2 Piɛle 3 - Nouveau Testament bété de Gagnoa

Anyinɛnyɔ yi yi

¹ -Awale 'wanye, "bɔgo 'na "sɔnɛ 'ye 'e 'kɛle lɛ dɛne 'anye "ku. "Ɛ "bɔgo "sɔkpɔ -sɔkpɛ -wɛ "me, 'e 'luɔle 'anye 'dle, -se 'e "kɛ 'anye kwɛle-, -se 'a "kɛ 'dlepɔsɛ yibhlele-.

² 'A 'luɔle- weli -ye "guɔkwɔmenya 'wlewlea -bhulɛle 'awɔ 'anye bhlɛme "ku. 'A 'luɔle- -me -kɛ 'lelee -gbagbɛ -ye 'anyɛɛ "kɔlepɔnya -sloa 'anye -wɛ "ku: Anyinɛnyɔ, 'Fuɔnyɔ 'na -gbagbɛ yɛ -lɔ.

³ -Mɔ, -tiaa sɛ, -ye 'a "kɛ yibhlele- ne lɛ: 'Bebhiɛle -yli "me, 'nyakpa yi 'ce -yi. 'Wa yi 'wanɛɛ 'ye 'wa "pɔ "ku 'dle "ne 'ɛ "ne 'nɛne -wɛ 'ɛyikɔ gɛlele-.

⁴ 'Wa yi 'anye sile nɛɛ: «Zezu -ple 'awɔ weli -gbɔ 'ɔ yi 'awɔ yi, 'ɛ "ne bhɔ 'diɛɛ yɛ? Zaa, -dee 'ɔ -ko bhɔ? "Naa-, -a 'to 'wɔ "ku-, "ne "ɛ -li -ko -nazɛ "ɛ sɛbhele 'yiɛ, -se Lagɔ "mɔ 'awɔ zikpɛ 'wlɛ-!»

⁵ 'Wa kɛ soɔ gbɔ ne, -bɛɛ' -bholo 'wa 'dlu -lɔ "ku: Lagɔ 'wlɛ "nɔgɔ "ne dodo, lɔbhɔ 'ya "me 'gwlɛ kpɛnyee. 'Ɔyigɛsɛ 'na weli kɔ 'ye Lagɔ 'wloa- -lɔ dodo 'ŋu "me zɔ, "ne 'ɔ yi -lɔ dodo 'ŋu nu male-.

⁶ "Ɛ sɛbhele -wɛ, 'ŋu 'nu, -ziɛziɛŋu -ɛ -mlɛ 'awɔ moɔ 'klekle 'wli -wɛ, Lagɔ -bhiale -lɔ bhlɛme 'na -glɔ "ku.

⁷ 'Ɛ sɛbhele -wɛ, Lagɔ 'cea- 'ɔnɛɛ weli "me "nɔgɔ "ne dodo -kaa -zeka ne "me, -se 'ɔnɛɛ -gblenya 'na gbobhle -zle, -kosu 'cɛ "ku -bhia.

⁸ -Awale 'wanye, -li 'klekle "me, 'a te -kɛ -ɛne "ku 'dlu: Anyinɛnyɔ 'na dɛku, 'yli -bholo -le -kɛɛ -zo -glo -kogbɔ (1.000) "ne -zo -glo -kogbɔ (1.000) -le -kɛɛ 'yli -bholo.

⁹ Anyinɛnyɔ 'na weli -ye 'ɔ -ple -wɛ -na 'yli 'wlole dɛku "ne -la dɛtlo. -Mɔ 'ɛ -ko "ɛ -soɔ "ne -bedia no -lɔ -gbɔ 'ɔ -to 'be. 'Anyɛɛ za, 'ɔ 'piɛ- -lɔ "bhle 'dle, 'ɔ "ne 'yɔbhɔ -gbɔ 'nyɔkpɔ ku. Anyinɛnyɔ 'yɔbhɔ -gbɔ 'nyakpa 'klekle 'bhelia- 'wanɛɛ zikpɛ kɔ.

