2 Piɛle 1 - Nouveau Testament bété de Gagnoa

Bhɛleweli

¹ -Ame, Simɔ Piɛle, Zezu Kli 'na "kulɔbhɔnyɔ "ne 'ɔnɛɛ "kɔlepɔnyɔ, 'e kɛle -wa -yle -me 'dlekukɛleɛ -ɛ 'tɛ- 'kpɛ "ku sɛgbɛɛ -anye nɛ ne, Zezu Kli, -anyɛɛ Lagɔ "ne -anyɛɛ Fuɔnyɔ 'na 'dlewɔtɛ "me.

² Lagɔ 'pɔ 'anye 'ŋu, -se 'ɔ 'nyɛ 'anye "kuwɛtɛ 'na 'kwleyi -se 'a "kɔ yibhlele-, -se 'a "kɛ Anyinɛnyɔ Zezu Kli yibhlele- -me!

Libhɔ -ye Lagɔ lale- -anye "ku

³ 'Ɔnɛɛ 'bhɛloɛ "me, Lagɔ 'je- -anye -li 'klekle -ye -a "kɛ slu, "ne -a "kɔ 'dle 'tɛle, "ne -a "kɛ yamale- -wɛ kɔ. "Naa-, 'ɔ -sloa -anye -ɔ la- -anye -gbɔ -a "kɛ 'ɔnɛɛ 'ŋlu "ne 'ɔnɛɛ "nɛnekoɛ 'na dɛ 'ye.

⁴ "Ɛ 'ŋlu -nyɛ 'bhɛloɛ ne "me, Lagɔ -plele -anye -bɛɛ' 'na "yitɛ -ɛ 'tɛ- 'kpɛ "ku -wɛ 'na weli kɔ. Zaa, 'a kɛ "ɛ -bɛɛ' -wɛ -yle ne, 'a yi 'ce zikpɛ -ɛ 'zu- ne "me 'na -bɛɛ' 'na -ɛnɛɛ to lɔbhɔ 'anye -wɛ "me 'bha, "ne Lagɔ 'ɔyigɛsɛ "bhaa 'a yi "ku kole-.

⁵ 'A 'gwele 'ayi kɔ, -se 'anyɛɛ 'dlekukɛleɛ 'a "kɛ 'ayi 'na 'tee sluɛ klo 'piɛ, -se 'ayi 'na 'tee sluɛ 'a 'cɛ Lagɔ 'na 'tee yibhleleɛ klo 'piɛ.

⁶ "Ɛ Lagɔ 'na yibhleleɛ -wɛ 'a 'cɛ 'ayi 'na "kupiɛleɛ klo 'piɛ; 'Ayi 'na "kupiɛleɛ 'a 'cɛ 'dlekupiɛleɛ klo 'piɛ, "ɛ 'dlekupiɛleɛ 'a 'cɛ Lagɔ 'na 'dletɛleɛ klo 'piɛ

⁷ "ɛ 'dletɛleɛ -wɛ, 'a 'piɛ 'a "nowlia 'na 'ŋwɛnɛ "me kɛleɛ 'klo, "ɛ 'ŋwɛnɛ "me kɛleɛ -wɛ 'a 'piɛ -waleɛ 'klo.

⁸ -Kosɛ -namanɔ -ye 'a "kɛ -slu -wɛ -lɔ "naa-, 'a 'cɛ 'tee -su ne, 'a yi -li 'na 'kwleyi no, "ne 'a yi Anyinɛnyɔ Zezu Kli yibhlele- "ne 'ɛ yi lɔbhɔ 'ple.

⁹ -Mɔ, 'nyɔkpɔ "mɔ "ɛ -soɔ 'na kosɛ -namanɔ -wɛ -su ne, 'ɔ -ko -sɛgbɛɛ -kpelɔbhɔnyɔ. 'Ɔ 'dlu -gbɔ 'wa 'bhuduɔ- 'awɔ bhlɛme 'ɔnɛɛ 'nyinyonoli za.

¹⁰ Zaa, -nyɔsɔwanye, 'a 'gwele 'se 'ayi kɔ -se 'a "kɛ Lagɔ 'na 'laweli "ne 'ɔnɛɛ -se 'ɔ -tɔ 'anye -wɛ 'dle "tɛle. 'A kɛ -soɔ 'ayi -su, 'a -ka 'ce 'nyinyonoli "me 'bhlile-.

