2 Kolɛtenya 8 - Nouveau Testament bété de Gagnoa

Zeluzalɛme 'na 'klecɛnya 'na 'kwɛlekwɛle-weli

¹ -Nyɔsɔwanye, -li 'na -li -ye Lagɔ -no Masedoane -glɔ 'na Lagɔgligbɛ "me 'na konya 'wli -wɛ, 'ɛyi, -a 'yɔbhɔ -lɔ -gbɔ -a "kɛ 'anye bhulɛle-:

² 'Wa ylɛle- 'kplɛkplɛɛ 'na 'kwleyi "me, -mɔ, 'ŋwɛnɛ lɔbhɔa 'ce kpɛnyee yiɛ. 'Wa -noɔ 'poɛnya 'wa, -mɔ 'ɛ -ko -sɔbhɔ "ne 'wa 'tale 'dlasi 'yi.

³ 'Klecɛnya 'je- -ye 'wa 'bhɛle- 'wa "kɛ nɛ "nyɛ -wɛ kɔ, "ne 'ɛyi 'nabhɛ 'ple- lɔbhɔ, 'e 'ye 'ɛnɛɛ dɛ, 'wa no, -mɔ, 'dle 'na 'dle kɔ 'wa nole- -lɔ.

⁴ 'Wa 'bhubhɔ -anye kpɛnyee -gbɔ 'wayi 'lelee, 'wa "kɛ Zeluzalɛme 'na 'klecɛnya kwɛle- -me.

⁵ -Ye 'wa -no miɛle- -anyɛɛ 'dlepɔsɛ 'wli "ku, "naa-, 'wa -sɛ 'wayi Anyinɛnyɔ za, "ne 'wa -sɛ -me 'lelee 'wayi -anyɛɛ za, -soɔ 'ye Lagɔ 'yɔbhɔ -lɔ.

⁶ "Ne -a yi -lɔ Tite kɔ 'titli nɛɛ: 'Anyɛɛ moɔ 'ye -li 'na -li 'cile- -lɔ "ku. Za, 'a 'no -kaa -se 'a -sɛ 'wli.

⁷ 'Anyɛɛ -ye 'a -kɛ -wɛ -zu kpɛnyee, "ne 'a -noɔ -lɔ 'dlekukɛlenya 'wa, "ne 'a bhulɛ 'tee. "Ne 'a -yi -li -kwleyi, "ne 'anyɛɛ -li "ne 'gwlɛ "me "ne 'a no cuu. "Ne 'a -kɛ -anyɛɛ 'ŋwɛnɛ "me. Zaa, 'a 'tua -me 'lelee 'nyakpa 'ylime -gbɔ 'a -ko 'nɛne kpɛnyee.

⁸ 'E -na -kɛ -gbɔ 'a no klepaa. -Mɔ, Lagɔgligbɛ 'na -vinɛ -wɛ 'wɔ 'na 'se 'wa -zo 'wanɛɛ 'dlasi 'wli 'bhobhlo -wɛ 'na 'de 'ye 'e -sɛle -lɔ 'anye. -Se 'anye 'lelee 'a 'cɛ -anye 'ylime 'tua- -gbɔ 'ŋwɛnɛ 'sɛku 'a 'nyɛ.

⁹ "Naa-, 'a -yi Anyinɛnyɔ Zezu Kli 'na -jɔlo. 'Ɔyi, -klɔgbɔnyɔ, 'ɔ "zoa- 'ɔyi 'poɛnyɔ 'anyɛɛ za, -se 'ɔnɛɛ 'poɛ -wɛ "me, 'a "kɛ -klɔgbɔnya "zo.

¹⁰ 'Neɛ' 'dlepɔsɛ 'ye 'e bhulɛle -kɛ -lɔ 'anye "ɛ weli ne "me, -gbɔ -ɛ 'nɛne 'anyɛɛ dɛku ne lɛ: 'Anye -noɔ -lɔ 'tɛtɛnya 'na -wa -kwɛle Zeluzalɛme -du "me 'na 'klecɛnya 'waa. 'Anye -noɔ -me -kɛ 'lelee 'tɛtɛnya 'na -wa pɔ- "ɛ -li -wɛ 'wɔ "ku 'dle 'ylobɛ 'na -ɛ 'ple- 'awɔ 'ce "me 'waa.

¹¹ -Ye 'a 'ci- "ku -wɛ, 'a no 'kaa 'se 'a -sɛ 'wli 'dle "namanɔ "me, -see 'a 'bhɛle -wɛ.

¹² 'A kɛ 'dle "namanɔ "me 'nyɛle-, 'nyakpa yi 'anye 'tee 'sa, 'ɛ -nyɛ 'anyɛɛ -ye 'a -su -wɛ "bhaa. 'Wa -ka 'anye -ye 'a "ne -kɛ -wɛ lo 'yɔbhɔle-.

