2 Kolɛtenya 3 - Nouveau Testament bété de Gagnoa

Mɛnenoɛ -lele 'na "kulɔbhɔnya

¹ -A kɛ soɔ bhulɛ ne, -a yi bhɔ -ayi 'anye 'ylime tua bha? -See 'nyakpa 'na -bedia sɛ -wɛ, 'a 'yɔbhɔ -gbɔ -a tua 'anye "bɔgo 'ylime -se 'a "kɛ -anye yibhlele-.

² -Anyɛɛ "bɔgo, 'anye 'waa -lɔ. 'Ɛɛ kɛleɔ- -lɔ -anyɛɛ 'dlezɔ, "ne 'nyakpa 'klekle -yi "ne 'wa zɛle "me.

³ Gbɛklɛklɛ yɛ -lɔ, Klise 'nabhɛ 'kɛle- -lɔ "ɛ "bɔgo -wɛ, "ne -anye -nɛme -lɔ. -Glaŋu nu 'wa "ne "kɛlele-, -mɔ, Lagɔ -ɔ -yɛ gbligbli 'na Zuzu "me 'ye 'ɛ "kɛleleɔ- -lɔ. 'Tiyi -pɛɛ "klo 'ye 'ɛ "ne kɛ "kɛleleɔ-, -mɔ, 'anye 'nyakpa 'na 'dlezɔ yɛ -lɔ.

⁴ "Ɛ weli -wɛ 'ye -a tɛle- -lɔ 'dle gbligbli Lagɔ 'yliku Klise 'na 'tɔ "me.

⁵ -Anye, -a "ne "pɔ 'dle -gbɔ -a 'bhɛle- -se -a "kɛ -bɛɛ' no -ayigɛsɛ. -Mɔ, Lagɔ gbɔ -lɔ "ne -a no -lɔ "ɛ -ye -a no -wɛ.

⁶ 'Ɔyi, 'ɔ 'nyɛ -lɔ -anye 'bhɛloɛ -se -a "kɛ mɛnenoɛ -lele 'na "kulɔbhɔnya "zo. "Ɛ mɛnenoɛ -wɛ "ne -Lɔ -ɛ kɛleɔ- -wɛ "me ko. -Mɔ, Zuzu Wlewle "me 'ye 'ɛ -ko -lɔ, "ɛ -Lɔ -ɛ kɛleɔ- -wɛ, 'kwiɛ 'ye 'ɛ 'nyɛ -lɔ. -Mɔ, Zuzu Wlewle, zikpɛ 'ye 'ɔ 'nyɛ -lɔ.

⁷ "Ɛ -Lɔ 'na weli -wɛ, 'tiyi 'pɛɛ "klo 'ye 'ɛ kɛleɔ- -lɔ, "ne Moyize lɔbhɔ nɛ -lɔ "ɛ -Lɔ -ɛ 'nyɛ 'kwiɛ -wɛ "ku. 'Ɛ -ko "ɛ -soɔ, "ne "ɛ "ku lɔbhɔɛ -wɛ 'nyɛ nɛ -lɔ Moyize 'ŋlu 'na "yitɛ. "Ɛ 'ŋlu -wɛ gbɔ 'awɔ -lɔ "ne 'ɔnɛɛ "klo "lele nɛ -lɔ "me. 'Ɛza, Izlayɛleyua "ne nɛ 'bhɛle- -se 'wa "kɔ "klo 'wolo, -mɔ "ɛ 'ŋlu -wɛ 'ɛ "ne gwlɛ nɛ -kɛ 'lelee "me.

⁸ "Ne Zuzu Wlewle 'na "kulɔbhɔɛ -wɛ yi 'ce 'lelee 'ŋlu 'na "yitɛ 'nyɛ.

⁹ -Lɔ 'na "kulɔbhɔɛ -ɛ 'gbli 'nyakpa gbo 'wlime -wɛ -ko nɛ 'ŋlu "me, zaa, Zuzu 'wlewle 'na libhɔ -ɛ gbɔ "ne 'nyakpa ŋwinɛle "me -wɛ yi 'ce 'ŋlu 'na -ɛ zi "ku 'nyɛ.

¹⁰ Sɛne -a gbɔ -lɔ nɛɛ: -Watɔ 'na 'ŋlu -nyɛ -dɛme nɛ "bhaa 'ɛ "ne mele- yɔko, -mɔ -dɛme nɛ zi "ku kpɛnyee.

¹¹ -Li 'na -ɛ 'ple -wɛ 'na 'ŋlu kɛ "me 'gwlɛ ne, sɔɔbɛɛza, -li 'na -ɛ "ne 'ple -wɛ 'na 'ŋlu -ka bhɔ lɔbhɔ 'ple 'a?

¹² "Ɛ 'dletɛleɛ ne gbɔ -lɔ "ne -a "ne 'gu -lɔ 'Denaade 'na sɛsɛɛ -gɛ.

¹³ -A "ne no Moyize 'nasɛ. 'Ɔ 'piɛ- 'ɔyi lokwi -pɛɛ "klo -se Izlayɛleyua te kɛ "ɛ 'ŋlu -wɛ 'na nɛnidɛ 'ylime 'ye.

¹⁴ -Mɔ, 'wanɛɛ 'wugɔŋo gbɔ- "ku -dɛme -na zɛ. 'Wa kɛ mɛnenoɛ -gɔgɔ 'na "bɔgo "me zɛle ne, 'ɛ -ko sɛgbɛɛ "ɛ lokwi -pɛɛ -wɛ wale- 'wanɛɛ 'klo "ku 'yiɛ. -Mɔ, -sɔɔdɛku 'nyɔkpɔ -nyɛ Klise "bhaa 'wa -kole "ku -wɛ, 'ye "ɛ lokwi -pɛɛ -wɛ bhɔ -lɔ "klo.

¹⁵ "Naa-, -dɛme -nazɛ, -se Izlayɛleyua zɛle Moyize 'na "bɔgo "me -wɛ, lokwi -pɛɛ wale- 'wanɛɛ 'wugɔŋo "ku 'yiɛ.

¹⁶ -Mɔ, -sɔɔdɛku 'nyakpa 'bheliɔ kɔ "ne 'wa glɛ Anyinɛnyɔ "klo -wɛ, lɔbhɔ "ɛ lokwi -pɛɛ -wɛ bhli -lɔ zɔ.

¹⁷ Anyinɛnyɔ, Zuzu Wlewle yɔ -lɔ. "Ne -se Anyinɛnyɔ 'na Zuzu -ko lɔbhɔ 'yiɛ -wɛ, sɔbhɔ kɔyeleɛ -ko me -lɔ lɔbhɔ.

¹⁸ -Anye 'klekle lokwi -pɛɛ "ne -anye "klo 'pe-, "naa-, Anyinɛnyɔ 'na 'ŋlu 'lelele -anye "klo sɛgbɛɛ 'pepleyi. Zaa, Anyinɛnyɔ -ɔ -noɔ Zuzu yɔ -wɛ, 'bhelia -lɔ -anye kɔ, 'ɔ "zoa -anye 'ɔnɛɛ 'wlolenya, "ne 'ɔnɛɛ 'ŋlu 'kpɔ 'ce -godogodo. Anyinɛnyɔ -ɔ -noɔ Zuzu yɔ -wɛ 'na libhɔ -ye 'ɔ no, 'ɛɛ -wɛ -lɔ.