2 Kolɛtenya 9 - Nouveau Testament bété de Gagnoa

Zeluzalɛme 'na 'klecɛnya 'na 'kwɛlekwɛleɛ

¹ Zeluzalɛme 'na 'klecɛnya -ye -a "kɛ kwɛle- za 'ɛ kɛ -noɔ, 'e -ka da 'anye "ku kɛle.

² 'E -yi sɛ nɛɛ 'a -bhɛ nɛ "me -gbɔ 'a "koa kwɛle-, "ne 'e yi -lɔ -ayi "ku zia Masedoane 'na 'nyakpa 'yliku 'anyɛɛ za -gbɔ Akayi -du "me 'na 'nyakpa 'na 'dle -ko nɛ "kle 'wanɛɛ "nyɛnyɛdɛ, 'ylobɛ -ɛ 'ple 'awɔ 'ce "me. 'Anyɛɛ ku 'tɛtɛliɛ 'ylime, 'nyakpa -kwleyia 'na 'dle 'plele- 'wanɛɛ "nyɛnyɛɛ "ku.

³ Sɛko -wɛ, 'e zia -ayi "ku 'anyɛɛ za, -ɛwɛza, -a "nowlia 'wɔ -ye 'e 'lebhele- 'anye "ku -wɛ, 'wa yibhlele- -sɛ -gbɔ 'anye 'a -luɔ nɛ "kle, -se -ye 'e -bhulɛ 'anyɛɛ dɛku -wɛ, 'a 'cɛ -kɛ no, -see sɔɔbɛɛza, 'e zia -ayi "ku -wɛ te kɛ "futo.

⁴ 'A "mɛ -sɔbhɔ "zo-, "ne Masedoane 'na 'nyakpa "bhaa -a "kɛ 'anyɛɛ moɔ -yi, "ne 'a "mɔ -kɛ -bɛɛ' kɔ -kɛɛ, -anye 'wa -kɛ 'anye 'dleku ne, 'zu yi -kɛ -anye lɔbhɔ, "ne 'ɛ yi 'lelee 'anye lɔbhɔ me!

⁵ -Ɛwɛza, 'e -no -lɔ -gbɔ "ɛ "nowlia ne 'wa 'ple 'yuku 'tɛ. -See 'wa "kɛ -li -ye 'a no -gbɔ 'a "kɛ "nyɛ -wɛ 'wli -jijalea. 'A -namlɛ yi "ne 'a "kɛ 'ɛwɛ 'klekle 'wli "zo, 'wa -yi sɛ -gbɔ 'dlewɔtɛ "me 'ye 'a "nyɛle- -lɔ, -mɔ, 'nyɔkpɔ -na no -gbɔ 'a "nyɛ "klepaa.

⁶ 'A yibhlele- 'sɛ -gbɔ: -Ɔ -glo 'tekeyi -wɛ, 'tekeyi 'ye 'ɔ 'di -lɔ, "ne -ɔ -glo vu -wɛ, vu 'ye 'ɔ 'di -lɔ.

⁷ -Ɔkɔkokɔko "nyɛ 'se 'ɔnɛɛ 'dle -wa -wɛ. 'Ɔ kɛ "nyɛ, 'ɔ -sɛ 'dle keyi, -mɔ, 'ɛ "ne 'kpokposɛ yɛ. "Naa-, -ɔ "nyɛ 'ŋwɛnɛsɛ -wɛ, 'ɔyi Lagɔ -wa -lɔ.

⁸ Lagɔ kɛ 'bhɛloɛ -se 'ɔ "kɛ 'anye -li 'klekle -ɛ 'nɛne -wɛ 'wliku mana. "Ne 'a yi -li 'klekle -ye 'a 'yɔbhɔ -wɛ kɛle-, "ne 'ɛ yi lɔbhɔ 'ple 'klekle, "ne 'a yi -nazɛ lɔbhɔ -sɛ, "ne 'a yi -li 'na -ɛ 'nɛne 'klekle -wɛ no yiɛ.

⁹ Sɛne 'ye Lagɔbɔgo 'gbɔ -lɔ: 'Nyɔkpɔ 'na -ɔ "ne kɔ 'tɛ, "ne 'ɔ "nyɛ 'nyɛzenya, "ne 'ɛ miɛle "ku -wɛ, 'ɔnɛɛ "nɛnekoɛ "ne "nenidɛ -kɛ.

¹⁰ "Naa-, Lagɔ "nyɛ -lɔ 'gloglonyɔ 'yo 'na -ye 'ɔ "kɛ 'glo -wɛ, "ne 'ɔ "nyɛ mo 'lelee -lɔ lilɛ. Lagɔ yi 'lelee 'anye 'yo "nyɛ me. 'Ɔ 'yi "ku zimalea-, "ne 'ɔ yi 'gbɔ "ne 'ɛ yi mi. "Ɛ -soɔ 'ye 'anyɛɛ "nɛnekoɛ "kɛ -lɔ 'bhi 'na 'kwleyi tlo.

¹¹ Lagɔ yi 'gbɔ "ne 'a yi -klɔgbɔ 'na 'wukwɛ 'klekle yle, -se 'a "kɛ 'alua "nyɛ -me 'ŋwɛnɛsɛ, sɔbhɔ za, 'nyakpa 'kwleyia yi 'ce Lagɔ bhɛle-, -li -ye 'a 'je- -anye kɔ -gbɔ -a "nyɛ 'alua -wɛ za.

¹² -Li -ye 'a "nyɛ -soɔ -wɛ, 'klecɛnya 'wayikɔ 'ye 'ɛ 'na 'kwɛle. -Ye 'wa "ne -kɛ -wɛ 'ye 'a 'nyoa -lɔ. "Ne, 'a "tamaloa -lɔ 'kwɛme, -se 'wa "kɛ Lagɔ bhɛle- bhubhɔ bhubhɛ "me.

¹³ 'Anyɛɛ "nyɛnyɛɛ "me 'ye 'a -tua -lɔ 'nyakpa 'ylime -gbɔ 'a -glɛ Lagɔ 'glɛ, "ne 'a "zo -lɔ Klise 'na 'Denaade 'plome, "ɛ kɛ -soɔ -ko ne, 'klecɛnya 'na 'kwleyia yi Lagɔ 'ŋlu 'kwa- 'ye 'a 'dliloa- 'anyɛɛ -klɔgbɔ -wɛ za, "ne 'a 'dlile- -me 'nyakpa 'klekle.

¹⁴ Lagɔ -nyɛ 'anye -li -kwleyi 'na -ɛ 'nɛne -wɛ. 'Ɛza, "ɛ 'nyakpa -wɛ "kɛ -lɔ 'anye 'wanɛɛ -waleɛ 'ylime 'tua 'bhubhɔbhubhɔ "me.

¹⁵ -A 'bhɛle Lagɔ 'ɔnɛɛ yu -ye 'ɔ "nyɛ -anye -wɛ za, -ɛ "ne wɔkɔle -bɛɛ' -kɛ.