2 Kolɛtenya 4 - Nouveau Testament bété de Gagnoa

Pɔle -nyɛ "kɔlepɔnya "bhaa 'na libhɔnosɛ

¹ Lagɔ 'na 'nyɛzedle -kɛle -za za 'ɔ no -lɔ -gbɔ -a no "ɛ libhɔ ne, zaa 'kwɛme te -kɛ -anye yɔle-.

² Li -ɛ -le 'zu "ku "ne 'nyakpa nole 'diɛɛ "me -wɛ, -a 'bhɛ- 'beku. -A kɛ Lagɔ 'na 'Denaade -sɛ ne, -a "ne 'plɛle- -kplɛkplɛ "me. -Mɔ, -anye gbɛklɛklɛ "me 'ye -a bhulɛle -lɔ -se 'nyakpa 'klekle "kɛ 'sɛ yibhlele- -gbɔ -ye -a bhulɛ -wɛ gbɛklɛklɛ yɛ -lɔ.

³ 'Denaade 'na -ye -a sɛ -wɛ kɛ zizɔ- ne, 'nyakpa 'na -wa me 'kwlɛ bhli -ka -wɛ za 'ɛ zizɔ- -lɔ,

⁴ "ne -wa "ne Lagɔ 'na weli 'dleku -kɛ, Sata, dodo ne "ku 'na lagɔ gba- 'wanɛɛ "nɛnoɛ "ku. 'Ɛza, 'wa "ne zle -ɛ -ko 'Denaade "me, "ne 'ɛ -noɔ Klise 'na 'ŋlu 'na -ylo yɛ -wɛ 'yli -gɛ. 'Ɔyi, -ɔ -noɔ Lagɔ 'na 'wlole yɔ -wɛ.

⁵ 'Bhɔ, 'de -ye -a sɛ -wɛ, -ayigɛsɛ 'na 'de 'ye -a -na -sɛ, -mɔ, Zezu Kli -ɔ -noɔ Anyinɛnyɔ yɔ -wɛ 'na 'de 'ye -a sɛ -lɔ. "Ne -anye, -a no -lɔ -gbɔ 'anyɛɛ "kulɔbhɔnya 'ye -a -noɔ -lɔ Zezu 'na 'tɔ "me.

⁶ Lagɔ nɛɛ: Zle le titiɛ 'jijɛku. 'Ɔyi -bhele -wɛ -le -lɔ -anye 'dlezɔ. 'Ɔ "kɛ gbɔ -se -a "kɛ Lagɔ 'na 'ŋlu -ɛ le Klise 'na "klo -wɛ yibhlele-.

⁷ -Mɔ, -anye, -wa -su "ɛ -klɔgbɔ -wɛ, -a -ko sɛgbɛɛ nyidɛ. -Se 'nyakpa 'klekle 'cɛ 'ylime 'ye -gbɔ "ɛ 'bhɛloɛ "yitɛ -wɛ, Lagɔ 'ye 'ɛ 'bhale -lɔ "me, -mɔ, -anye 'ye 'ɛ -na -kɛ "me 'bhale-.

⁸ 'Nyakpa -su -anye 'kpokposɛ moɔ 'klekle. -Mɔ, -ɛ "ne -anye 'wlime gbli-. 'Wa 'kpla- -anye kpɛnyee, -mɔ, 'kwɛme "ne -anye yɔle-, -mɔ 'ɛ -ko sɔbhɔ "ne -a tɛle- Lagɔ 'dle 'yiɛ.

⁹ 'Wa 'gbapea- -anye, -mɔ, Lagɔ "ne -anye "me 'bhale-. 'Wa bhle -anye siɛ "ne 'wa lɔbhɔ- -anye, -mɔ, -a "ne "ku-.

¹⁰ -A -su Zezu 'na 'kwiɛ ku "me -godogodo -se 'nyakpa 'klekle 'cɛ 'ylime 'ye -gbɔ Klise -ko -anye "me, 'ɔ -yɛ.

¹¹ -A kɛ 'se -yɛ -ce, -a "ne -la 'kwiɛ dɛ tlole- -godogodo Zezu 'na 'tɔ "me, -se Zezu 'na zikpɛ "kɛ 'lelee 'ylime 'yeɔ- -anyɛɛ ku -ɛ "kɛ 'ku -wɛ "me.

¹² Soɔ 'ye 'kwiɛ 'dede -lɔ -anye -se 'anye 'a "kɛ zikpɛ yle.

¹³ Sɛne 'ye 'ɛ kɛleɔ- -lɔ Lagɔbɔgo nɛɛ: «'E -kɛ Lagɔ 'dleku, 'ɛnɛɛ 'ylime za 'e -bhulɛ -lɔ.» "Ɛ 'dlekukɛleɛ -bhele -wɛ gbɔ -lɔ "ne -a no -lɔ -ye -a 'yɔbhɔ -wɛ. -A -kɛ -me 'lelee Lagɔ 'dleku 'ɛ za -a bhulɛ -lɔ.

¹⁴ -Ɛɛ, -a -yi sɛ -gbɔ -ɔ -sɛ Anyinɛnyɔ Zezu glu -wɛ yi -anye glu -sɛ -me, -anye -nyɛ Zezu "bhaa, "ne 'ɔ yi -anye 'ayi 'wɔ "bhaa 'ɔyi yɔko 'jilɛ.

¹⁵ 'Anyɛɛ za, -a 'ŋunu -lɔ -li 'klekle 'na gbo "ku. Lagɔ kɛ 'nyakpa -kwleyia 'na 'nyɛzedle 'pɔ -godogodo ne, 'wa "kɛ 'ɔnɛɛ "nɛnekoɛ yibhlele-, 'wa "kɔ bhɛle, -se 'wa "kɔ 'ŋlu kwa 'yiɛ.

-Anyɛɛ 'kwɛme 'tɛ- -godogodo

¹⁶ 'Ɛnɛɛ za 'kwɛme "ne -lɔ -anye yɔle-. -Anyɛɛ ku kɛ se zlo- -ce, -ɛ -ko -anye "me -wɛ "zo 'lele -se zle ze 'yiɛ -wɛ.

¹⁷ -Ɛɛ, -anyɛɛ -dɛme 'na 'gbapeɛ "ne "me 'tɛ-, "ne 'ɛ "ne gwlɛ "me, -mɔ, 'ŋlu -ɛ 'ple 'ŋlu 'klekle yɔko "me -wɛ -wo -lɔ -anye. "Ɛ 'ŋlu -wɛ gwlɛ "me, "ne 'ɛ 'kpɔ- kpɛnyee, "ne 'ɛ -zi -anyɛɛ 'gbapeɛ "ku.

¹⁸ -Anye, -a "ne tɛle 'se -bɛɛ' 'na -ye 'wa "kɛ 'ylime 'ye -wɛ siɛ, -mɔ, -bɛɛ' 'na -ye 'wa "ne 'ye 'ylime -wɛ 'ye -a tɛle -lɔ siɛ. "Naa-, -ye 'wa 'ye 'ylime -wɛ 'ɛ "ne 'gwlɛ "me, -mɔ, -ye 'wa "ne 'ye 'ylime -wɛ 'gwlɛ -lɔ "me kpɛnyee.