2 Kolɛtenya 5 - Nouveau Testament bété de Gagnoa

-A -kɛ "nɔgɔ "me 'glidɛ

¹ "Naa-, -a -yi 'sɛ -gbɔ dodo ne "ku 'na ku -ye -a -ko "me -wɛ, 'ɛ -ko sɛgbɛɛ -gligbɛ 'na -ɛ "kɛ lɛ "kubhiɛ 'yli -bholo "me. -Mɔ, 'a -ya yibhlele- "kɛ sɛ -gbɔ "nɔgɔ "me, -a -kɛ 'bhle -bhudu 'na -ɛ "kɛ lɛ 'gwlɛ -godogodo, Lagɔ 'sɛbhɛ- -lɔ, -mɔ, 'nyakpa "ne 'sɛbhɛ-.

² "Ne -dɛme 'na dɛ ne "ku, -a 'kplile- -lɔ 'ɛ -gligbɛ -wɛ zɔ, "ne -a 'tɔtɔ "me -lɔ yɔko "me -se -a "kɛ kɛ "nɔgɔ "me 'na -bhudu -ɛ -ka "kubhiɛ -wɛ "me -plɛ me. 'Ɛ -noɔ -lɔ -anyɛɛ ku -lele yɛ.

³ Zaa, "ɛ "nɔgɔ "me 'na -bhudu -wɛ -kɛ -anye 'wlime 'gbli- ne, -a yi 'sɛ yibhlele- -gbɔ -a "ne 'wludiɔ-.

⁴ -Sɔɔdɛku, -a -ko dodo ne "ku 'na -gligbɛ ne zɔ ne, -a kpli, sɛgbɛɛ -ɔ 'kɔtɔ "me. 'Diɛɛ yɛ -lɔ, -a "ne 'yɔbhɔ -gbɔ -a "kɛ "ku, -se -a "kɛ -anyɛɛ ku ne "me 'bha-. -Mɔ -a 'yɔbhɔ -gbɔ -a "kɛ "nɔgɔ "me 'na ku yle, -se zikpɛ -ɛ -ka "kubhiɛ -wɛ "kɛ "ɛ ku -wɛ mlɛ.

⁵ -Ɔ -sɛ lɔbhɔ -anye "ɛ zikpɛ ne za ne, Lagɔ yɔ -lɔ. 'Ɔ 'nyɛ -lɔ -anye Zuzu Wlewle, 'ɛ -noɔ tɛtɛ -bɛɛ' 'na "namanɔ -ye -a "kɔ "me ylele- yɛ.

⁶ Zaa, -anyɛɛ 'kwɛme 'tɛ- -godogodo. -Mɔ, -a -yi sɛ -sɔɔdɛku, -a -ko -anyɛɛ dodo ne "ku 'na ku "me -wɛ, Anyinɛnyɔ 'ye -a 'tlole -lɔ 'dɛ.

⁷ "Naa-, 'dlekukɛleɛ "me 'ye -a 'nɔŋole -lɔ, -mɔ, -ye -a -gɛ 'yli -wɛ 'ye -a "ne -gɛlele.

⁸ -Ɛɛ, -anyɛɛ 'kwɛme 'tɛ- 'klekle "ne -a 'yɔbhɔ nɛ kpɛnyee -gbɔ -a "kɛ "ɛ ku ne "me 'bha-, -se -a "kɛ Anyinɛnyɔ yɔko -ko.

⁹ -Mɔ, -a kɛ 'se "ɛ ku ne "me -ko, "ne -a "mɔ 'se "ɛ ku ne "me -ko -ce, -ye -a 'yɔbhɔ -tiaa -noɔ -lɔ -gbɔ -a 'namalo -gɛ.

¹⁰ Sɛko -wɛ, -anye 'klekle -a yi 'ce Klise 'yliku 'sibhɔ 'ɔnɛɛ 'gbobhleledɛ "me, lɔbhɔ 'ye -ɔkɔkokɔko "kɛ -lɔ -ɛ -noɔ 'ɔnɛɛ yɛ -wɛ ylele-, "namanɔ "ne "nyɛnye, -se 'ɔ -su 'ɔnɛɛ zikpɛ "ku dodo ne "ku -wɛ.

