2 Kolɛtenya 7 - Nouveau Testament bété de Gagnoa

¹ 'Titoa -awale 'wanye, Lagɔ -plele 'se -anye weli kɔ, za, -a 'gwegwele kɔ -se -anyɛɛ ku -nyɛ 'dle "bhaa "kɛ 'wlele plɛ. -A -ya 'gu Lagɔ -gɛ, -se -a "kɛ -anyɛɛ 'wleleplɛɛ kɔ bhiɛ.

Pɔle 'na 'ŋwɛnɛ

² "Nowlia 'wanye, 'a "zo -anye 'ayi 'dlezɔ. "Naa-, -sɔɔdɛku -a -ko 'anyɛɛ moɔ -wɛ, -a "ne 'nyɔkpɔ -nyɛnye 'wli -no, -a "ne 'nyɔkpɔ 'wlime -nyimɔ, "ne -a "ne 'nyɔkpɔ -vi "ku -li.

³ 'E -na -kɛ no -gbɔ 'e "kɛ 'anye gbo lua za 'e bhulɛ "ɛ soɔ. -Mɔ, 'e -bhulɛ nɛ "kle -gbɔ ku 'a kɛ "ku- -ce, yɛ -a kɛ -yɛ -ce, 'a -ko -anye 'dlezɔ 'yiɛ.

⁴ 'E -kɛ 'anye 'dleku "yitɛ "ku, "ne 'a -le -ame 'ŋwɛnɛ "ku kpɛnyee. 'Ɛza, 'gbapegbapeɛ 'klekle -ye 'e -yle -wɛ, 'kwɛme 'tɛ- -ame 'gbigbi, "ne 'ŋwɛnɛ miɛle- -ame 'wli "ku.

⁵ "Naa-, -ye -a -ylɛ Masedoane -glɔ "me -wɛ, -a "ne -la -nyɔpɔ 'tekeyi, -mɔ, 'kplɛkplɛɛ 'na -dee 'ɛ "mɔ 'bhale- "ne -dee 'ɛ kɛ 'bhale- 'klekle 'ye -a -yle -lɔ. 'Nyakpa -bli -anye gbo -no -za, "ne nyanɔ yi -lɔ 'lelee -anye 'dlezɔ 'plɛ.

⁶ -Mɔ, Lagɔ -ɔ 'nyɛ 'nyakpa -ye gbo -bhiɛ 'dleku 'kwɛmetamaleɛ -wɛ, -dɛpe -lɔ -anye Tite 'na 'duylɛ "me.

⁷ Tite 'na 'duylɛ 'ɛyikɔ "ne -kɛ -anye -dɛpe, -mɔ, 'kwɛme -ye 'a "tamaleɔ 'lelee -wɛ za yɛ -lɔ. 'Ɔ -bhulɛle -anye -gbɔ -neɛ' to lɔbhɔ 'anye, "ne 'ɔ -bhulɛle -anye 'anyɛɛ "klo -ye 'a -nyɛne -wɛ 'na weli, 'kwɛme -ye 'a 'tɛ- "ne 'a "kɛ -ame 'beme 'sibhɔ -wɛ 'na weli. 'Ɛza, 'neɛ 'ŋwɛnɛ 'kpɔmale- kpɛnyee.

⁸ 'Neɛ "bɔgo 'na "sɔnɛɛ -ye 'e kɛle- 'anye "ku -wɛ kɛ 'gbɔ "ne 'a kɛ "klo -nyɛne, 'ɛ "ne -ame 'dlebhɛ "ku -le. "Naa-, 'e -yi sɛ -gbɔ "ɛ "bɔgo "ne 'gbɔ -lɔ "ne 'a yi -lɔ "klo -nyɛne 'tekeyi, -mɔ, "ɛ "klonyɛneɛ -wɛ -ka "me 'gwlɛ.

