2 Piɛle 2 - Nouveau Testament bété de Gagnoa

"Guɔkwɔmenya -gbeyia

¹ -Watɔ, "guɔkwɔmenya -gbeyia -ko 'awɔ -glɔnya 'glɛme. 'Anye 'glɛme, 'a yi 'ce 'lelee -sloanya -gbeyia yle -me. 'Wa yi 'anye -glɛme -plɛ 'diɛɛ "me, "ne 'wa yi 'anye ylo no -sloa -weli -nyɛnye "me. "Ne 'wa yi "Bhenyɔ 'nabhɛ -ɔ 'fua- -wɛ 'na lo sɛ. -Soɔ 'wa "kɛ -lɔ 'wayi -kpilɛkpilɛ -ɛ -koa "ku -bhia -wɛ "ku lale- cuu.

² 'Nyakpa -kwleyia yua 'ce -gɛlele 'wayi 'na 'kpeteklisɛ 'na -slusluɛ "me. "Ne 'wanɛɛ za, 'wa yi 'ce gbɛklɛklɛ 'na -gwe 'dii ziɛ.

³ "Ne 'wa 'yɔbhɔ -gbɔ 'wa "kɛ -kɛ 'se 'dlasi yle cuu za, 'wa yi 'ce 'anye bhulɛweli -ye 'wa -sɛ 'wayi 'wlime -wɛ "me ylo nole-. -Mɔ, -ɛ "ne 'awɔ -la -dɛme yɛ, 'wanɛɛ 'gbobhleleɛ -ko 'awɔ lɔbhɔ "kle, "ne 'wa yi -kpilɛkpilɛ sibhɔle- cuu.

⁴ "Naa-, Lagɔ "ne -kɛ 'ɔnɛɛ "nɔgɔzilia 'wa -no 'nyinyonoli -wɛ 'na 'gbo 'yi 'tale-. -Mɔ, -dee 'wa "kɛ 'gbapele 'ye 'ɔ siloa- -lɔ, "ne 'ɔ yua -lɔ gwa- 'gɔgɔ "nu ''titiɛ "me, "ne 'ɔ yua -lɔ 'kulɛ- -kaa -se 'gbobhle -zle "kɛ ylɛ.

⁵ -Watɔ -ce 'na 'nyinyonoli -nonya, Lagɔ "ne 'awɔ 'wanɛɛ "kleyea "ku -dlu. -Mɔ 'ɔ -labha 'awɔ -ziɛziɛŋu "ne 'ɔnɛɛ -gblenya 'klekle -wa -ko 'awɔ dodo ne "ku -wɛ yi -lɔ 'wli bhiɛ-, Nowe -bholo -kpee 'ye 'ɔ fuɔ- 'awɔ -lɔ, 'ɔyi -ɔ bhulɛ 'awɔ Lagɔ 'na "me ŋwinɛle- -weli -wɛ, 'ɔ -nyɛ 'nyakpa -gbɔsɔ "bhaa.

⁶ Lagɔ -bhia me 'awɔ -kɛ 'lelee Sodɔme -nyɛ Gomɔle "bhaa 'na 'du -kosu nu "ku. 'Ɛwɛ 'ye 'nyakpa -gbeyia -wɛ "kɛ nɛ -lɔ "ku wolo-, "ne 'wa "kɛ nɛ -lɔ 'sɛ yibhlele- -gbɔ 'ɛwɛ yua 'ce yle -me.

⁷ Lɔte -ko 'awɔ 'nyakpa -wa -su 'wayi -gbeyi "ku -wɛ 'glɛme, -mɔ, 'ɔyi 'nabhɛ 'nyɔkpɔ 'na -ɔ ŋwinɛle- "me yɔ 'awɔ -lɔ. 'Wanɛɛ -kosɛ -nyɛnye 'gbapeɔ 'awɔ kpɛnyee.