Lagɔ -selia 'nyakpa gbo Klise "me

¹¹ -A -yi -se Anyinɛnyɔ 'na 'plomezoɛ sɛ zɔ ne. 'Ɛza, -a 'tɛle -lɔ -se -a 'cɛ 'nyakpa "me "noa -wɛ 'siɛ. Lagɔ -yi -anye 'tee, "ne 'e -yi sɛ -gbɔ, 'anye 'lelee 'anyɛɛ 'dle -ce zɔ, 'a -yi -anye 'tee.

¹² -A -na no -gbɔ -a "kɛ 'anye -ayi "kusɔ 'ylime tua. -A "kɛ -sɔbhɔ 'gbɔ ne, 'a "kɛ 'ayi "ku zia -anyɛɛ za. -Se 'a "kɛ -wa zia 'wayi "ku zikpɛ -ko -li za -wɛ bhulɛlesɛ yibhlele-. -Mɔ, 'ɛ "ne -kɛ -ɛ -ko 'dlezɔ -wɛ yɛ.

¹³ -A kɛ -ko sɛgbɛɛ 'wa "ne 'wlime kɛɛ, Lagɔ za yɛ -lɔ. "Ne -a kɛ 'tee -ko, 'anyɛɛ za yɛ -lɔ.

¹⁴ "Naa-, Klise 'na 'ŋwɛnɛ miɛle -anye 'wli "ku, -sɔɔdɛku, -a 'pɔ -ɛne "ku 'dle ne: 'Nyɔkpɔ -bholo "ku- 'nyakpa 'klekle za, 'ɛnɛɛ za 'nyakpa 'klekle "ku-.

¹⁵ 'Ɔ "ku- 'nyakpa 'klekle za, -se -yɛyɛnya 'wayigɛsɛ 'na 'gbo 'toa kɛ 'plɛle-. -Mɔ, 'wa "kɛ -kɛ Klise -ɔ "ku- "ne 'ɔ 'yi 'wanɛɛ za gluzɔ 'wlo -wɛ za yamale-.

¹⁶ 'Ɛnɛɛ za, -Dɛmeda, -a "ne -la 'nyɔkpɔ, 'nyɔkpɔ 'sɛku -yi. -Soɔ 'ye -a "kɛ nɛ -kɛ Klise -yi bhlɛme ne, "ɛ -soɔ 'ye -a "no -la -dɛme -yi.

¹⁷ 'Za, 'nyɔkpɔ -nyɛ Klise "bhaa 'wa "kɛ "ku -kole ne, "lele 'ye 'ɔ "zo -lɔ. "Naa-, -ɛ -noɔ "gɔgɔ yɛ -wɛ "ku 'ye 'ɛ -bhiɛ -lɔ, "ne -ɛ -noɔ "lele yɛ -wɛ -ko -lɔ lɔbhɔ.

¹⁸ 'Ɛyi 'klekle Lagɔ "me 'ye 'ɛ 'bhale -lɔ. 'Ɔ -selia -lɔ -anye Klise "me 'ɔyi "bhaa gbo, "ne 'ɔ yi -lɔ -anye "ɛ 'gboseliɔ libhɔ -wɛ kɔ 'je.

¹⁹ 'Diɛɛ, Lagɔ -selia -lɔ -glɔnya 'nyɛ 'ɔyi 'wɔ "bhaa gbo Klise "me, "ne 'ɔ "ne wlo -la "nyɛnye -ye 'nyakpa -no -wɛ "klo. "Ne 'ɔ yi -lɔ -anye 'lebhe -gbɔ -a -sɛ 'gboseliɔweli -wɛ 'na 'de.

²⁰ Zaa, Klise 'na 'tɔme 'ye -a libhi -lɔ weli "ku. 'Diɛɛ, -anye "me 'ye Lagɔ, 'ɔyigɛsɛ la -lɔ 'anye, Klise 'na 'tɔ "me, 'a 'ŋunu "ku -se 'a 'seliɔ gbo 'a -nyɛ Lagɔ "bhaa. -Ɛwɛ, 'ye -a 'yɔbhɔle -lɔ 'anye 'kwɛmetamaleɛ "me.

²¹ Klise "ne 'awɔ 'nyinyonoli 'wlime -kɛ, "ne Lagɔ yu -lɔ -anyɛɛ 'nyinyonoli 'na gbo 'wlime 'gbli-. Zaa, -dɛme'nadɛne "ku, Klise "me, Lagɔ "zoa- -anye "meŋwinɛlenya.