2 Timote 4 - Nouveau Testament bété de Gagnoa

Pɔle 'na 'bebhiɛle 'demezoweli

¹ 'E titli -eyi kɔ Lagɔ 'yliku, "ne Zezu Kli -ɔ "kɛ 'ce yi "ne 'ɔ "kɛ -yɛyɛnya "ne -glukonya 'gbobhlele -wɛ 'yliku. "Ɛ Zezu Kli -wɛ yi 'ce -klɔgbɔsɛ yi.

² -Sɛ Lagɔ 'na 'Denaade, 'titliloa 'yukwli "me, -se 'ɛ "mɔ "me -ko "ne -se 'ɛ kɛ "me -ko, bhulɛ 'yiɛ, "tamaloa 'kwɛme -se 'wa kɛ 'gbi 'to ne, 'jijaloa 'wli, -se -gbɔtɔloa "ku, -se 'piɛ -kɛ "bhle 'dle -se -e "koa -kɛ sloa -godogodo.

³ -Mɔ, lɔbhɔ yi 'ce ylɛ "ne -bedia -ka 'ce -diɛnadiɛ 'na sloaweli -wɛ 'yukwli 'fo. 'Wa yi -ye 'wa 'yɔbhɔ -wɛ gɛle, "ne 'wa yi 'wayi slonya -gbagboa yɔko lale, -se 'wayi -wɛ "koa -ye 'wa no gbɔ 'wa "kɛ 'yukwli 'fo -wɛ bhulɛle-.

⁴ 'Wa yi 'ce 'wanɛɛ 'yukwli "ku 'gba -se 'wa te -kɛ -ɛ noɔ 'Denaade yɛ -wɛ 'yukwli 'fo zɛ. "Ne 'wa yi 'wanɛɛ 'yukwli "ku 'vulua -se 'wa "kɛ gɔgɔ weli -ɛ "ne gbaa "me -ko -wɛ 'yukwli 'fo.

⁵ -Mɔ, -eyi, -li 'klekle "me 'piɛle -kɛ -eyi "ku. Gbapegbapeɛ "kɛ -eyi yle ne, yibhlele- 'ɛ slusɛ, sloa 'Denaade, -se lɔbhɔ Lagɔ "ku 'tee.

Pɔle nɛɛ 'ɔnɛɛ -dɛ "ne -la "me tlo

⁶ -Ame, 'neɛ -dɛ -ylɛ, 'neɛ zikpɛ 'e -plele Lagɔ kɔ sɛgbɛɛ bɔbɔle -bɛɛ'. "Ne 'neɛ "ku dɛku ylɛ- "bhuɔ.

⁷ 'E -gwe 'gɔle 'na "namanɔ, 'e -bhiɛ 'neɛ sokwɛ pa- -kɔ "ne 'neɛ 'dlekukɛleɛ 'e "ne 'yi 'tale-.

⁸ -Dɛmeda 'neɛ 'peɛleɛ -ye Anyinɛnyɔ "kɛ -ame kɔ 'je -wɛ 'ye 'e -wo -da -lɔ. "Ɛ -zle -wɛ, 'ɔyi gbobhlenyɔ -ɔ ŋwinɛle- "me, gbobhlezle kɛ -yi ne, 'ɔ yi -ame 'neɛ kɔ 'je. "Ɛ "ne -kɛ 'ayikɔ yɔ, -mɔ, 'nyakpa 'klekle -wa -wo -me 'ŋwɛnɛsɛ "ku 'ɔnɛɛ yi -zle -wɛ, 'ɔ yua 'ce "nyɛ me.

Pɔle bhulɛle Timote 'ɔnɛɛ 'bebhiɛleweli

⁹ Ylele -ame bhobholo me 'e -ko ne.

¹⁰ "Naa-, Demase 'bha- -ame yɔko dodo ne "ku 'na -li za. 'Ɔ -me Tesalonike, "ne Klesase -me Galasi -glɔ "me, "ne Tite -me Dalemasi -glɔ "me.

¹¹ Luke -bholo -kpee -ko -lɔ -ame yɔko. Zaa, libhi Malke "ku -se 'ɔyi "bhaa 'a yli 'gɔme, "naa-, "ɛ 'mɛne, 'ɔ yi -ame Lagɔ 'na libhɔ 'kwɛle zɛ.

¹² -E lebhele Tisike Efɛze -du "me.

¹³ Zle -e "kɛ yi ne, -nɛme kɛ 'koti -ye 'e -tle Tloase -du "me Kalepuse 'na -doɔ -wɛ. -Nɛme -me "kɛ 'na "bɔgo. -Mɔ, -tiaa -ɛ -gliglileɔ -wɛ te -kɛ to.

¹⁴ 'Gblubhlɛnyɔ Alɛzadle -no -ame "nyɛnye 'na -bɛɛ' 'wli. Anyinɛnyɔ yu 'ce -ye 'ɔ -no -wɛ 'na -ɛ -ŋwɔ "ku -wɛ kɔ 'je.

¹⁵ -Eyi 'nabhɛ, 'luɔlo -kɔ "ku! "Naa-, weli -ye -a bhulɛ 'klekle -wɛ, 'ɔ "ne "ku 'ŋunu- zɛ.

¹⁶ Tɛtɛ -zle "me, gbobhle -mɔ, -dee 'e -sɛ 'awɔ -ayi gbo -wɛ, 'nyɔkpɔ "ne 'ce -ame -kwɛle. 'Wayi 'klekle -tle -ame doɔ. Lagɔ 'toa 'ce 'ɛnɛɛ -jiɛ "me "pɔ!

¹⁷ -Mɔ, Anyinɛnyɔ "bhaa -a -kole "ku za, 'ɔ "tamalea- -ame 'kwɛme. "Ne 'e yi -lɔ Anyinɛnyɔ 'na 'Denaade sloa-. 'Nyakpa 'klekle -wa "ne Zufonya 'waa -wɛ no- "me. 'Ɛ -sɛ -lɔ -ame gbi 'nu.

¹⁸ Anyinɛnyɔ yi 'ce 'na 'galu 'di. 'Ɔ yi 'ce -ame 'fuɔ, "ne 'ɔ yi 'ce -ame 'ɔnɛɛ 'Kamalezikpɛ "me pla- -me. Anyinɛnyɔ 'bhe- -lɔ 'ŋlumeɛ -dɛme "ne -godogodo 'yiɛ. Amɛn.

Pɔle 'na 'bebhiɛle bhɛleweli

¹⁹ 'Bhɛle Plisile "ne Akilase, 'bhɛle -me 'lelee Onezifɔle -nɛɛ -doɔ 'na 'nyakpa.

²⁰ Elasete -to Kolɛte. 'E -tle Tlofime Milɛ -du "me, 'ɔ "ne nɛ -yɛ zɛ.

²¹ 'Tɔtɔle -eyi kɔ -sɔɔdɛku wɔtlɔ -namlɛ yi -wɛ. Ebuluse, Pudɛse, Linuse, Klodia "ne 'klecɛnya 'klekle "nowlia -nyɛ "nɔyoa 'wɔ "bhaa bhɛle -eyi.

²² Anyinɛnyɔ "bhaa 'a kole- "ku! -Se 'ɔ 'pɔ 'anye 'klekle 'ŋu!