2 Timote 1 - Nouveau Testament bété de Gagnoa

Pɔle bhɛle Timote

¹ -Ame, Pɔle, Zezu Kli 'na "kɔlepɔnyɔ 'ye 'e -noɔ -lɔ, sɛko -wɛ, Lagɔ 'ŋunu- -lɔ "ku zɛ. Zaa, -ame 'wa -sɛ -lɔ lɔbhɔ, -se 'e "kɛ zikpɛ -ye Lagɔ no -gbɔ 'ɔ "kɛ -anye kɔ 'je Zezu Kli 'na 'tɔ "me -wɛ 'na 'de -glɔnya -sɛle.

² 'Na -wawayu Timote, -eyi 'ye 'e 'kɛle lɛ "ku. To Lagɔ "ne Anyinɛnyɔ Zezu Kli 'pɔ -eyi 'ŋu. 'Wa sloa -eyi 'wanɛɛ 'ŋwɛnɛ, -se 'wa 'nyɛ -eyi "kuwɛtɛ!

Pɔle bhɛle Lagɔ

³ -Se titiɛ yi "ne zle ze -wɛ, 'e "kɛ bhubhɔ 'e 'di 'ce 'neɛ -tɔ 'yiɛ. "Ne 'e bhɛle Lagɔ -ye -e lɔbhɔ "ku 'dle -wɔtɛ "me -wɛ, -se -a 'to 'wa 'to 'wɔ 'sɛ- -wɛ.

⁴ 'Neɛ 'dle kɛ -neɛ' -see -e 'tu nɛ -wɛ "ku sibhɔ -dee -a 'bhabhale- yɔko -wɛ, 'ɛ -leɛ 'e 'ye -eyi 'ylime -se 'ŋwɛnɛ "kɛ -ame 'lɔbhɔ-.

⁵ 'Neɛ 'dle sibhɔ -neɛ' 'dlekukɛleɛ -ɛ -ko gbɛklɛklɛ "me -wɛ "ku. "Ɛ 'dlekukɛleɛ -wɛ, 'ɛ -ko nɛ -lɔ -e "nɔ "yitɔ Loyise -nyɛ -e "nɔ Enise "bhaa "me "kle, 'za, 'e -kɛ 'dleku -gbɔ, "ɛ 'dlekukɛleɛ -bhele -wɛ -ko me -lɔ -eyi "me.

'Wa kulɛle -Klɔgbɔ 'na "namanɔ Timote "ku

⁶ 'Ɛnɛɛ za 'e sibha -kɛ -lɔ lɔbhɔ -neɛ' 'dle -gbɔ slu -kɛ Lagɔ 'na -jɔlo -ye -e -yle -sɔɔdɛku 'e 'piɛ- nɛ -eyi 'kwlɛ 'wli -wɛ.

⁷ "Naa-, Zuzu Wlewle -ye Lagɔ 'je- -anye kɔ -wɛ -na no -gbɔ -a gu. -Mɔ, "ɛ Zuzu Wlewle ne 'kwɛme 'ye 'ɔ "tamalea -lɔ -anye, "ne 'ɔ "zo -lɔ -anye 'ŋwɛnɛ "me, "ne 'ɔ sloa -lɔ -anye -see -a "kɛ -ayi slu, "ne -see -a -kɛ -ayi "ku piɛle -wɛ.

⁸ Zaa, -e -gba "kɛ Anyinɛnyɔ 'na 'Denaade -nyɛ 'ɔnɛɛ 'dɛ -e 'ye- -wɛ sɛ ne, zu te -eyi lɔbhɔ. "Ne zu te 'lelee -eyi -ame "mɔ -ko -jiɛ "me ne za lɔbhɔ. Lagɔ 'na 'bhɛloɛ 'kwɛle -anye -se -a "kɛ 'gɔme 'gbapele 'ɔnɛɛ 'Denaade za.

⁹ Lagɔ 'fuɔ- -anye, "ne 'ɔ yi -lɔ -anye la- -se -a "kɛ 'ɔnoa "zo. -Anyɛɛ -ye -a no -wɛ za 'ɛ "ne -kɛ -noɔ, -mɔ, 'ɔyigɛsɛ 'yɛbhɛ -lɔ -gbɔ 'ɛ ko sɔbhɔ. Fu 'ye 'ɔ 'je- -lɔ -anye kɔ Zezu Kli "me, -sɔɔdɛku 'wa -na zikpɛ 'wlɛ- -wɛ.

¹⁰ Zaa, -Dɛmeda, "ɛ -jɔlo ne -gɔ la 'yli 'tee, -sɔɔdɛku -anyɛɛ 'Fuɔnyɔ Zezu Kli -yi -wɛ, 'ɔyi Zezu, 'ɔ -lu gazoɛ 'na 'bhɛloɛ to "me, "ne 'Denaade "me, "ne 'ɔ yi -lɔ zikpɛ 'na -ɛ -ka "kubhiɛ -wɛ 'nyakpa sloa.

¹¹ Lagɔ "zoa- -ame Zezu 'na "kɔlepɔnyɔ, -se 'e "kɛ 'Denaade -glɔnya -sɛle, -se 'e "koa sloa.

¹² 'Ɛnɛɛ za 'e 'gbape -lɔ -dɛme ne, -mɔ, zu "ne 'lɔbhɔ -ame. "Naa-, 'e -yi -ye 'e "zo- 'neɛ 'dlekukɛleɛ "me zɛ. "Ne 'e -kɛ 'dleku -gbɔ Lagɔ 'ɔ -kɛ 'bhɛloɛ -se 'ɔ "kɛ -ye 'ɔ kulɛle- -ame "ku -wɛ "klo -kole -kaa zikpɛ 'na "kubhiɛ -zle.

¹³ Zaa, -diɛnadiɛ 'na weli -ye 'e -sloa -eyi -wɛ, gɛlele. 'Dlekukɛleɛ "ne 'ŋwɛnɛ 'ye Anyinɛnyɔ Zezu Kli 'je- -anye kɔ -wɛ 'ye -e -ylele -lɔ "me.

¹⁴ -Klɔgbɔ 'na "namanɔ 'wa -kulɛle -lɔ -eyi "ku. Zaa, Zuzu Wlewle -ɔ -ko -anye "me -wɛ kwɛle- -eyi -se -e 'cɛ slu 'tee.

Onezifɔle 'na kosɛ

¹⁵ -E -yi sɛ -gbɔ -wa 'bhale Azi -glɔ 'klekle "ku -wɛ 'bhale- -ame "me, "ɛ "zo Fizɛle "ne Elemozɛne.

¹⁶ Zaa, Anyinɛnyɔ 'tua 'ɔnɛɛ "nɛnekoɛ Onezifɔle 'na -gligbɛnya 'ylime. "Naa-, 'ɔ "tamalea nɛ -ame 'kwɛme 'yiɛ, "ne -ame "mɔ -ko -jiɛ "me -wɛ ne, 'e no 'zu "ku -lele.

¹⁷ -Mɔ, -ye 'ɔ ylɛ Wlɔmo -du "me -wɛ, 'ɔ -tɛle -ame moɔ 'klekle siɛ, "ne 'ɔ yi -lɔ -ame yle-.

¹⁸ Zaa, Anyinɛnyɔ Zezu "nyɔ Lagɔ 'na -jɔlo 'gbobhle -zle! "Naa-, -e -yi 'nɛne 'klekle -ye 'ɔ -no -ame Efɛze -du "me 'wli -wɛ za sɛ.