Kolɔsenya 1 - Nouveau Testament bété de Gagnoa

Bhɛleweli

¹ -Ame Pɔle, Zezu Kli 'na "kɔlepɔnyɔ 'ye 'e -noɔ -lɔ, sɛko -wɛ, Lagɔ 'yɛbhɛ -lɔ zɛ. -A "nɔwli Timote "bhaa, 'e kɛle lɛ

² 'anye, -wa -noɔ Lagɔ -noa 'waa, "ne -wa -ko Kolɔse -wɛ "ku, -nyɔsɔ 'wɔ -wa -kɛ Klise 'dleku -wɛ, -a To Lagɔ 'pɔ 'anye 'ŋu, -se 'ɔ 'nyɛ 'anye "kuwɛtɛ!

Pɔle bhɛle Lagɔ

³ -A kɛ bhubhɔ ne, -a bhɛle 'ce 'anyɛɛ za Lagɔ -godogodo, Anyinɛnyɔ Zezu Kli 'ɔ To.

⁴ -Ye -a 'no- 'anyɛɛ dɛku ne lɛ: 'A -kɛ Zezu Kli 'dleku, "ne 'a -wa -wa -noɔ Lagɔ -noa 'waa 'klekle -wɛ.

⁵ "Naa-, 'a "tɛle -ye Lagɔ -sɛ lɔbhɔ 'anyɛɛ za "nɔgɔ "me -wɛ 'dle. -Ye 'Denaade -ɛ -noɔ gbɛklɛklɛ -weli yɛ -ylɛ 'anyɛɛ -moɔ -wɛ, 'ɛɛ -gbɔ -lɔ "ne 'a yi -lɔ "ɛ 'dletɛleɛ ne yibhlele-.

⁶ "Ɛ 'Denaade ne tlo -lɔ bhi, "ne 'ɛ 'ŋwɛne -lɔ -glɔ 'klekle "ku. "Ɛ sɛbhele -wɛ 'ye 'ɛ -ko -me -lɔ 'anyɛɛ mɛce, -se 'wa "mɔ 'awɔ 'anye Lagɔ 'na -jɔlo -de -sɛle ne, "ne -se 'a "mɔ 'awɔ "me 'no -gbɔ Lagɔ -wa 'anye 'diɛɛ.

⁷ Epaflase, -ɔ -noɔ -a 'tito yɔ, "ne 'ɔyi "bhaa -a -no libhɔ -wɛ, 'ɔ sloɛ -lɔ 'anye. 'Ɔɔ -ko -lɔ -anyɛɛ 'bhulɛ "me 'anye yɔko sɛgbɛɛ Klise 'na "kulɔbhɔnyɔ -ye 'a "kɛ 'dle "tɛle.

⁸ "Ne 'ɔ yi -lɔ -anye -waleɛ -ye Zuzu Wlewle "zo- 'anye "me -wɛ 'sloa-.

⁹ 'Ɛza, -anye 'lelee, -se -a "mɔ 'awɔ 'anyɛɛ "kukoweli yibhlele-, -a 'bhubhɔ 'anyɛɛ za "ne -a "ne 'diɔle-. "Ne -a zlɛ -lɔ Lagɔ -gbɔ 'ɔ 'nyɛ 'anye 'ylimeyamaleɛ "ne "nanoɛ 'klekle, "ne -bɛɛ' 'na -ɛ 'bhale 'ɔnɛɛ Zuzu "me -wɛ. Lɔbhɔ 'na dɛku, 'a yi -ye 'ɔ 'yɔbhɔle- 'anye "me -wɛ yibhlele- gou.

¹⁰ Lɔbhɔ 'na dɛku, 'a yi 'ce Anyinɛnyɔ 'na -se 'ɔ 'yɔbhɔ -wɛ ko, "ne 'a yi 'ce -li 'na -ɛ 'nɛno -gɛ 'klekle -wɛ no, "ne 'a yi 'ce bhi tlo, "ne 'a yi 'ce Lagɔ yibhlele- 'yiɛ.

¹¹ Lagɔ 'na 'bhɛloɛ "yitɛ yi 'ce 'anye -li 'klekle za 'kwɛme "tamalea-. Lɔbhɔ 'na dɛku, 'a yi 'ce 'lelee "me "tamale-, "ne 'a yi 'ce 'dleku "tamaleɛ yle 'anye 'klekle -wɛ za. 'Ŋwɛnɛ sɛku,

¹² 'a bhɛle To: 'Ɔɔ -gbɔ -lɔ "ne 'a yi -lɔ -li 'na -ye 'ɔ -sɛ lɔbhɔ 'wlewle 'wanɛɛ "ku, 'ɔnɛɛ 'kamale zikpɛ "me 'na zle "ku -wɛ yle.

¹³ 'Ɔ -sɛ -anye titiɛ "me, "ne 'ɔ yi -lɔ -anye 'ɔnɛɛ -wawayu 'na 'Kamalezikpɛ "me 'ylalea-.

¹⁴ "Ɛ yu ne "me, -anyɛɛ 'galu diɔ-, -anyɛɛ 'nyinyonoli 'na 'gbo "taleɔ- 'yi.

-A -ya 'dile Klise, -glɔ 'klekle 'na Anyinɛnyɔ lo keyi

¹⁵ Klise -noɔ -lɔ Lagɔ -ye 'wa "ne 'ye 'ylime -wɛ 'na 'wlole yɔ. 'Ɔ -noɔ -lɔ -ye 'wa -gwɛle- tɛɛ yɔ, -ɔ 'zi -lɔ -li 'klekle -ɛ 'wlɔ- -wɛ "ku.

