2 Kolɛtenya 2 - Nouveau Testament bété de Gagnoa

¹ -Ye 'neɛ 'dle 'yɔbhɔ -gbɔ 'e "kɛ no -noɔ -lɔ nɛɛ 'e -ka 'anyɛɛ moɔ 'wlizɔ zi "ne 'a "kɛ "klo 'nyɛnenyɛnele.

² -Ame, 'mɔɔ kɛ gbɔ "ne 'a kɛ "klo 'nyɛne ne, -ɔ "kɛ bhɔ gbɔ "ne 'ŋwɛnɛ "kɛ -ame lɔbhɔ 'a? 'Ɛ "ne bhɔ "ɛ -ye 'e 'yiɛ- 'dle nuɔ ne yɔ?

³ Sɔɔbɛɛza, 'e kɛle- 'anye "ku -noɔ -lɔ -gbɔ 'e kɛ 'anyɛɛ moɔ -du -ylɛ ne, 'anye -wa "kɛ -ame 'ŋwɛnɛ labha- -wɛ, 'a te -kɛ "klo 'nyɛne-. 'E -kɛ 'anye 'dleku -gbɔ 'neɛ 'ŋwɛnɛ 'anye 'klekle -nɛ yɛ me -lɔ.

⁴ "Naa-, miɛ -ko 'awɔ -ame 'ylime "ne 'e kɛle 'awɔ -lɔ 'anye "ku, 'dle 'yiɛ 'awɔ -ame nuɔ "ne 'dlebhɛ 'lɔbhɔ 'awɔ -ame. 'E -na -kɛ -gbɔ 'a "kɛ "klo 'nyɛne za yɛ, 'e kɛle -se 'e "kɛ 'anye -see 'e -wa 'anye kpɛnyee -wɛ 'ylime tua za yɛ -lɔ.

Pɔle nɛɛ: 'Wa 'tale 'nyɔkpɔ -ɔ no 'nyinyonoli -wɛ 'na gbo 'yi

⁵ -Mɔ, 'anye 'glɛme 'nyɔkpɔ kɛ -bɛɛ' 'na -ɛ gbɔ "ne 'wa 'nyɛne "klo -wɛ no ne, -ame 'ye 'ɔ -na -kɛ "klo 'nyɛnea-. 'Anye 'klekle 'ye 'ɔ 'yiɛ -lɔ 'dle nuɔ. Zaa, 'ɛ "ne 'nyakpa 'klekle 'waa, -mɔ, -bedia 'ye 'ɔ 'yiɛ -lɔ 'dle nuɔ, 'a te -ka -la lɔbhɔ 'ple.

⁶ "Ɛ -soɔ 'na 'nyɔkpɔ -wɛ, 'nyakpa 'na -kwleyia 'yɔ "ku -gbɔtɔle -bɛɛ', za 'ɛ neni- "ɛ doɔ.

⁷ -Ɛwɛza, -dɛmeda, 'a 'tale- "nyɛnye -ye 'ɔ -no -wɛ yi, -se 'a "tamaleɔ 'kwɛme. 'Ɛ "mɔ -soɔ ylɛle- ne, 'dle yu nuɔ 'yiɛ "yitɛ "ku "ne 'kwɛme yu yɔle "yitɛ "ku.

⁸ Zaa, 'e 'yɔbhɔ -gbɔ 'a tuɔ -see 'a -wɔ -wɛ 'ylime.

⁹ "Naa- 'e kɛle- 'anye "ɛ "bɔgo ne "ku -see 'e "kɛ 'anye "mebea-, 'a kɛ -kɛ 'neɛ 'demezoweli 'plome "zo ne.

¹⁰ 'A kɛ 'nyɔkpɔ 'na weli 'yi 'tale-, -ame 'lelee 'e 'tale- -me 'yi. Weli 'na -ye 'wa "kɛ 'yi 'tale kɛ lɔbhɔ -ko, 'e 'tale- 'yi, 'anyɛɛ za, Klise 'yliku.

¹¹ -Soɔ 'ye 'ɛ kɛ ko, Sata -ka -anye ylo no, -a -yi 'ɔnɛɛ 'dlepɔsɛ "ne -a -yi -ye 'ɔ no -gbɔ 'ɔ "kɛ no -wɛ zɛ.

Pɔle, Tite 'na 'dlebhɛ lɔbhɔ

¹² 'E -ylɛ Tloase -se 'e "kɛ -glɔnya Klise 'na 'Denaade -sɛle. "Naa-, Anyinɛnyɔ -kɛle nɛ 'gwe "kle -se 'e "kɛ lɔbhɔ libhɔ no.

¹³ -Mɔ, 'dlebhɛ lɔbhɔ nɛ -kɛ -ame, "naa-, 'e "ne nɛ -ame "nɔwli Tite "bhle ylele-. -Ɛwɛza, 'e 'bha- -lɔ Tloase, "ne 'e yi -lɔ Masedoane me.

Pɔle bhɛle Lagɔ -se 'ɔ -to 'wliku -wɛ za.

¹⁴ -A bhɛle Lagɔ! "Naa-, 'ɔnɛɛ 'tɔ "me 'ye 'a zi -lɔ "ku Zezu Kli "me. 'Ɔyi, 'ɔ ylɛle- -lɔ -anye "me "ne -a biɛ -lɔ 'ɔnɛɛ yibhleyibhleleɛ -glɔ sɛgbɛɛ lasiklɔ 'na 'ŋoni 'ŋwɛne moɔ 'klekle.

¹⁵ Lagɔ 'na dɛku Klise 'na 'ŋoni "namanɔ -ye -a -noɔ -lɔ, -wa 'nɔŋo 'popoɛ 'na -gwe "ku "ne -wa me 'lelee 'kwlɛ -bhli -ka -wɛ 'na dɛku.

¹⁶ -Bedia 'na dɛku, 'ŋɛnɛ -nyɛnye -ɛ kɔme 'kwiɛ 'na -gwe "ku yɛ -lɔ. -Wawɛ 'na dɛku, 'ŋoni -ɛ kɔme zikpɛ 'na -gwe "ku yɛ -lɔ. -Mɔ, -ɔ 'bhɛle- bhɔ -se 'ɔ "kɛ libhɔ 'na -ɛwɛ no 'a?

¹⁷ Lagɔ 'na 'Denaade -ye -a sɛ -wɛ, -a -na kɛ no -gbɔ 'wa "kɛ -anye 'dlasi "nyɛ -see 'nyakpa -kwleyia sɛ -wɛ. -Anye, 'gbaa 'ye -a bhulɛ -lɔ Lagɔ za, Lagɔ 'yliku, Klise 'na "kulɔbhɔnya 'nasɛ.