¹⁰ Anyinɛnyɔ 'na yi -zle yi 'anye 'vu sɛgbɛɛ 'winyɔ. "Ɛ -zle -wɛ, "nɔgɔ yi 'ce "kubhiɛ 'kple "yitɛ "me, -kosu yi "nɔgɔ "me 'na -zeli "ku bhia-, dodo "ne -li 'klekle 'ɛ -ko "ɛ dodo ne "ku -wɛ -kosu 'yi siɛ 'fefe, dodo -nyɛ dodo ne "ku 'na nyakpa 'na nonoli 'klekle yi 'ce gbobhleleɔ-.

¹¹ "Ɛwɛ 'klekle yi -kɛ se "ku -bhiɛ zaa, 'a 'wlole- zikpɛ 'na -ye 'a "kɛ "ku ko -wɛ "me. -See Lagɔ 'yɔbhɔ -wɛ, sɔbhɔ 'ye 'a -na slu 'ayi "ku, -see 'a "tɛlo 'dle.

¹² 'A -wo Lagɔ 'na 'yli "ne 'a 'yɔbhɔ -gbɔ 'ɛ yi 'bhɔbhlo. "Ɛ -zle -wɛ -kosu yi "nɔgɔ 'siɛ- "ne -zeli yi 'ce 'ŋɔnɔ- -kosusinɔ za.

¹³ Lagɔ -ple weli -gbɔ "nɔgɔ -lele "ne dodo -lele yi 'ce yi, "bhle 'ye "meŋwinɛleɛ "kɛ -lɔ -ko. 'Diɛɛ, 'ɛyi 'ye -a -wo -lɔ.

'A 'luɔle- -kɛ 'ayi "ku!

¹⁴ -Ɛwɛza, 'dle -glɛ 'titoa nye, -dee 'a -wo -mlɛ "ɛ 'yli -wɛ, 'a 'gwele- kɔ -se 'a "kɛ 'wlele ko, -se 'a te -kɛ 'nuɔsɔbhɔledɛ kɛle- Lagɔ 'yliku, "kuwɛtɛ "me.

¹⁵ 'A 'luɔle- weli -cibhɛ ne "ku: Anyinɛnyɔ 'na 'dlebhlepiɛ -za za 'a "kɛ -lɔ 'po-. 'Ɛwɛ 'ye -a "nɔwli, "ne -a 'tito Pɔle no nɛ -lɔ -gbɔ 'ɔ "kɛ 'anye bhulɛle- 'ɔnɛɛ "bɔgo -ye 'ɔ 'kɛle- 'anye "ku -wɛ "me. 'Ɔ bhulɛle 'ylimeyamaleɛ -ye Lagɔ 'jo- kɔ -wɛ "me.

¹⁶ -Ye 'ɔ 'kɛle- 'ɔnɛɛ "bɔgo 'klekle "me -wɛ -lɔ 'ɔ "kɛ -ɛwɛ 'na "ku 'ko weli bhulɛ. Weli -cibhi 'na -bedi 'na "me noɛ 'tɛ- "me, 'ɛza, 'nyakpa -wa "ne -bɛɛ' "me -nyini "ne -wa "ne 'lelee -bɛɛ' 'ciɛ- -wɛ 'bhelia -lɔ 'ɛ zɔ -sɛ -sɛ kɔ. "Ɛ sɛbhele -wɛ, 'wa 'sa me -lɔ Lagɔ-bɔgo 'na -dawli 'na -bedi za. 'Wa "kɛ -soɔ no ne, 'wayigɛsɛ 'wa nyimɔ -lɔ 'wayi.

¹⁷ -Mɔ, 'anye 'na 'dle -glɛ -titoa nye, -Dɛmeda 'e -luɔle 'anye. Zaa 'a 'luɔle- 'ayi "ku, 'wa te -kɛ 'anye ylo no Lagɔ 'na -gblenya 'na weli -nyɛnye "me. 'A 'cɛ -soɔ 'sa ne 'a yi "me "tamale- 'dlekukɛleɛ "me.

¹⁸ Zezu Kli 'na wamaleɛ "ne 'ɔnɛɛ yibhleleɛ, Anyinɛnyɔ, -anyɛɛ 'Fuɔnyɔ, 'kpɔmale- 'anye "me. 'Ɔɔ 'bhe- -lɔ 'ŋlu -dɛme ne "ne -godogodo! Amɛn!