2 Kolɛtenya 11 - Nouveau Testament bété de Gagnoa

Pɔle -nyɛ "kɔlepɔnya -gbeyia "bhaa

¹ -Nyɔsɔwanye, 'a yi bhɔ 'neɛ "kukwɛ ne 'ŋunule! -Ɛɛ, 'a 'ŋunu "ku.

² 'A -kɛ 'na 'dle kɔ, "ne 'e no 'anyɛɛ lɔbhɔzo. "Ɛ wamalesɛ "yitɛ -wɛ Lagɔ "me 'ye 'ɛ 'bhale -lɔ. "Naa-, 'widi -bholo -kpee 'ye 'e 'tebhe- -lɔ 'anye "ku: 'Ɔ -noɔ -lɔ Klise yɔ, 'ɔyi 'ye 'e "kɛ 'ce -lɔ 'anye 'ylime 'tua- sɛgbɛɛ 'ŋukoyulɔ -digbɔ 'na -ɔ "ne lɛ 'widi -yi "ne -ɔ -ko lɛ 'wlele.

³ -Mɔ, 'a luɔ -kɛ! 'Tɛbhɛ -no 'awɔ -kɛ Ɛvo ylo yowlɛ "me. Zaa, 'e "gu -gbɔ 'anyɛɛ 'dlepɔsɛ "namanɔ -ɛ -ko 'wlele -wɛ te kɛ kɔ 'bheliɔ, -se 'a te kɛ Klise "guɔ 'ylile-.

⁴ Sɛgbɛɛ, 'nyɔkpɔ bholo yi. "Ne 'ɔ bhulɛle 'anye Zezu 'na -vinɔ 'na weli, Zezu 'na -nyɔ 'na weli -ye -a -na 'ce -zɛ 'anye bhulɛle- -wɛ. "Ne sɛgbɛɛ 'a -yle 'lelee -lɔ zuzu 'na -vinɔ, zuzu 'na -ye 'a -na 'ce -zɛ yle -wɛ. "Ne 'lelee sɛgbɛɛ 'Denaade 'na -ye 'a -na 'ce -zɛ "me no gou -wɛ, 'ɛyi -wɛ 'ye 'a 'sa -lɔ kɔ.

⁵ -Mɔ, -ame, 'e -yi "neɛmɔ 'sɛ -gbɔ -ye 'a la 'anyɛɛ "kɔlepɔnya "yitia -wɛ 'wɔ, 'wa "ne -ame -bɛɛ' "me "ku -zile.

⁶ 'E "ne -kɛ -tiaa bhulɛ sɛ -yi. -Mɔ, 'ɛ kɛ -kɛ Lagɔ 'na yibhleleɛ yɛ ne 'ɛyi -wɛ -kɛ 'ɛnɛɛ 'yli! "Naa-, -a -sloa 'anye 'tee -anyɛɛ nonoli 'klekle "me.

⁷ -Sɔɔdɛku 'e -sɛle 'anye Lagɔ 'na 'Denaade -wɛ, 'e -kwlilea -ayi "ku "ne 'e yi -lɔ 'anye 'kpamalea-, "naa-, 'ɛ 'Denaade -wɛ "fu 'ye 'e -sɛle -lɔ 'anye. 'Ɛyi -wɛ "nyɛnye yɛ bha?

⁸ -Sɔɔdɛku 'e -no 'awɔ 'anyɛɛ libhɔ -wɛ, Lagɔgligbɛ 'na -vinɛ 'peɛle 'awɔ -lɔ -ame, "ɛ 'wanɛɛ 'dlasi -wɛ 'ye 'e libhi- -lɔ "ku, "ne 'e yi -lɔ 'anyɛɛ libhɔ no.

⁹ -Ye 'e -ko 'awɔ 'anyɛɛ moɔ -wɛ, 'nyɔkpɔ "ne nɛ -ame -su, 'e "mɔ nɛ 'se -bɛɛ' -kɛ -ce, -mɔ, 'e "ne 'anye -zlɛ. "Naa-, "nowlia -wa 'bha- Masedoane -wɛ -yi 'awɔ -ame "ku. 'E "ne 'yɔbhɔ nɛ -gbɔ 'e "kɛ 'anye "me 'menia-. "Ne 'e -ka 'ce 'lelee 'ɛnɛɛ dɛ ylɛle-.

¹⁰ 'Nyɔkpɔ -ka 'ce 'lelee sɔbhɔ 'na kokoɛ -ame 'dlezɔ -sɛ Akayi -glɔ ne "me. Klise -ɔ -ko -ame "me -wɛ za. 'E yi no -gbɔ -diɛɛ yɛ -lɔ, -soɔ 'ye 'e 'gbɔ -lɔ.

¹¹ Sɔɔbɛɛza 'e "zo bhɔ "ɛ -soɔ? 'E "ne 'anye -wa za yɛ bha? -Mɔ, Lagɔ -yi 'diɛɛ 'sɛ -gbɔ 'e -wa 'anye.

¹² -Ye 'e no ne, 'e 'yi 'ce no 'yiɛ. -Se -wa no -gbɔ libhɔ -bhele 'ye -a no -wɛ, 'e 'toa kɛ -gwe "nyɛ, -se 'wa te -kɛ 'kekle 'gbɔtɔ.

