Kolɔsenya 2 - Nouveau Testament bété de Gagnoa

¹ 'A yibhlele- sɛ -gbɔ 'e yi kɔ gwele kpɛnyee 'anyɛɛ za, 'klecɛnya -wa -ko Laodise -du "me -wɛ za, "ne 'anye 'klekle -wa -na 'ce -zɛ -ame 'ylime 'ye -wɛ za.

² 'E 'yɔbhɔ -gbɔ 'wa "tamale 'dleku, -se 'wa -kole "ku 'ŋwɛnɛsɛ, -se 'wanɛɛ "nanoɛ 'kpɔmale-, -se 'wa "kɛ Lagɔ 'na -ɛ zizɔ- "ku -wɛ yibhlele-, Klise -noɔ -lɔ -ɛ zizɔ- "ku -wɛ yɔ,

³ "naa-, Klise 'ɔyikɔ "me 'ye -a yle -lɔ "nanoɛ -nyɛ 'ylimeyamaleɛ "bhaa.

⁴ 'E bhulɛle 'anye "ɛ -soɔ, -se 'nyakpa te "kɛ 'anye bhulɛweli "namanɔ "me ylo nole- zɛ.

⁵ 'A kɛle- 'dleku, 'e 'tlole 'anye 'dɛ, -mɔ, 'neɛ 'dle -ko 'anye "ku. 'Ŋwɛnɛ lɔbhɔ -ame -ye 'e 'ye 'anyɛɛ moɔ 'na -li -ɛ -ko -kpee 'ylime -wɛ "ne 'anyɛɛ Klise 'na 'dlekukɛleɛ -nyenyi klekle -wɛ za.

Klise -bholo -kpee 'nyɛ -lɔ zikpɛ

⁶ 'A yle Klise Zezu sɛgbɛɛ Anyinɛnyɔ, zaa, -ɔ -nyɔ "bhaa 'a 'kole "ku.

⁷ 'A 'kɛle- -kpulu 'ɔyi "me, 'a 'sɔbhɔle 'anyɛɛ zikpɛ Klise "me, 'dlekukɛleɛ -ye 'wa 'sloa- 'anye -wɛ, 'a 'kɛle- kɔ klekle, -se 'a bhɛle Lagɔ -ka -ka -ka.

⁸ 'A 'luɔ- -kɛ! 'Nyɔkpɔ te -kɛ 'anye bhulɛweli 'na -ɛ "ne -bɛɛ' "me -ko, "ne 'ɛ -noɔ 'nyakpasɛ "ku 'na "nanoɛ yɛ -wɛ 'na -gbotu 'anye cile-, -Lɔ -ye 'wa 'wlɛ- 'wayigɛsɛ -wɛ yo yɛ -lɔ, 'nyakpa 'na -Lɔ "me 'ye 'ɛ 'bhale -lɔ, -mɔ, Klise "me 'ye 'ɛ -na 'bhale-.

⁹ "Naa-, Lagɔ 'na 'bhɛloɛ 'klekle Zezu "me 'ye 'ɛ -ko -lɔ.

¹⁰ "Ne 'anye Klise 'na zikpɛ 'ye 'a -ko -lɔ "me gou. 'Ɔyi -ɔɔ -noɔ -kamaleɛ "ne 'bhɛloɛ 'klekle 'na "cifi yɔ -wɛ.

¹¹ Klise "me -ye 'wa 'dile- 'lelee -lɔ 'anye "ku zɛ. "Ɛ "kudiɛ -wɛ, 'nyɔkpɔ 'na sɔ "me 'ye 'ɛ "ne -noɔ, -mɔ, Klise "me 'ye 'ɛ 'bhale -lɔ, 'ɛ -gbɔ "ne 'a no "nyɛnye -wɛ 'ye 'ɔ sɛ- -lɔ lɔbhɔ.

¹² Batɛme "me, Klise "bhaa -biɛ "me 'ye 'a -gbale -lɔ, "ne 'ɔyi "bhaa 'a yi -lɔ 'gɔme gluzɔ 'wlole. "Naa-, Lagɔ 'na 'bhɛloɛ, -ɛ -sɛ Klise -glukonya 'glɛme -wɛ -ye 'a -kɛle -lɔ 'dleku zɛ.