⁸ "Naa- 'ɔ -ko 'awɔ 'nyakpa -wa -su 'wayi -gbeyi "ku -wɛ 'glɛme, -mɔ, 'ɔyi 'nabhɛ 'nyɔkpɔ 'na -ɔ ŋwinɛle- "me yɔ 'awɔ -lɔ. 'Wanɛɛ kosɛ -nyɛnye 'gbapeɔ 'awɔ kpɛnyee. "Naa-, 'ɔ -goa 'awɔ 'yli, "ne 'ɔ 'no 'awɔ "me, "ne -se -zle 'ple nɛ 'yiɛ -wɛ, 'ɔnɛɛ 'dle -ɛ ŋwinɛle- "me -wɛ 'yiɔ 'awɔ nuɔ kpɛnyee 'wanɛɛ nonoli -gbeyi -wɛ 'wɔ za. -Mɔ, Lagɔ fuɔ- 'awɔ "ɛ 'nyakpa -wɛ 'glɛme.

⁹ 'Ɛ sɛ zɔ -gbɔ Anyinɛnyɔ 'bhɛle- 'ɔ "kɛ -wa 'tɛlo- 'dle -wɛ 'gbapeɛ 'yli -sɛ. "Ne 'ɔ yi, 'nyakpa -nyɛnyea 'wanɛɛ 'dɛ jilɛ -se 'ɔ "koa 'kle 'yea- 'gbobhle -zle.

¹⁰ -Ye 'ɔ "kɛ 'ce 'kle 'yea- -tiaa -noɔ -lɔ -wa -gɛlele 'dlepɔsɛ -nyɛnye 'wanɛɛ ku "me -wɛ 'waa. "Ɛ 'wayi -wɛ 'tɛle -lɔ nonoli -ɛ -le 'zu "ku -wɛ 'ɛyikɔ 'siɛ, 'wanɛɛ gbo "ne -lɔ Anyinɛnyɔ 'na -kamaleɛ "klo -ko. 'Ɛ -soɔ 'na -sloanya -gbeyia -wɛ -kɛ 'wayi 'dleku kpɛnyee. 'Wa zia -lɔ 'wayi "ku "ne 'wa "ne "gu 'ŋlu me Zuzu 'wa -ko "nɔgɔ "me -wɛ 'na 'diziɛ -gɛ.

¹¹ "Nɔgɔzilia 'nabhɛ 'wa "ne 'bhlele "ɛ -soɔ 'na zuzu -wɛ gbo, "ne 'wa "ne zua 'di Anyinɛnyɔ 'yliku. 'Ɛ -ko sɔbhɔ "ne "nɔgɔzilia 'tɛ- "me "ne 'wa -kɛ 'bhɛloɛ kpɛnyee "ne 'ɛ -zi "ɛ -sloanya -gbeyia -wɛ "ku.

¹² "Ɛ 'nyakpa -wɛ -ko sɛgbɛɛ 'nɛmea 'na -wa "ne "nɛ-, -wa -ko lɔbhɔ -gbotu 'na 'yli bhli -za -se 'wa "kɛ "ku. 'Wa 'yli 'ye 'wa "ne -yi -wɛ "ne 'wa yi "ku sɛgbɛɛ 'nɛmea.

¹³ 'Kleyeɛ -ye 'wa "kɛ yle- 'wanɛɛ nonoli -nyɛnye za yɛ -lɔ. 'Wa -wa -se 'wa "kɛ 'wanɛɛ 'dlepɔsɛ -nyɛnye zlegɛ no. 'Wa -nyɔ 'wɔ "bhaa 'a "kɛ -jajo no ne, 'ɛyi 'wa ylɛle -lɔ "me "ne 'wa wlɛle -lɔ 'anye 'yo yɔko, "ne "ɛ 'wanɛɛ lɔbhɔ -koɛ -wɛ -le 'zu "ku.

¹⁴ 'Wa biɛ 'yli gbo -zlɛ -za, 'wanɛɛ 'dle "ne bɔ 'nyinyonoli -nodɛ. "Ne 'wa 'tetile -lɔ -wa "ne 'dlekukɛleɛ "me tɛle- -wɛ 'wayi lo. 'Nyakpa 'na -wa -kɛ 'dlasi 'na 'ŋwɛnɛ "me kpɛnyee 'waa -lɔ. -Kpilɛkpilɛnya 'waa -lɔ!

