2 Timote 2 - Nouveau Testament bété de Gagnoa

Klise 'na slojayu

¹ -Eyi, -ame yowli, 'tɛle -see -e "kɛ "zo "ne -neɛ' 'kwɛme "kɛ "tamale- -godogodo Zezu Kli 'na 'ŋwɛnɛ "me kɛle- -za -wɛ siɛ.

² -Ye 'e -sloa -eyi 'nyakpa -kwleyia 'yliku -wɛ, 'tle -me -kɛ 'lelee 'nyakpa 'na 'vinoa yɔko -se 'wayi 'wa yibhlele- -me -kɛ 'lelee 'ɛnɛɛ sloasɛ.

³ Zaa, libhi -neɛ' gbapegbapeɛ 'na dɛ "ku sɛgbɛɛ Zezu Kli 'na "slojayu 'na "namanɔ.

⁴ "Slojayu 'na -ɔ no -gbɔ 'ɔ "kɛ 'ɔnɛɛ "cifi 'ŋwɛnɛ labha -wɛ, 'ɔ "ne "zo -la 'ɔyi dodo ne "ku 'na libhɔ 'na weli 'wlime.

⁵ "Ɛ sɛbhele -wɛ, Sokwɛpanyɔ "kɛ no -gbɔ 'ɔ "kɛ -ye 'wa 'piɛ- -wɛ yle ne, "ɛ -gbagbɛ -ye 'wa "zo- lɔbhɔ -wɛ 'ye 'ɔ "kɛ -lɔ 'plome "zo.

⁶ "Ɛ sɛbhele -wɛ gloglonyɔ -ɔ 'kplɛle "ɛ libhɔ kɔ -wɛ 'ɔ 'di -lɔ tɛɛ.

⁷ -Ye 'e bhulɛle -eyi ne, glole 'dle, -se Anyinɛnyɔ 'cɛ 'ce -eyi "me 'noa- 'klekle.

-Neɛ 'dle sibhɔ Zezu -ɔ 'wlo- gluzɔ -wɛ "ku.

⁸ -Neɛ' 'dle sibhɔ Zezu Kli "ku: 'Ɔ 'wlo- gluzɔ. -Klɔgbɔnyɔ Davide 'na -gligbɛ "ku 'wa -gwɛlelo -lɔ. 'Ɛ -noɔ -lɔ 'Denaade -ye 'e sɛ ne yɛ.

⁹ "Ɛ 'Denaade ne za 'e gbape -lɔ, "ne 'wa -gwale -lɔ -ame gɔgɔ nu sɛgbɛɛ 'nyɔkpɔ -gbeyi. -Mɔ, Lagɔweli "ne 'gwɔ-!

¹⁰ -Ɛwɛza, 'e 'sa -lɔ 'ɛyi 'klekle kɔ -ye Lagɔ -sɛ lɔbhɔ -wɛ za, -se 'wayi, 'wa "kɛ -kɛ 'po Zezu Kli "me, -se 'wa "kɛ -kɛ 'lelee 'ŋlu "mɔme -godogodo 'na -ɛ "ne lɛ 'nɛnidɛ -kɛ ne.

¹¹ Weli 'na -ɛ -kɔ 'dleku ne lɛ: Klise "bhaa -a kɛ 'gɔme "kule- ne, -a yi 'gɔme yamale-.

¹² Klise "bhaa -a kɛ 'gɔme gbapele- ne, -a yi 'ce 'gɔme -klɔgbɔ 'pɔle. Zaa, -a kɛ 'ɔ lo -sɛ ne, 'ɔyi 'ce 'lelee -anyɛɛ lo -sɛ -me.

¹³ -A "mɔ Zezu Kli 'dle tɛle- ne, 'ɔyi, 'ɔ 'tɛle -anye 'dle, "naa-, 'ɔ "ne 'bhɛle- "ne 'ɔ "kɛ -ye 'ɔ bhulɛ -wɛ "ku 'bha.

'A kɛ 'Denaade sɛ, 'a sɛ 'tee

¹⁴ 'A "luɔ -le 'nyakpa 'klekle 'dle. -See Lagɔ 'yliku, -a bhulɛloa gbɛklɛklɛ -se 'a 'titliloa kɔ -gbɔ 'wa "bhaa 'kpɛlekpɛleɛ -ɛ "ne -bɛɛ' "me -ko -wɛ 'beku. -Mɔ, 'a 'cɛ soɔ 'sa ne, -wa 'fo 'anye 'yukwli -wɛ 'ye 'a nyimɔ -lɔ 'wlime.

