2 Kolɛtenya 12 - Nouveau Testament bété de Gagnoa

'Ŋwɛnɛ lɔbhɔ Pɔle -se 'ɔ 'gbape- Klise za -wɛ

¹ 'E yi bhɔ 'ayi "ku zia? 'Ɛ "ne -kɛ -bɛɛ' "me -ko! -Mɔ, 'ɛ -ko sɔbhɔ, "ne 'e yi -ye Anyinɛnyɔ -ylɛlea -ame 'yli "klo -wɛ za bhulɛ-.

² -Ame Pɔle, 'e -yi 'klecɛnyɔ -bholo. 'Ɛnɛɛ 'ylobɛ kogbɔ -mɔɔnɔ ne lɛ, Lagɔ libhi- "ɛ 'nyɔkpɔ -wɛ "ku, "ne 'ɔ -kɔmo "nɔgɔ "me. 'Ɔnɛɛ ku "bhaa yɛ "bhle -lalɛce? 'E "ne 'sɛ -yi. 'Ɛ "ne -Lalɛce 'ɔnɛɛ ku "bhaa yɛ -oo? 'E "ne 'sɛ -yi, -mɔ Lagɔ -yi sɛ.

³ 'E -yi sɛ -gbɔ Lagɔ -kɔme "ɛ 'nyɔkpɔ -wɛ "nɔgɔ "me. 'Ɔnɛɛ ku "bhaa yɛ bha, -mɔ "ɛ ku -to bha? 'E "ne 'sɛ -yi, -mɔ Lagɔ -yi sɛ.

⁴ 'E -yi sɛ -gbɔ "Ɛ 'nyɔkpɔ -wɛ Lagɔ libhu- "ku, "ne 'ɔ yu -lɔ "nɔgo "me kɔme-, "bhle -ye 'ɔ 'nole- -lɔ bhulɛweli "me, -ye dodo ne "ku 'na 'nyɔkpɔ -ka bhulɛ ne, "ne 'nyɔkpɔ "ne 'bhɛle- "ne 'ɔ 'cɛ nu ylɛlea-.

⁵ 'Ɔyi -wɛ za, 'e yi 'ce 'ayi "ku zia. -Mɔ, 'neɛ dɛku, -se 'e "ne "me 'tɛ- -wɛ za 'e -ka -lɔ 'ayi "ku zia.

⁶ 'E kɛ nɛ no -gbɔ 'e "kɛ 'ayi "ku zia ne, 'e "ne "kukwɛnyɔ yɔ, "naa-, gbɛklɛklɛ 'ye 'e bhulɛ -lɔ zɛ, -mɔ, 'e "ne 'yɔbhɔ -gbɔ 'e "kɛ 'ayi "ku zia. Sɔbhɔ za, -ye 'e no -wɛ, 'wa "kɛ -lɔ "ku 'wolo- "ne 'wa "kɛ nɛ -lɔ -ame 'gbobhlele-, 'wa kɛ -ye 'e bhulɛ -wɛ 'no-, 'ɛyi 'ye 'wa -na bhulɛ-, -mɔ, 'wa 'te keyi "pɔ.

⁷ Lagɔ -ylɛlea -ame li 'na "yiti -ɛ sɛ geji "ku -wɛ 'yli "klo, "ɛ li -wɛ 'na 'ylime, Lagɔ "zo- -ame 'gbapegbapeɛ "yitɛ ku "me, 'ɛ -ko sɛgbɛɛ Sata 'na lebhelebhleyu 'ɔ 'kpla -ame, -se 'e te -kɛ 'ayi "ku zia.

⁸ -Ɛwɛza, "ku 'na yɛ ta ne lɛ, -se 'e bhubhɔ- Anyinɛnyɔ -se 'ɔ "kɛ -ame "ɛ 'gbapegbapeɛ -wɛ "guɔ 'ylialea-.

⁹ -Mɔ, sɛne 'ye 'ɔ -bhulɛle -lɔ -ame -gbɔ: «'Nɛne -ye 'e no -eyi -wɛ, 'ɛ "neni doɔ. -Neɛ' 'kwɛme -yɔleɛ "me 'ye 'wa 'yeme -lɔ 'neɛ 'bhɛloɛ.» -See 'e "ne "me 'tɛ- 'na "ku 'ye 'e "kɛ -lɔ -ayi zia, -see Klise 'na 'bhɛloɛ "kɛ -ame "ku -ko 'yiɛ.

¹⁰ 'Ɛ soɔ za, 'e 'nɛne -ayi -gɛ, 'kwɛme yɔleɛ "me 'yliyliɛ, 'kplɛkplɛɛ, 'gbape 'ye 'wa -gbapea -ame -wɛ "ne 'nyɔŋokuloɛ -ye 'e no Klise za -wɛ! 'E 'ŋunu 'ɛ gbo 'ŋwɛnɛsɛ. "Naa-, 'kwɛme -ka -ame yɔle-, lɔbhɔ -wɛ 'ye 'kwɛme "tamale -lɔ -ame -tiaa.

Kɔlɛte 'na 'klecɛnya za, 'dlebhɛ lɔbhɔ Pɔle

¹¹ "Kukwɛnyɔ 'nasɛ 'ye 'e bhulɛ- nɛ -lɔ, 'anye, 'ayigɛsɛ, 'anye gbɔ -lɔ "ne 'e bhulɛ- sɔbhɔ, "naa-, 'anye "kɛ -lɔ -neɛ' weli 'na "namanɔ bhulɛ, 'e "mɔ 'se -bɛɛ' me -ko -ce. -Wa la 'wayi Zezu Kli 'na "kɔlepɔnya "yitia -wɛ, 'wa "ne -ame -bɛɛ' "me "ku -zile.

