2 Timote 3 - Nouveau Testament bété de Gagnoa

'Bebhiɛleyli "me 'na "kle

¹ 'Yibhlele- sɛ -gbɔ 'bebhiɛle -yli yi -kɛ "me "tamale kpɛnyee.

² 'Nyakpa -ka -kɛ 'walua "ku 'dlepɔ. 'Wa yi 'dlasi mamale, 'wa yi 'yli siɛ tɛle-, 'wa yi bha, 'wa yi Lagɔ 'yli, 'wa yi 'wa 'to 'wɔ 'plome -sɛ. 'Wa -ka "nɛne yibhlele-. 'Wa -ka -kɛ -la Lagɔ 'na -li 'plome "zo.

³ 'Wa "ne -kɛ 'dlepɔledɛ -kɛ, 'wa "ne -kɛ 'nyɛzedle -kɛ. 'Wa yi 'walua 'na weli "nyɛnye bhulɛ. 'Wanɛɛ zikpɛ yi bidibidi ko. 'Wa yi -konyinɛ "me ko kpɛnyee. 'Wa yi -wa no "nɛne -wɛ 'gble.

⁴ 'Wa yi 'walua ylo no. 'Wa yi "kpokponya "zo. Bhabha -za, 'wa -ka 'nyɔkpɔ, 'nyɔkpɔ la. 'Wa yi zikpɛ ne "ku 'na -li mamale "ne 'wa -ka Lagɔ wamale.

⁵ 'Wa yi ko sɛgbɛɛ Lagɔ 'wa gɛle me, -mɔ, -a 'cɛ "me 'veɛ ne, 'wa "ne Lagɔ 'na 'bhɛloɛ 'dleku -kɛ kplokplo. Soɔ 'na 'nyakpa -wɛ, gloa keyi.

⁶ 'Wanɛɛ 'glɛme 'na -bedia plɛ 'wime -bhudu 'wɔ "me. 'Wa -nyimɔ 'ŋwenea 'na -wa "ne "me 'tɛ- -wɛ 'wlime, "ɛ 'ŋwenea -wɛ 'yiɛ 'nyinyonoli "ku, 'wanɛɛ 'dlekukɛleɛ "ne "me 'tɛ-. "Ɛ soɔ 'na 'ŋwenea -wɛ, 'wanɛɛ 'dle -glɛ -li 'klekle 'glɛ.

⁷ "Ɛ 'ŋwenea -wɛ -ciɛ 'yiɛ, -mɔ, 'wa "ne yibhlele 'Denaade 'na zɔ 'tee.

⁸ Bhlɛme, Zanɛse -nyɛ Zablɛse "bhaa -wa 'ŋunu- 'awɔ Moyize 'na weli -ye 'ɔ -bhulɛ -wɛ "ku. "Ɛ sɛbhele -wɛ, 'ye "ɛ 'nyakpa -wɛ 'ŋunu- -lɔ 'Denaade 'na 'gbo "ku. 'Wanɛɛ 'dlepɔsɛ 'gbi- 'wli, "ne 'wanɛɛ 'dlekukɛleɛ "ne -bɛɛ' "me -ko.

⁹ "Ɛ soɔ 'na 'nyakpa -wɛ -ka 'yuku 'wlo. 'Wa yi 'sɛ yibhlele- -gbɔ 'gbi 'ye 'wa 'to -lɔ. -See 'wa 'ye- 'awɔ gɔgɔ "me Zanɛse -nyɛ Zablɛse "bhaa 'wanɛɛ 'gbitoɛ 'ylime -wɛ.

Pɔle "zo Timote 'de "me

¹⁰ -Mɔ -eyi -li 'klekle "me -e gɛle -ame, 'neɛ sloaweli -e no- "me, -e -fo me 'yukwli, -e -didale 'neɛ -kosɛ, -e -yi 'neɛ -ye 'e "kɛ no, 'neɛ 'dlekukɛleɛ, 'dlebhlepiɛ, -e -yi -see 'e -waa 'nyakpa, "ne -e "tɛle- Lagɔ 'dle.

¹¹ -E -yi -ye 'wa -no -ame 'wli, "ne 'kle -ye 'e 'ye- Atiɔse, Ikoniɔme "ne Lisetle -du "me. 'Diɛɛ, 'e 'gbape kpɛnyee, -mɔ Anyinɛnyɔ -sɛ -ame "ɛ 'kplɛkplɛɛ -wɛ 'yli.

¹² "Ne 'nyakpa 'na -wa no -gbɔ 'wa yi 'ce Zezu Kli gɛle -wɛ, 'wa yua 'ce 'lelee 'gbapea.

¹³ -Mɔ, 'nyakpa -gbeyia, Yowlɛnya yi 'ce "nyɛnye -no -za kɔ me -me ne 'yiɛ. 'Wa yi 'ce 'nyakpa ylo no. -Mɔ, 'wa yua 'ce 'lelee ylo no me.

¹⁴ -Mɔ, -eyi, -ye -e 'ciɛ- -wɛ, "ne -nyɔ 'na gbo -e 'ŋunu- 'dlekukɛleɛ "me -wɛ slu klekle. 'Naa-, -wa sloa- -eyi -wɛ, -e -yua zɛ.

¹⁵ 'Ɛ 'bhale -neɛ' yua -di "me, -e -yi Lagɔbɔgo. 'Ɛ 'bhɛle -se 'ɛ "kɛ -eyi "nɛnoɛ sloa. "Ɛ "nɛnoɛ -wɛ "kɛ -lɔ -eyi 'fuɔ, -e kɛ -kɛ Zezu Kli 'dleku -kɛ ne.

¹⁶ Lagɔ -kwɛle -lɔ 'nyakpa "ne Lagɔbɔgo 'klekle yi -lɔ 'kɛleɔ-. 'Ɛ "nɛne -se 'ɛ "kɛ 'nyɔkpɔ gbɛklɛklɛ 'sloa. "Ne 'ɛ yu 'lelee 'kwɛle, "ne 'ɔ yi 'gbito -gwe "ku 'bha, "ne 'ɔ yi 'ɔnɛɛ zikpɛ "meŋwinɛlesɛ slu.

¹⁷ Lagɔbɔgo gbɔ -lɔ "ne Lagɔnyɔ no -lɔ -li 'klekle -ɛ "ne 'nuɔsɔbhɔledɛ -kɛ -wɛ.