¹⁶ "Naa-, 'ɔyi "me 'ye Lagɔ 'wlɛle- -lɔ -li 'klekle, "nɔgɔ "me, "ne Dodo ne "ku, -li 'na -ɛ -gɔ 'yli, "ne -ɛ "ne 'yli -gɔ -wɛ, -wa 'tɛ- 'kwɛme, "ne zuzu -wa 'kamalea, "ne -wa -kɛ 'bhɛloɛ -wɛ. -Ɔ 'wlɛ- -lɔ 'klekle, "ne 'ɔ 'bhe- -lɔ.

¹⁷ Klise -le "kle, "ne -li yi -lɔ 'wlɔ-. "Ne -ɛ -le 'klekle -wɛ, 'ɔnɛɛ za 'ɛ -ko -lɔ lɔbhɔ.

¹⁸ 'Ɔ -noɔ 'lelee -lɔ 'ɔnɛɛ ku 'na 'wli yɔ, 'ɛ sɛ zɔ nɛɛ: Lagɔgbibgɛ. 'Ɔ -noɔ -lɔ "kucileɛ yɔ, 'ɔ -noɔ -lɔ tɛtɛ 'nyɔkpɔ -ɔ 'wlo- gluzɔ yɔ. -Se 'ɔ "kɛ 'wayi 'klekle 'yuku 'gɛle-, -moɔ 'klekle, "ne -godogodo.

¹⁹ 'Diɛɛ, Lagɔ 'glile- -ɔ Yowli "me gou, -se 'ɔ 'yɛbhɛ yɛ -lɔ.

²⁰ "Ne 'ɔ 'yɔbhɔ -gbɔ 'ɔ "kɛ -li 'klekle -nyɛ 'ɔ Yowli "bhaa 'gbo -selia, 'ɔ Yowli "me, "ne 'ɔ Yowli za. "Ɛ 'ɔ Yowli 'na 'dlu -ye 'ɔ 'slu- klowa "klo 'siɛ -wɛ "me -ye Lagɔ -nɛme -lɔ "kuwɛtɛ, dodo ne "ku, "ne "nɔgɔ "me.

²¹ 'Anye, -watɔ 'ce, lowlinya 'ye 'a -noɔ nɛ -lɔ Lagɔ za, 'a -noɔ nɛ 'ɔnɛɛ -gblenya 'waa. "Naa-, 'a 'pɔ nɛ 'dle -gbɔ 'a "kɛ nɛ "nyɛnye no, "ne 'a no nɛ 'yiɛ!

²² -Mɔ, -dɛmeda, Lagɔ "bhaa 'a seliɔ- 'gbo 'ɔ Yowli 'na 'kwiɛ "me, -ɔ 'gbape- 'nyɔkpɔ sɛku -wɛ. Lɔbhɔ 'na dɛku, 'a yi Lagɔ 'yliku -ko 'wlewle, 'wlele, "ne 'a -ka 'nuɔsɔbhɔledɛ kɛle-.

²³ -Mɔ, 'a "tamale- "me 'dlekukɛleɛ "me. 'A te 'se 'Denaade 'guɔ 'ylile-: 'Ɛyi -ye -a "tɛle- -lɔ 'dle. 'Wa -sɛle -wa -ko dodo ne "ku 'klekle -wɛ 'de, 'a 'no -me "me, "ne -ame Pɔle, 'e yi -lɔ "ɛ 'Denaade ne 'na "kulɔbhɔnyɔ "zo.

Pɔle 'gbape, "ne 'ɔ 'gwele Lagɔgligbɛ 'na libhɔ za kɔ

²⁴ -Dɛmeda, 'ŋwɛnɛ lɔbhɔ -ame -ye 'e 'gbape 'anyɛɛ za -wɛ. "Naa-, 'neɛ ku "me, 'e 'gbape -me -nazɛ Klise 'na -see 'ɔ 'gbape 'yiɛ -wɛ 'ɔnɛɛ ku za, 'ɛ sɛ zɔ nɛɛ: Lagɔgligbɛ za.

²⁵ 'E "zo- Lagɔgligbɛ 'na "kulɔbhɔnyɔ, -se 'e "kɛ libhɔ -ye Lagɔ no -gbɔ 'e no -wɛ no: 'E "kɛ 'anye Lagɔweli 'klekle -sɛle.

²⁶ "Ɛ bhulɛweli ne, -ɛ 'nunadleku -ɛ zizɔle- 'ce -godogodo ŋeyi 'klekle 'ylime -wɛ yɛ -lɔ. -Dɛmeda, Lagɔ -tuɛ -wa -noɔ 'ɔnoa 'waa -wɛ 'ylime gbɛklɛklɛ.

²⁷ 'Ɔ 'yɔbhɔ nɛ -gbɔ 'ɔ "koa -ɛ 'nunadleku ne 'na "kpɔmalesɛ, "ne -klɔgbɔpɔsɛ 'sloa-. "Ɛ -ɛ 'nunadleku ne 'nyakpa 'klekle -nɛ yɛ -lɔ, 'ɛɛ ne lɛ: Klise -ko 'anye -jijɛku "ne 'ɔyi "me, 'a -kɛ 'dleku -gbɔ 'a yi Lagɔ 'na 'ŋlumeɛ 'na dɛ "ye.

²⁸ "Ɛ Klise ne 'na 'de 'ye -a sɛ -lɔ. "Ne -a "zo -lɔ -ɔkɔkokɔko 'de "me, "ne -a 'sloɛ -lɔ "nane sɛku, -see 'wayi 'klekle "kɛ Klise "me "gɔbhɔle.

²⁹ 'Ɛza, 'e no -lɔ libhɔ, "ne 'e "tɔtɔle -lɔ 'ayikɔ Klise -ɔ -ko -ame "me 'ɔnɛɛ 'bhɛloɛ "bhaa -wɛ za.