2 Kolɛtenya 6 - Nouveau Testament bété de Gagnoa

¹ Zaa, -anye -nyɛ Lagɔ "bhaa -wa nole libhɔ 'gɔme ne, -anye 'yɔbhɔle -lɔ 'anye -ɛne: -Jɔlo -ye Lagɔ 'je 'anye kɔ -wɛ 'a 'te nyimɔ.

² "Naa-, Lagɔ nɛɛ: «Lɔbhɔ -ylɛ za, 'e 'no- -neɛ' bhubhɔweli "me, "ne -zle 'anyɛɛ 'fuɔzle -kɛ -ylɛ, 'e yi -eyi kwɛle- -ka yi. Zaa, -Dɛmeda, lɔbhɔ -ylɛ, lɔbhɔ -ylɛ -diɛɛ'. -Dɛme, 'yli -ye Lagɔ "kɛ -anye "me 'fuɔ ne lɛ.»

³ -Anyɛɛ zikpɛ "me, -a "ne 'yɔbhɔ -gbɔ -a "kɛ -bɛɛ' 'na -ɛ "kɛ 'nyɔkpɔ "nyɛnye "me kɔme- -wɛ no -se -anyɛɛ libhɔ te kɛ 'nuɔsɔbhɔledɛ kɛle-.

⁴ Sɔbhɔ za, -a no -lɔ -li 'klekle -se -a 'cɛ 'anye 'ylime 'tua -gbɔ Lagɔ 'na "kulɔbhɔnya -ye -a -noɔ, "ne -a 'ye -lɔ 'kle, 'gbapegbapeɛ "me, 'dlebhɛ "me, nyanɔ "me,

⁵ 'Lɔbhɔlɛbhɛɛ 'oo, -jiɛ 'oo, 'wa 'sibha -anye 'nyakpa 'yliku, 'kplɛkplɛɛ 'oo, 'ylɛteɛ 'oo, ŋɔŋolɛbhɛɛ oo, 'ɛyi 'klekle -a 'ŋunu "ku.

⁶ -Soɔ 'ye -a 'tua 'lelee -lɔ -ayi 'ylime -gbɔ Lagɔ 'na "kulɔbhɔnya 'ye -a -noɔ 'wlele 'na -kokoɛ "me, -li 'na yibhleleɛ "me, 'dle 'na 'bhlepiɛ "me, 'dlekunamaleɛ "me, Zuzu Wlewle "bhaa 'na "kukoleɛ "me, -diɛnadiɛ 'na -waleɛ "me.

⁷ Gbɛklɛklɛ 'ye -a bhulɛ -lɔ Lagɔ 'na 'bhɛloɛ "me, -ye -a libhi "ku "ne -anyɛɛ 'gblenya "bhaa -a 'gwe "ne -a zizi -ayi "ku -wɛ -noɔ -lɔ -anyɛɛ Lagɔ 'yliku 'na 'tee 'nɔŋoɛ yɛ,

⁸ -bedia "zo -anye -bhlegbi "me "ne 'wawɛ zia -anye 'dii. -Bedia bhulɛ -anyɛɛ "ku 'na weli -nyɛnye, "ne 'wawɛ -sɛ -anyɛɛ 'de 'na "namanɔ, 'wa libhi -anye "ku ɛɛ yowlɛnya, "ne -a bhulɛ "me -kɛ gbɛklɛklɛ,

⁹ 'wa -su -anye "ku sɛgbɛɛ -ye 'wa "ne -yi gou, "ne 'wa -yi kɛ "fu -anye, 'wa 'wolo -anye "ku sɛgbɛɛ -gɛzea, "ne -a -yɛ -kɛ "fu gbligbli, 'wa lɔbhɔ -anye -mɔ 'ɛ "ne 'kwiɛ 'glɛglɛ-,

¹⁰ 'wa 'gbɔ "ne -a -nyɛne "klo, -mɔ, 'ɛ -ko "ɛ -soɔ "ne 'dlezɔ 'nɛne -anye yiɛ. 'Wa -kɛ 'dleku -gbɔ 'poɛnya 'ye -a -noɔ, "ne -anye 'gbɔ -lɔ "ne 'nyakpa -kwleyia "zo -lɔ -klɔgbɔnya, 'wa -tɔle -gbɔ -a "ne -bɛɛ' -kɛ, "ne -anye -kɛ -lɔ -li 'klekle!

¹¹ 'Anye Kolɛte 'na 'nyakpa -wɛ, -a bhulɛle- 'anye gbɛklɛklɛ, -a "ne 'anye -bɛɛ' 'ylime zizile-.

¹² 'Anyɛɛ za, -a -vulu -anyɛɛ 'dle "ku, -mɔ, 'anye, 'anye "ne -lɔ -anye -see 'a -wa -anye -wɛ 'ylime tua-.

¹³ -See 'to bhulɛle 'ɔnɛɛ yua -wɛ, sɔbhɔ 'ye 'e bhulɛle -lɔ 'anye, -ye -a no ne, 'a no -me, 'a -vulu -me 'anyɛɛ 'dleku, 'anye 'lelee!

-Yɛyɛ Lagɔ 'na -bhudu

¹⁴ -Wa "ne Lagɔ -yi -wɛ "bhaa 'a te "ku -kole -se 'a te -li -nyɛnye no. -Ɛ 'ŋwinɛle- "me, "ne -ɛ "ne "me ŋwinɛle- yi bhɔ yɔko mele-? Zle -nyɛ titiɛ "bhaa yi bhɔ "ku 'nɔŋole-?

¹⁵ -Waleɛ yi bhɔ Klise -nyɛ Sata "bhaa 'glɛme 'ko? 'Dlekukɛlenyɔ "ne 'nyɔkpɔ -ɔ "ne Lagɔ -yi -wɛ "bhaa yi bhɔ -bɛɛ' "ku 'bhele?

¹⁶ Lagɔ 'na -bhudu -nyɛ "fu 'na lagɔ "bhaa, weli -bhele 'wa bhulɛ bha? "Naa-, -anye -noɔ -lɔ Lagɔ -ɔ -yɛ gbligbli 'na -bhudu yɔ. Sɛne Lagɔ -bhulɛ nɛɛ: 'E "koa 'glɛme 'gli, -se 'wa "kɛ -neɛ' 'nyakpa "zo -se -ame 'e "kɛ 'wanɛɛ Lagɔ "zo.

¹⁷ -Soɔ za Anyinɛnyɔ no -lɔ nɛɛ: 'A 'ylile "ɛ 'nyakpa -wɛ 'guɔ -se 'a 'tlomaloa 'dɛ 'fɛfɛ! 'A te -ɛ "ne 'wlele -ko -wɛ kɔ "sa. -Se -ame Lagɔ, 'e "kɛ kɛ -anyɛɛ za sɔ "me 'lɛle.

¹⁸ Anyinɛnyɔ -ɔ 'bhɛle- lɛ -li 'klekle bhulɛ lɛ sɛne: "Mɔ "kɛ -lɔ 'a 'to "zo, "ne 'anye, 'a "kɛ -lɔ 'neɛ 'widiayua -nyɛ 'ŋuyua "bhaa "zo.