2 Zaa 1 - Nouveau Testament bété de Gagnoa

Bhɛleweli

¹ -Ame, -ɔ -noɔ 'dlekukɛlenya 'na "yitɔ yɔ ne, 'mɔɔ 'kɛle lɛ "bɔgo ne. 'Ŋɔnɔ 'na -ye Lagɔ -tɔ -wɛ, 'ɔyi -nyɛ 'ɔnɛɛ yua "bhaa 'ye 'e 'kɛle lɛ "ku. 'E -wa 'anye 'klekle gbɛklɛklɛ "me, 'ayikɔ 'mɔɔ "ne -kɛ 'anye -wa, -mɔ, -wa -ko Lagɔ 'na gbɛklɛklɛ "me -wɛ -wa -me -kɛ 'anye.

² -A -wa 'anye "naa- gbɛklɛklɛ -ko -anye "me zɛ, 'ɛ yi 'ce -anye "me -ko -godogodo.

³ To Lagɔ, "ne 'ɔ Yowli Zezu Kli 'pɔ -anye 'ŋu, -se 'ɔ "nyɛ -anye 'nyɛzedlekɛleɛ "ne "kuwɛtɛ, -se -a "kɛ 'ɔnɛɛ gbɛklɛklɛ -nyɛ -waleɛ "bhaa "me ko!

Gbɛklɛklɛ "ne -waleɛ

⁴ 'Ŋwɛnɛ lɔbhɔ- -ame kpɛnyee, -ye 'e -ylele 'neɛ yua 'na -bedia gbɛklɛklɛ "me -wɛ, -see To no -gbɔ -a "zo -wɛ yɛ -lɔ.

⁵ "Ne -Dɛmeda, "nɔyɔ, -ye 'e 'yɔbhɔle -eyi "me lo ne lɛ: -A wawale-! Gbagbɛ -lele 'ye 'e -na -kɛ -dɛne -eyi "ku 'kɛle, -mɔ, "kucidɛku 'na gbagbɛ -ye -a -su -wɛ yɛ -lɔ.

⁶ -Waleɛ, Lagɔ 'na gbagbɛ 'na kɔkɛleɛ yɛ -lɔ. "Ne gbagbɛ -nyɔ 'na weli 'ye -a 'no- 'awɔ "kucidɛku -wɛ -noɔ -lɔ -gbɔ: 'A slule- 'ayi -waleɛ "me!

'A 'luɔle- -kɛ -sloanya -gbeyia "ku!

⁷ Yowlɛnya 'na 'kwleyia -ŋwɛne -glɔ 'klekle "ku. 'Wa "ne yibhlele- -gbɔ Zezu Kli -yili -diɛnadiɛ 'nyɔkpɔ "me. "Ɛ 'nyakpa -wɛ, yowlɛnya "ne Klise 'na -gblenya 'waa -lɔ.

⁸ 'A 'luɔle- -kɛ 'ayi "ku! -Se 'a te -kɛ libhɔ 'na -ye 'a -no -wɛ 'na 'peɛleɛ 'beku 'bha-, -se 'a "kɛ -kɛ 'ɛyi 'klekle yle.

⁹ 'Nyɔkpɔ 'na -ɔ "ne 'ɔyi Klise 'na sloaweli "me -slule "ne 'ɔ 'peliɛ "ku -wɛ, 'ɔ -nyɛ Lagɔ "bhaa 'wa "ne "ku -kole. -Ɔ -slule 'ɔyi Klise 'na sloaweli "me -wɛ 'ɔ -nyɛ To "ne Yu "bhaa 'wa -kole "ku.

¹⁰ 'Nyɔkpɔ kɛ 'anye lo -yli ne, "ne 'ɔ "mɔ "ɛ sloaweli -wɛ nu -su, 'ɔ te 'anye "ku 'plɛ-, 'a 'to bhɛle.

¹¹ -Mɔ, 'nyɔkpɔ -ɔ bhɛlo -wɛ, "ɛ 'nyɔkpɔ -wɛ 'na nonoli -nyɛnye -wɛ 'ye 'ɔ no -me -lɔ.

'Bebhiɛleweli

¹² -Ye 'e "kɛ 'anye bhulɛle- -wɛ zu, -mɔ, 'e "ne 'yɔbhɔ -gbɔ 'e 'cɛ "bɔgo "me "zo 'klekle, sɛko -wɛ, 'e 'yɔbhɔ -gbɔ 'e "kɛ 'anyɛɛ moɔ yi, -se -a "kɛ -duku 'gli, -se -a "kɛ bhulɛ-bhulɛle-, -se -anyɛɛ 'ŋwɛnɛ "kɛ "meŋwinɛle-.

¹³ -E "nɔyɔ -ye Lagɔ -tɔ -wɛ 'na yua nɛɛ 'wa bhɛle -eyi.