2 Tesalonikenya 2 - Nouveau Testament bété de Gagnoa

-Ɛ "kɛ 'ce bhɔ yi "bhuɔ "ne Anyinɛnyɔ "kɛ 'du ylɛ 'a?

¹ -Nyɔsɔwanye, 'a -yi sɛ -gbɔ -anyɛɛ "Bhenyɔ Zezu Kli yi 'ce yi "ne -a yu yɔko 'wli "zole, -ye -a 'yɔbhɔle 'anye "me ne lɛ:

² 'Nyɔkpɔ kɛ -no -gbɔ Lagɔ -ylɛle -ame 'yliku -gbɔ Anyinɛnyɔ -yi "bhuɔ ne, 'a te 'ce guɔ cuu, sɛgbɛɛ 'nyɔkpɔ 'na -ye 'wlime nyimɔ -wɛ, -se 'a te 'lelee 'wanɛɛ -ye 'wa -bhulɛle 'anye -wɛ -gɛ "gu. -Mɔ, -anye "ne -bhulɛ, "ne -anye "ne kɛle-.

³ 'Nyɔkpɔ te 'ce 'anye ylo no -visɛ, "naa-, 'yli -ye 'nyɔkpɔ "kɛ Lagɔ 'na lo -sɛ -wɛ "ne -mlɛ -dɛme -yiɔ. -Gblenyɔ -ɔ "kɛ -jiɛ plɛ -wɛ -namlɛ 'ɔyi 'nyakpa 'ylime tua- zɛ, -glɔ kɛ "me -zuzuɔ "yitɛ "ku "bhuɔ "ne Zezu "kɛ -lɔ yi.

⁴ "Ɛ -gblenyɔ -wɛ -ka 'ce -ɛ -ko 'wlewle "ne -ye Lagɔnya bɔbɔ -wɛ 'wɔ yibhlele-, 'ɔ yi Lagɔ 'na -bhudu "me plɛ, "ne 'ɔ yi "bhle 'gli, "ne 'ɔ yi 'ɔyi Lagɔ la.

⁵ 'E -bhulɛle 'awɔ 'anye -sɔɔdɛku 'e -ko nɛ 'anye 'glɛme -wɛ, -dlu 'ye 'a -dlu bha?

⁶ -Dɛme'nadɛne "ku, 'a -yi -ɛ "nyegbeɔ. -Mɔ, 'lɔbhɔ kɛ 'ce -ylɛ, "ne 'ɔ "kɛ -lɔ 'anye 'ɔyi 'ylime tua-.

⁷ Zuzu -nyɛnye 'na 'bhɛloɛ no 'diɛɛ libhɔ, 'wa kɛ -ɔ "titi 'yliku -wɛ lɔbhɔ -sɛ, "ne 'ɔ "kɛ -lɔ 'ɔyi -glɔnya tua- gbɛklɛklɛ.

⁸ Lɔbhɔ 'ye "ɛ -gblenyɔ -wɛ "kɛ -lɔ 'ylime 'yeɔ-, "ne Anyinɛnyɔ Zezu kɛ -yi ne 'ɔnɛɛ nu 'na -pepe "ne 'ɔnɛɛ 'bhɛloɛ 'na 'dɛle "kɔ -lɔ "ku bhia.

⁹ -Sɔɔdɛku "ɛ -gblɛnyɔ "kɛ 'ce yi Sata 'na 'kpokpo "bhaa -wɛ, 'ɔ yi -li 'klekle -nyɔ 'na 'nonoɛ 'tɛ- "me, "ne 'ɛ 'nyea, "ne 'ɛ 'sɛ geji "ku -wɛ no. "Ɛwɛ "kɛ -lɔ 'nyakpa kwlɛ bhlia-.

¹⁰ "Ne 'ɔ "kɛ -lɔ yo 'klekle 'glɛme 'na yo 'yukwɔ me, "ne 'ɔ "kɛ -lɔ 'wa -bhli 'kwlɛ "kle -wɛ "bhle 'woloa-. Sɛko -wɛ, 'wa "ne gbɛklɛklɛ -ɛ "koa nɛ 'fuɔ -wɛ -wamale zɛ.

¹¹ -Ɛwɛza Lagɔ 'joa -lɔ yowlɛ 'na 'bhɛloɛ kɔ, "ne 'wa "kɛ -lɔ yo 'dleku kɛle-.

¹² -Mɔ, Lagɔ yi 'ce -wa "ne gbɛklɛklɛ 'dleku -kɛ, "ne -wa no "nyɛnye -wɛ -jiɛ "me "pɔ.

'A "tamale- 'dleku -mɔ, Lagɔ -sɛ -lɔ 'lɔbhɔ 'anye

¹³ 'Ɛ kɛ -anye 'waa, -a yi -godogodo Lagɔ bhɛle 'anyɛɛ za, Anyinɛnyɔ 'na -wawayuanye, "naa- Lagɔ -sɛ 'awɔ 'anye lɔbhɔ -dee zikpɛ 'ci 'awɔ "ku -ce, 'a 'po-, "naa-, Zuzu Wlewle -wɛle 'anye, sɛko -wɛ 'a -kɛle gbɛklɛklɛ 'dleku zɛ.

¹⁴ Lagɔ 'na 'Denaade -ye -a -sɛle 'anye -wɛ, 'ɛ bhulɛle -lɔ 'anye nɛɛ: 'Ɔ -sɛ lɔbhɔ 'anye -se 'a "kɛ Anyinɛnyɔ Zezu Kli 'na 'ŋlumeɛ 'na 'didi "me ko -me.

¹⁵ Zaa -nyɔsɔwanye, 'a "tamale- 'kwɛme, 'a kɛle- -ye -a -sloa 'anye -wɛ kɔ 'gugwlegugwle, bhulɛweli "me "ne "bɔgo -ye -a 'pɔ- 'anye "ku -wɛ "me.

¹⁶ -Se Anyinɛnyɔ Zezu Kli, 'ɔyigɛsɛ "ne -a To Lagɔ, -ɔ -wa -anye, -ɔ 'nyɛ- -anye -jɔlo, 'ylime siɛ- 'na -ɛ -ka lɛ "kubhiɛ -nyɛ 'dletɛleɛ "namanɔ "bhaa.

¹⁷ 'Ɔ 'dɛpe 'anye, 'ɔ 'tamalea 'anye 'kwɛme 'anyɛɛ nonoli "namanɔ "ne 'anyɛɛ bhulɛweli "me.