -noɔ dodo ne "ku -nɛ yɛ, "ne 'ɛ -ko 'anye "me -wɛ, 'a lɛbhɛ -se 'ɛ ku: Sɛgbɛɛ 'kpeteklinya "bhaa 'na gogoɛ, -li -nyɛnye 'na nonoɛ, -li -ɛ -le 'zu "ku "ne 'ɛ "ne 'nɛne 'na -wamaleɛ, 'dle "me 'gugwaleɛ, 'ɛ -ko sɛgbɛɛ "fu 'na Lagɔ 'na "zozoɛ.

⁶ -Ɛwɛ 'klekle gbɔ -lɔ "ne Lagɔ 'pɔ -lɔ 'kɛle, 'nyakpa 'na -wa no gbɔ 'wa -kɔ 'plome "zo -wɛ 'na dɛku.

⁷ Bhlɛme, 'anye 'lelee, -ye 'a -ko -me nɛ "ɛ soɔ -wɛ, 'a no nɛ "ɛ -ye 'wa no 'doɔ -wɛ.

⁸ -Mɔ, -dɛmeda, 'a 'tale- "ɛwɛ 'klekle yi: 'Kɛle, 'kpokpo, -konyinɛ. "Ne 'slowli -nyɛ weli -nyɛnye -wɛ 'wɔ "bhaa te -la 'anye nu ylɛle!

⁹ 'A te -la yo yɔko 'wlɛwlɛle-. -See 'wa sɛ "meplakoti -gɔgɔ "me -wɛ, sɔbhɔ 'ye 'a 'tale- -lɔ 'anyɛɛ nonoli -nyɛnye -wɛ 'yi.

¹⁰ "Ne 'ɛ -ko sɛgbɛɛ 'koti -lele 'ye 'a -pla "me. "Ne 'ɔ 'wlole -lɔ 'ɔnɛɛ 'wlɛnyɔ 'yiɛ. 'Ɛ "kɛ -lɔ -gbɔ "ne 'a "kɛ -lɔ Lagɔ yibhlele- -tiaa.

¹¹ -Dɛmeda, zufonyɔ "ne -da -le, Glɛkeyu "ne -da -le, "kudiɔnyɔ "ne -da -le, -ɔ "ne "ku diɔ- "ne -da -le. Lowlinya "ne -da -le, 'kwlɛnya "ne -da -le. 'Juyua "ne kɔyelenya "ne -da -le. -Mɔ, Klise -le -lɔ, 'ɔ -noɔ -lɔ 'klekle yɔ, "ne 'ɔ -ko -lɔ 'klekle "me.

¹² Lagɔ -tɔ 'anye, 'ɔ 'yɔbhɔ -gbɔ 'a "zo 'ɔnoa, "ne 'ɔ -wa 'anye. Zaa, 'a 'piɛ "bhle 'dle -se 'a 'kɛle- 'nyɛze 'dle, -se 'dlezɔ ko 'anye foo, 'ɛ "zo -zigbadle, -bɔŋodle.

¹³ 'A 'slu -slule. 'Nyɔkpɔ kɛ 'ɔluyu "nyɛnye 'wli -no ne, 'a 'tale- 'yi. -Se Anyinɛnyɔ 'tale- 'anyɛɛ "nyɛnye 'yi -wɛ, 'a no -me sɔbhɔ!

¹⁴ -Mɔ, 'a -wale -tiaa: -Waleɛ gbɔ -lɔ "ne 'nyakpa 'kole -lɔ "ku 'tee.

¹⁵ Klise 'na "kuwɛtɛ ko 'anye 'dlezɔ! "Kuwɔtɛ -wɛ za Lagɔ la- -lɔ 'anye, -se 'a "kɛ "ku- -bholo "zo. 'A 'bhɛle- Lagɔ -godogodo.

¹⁶ Klise 'na weli -ko 'anye 'glɛme, 'ɛ -nyɛ 'ɛnɛɛ -klɔgbɔ 'klekle "bhaa. 'A 'sloasloale 'ylimeyamalesɛ, -se 'a "zozole 'de "me. 'A 'bhɛle- Lagɔ 'anyɛɛ 'dle 'klekle zɔ, 'a bhle lo: Some, Lagɔ -lo 'na -ye 'a 'wɛlɛ- 'ayigɛsɛ -wɛ "ne lo -ye Zuzu Wlewle pɔ 'anye -gwe "ku -wɛ.

¹⁷ Weli 'klekle -ye 'a "kɛ bhulɛ, -li 'klekle -ye 'a "kɛ no -wɛ, 'a 'no Anyinɛnyɔ Zezu 'na 'tɔ "me, 'a ylɛlo- "me -se 'a "kɛ To Lagɔ bhɛle-.

-Kosɛ -lele

¹⁸ 'Ŋwenea 'nye, 'a "zo 'a "luwlia 'wɔ 'plome, -see Anyinɛnyɔ 'yɔbhɔ -wɛ.

¹⁹ 'Widia 'nye, 'a -wamale 'anyɛɛ 'ŋwenea "ne 'a wɔtɔ 'wanɛɛ za 'dle.

²⁰ Yua 'nye, 'a "zo 'anyɛɛ 'gwɛlenya 'plome -li 'klekle "me, -ɛ -le Anyinɛnyɔ 'tɔ "ku -wɛ -lɔ.

²¹ To 'wanye, 'a te yua 'dle 'nuɔ yiɛ. 'Kwɛme toa -kɛ yɔle-.

²² 'Juyua 'nye, 'a "zo 'anyɛɛ "bhenya 'plome dodo ne "ku 'na -li 'klekle "me. -Dee 'wa -kole 'anye "klo -wɛ 'ye 'a -na toa "kulɔbhɔ 'ɛyikɔ, 'nyakpa 'na 'ŋwɛnɛ labha- 'sɛku. -Mɔ, 'a lɔbhɔa "ku 'dletɛlesɛ, "naa-, 'a "zo Anyinɛnyɔ Lagɔ 'plome zɛ.

²³ -Li 'klekle -ye 'a no -wɛ, 'a no 'dle -bɔŋobɔŋo "me Anyinɛnyɔ za, -mɔ 'ɛ "ne 'nyakpa za yɛ.

²⁴ "Naa-, 'a -yi sɛ -gbɔ Anyinɛnyɔ yi 'ce 'anye -bɛɛ' 'na "namanɔ kɔ 'je. 'A yi 'ce -li 'na "namanɔ -ye 'ɔ -sɛ lɔbhɔ 'ɔnɛɛ 'nyakpa za -wɛ yle. Anyinɛnyɔ -gbaa -ye 'a lɔbhɔ "ku -wɛ, Klise yɔ -lɔ.

²⁵ 'Nyɔkpɔ 'na -ɔ no "nyɛnye -wɛ, "nyɛnye -ye 'ɔ no 'na 'gbo 'ye 'ɔ "kɛ -lɔ yle. "Naa-, Lagɔ 'gbezi 'nyaka "me.