¹¹ 'Diɛɛ, Lagɔ yi 'anyɛɛ za 'kamalezikpɛ -ɛ "ne lɛ "nenidɛ -kɛ 'na -gbanuɛgwe "ku vulu- gbɛklɛklɛ, Anyinɛnyɔ, "ne -anyɛɛ 'Fuɔnyɔ Zezu Kli 'na 'kamale zikpɛ.

'A "tɛle 'se -ye 'wa -sloa 'anye -wɛ 'dle

¹² 'Ɛnɛɛ za, 'e 'yɔbhɔ 'ce -gbɔ 'e "kɛ -li -wɛ 'wɔ 'anyɛɛ 'dle "ku 'sibha. -Mɔ, 'a -yi "kle, "ne 'a "tɛle- gbɛklɛklɛ -ye 'a -yle -wɛ 'dle.

¹³ -Mɔ, 'luɔ 'ye 'e 'luɔ -lɔ 'anye, -se 'e "kɛ -li ne 'anyɛɛ 'dle "ku sibha-, -sɔɔdɛku 'e -ko -mlɛ dodo ne "ku -wɛ.

¹⁴ 'E -yi sɛ -gbɔ 'e yi 'anye yɔko 'bha 'na dɛ "ne -la "me tlo, Anyinɛnyɔ Zezu Kli -bhulɛle -ame.

¹⁵ -Mɔ, 'e kɛ -me "bhuɔ ne, 'a -ka 'ce 'neɛ -ye 'e -sloa 'anye -wɛ "ku 'dlu lɔbhɔ kɛ 'ce -ylɛ ne, 'e yi 'ce 'ɛnɛɛ za kɔ 'gwele-.

¹⁶ "Naa-, Anyinɛnyɔ Zezu Kli 'na zɛzɛ sɛ 'na "kusɔ 'na yiyiɛ, nunɛ -ye -a sɛ -ayi 'wlime -wɛ "me 'ye 'ɛ -na -kɛ 'bhale-. -Mɔ, 'ɔyi, -a 'yo- 'ylime gbɛklɛklɛ 'ɔnɛɛ 'ŋlu 'klekle "me.

¹⁷ 'Diɛɛ, 'ɔ -yle -bhlegbi "ne To Lagɔ 'na 'ŋlu, -sɔɔdɛku "me Tamale- Lagɔ 'na bhulɛ -weli -ɛ 'bhale- "nɔgo "me -no nɛɛ: «-Ɔne, 'neɛ yu -ye 'e -wa kpɛnyee yɔ -lɔ, 'ɔyi 'ye 'e -sɛ -lɔ lɔbhɔ 'ŋwɛnɛsɛ.»

¹⁸ 'Ɛ weli ne, "nɔgɔ "me 'ye 'ɛ 'bhale- -lɔ, -a no- "me -ayigɛsɛ, -sɔɔdɛku -a -ko 'awɔ tlo 'wlewle 'vli -wɛ.

'A kulɛ "guɔkwɔmenya 'na weli

¹⁹ "Ne -a -yi -sɛ -gbɔ "guɔkwɔmenya 'na weli "ne "ku -kpɛle nɛ yɛ, 'a 'fo 'yukwli 'tee, "naa-, 'ɛ -ko sɛgbɛɛ "napɛ -ɛ lele titiɛ "me, -ka -se -zle "kɛ 'ze, -se zegbakpɔ "me 'na -zeli "kɛ zɔ 'wlo -se 'ɛ "kɛ 'anye 'dlezɔ 'lele-.

²⁰ -Li 'klekle "me, -ye 'a "kɛ yibhlele- ne lɛ: 'Nyɔkpɔ -ka "guɔkwɔmenya 'na weli -ɛ -ko Lagɔbɔgo "me -wɛ 'ɔyikɔ zɔ -sɛ.

²¹ "Naa-, 'nyɔkpɔ -na 'ce -zɛ 'ɔyikɔ -se 'ɔ 'yɔbhɔ -wɛ Lagɔ 'na weli bhulɛ-. -Mɔ, Zuzu Wlewle 'na 'kwɛle 'kwɛleɛ "me 'ye 'nyakpa -bhulɛle -lɔ Lagɔ 'na 'tɔ "me.