¹⁵ Zaa, "tamale 'kwɛme -se sibhɔ Lagɔ 'yliku; Sɛgbɛɛ 'ɔnɛɛ libhɔnonyɔ 'na "namanɔ -nyɔ 'na libhɔ 'nɛno -gɛ -wɛ. "Ne sɛgbɛɛ 'nyɔkpɔ 'na -ye 'ŋwɛnɛ lɔbhɔle 'ɔnɛɛ libhɔ 'ylime -wɛ, "ne 'ɔ sɛle 'tee Lagɔ 'na 'Denaade -glɔnya -wɛ.

¹⁶ 'Fu 'na 'kpɛlekpɛleɛ -ɛ "ne 'dlekukɛleɛ 'na -gwe "ku -ko -wɛ, 'bhɛ 'beku: "Naa-, -wa no "ɛ soɔ -wɛ yi 'ce Lagɔ 'guɔ 'yli 'jeje.

¹⁷ 'Wanɛɛ bhulɛweli -nyɛnye nyimɔ -li, sɛgbɛɛ gbiɛ 'na -ɛ diɔ -wɛ, "ɛ 'nyakpa -wɛ 'glɛme 'ye Yimene, "ne Filɛte -ko me -lɔ.

¹⁸ 'Wa -ylile gbɛklɛklɛ 'na -gwe 'guɔ. 'Wa nɛɛ Lagɔ -sɛ -anye -glukonya 'glɛme "bhuɔ, "ne 'wa yi -lɔ 'nyakpa -kwleyia 'na 'dlekukɛleɛ "klo 'siɛ gbli-.

¹⁹ Lagɔ 'na 'jijɛgblɛ -ye 'ɔ sibhi- -yɛ gbligbli. 'Ɛnɛɛ "ku 'na weli -ye 'wa kɛle- ne lɛ: «Anyinɛnyɔ -yi -wa -noɔ 'ɔnoa 'waa.» "Ne 'lelee «-ɔ kɛ no -gbɔ Anyinɛnyɔ -nɔ 'ye 'ɔ -noɔ ne, 'ɔ 'ylile- "nyɛnye "guɔ.»

²⁰ -Bhudu "yitɛ "me, 'wa ylele "bhle -badlɛ -ba, 'leyi -ba, kpɛklɛ, "ne 'nyidɛ. -Mɔ 'wa dlile -bedia "me -jajo -no -zle "ne 'ɛnɛɛ -ɛwɛ 'ɛ dliɔleɔ "me zle 'klekle "me.

²¹ Zaa, 'nyɔkpɔ 'na -ɔ 'bha- sloasɛ -nyɛnye 'na -gwe "ku -wɛ, -ko sɛgbɛɛ 'baa 'na 'ye 'wa dlile "me -jajo no -zle. 'Wa yu 'ce kulɛ "Bhenyɔ za. 'Naa-, 'ɔyi 'wa ylɛle -lɔ "me "ne 'wa no -lɔ -li 'na -ɛ 'nɛne 'klekle -wɛ.

"Bhenyɔ 'na "kulɔbhɔnyɔ

²² -Ame yowli Timote, 'teyigba 'na -li -nyɛnye -ɛ 'loa 'ŋwɛnɛ "ku -wɛ, 'glɛ keyi. 'Nyakpa -nyɔ 'wɔ "bhaa -a bhubhɔle Anyinɛnyɔ 'gɔme 'dle "namanɔ kɔ -wɛ 'a tɛle "meŋwinɛleɛ, 'dlekukɛleɛ, 'ŋwɛnɛ "ne "kuwɛtɛ siɛ.

²³ Zaa, 'kpɛtɛkli -bhulɛ -ɛ "ne -bɛɛ' "me -ko -wɛ, 'bhɛ 'beku. -E -yi sɛ nɛɛ 'ɛɛ 'nɛme -lɔ gbonoɛ.

²⁴ -Mɔ, Anyinɛnyɔ Lagɔ 'na "kulɔbhɔnyɔ -ka gbononyɔ "zo, 'ɔ yi 'nyakpa 'klekle wamale-, "ne 'ɔ yi sloa 'tee. "Ne 'ɔ yi 'ɔnɛɛ 'dle "ku 'piɛle.

²⁵ 'Ɔ yi "bhle 'dle 'piɛ, "ne 'ɔ yi 'ɔnɛɛ -gblenya bhulɛle, -lalɛce, Lagɔ yi gbɔ "ne 'wa yi kɔ 'bheliɔ- "ne 'wa yi gbɛklɛklɛ yibhlele-.

²⁶ "Ne 'wa yi lo yi, "ne 'wa "kɛ -lɔ Sata 'na -gbotu 'yli 'bha, -ɔ "zoa nɛ -jiɛnya -wɛ. 'Wa -kɔ -la "ku lɔbhɔ ne 'wa yi 'wayi 'tee slu.