¹³ 'Anye, 'a "ku- 'awɔ 'anyɛɛ 'nyinyonoli 'na gbo "me, "ne 'a "ne 'awɔ 'lelee "ku diɔ- zɛ. -Mɔ, 'ɛ -ko sɔbhɔ "ne Lagɔ 'nyɛ- 'anye zikpɛ Klise "me, "ne 'ɔ 'tale- -anye 'klekle 'na 'nyinyonoli 'na gbo 'yi,

¹⁴ -Anyɛɛ 'gɛgbo 'ye 'ɔ "titli- -lɔ "ku, 'gɛgbo -ye -a libhi- nɛ "ku, "ne 'ɛ yelea nɛ -anye gbo -gbagbɛ 'na 'kɔkɛleɛ "me -wɛ, 'ɛnɛɛ "bɔgo 'ye 'ɔ -kole -lɔ klowa "klo.

¹⁵ Lagɔ -sɛ zuzu -wɛ 'wɔ 'na 'bhɛloɛ -nyɛ 'wanɛɛ -kamaleɛ "bhaa kɔ. "Ne 'ɔ yua -lɔ -glɔnya 'ylime -tua sɛgbɛɛ -jiɛnya. 'Ɔ Yowli 'na gluzɔ -wlo "tɛnye -wɛ "me.

¹⁶ Zaa, 'nyɔkpɔ te -kɛ 'anye gbo lua, 'anyɛɛ -ye 'a li "ne -ye 'a nɔmɔ -wɛ, 'ɛ -nyɛ 'ce 'na glu -wlo -jajo -nyɛ -gbajɛ "bhaa za.

¹⁷ -Ɛwɛ 'klekle -ɛ "kɛ yi -wɛ 'na zuzu yɛ -lɔ, -mɔ, -ɔ -le -diɛnadiɛ -wɛ Klise yɔ -lɔ.

¹⁸ 'Nyɔkpɔ te kɛ 'anye -see 'a "kɛ 'wli "ku -to -wɛ 'na 'gbo 'dleku -sɛ. 'E 'pɔ 'nyakpa 'na -wa 'kwlilea 'wayi "ku "nɔgɔzilia 'yliku "ne 'wa bɔboa -wɛ "ku 'dle. "Ɛ 'wayi -wɛ 'ylaylɛweli 'wa zia -lɔ "ku. Sɔbhɔ 'na 'nyakpa -wɛ, 'nyakpa sɛku 'wa 'pɔ -lɔ 'dle, "ne 'wa zia -lɔ 'wayi "ku 'bhabha -za.

¹⁹ 'Wa "ne Klise -ɔ -noɔ ku 'na 'wli yɔ -wɛ 'glɛ -glɛ. "Ne "ɛ 'wli -wɛ -su -lɔ "ɛ ku -wɛ 'klekle. 'Ɛ -gbɔ -lɔ "ne -a 'bha -lɔ bhulɛ "me 'tee, Lagɔ 'kpamalea -lɔ "ɛ ku -wɛ "ku -se 'ɔ 'yɔbhɔ -wɛ.

²⁰ Klise "bhaa 'gɔme 'ye 'a "kule- -lɔ, "ne dodo ne "ku 'na 'bhɛloɛ "ne -la -bɛɛ' "me -ko 'anyɛɛ dɛku. -Mɔ, 'a no sɛgbɛɛ "ɛ -ɛwɛ 'wɔ 'na zikpɛ 'ye 'a -ko -namlɛ "ku ne. Sɔɔbɛɛza, 'a "zo bhɔ "ɛ -gbagbɛ ne 'wɔ 'plome 'a:

²¹ «Te -kɛ -ɛne "ku 'libhi! Te -kɛ -ɛwɛ li! -Se te -kɛ -ɛwɛ kɔ 'sa.»

²² 'Ɛ -li -wɛ 'wɔ -ye 'wa -tea 'anye -wɛ "ku 'ye 'ɛ bhiɛ -kɛ. -Gbagbɛ 'na -ɛ 'bhale 'nyakpa "me yɛ -lɔ zɛ!

²³ 'Diɛɛ yɛ -lɔ, bɔbɔbɔbɔɛ -ye 'a "zo 'ayigɛsɛ -wɛ, "nɔgɔzilia 'yliku 'na "kukwlialeɛ, ku 'na kplakplɛɛ, 'ɛwɛ 'klekle -ko sɛgbɛɛ "nanoɛ. -Mɔ, 'ɛ -gbagbɛ -wɛ "ne -bɛɛ' "me -ko, "naa-, 'nyakpa 'na 'dlepɔsɛ 'ye 'ɛ 'labha -lɔ 'ŋwɛnɛ.