¹² 'Anyɛɛ moɔ, 'a 'ye- -see 'e 'piɛ- "bhle 'dle "yitɛ "ku -wɛ 'ylime, -li 'na -ɛ 'sɛ geji "ku -wɛ, nonoli 'na -ɛ zi "ku, -li -ɛ 'ŋɛnɛ lɛ. -A "kɛ -ɛwɛ 'klekle "ku wolo ne, 'a -gɛyli -gbɔ Zezu 'na "kɔlepɔnyɔ 'ye 'e -noɔ -lɔ.

¹³ -Ye Lagɔgligbɛ 'na -bedia -yle bhɔ "ne 'anye 'a "ne bhɔ -yle me 'a? Lagɔgligbɛ 'na -bedia -su -ame, -ame, 'e "ne 'anye 'ɛyi -wɛ 'yɔbhɔle, zaa, 'ɛ -lu -ame!

¹⁴ 'E -bhɛ "me -se 'e "kɛ 'anyɛɛ moɔ yi "ku ta dɛku. 'Anye -gba "kɛ -ame slu-, sɛko -wɛ, 'anyɛɛ -ye 'a -kɛ -wɛ 'ye 'e -na siɛ tɛle-, -mɔ, 'anye 'ye 'e tɛle -lɔ siɛ -tiaa. "Naa-, 'a -yi sɛ -gbɔ yua -na lɔbhɔ 'to 'wɔ 'na -bɛɛ' "zo. -Mɔ, 'to 'wɔ "zo -lɔ lɔbhɔ yua 'na -bɛɛ' -gbɔ 'ɛ "koa kwɛle-.

¹⁵ -Ame Pɔle, 'ŋwɛnɛ lɔbhɔ -ame -se 'e "kɛ 'anye 'neɛ -ye 'e -kɛ 'klekle -wɛ kɔ 'je, "ne 'anyɛɛ za, 'e yi 'neɛ zikpɛ "me 'bhale-. -Ame, 'e kɛ 'anye -wa kpɛnyee 'a yi bhɔ 'neɛ -wamale -za "me yɔle- bha?

¹⁶ -Mɔ, 'a -yi -sɛ -gbɔ 'anye "ne 'awɔ -ame su. -Mɔ, -bedia 'na dɛku -kplɛpklɛ, 'e -plɛ -lɔ -se 'e "kɛ 'anye ylo no.

¹⁷ 'A 'wolo 'nyakpa 'klekle 'na -ye 'e -lebhele 'anye "ku -wɛ "ku: 'Wanɛɛ 'glɛme 'na -bholo -li bhɔ 'anye "ku 'a?

¹⁸ 'Mɔɔ -no -lɔ -gbɔ Tite me 'anye 'ylime 'ye ka, 'ɔ -nyɛ "nɔwli -bholo 'na -ye 'a -yi -wɛ "bhaa. Tite -li bhɔ 'anye "ku 'a? Tite "ne -ame 'dlepɔsɛ -bhele -wɛ 'ye -a "ne bhɔ -kɛ 'a? "Ne "ɛ -gwe -bhele -wɛ 'ye -a -na bhɔ bhli 'a?

¹⁹ 'Yli yɛ ne "me, 'a 'pɔ -lalɛce 'dle nɛɛ -ayi -ye -a sɛ -lɔ gbo 'anye 'yliku. -Mɔ, 'ɛ "ne -soɔ yɛ, Lagɔ 'yliku 'ye -a bhulɛle -lɔ, -se Klise 'yɔbhɔ -wɛ. 'Ɛwɛ 'klekle, 'titoa 'wanye, -ye -a no doɔ -wɛ, 'anyɛɛ -zakpɛ 'na 'dlekukɛleɛ "kɛ 'yuku me za yɛ -lɔ.

²⁰ -Ye 'e "gu -gɛ ne lɛ: 'E yi -kɛ 'anyɛɛ moɔ yi. 'E "kɛ 'anyɛɛ moɔ -yi -lalɛce, 'e -ka 'anye -see 'ɛ -ko -ame 'dleku -wɛ ylele-. "Ne -ame 'lelee, 'a -ka -lalɛce, -ame -see 'a 'yɔbhɔ -wɛ ylele-. 'E "gu -gbɔ 'e te 'anye -ɛne 'glɛme ylele-: Gbonoɛ, lɔbhɔzonoɛ, kɛle, 'nyakpa 'na 'keyiglɛglɛleɛ 'wɔ, 'alua 'na 'yliyliɛ, 'wanɛɛ -sɛsɛɛ -wɛ 'wɔ, 'ylisiɛtɛleɛ, 'bidiglagli 'na kosɛ. Li ne 'klekle 'na 'dlebhɛ lɔbhɔ nɛ -lɔ -ame 'anyɛɛ moɔ 'na yi dɛku.

²¹ -Bɛɛ' -bholo -ye 'e "gu -gɛ ne lɛ: -Zle 'e "kɛ 'anyɛɛ moɔ -yi ne, Lagɔ yi -lalɛce -ame zu 'labha- 'anye 'yliku. 'E yi -lalɛce 'tu, 'anye 'glɛme 'na -bedia no -nazɛ 'nyinyonoli bhlɛme 'nasɛ, 'e yi 'tu. "Naa-, -dɛme -nazɛ 'yiɛ, 'wa "ne 'wanɛɛ -kosɛ -gɔgɔ 'yi 'tale, 'e yi 'tu, "ne 'wa zlɛ -lɔ gbo, "ne 'wa -su 'wayi 'bidiglagli.