¹³ -Ɛ "ne -kɛ -gbɔ 'a "kɛ 'ayi 'poɛnya "zoa- -se 'a "kɛ 'alua 'kwɛle yɛ. 'Bhɔ, -mɔ, -li "kɛ "me ŋwinɛle- za yɛ -lɔ.

¹⁴ -Dɛme 'na dɛ ne "ku, -ye 'a -kɛ "ne 'ɛ 'ple- lɔbhɔ -wɛ yi -wa "ne -kɛ -wɛ kwɛle-. Zle 'a "mɔ -bɛɛ' -kɛ, -wa -kɛ "ne 'ɛ 'ple- lɔbhɔ -wɛ yi 'anye kwɛle-, -se -li "kɛ "me 'ŋwinɛle-.

¹⁵ "Naa-, sɛne Lagɔbɔgo no -lɔ nɛɛ: -Ɔ libhi -vu -wɛ 'na -ye 'ɔ libhi- -wɛ 'ɛ "ne 'ple -la lɔbhɔ. "Ne -ɔ libhi- 'tekeyi -wɛ, -bɛɛ' "ne bɔ 'lelee kɔ.

Tite -nyɛ 'klecɛnya 'na -bedia "bhaa, 'wa me Kolɛte -du "me

¹⁶ -A 'bhɛle- Lagɔ! "Naa- -see 'e 'yɔbhɔ nɛ gbɔ 'e 'kɛ 'anye kwɛle, "ɛ sɛbhele -we 'ye Lagɔ "zo- -me -lɔ Tite 'dlezɔ.

¹⁷ "Ne Tite yi -lɔ -anyɛɛ bhulɛweli "ku 'ŋunu-, "ne ku 'tɛtɛleɛ "me, "bhle 'na weli -ko nɛ 'wlime "kle, "ne 'ɔ yi -lɔ 'ɔyigɛsɛ no -gbɔ 'ɔ yi 'anyɛɛ moɔ yi.

¹⁸ "Nɔwli -nyɔ -nyɛ Tite "bhaa -ye -a "kɛ 'anye "ku 'lebhele -wɛ, Lagɔgligbɛ 'klekle bhulɛ 'ɔnɛɛ weli 'na "namanɔ -se 'ɔ -sɛ Lagɔ 'na 'Denaade -wɛ za.

¹⁹ 'Ɛ "ne -kɛ 'ɛwɛ 'ɛyikɔ za yɛ! -Mɔ, Lagɔgligbɛ -sɔ -lɔ lɔbhɔ -gbɔ 'ɔyi "bhaa -a yile 'gɔme -se 'a -kɛ -ye 'wa 'je- 'anye kɔ -wɛ 'dli-. Libhɔ -ye 'a -kɛ nɛ no, "ne Anyinɛnyɔ 'Ɔyigɛsɛ "kɛ nɛ 'ŋlu me -wɛ -lɔ, lɔbhɔ 'na dɛku, -anyɛɛ nonoli "namanɔ 'na -see 'ɛ -ko -anye 'dleku sɔbhɔ 'ye -a -tua -lɔ 'ylime.

²⁰ -A gwegwele kɔ -se 'dlasi -kwleyi -wɛ 'na 'dlidliɛ "me, -a te -kɛ 'nuɔsɔbhɔledɛ kɛle-.

²¹ "Naa-, -ɛ 'nɛne -wɛ 'ye -a 'tɛle -lɔ 'siɛ, 'ɛ "ne Anyinɛnyɔ 'ɔyikɔ 'yliku yɛ, -mɔ, 'nyakpa 'yliku yɛ -me -lɔ.

²² -Ye -wa 'lebhe -wɛ 'glɛme 'ye -a "zo -me -lɔ -a "nɔwli, 'ɔ 'yɔbhɔ -gbɔ 'ɔ "kɛ lɔbhɔ-, 'ɛyi -wɛ 'ye -a 'kabha -lɔ 'yli -tiaa -li 'klekle "me, -mɔ, -dɛmeda; 'Ɔ zɛkɛ ne 'ɛ 'ple- -watɔ nɛ -ce yɔko "me, "naa-, 'ɔ "kɛ -anye 'dleku kpɛnyee zɛ.

²³ Tite, 'neɛ 'nɔŋonyɔ yɔ -lɔ, 'ɔyi "bhaa "ne -a nole -lɔ libhɔ 'gɔme 'anyɛɛ za. -A "nowlia -wɛ 'wɔ, Lagɔgligbɛ -lebheloa -lɔ. Klise "kɛ 'ŋlu me za, 'wa -no -lɔ -ɛwɛ 'wɔ.

²⁴ Zaa, 'a 'tua- 'ayi 'ylime -gbɔ 'a -woa -diɛɛ -na -diɛɛ', -se Lagɔgligbɛ "kɛ 'sɛ yibhlele- -gbɔ -a kɛ -ayi "ku zia 'anyɛɛ za ne, 'ɛ "ne yo yɛ.