⁹ -Mɔ, -dɛmeda, 'ŋwɛnɛ lɔbhɔ -ame. 'Ɛ "ne -kɛ 'anyɛɛ "klo -ye 'a -nyɛne -wɛ za yɛ, -mɔ, sɛko -wɛ, "ɛ "klonyɛneɛ ne 'bhelia- 'anyɛɛ 'dle kɔ, 'ɛ "namale- Lagɔ -gɛ, "ne 'ɛ -ko sɔbhɔ "ne -ye -a no 'anye -wɛ "ne "nyɛnye yɛ.

¹⁰ 'Dlebhɛ -ɛ 'bhale Lagɔ "me -wɛ 'bhelia -lɔ 'nyɔkpɔ kɔ, "ne 'ɛ 'nyɔ -lɔ zikpɛ, za, 'ɛyi -wɛ te -anye 'dlebhɛ "ku lele-, -mɔ, 'dlebhɛ -ɛ "ne 'bhelia 'dle kɔ -wɛ 'nɛme -lɔ 'kwiɛ.

¹¹ 'Anyɛɛ 'dlebhɛtusɛ 'namale- Lagɔ -gɛ. Zaa, 'a 'wolo -la -dɛme -ye 'ɛ -nɛme 'anye -wɛ "ku! 'A 'tale "nyɛnye 'yi 'bhobhlo! 'A 'bhubhɔ 'bhobhlo! "Ne 'dlebhɛ lɔbhɔ 'anye 'bhobhlo! "Ne 'a "gu "nyɛnye 'na nonoɛ -gɛ! 'Neɛ to 'lɔbhɔ 'anye! "Ne 'kwɛme 'tɛ- 'anye! 'Nyakpɔ 'na 'ye gbo lu -wɛ, 'a 'gbapeɔ. "Ɛ weli ne, 'nyakpa 'ye 'ylime gbɔ 'a "ne nɛ sɛ -yi.

¹² Zaa, 'e "ne 'anye "ku kɛle-, -ɔ -noa 'anye "nyɛnye -wɛ 'na 'ylime, "ne 'e "ne 'anye "ku kɛle- -ɔ 'gbape- "ɛ "nyɛnye -wɛ za 'na 'tɔme. -Mɔ, 'e 'yɔbhɔ -gbɔ 'e "kɛ 'anye 'ylime -tua -gbɔ Lagɔ 'yliku 'a -wa -anyɛɛ weli.

¹³ -Ɛ "tamalea -anye 'kwɛme -wɛ -lɔ. "Ne 'ɛ 'kwɛmetamaleɛ ne -lele -anye 'ŋwɛnɛ "ku, "ne "ɛ 'ŋwɛnɛ -wɛ 'ple lɔbhɔ Tite 'na 'ŋwɛnɛ za. "Naa-, 'anye 'klekle "tamaleɔ- -lɔ 'dleku zɛ.

¹⁴ "Naa-, 'ɔyi 'yliku 'a -sɛ -ame zu "klo "me, za, zu "ne 'lɔbhɔ -ame, sɛko -wɛ, -a bhulɛle nɛ 'ce 'anye gbɛklɛklɛ yiɛ, 'ɛza, -se 'a -sɛ -ame zu "klo "me Tite 'yliku -wɛ "namaleɛ -lɔ -tiaa.

¹⁵ 'Ɔnɛɛ 'dle 'sibhɔ -se 'a "zo 'plome, "ne 'a sɔ- 'tee 'anyɛɛ ku 'na 'tɛtɛleɛ "me, 'ɛza, 'ɔnɛɛ 'ŋwɛnɛ -ye 'ɔ -kɛ 'anyɛɛ za "me -wɛ 'kpɔmale- -lɔ kpɛnyee.

¹⁶ 'Ŋwɛnɛ lɔbhɔ -ame, "naa-, 'e 'bhɛle- 'e "kɛ -anye 'dleku -kɛle -li 'klekle "me zɛ.