3 Zaa 1 - Nouveau Testament bété de Gagnoa

Bhɛleweli

¹ -Ame, 'mɔɔ -noɔ 'dlekukɛlenya 'na "yitɔ yɔ ne, 'e 'kɛle Gayiuse, 'tito -awale "ne -ye 'e -wa -diɛnadiɛ -wɛ "ku.

² 'Na -wawa 'tito, 'e 'yɔbhɔ -gbɔ -neɛ' -li 'klekle me "bhle, -se -neɛ' 'kwɛme "tamale- 'ce yiɛ, -se -neɛ' Lagɔ -zikpɛ "mɔme- 'lelee 'yuku.

Gayiuse "tɛle- Lagɔ 'dle

³ "Nowlia 'na -bedia -yi mɛne, 'wa -bhulɛ -neɛ' "ku -ko -weli -see gbɛklɛklɛ -ko -neɛ' 'dlezɔ "ne 'e 'nɔŋo- gbɛklɛklɛ "me, "ɛ weli -wɛ "zo- -ame 'ŋwɛnɛ -kwleyi 'dlezɔ.

⁴ -Ye 'e 'no- "me -gbɔ -neɛ' yua 'nɔŋo gbɛklɛklɛ "me -wɛ, -ɛ "zo- -lɔ 'neɛ 'ŋwɛnɛ "yitɛ.

⁵ 'Na -wawa -tito, -e -su 'klecɛnya 'tee, 'wa kɛ 'se lowlinya 'waa -ce. -E kɛ "ɛ soɔ no 'yiɛ ne, 'dletɛlenyɔ 'ye -e -noɔ -lɔ.

⁶ Lagɔ 'na -gligbɛnya 'yliku, 'wa -sɛ -neɛ' -see -e 'kwɛle 'nyakpa -wɛ 'na 'de. Zaa, 'wanɛɛ 'gloku -mee 'wa me -wɛ, 'kwɛloa- -see 'ɛ 'nɛne Lagɔ -gɛ -wɛ.

⁷ "Naa-, Klise 'na 'tɔ "me 'wa -bhli -lɔ "ɛ -gwe -wɛ, "ne 'wa "ne -wa "ne Lagɔ -yi -wɛ -bɛɛ' 'yɔbhɔle-.

⁸ Zaa, -anye, -a yi "ɛ -soɔ 'na 'nyakpa -wɛ 'wɔ kwɛle-, -se 'wayi 'wɔ "bhaa -a "kɛ libhɔ no, -se gbɛklɛklɛ kɛ -glɔ zɔ ŋwɛne-.

Diɔtlefɛse "ne Demetliuse 'wanɛɛ "kukoweli

⁹ 'E kɛle- "bɔgo -bhueyi lagɔgligbɛ "me 'na 'nyakpa "ku, -mɔ, Diotlefɛse, -ɔ -wa 'ɔlua 'na 'yliku -ko weli, 'ɔ "ne "zo -anye "klo 'kpɔ "me.

¹⁰ 'Ɛnɛɛ za, -zle 'e kɛ -yi, 'e yi nyɛnye 'klekle -ye 'ɔ -no -anye 'wli -wɛ 'na weli bhulɛ: 'Ɔ -wlɛle -anye yo yɔko, 'ɛ "ne -ɛwɛ 'ɛyikɔ yɛ. 'Ɔ sɛ 'klecɛnya 'na -vinoa 'na 'tee sa -lo. "Ne -bedia kɛ no -gbɔ 'wa "koa 'tee 'sa, 'ɔ 'titua 'yliku, "ne 'ɔ 'kpetua -lɔ lagɔgligbɛ "me.

¹¹ 'Na -wawa 'tito, te -ɛ "ne 'nɛne -wɛ 'didale-, -mɔ, 'didale- -ɛ 'nɛne -wɛ. -Ɔ no 'nɛne -wɛ, Lagɔ -nɔ yɔ -lɔ, -ɔ no "nyɛnye -wɛ "ne Lagɔ -yi.

¹² 'Nyakpa 'klekle bhulɛ Demetliuse 'na weli "namanɔ, gbɛklɛklɛ 'nabhɛ bhulɛ 'ɔnɛɛ "kukoweli. -Anye 'lelee, -a sɛ -me 'ɔnɛɛ 'de, "ne 'e -yi sɛ -gbɔ -anyɛɛ 'desɛweli 'diɛɛ yɛ -lɔ.

Zaa 'na 'bebhiɛleweli

¹³ -Ye 'e "kɛ -eyi bhulɛle- -wɛ -zu kpɛnyee, -mɔ, 'e "ne 'yɔbhɔ -gbɔ 'e 'cɛ 'kɛle.

¹⁴ 'E -kɛ 'dleku nɛɛ: 'E "kɛ -eyi 'ylime 'ye 'na dɛ "ne -la "me tlo, -se -a "kɛ -duku gli- -se -a "kɛ lɛtɛ.

¹⁵ "Kuwɔtɛ ko -eyi "ku! Mɛne 'na 'titoa bhɛle -eyi. 'E bhɛle me 'lelee mɛce 'na 'titoa, -bholo -bholo.