¹⁵ 'Wa 'bha- -gwe 'na -ɛ 'je- "me -wɛ "ku "ne 'wa yi -lɔ 'kwlɛ bhli-. 'Wa bhli- Bosole yowli Balaame 'na gudu, ɔyi -ye 'wa 'je- 'dlasi kɔ -gbɔ 'ɔ no "nyɛnye. "Ne Balaame 'na 'dle 'plele- "ɛ 'dlasi -wɛ "ku,

¹⁶ -mɔ 'ɔ 'no- "ku gbɔtɔle -weli "me: Soko 'na 'ŋɔnɔ -nɔ 'na -ɔ "ne 'di gbo -wɛ -bhulɛ 'nyakpasɛ "ne 'ɔ yi -lɔ Lagɔ 'na "guɔkwɔmenyɔ Balaame 'na -li -nyɛnye -ye 'ɔ "kɛ nɛ no -wɛ 'nyegbea-.

¹⁷ "Ɛ -sloanya -gbeyia -wɛ -ko sɛgbɛɛ 'ŋuwli 'na -ɛ "ne lɛ 'ŋu "me -ko, "ne 'wa -ko 'lelee sɛgbɛɛ 'nɔgɔ jɛtlɛ 'na -ye -gupepe 'glɛ lɛ 'kwlɛ. Lagɔ -sɛ lɔbhɔ 'wanɛɛ -glidɛ gu -titiɛ "me.

¹⁸ 'Diɛɛ, 'wanɛɛ bhulɛweli mɛne- 'yukwli "me, -mɔ 'ɛ "ne -bɛɛ' "me -ko, "ne 'wa lale -lɔ 'wayi 'nyakpa -wa 'bha- zikpɛ -nyɛnye 'lele "ku 'beku "ku -wɛ lo. 'Ɛnɛɛ za, 'wanɛɛ nyɔkpɔsɛ 'na 'dlepɔsɛ -nyɛnye "me 'wa

¹⁹ pleloa -lɔ weli kɔ -gbɔ 'wa yi kɔ yele-. "Ne 'wayi 'nabhɛ 'wanɛɛ nonoli -ɛ 'ploa -plo -wɛ 'na 'lu -koa -kɛ 'wlime. "Naa-, -sɔɔdɛku -bɛɛ' -gbli -anye 'sɔ 'wlime -wɛ -ɛnɛɛ juyua 'ye 'a -noɔ -lɔ.

²⁰ -Wa -yi Anyinɛnyɔ "ne -anyɛɛ 'Fuɔnyɔ Zezu Kli, 'wa 'bha- zikpɛ ne "ku 'na -li -nyɛnye 'beku, -mɔ 'wa kɛ 'wayi 'yi 'tale- ne, 'ɛ -koa "kusɔ 'wlime -gblile ne, 'wayi -wɛ 'wanɛɛ zikpɛ yi -gbeyi "zo "ne 'ɛ yi -watɔ -nɛ "ku 'zi.

²¹ 'Wa yibhlele- -gwe 'na -ɛ kɔme "meŋwinɛlemɔ, -mɔ 'wa 'bha- Lagɔ 'na -gbagbɛ -ye 'wa -sloa -wɛ 'na -gwe "ku. Za -gbɔ 'wa 'te nɛ se "ɛ -gwe -wɛ 'dɛ yibhlele-.

²² -Dɛmeda, -ɛ -yloa ne 'sibhale -lɔ 'anye "ɛ nunɛ ne zɔ gbɛklɛklɛ: «'Gwe lile 'ɔnɛɛ gwɛsɛli "kusɔ» "ne «'kokoti 'na -ye 'wa 'bha- -bhudoa -ka -wɛ -bhlile "kusɔ 'paple "me.»