¹³ "Kɔlepɔnya 'na -gbeyia 'waa -lɔ, "ne 'wa -noɔ 'lelee -lɔ libhɔnonya -nyɔ 'na sɔ -ko -gwe "me -wɛ 'waa. "Ne 'wa no -lɔ sɛgbɛɛ Klise 'na "kɔlepɔnya 'wa -noɔ.

¹⁴ 'Ɛ "ne 'nyea 'se: "Naa-, Sata 'nabhɛ zigbalea 'ɔyi "me sɛgbɛɛ "nɔgɔzilɔ -ɔ 'le "ku -wɛ.

¹⁵ 'Ɛ -ka nɛ 'se 'lelee 'anye nyea: "Naa-, -wa no Sata 'na libhɔ -wɛ kɛ 'wayi "me zigbalea- sɛgbɛɛ 'nyakpa -wa no Lagɔ -ɔ ŋwinɛle- "me 'na -li 'na -li. 'Wa yi -ye 'wa -no -wɛ 'na 'peɛleɛ yle 'bebhiɛle dɛku.

Pɔle 'na libhɔ -nyɛ 'ɔnɛɛ 'kplɛkplɛɛ "bhaa

¹⁶ 'Anye 'ye bhulɛle kɛ -lɔ yiɛ, 'a te -kɛ 'dle 'pɔ -gbɔ "kukwɛ 'sa -ame! 'A kɛ 'se 'dle 'pɔ -gbɔ "kukwɛ 'sa -ame -ce, 'a 'ŋunu -se 'e "kɛ 'ayi "ku zia 'tekeyi.

¹⁷ -Ye 'e "kɛ bhulɛ ne, -se Anyinɛnyɔ 'yɔbhɔ -wɛ 'ye 'ɛ "ne -kɛ -noɔ, 'e bhulɛ sɛgbɛɛ "kukwɛnyɔ. "Naa-, 'e -kɛ 'ayi 'dleku zɛ, 'ɛza, 'e zia -lɔ 'ayi "ku.

¹⁸ 'Nyakpa -kwleyia kɛ 'wayi "ku zia sɛgbɛɛ dodo ne "ku 'na 'nyakpa ne, -ame, 'e yi 'ayi "ku zia -me.

¹⁹ 'Anye -wa -noɔ "nanenya 'waa -wɛ, -wa "ne 'nɛɛ- -wɛ, 'wayi 'ye 'a -ko -lɔ keyi 'ŋwɛnɛsɛ.

²⁰ "Ne "ɛ 'nyakpa -wɛ "zoa -lɔ 'anye 'juyua, "ne 'wa li -lɔ 'anye "ku, "ne 'wa 'yli -lɔ 'anyɛɛ -ye 'a -kɛ 'klekle -wɛ 'wi, "ne 'wa libhi -lɔ 'anye sɔ "klo "ne 'wa 'pɔ -lɔ 'anye 'kwlɛ 'yukwli "me, "ne 'ɛ -ko sɔbhɔ "ne 'a "ne 'pɔle kɛle "me.

²¹ Zu lɔbhɔ -ame, 'e -cɛ bhulɛ, -a "ne 'kwɛme -kɛ za yɛ bha? -Mɔ, 'nyɔkpɔ kɛ no -gbɔ 'ɔ "kɛ 'ɔyi "ku zia -bɛɛ' za ne, -ame 'lelee 'e 'yi no -me, 'e kɛ 'se "kukwɛsɛ bhulɛ -ce.

²² Eblenya 'wa "kɛ 'se -noɔ -ce, Izlayɛleyua 'wa "kɛ 'se -noɔ -ce, "ne Ablame 'na -gligbɛnya 'wa "kɛ 'se -noɔ -ce, -ame, 'ɔyi 'ye 'e -noɔ -me 'lelee -lɔ!

²³ Klise 'na "kulɔbhɔnya 'wa -noɔ bha? 'E bhulɛ sɛgbɛɛ "kukwɛnyɔ, zaa, 'wa "kɛ no -gbɔ Klise 'na "kulɔbhɔnya 'wa -noɔ ne, -ame, 'e -noɔ -me Klise 'na "kulɔbhɔnyɔ yɔ, "ne 'e -zua "ku 'klekle, 'kplɛkplɛɛ "me, -jiɛ "me, 'lɔbhɔlɛbhɛɛ "me, 'e 'siɛle- 'kwiɛ.

²⁴ "Ku 'umgbu, Zufonya 'sɛpe- -ame -kple 'na glo -bholo yɛ -kogbɔfɛnɔ nu.

²⁵ Wlomɛnya 'sɛpɔ -ame kpɛnyee "ku ta. "Ku -bholo, 'wa pɔ- -ame 'tiyi, "ku ta, 'e 'gli- bato "me 'ŋu "klo, "ne 'ɛ nyimɔ-, "ne 'e -sɛ 'yli -bholo 'cibhɛ 'ŋu "me.

²⁶ 'E -bli -glɔ kpɛnyee, "ne 'e 'ye- 'kle kpɛnyee: 'Ŋu "klo na "kleyeɛ, "kpokponya 'na "kleyeɛ, -a "nowlia Zufonya 'na "kleyeɛ, "ne -wa "ne Zufonya 'waa -wɛ 'na "kleyeɛ, 'du "me 'na "kleyeɛ, 'kɔsɛku 'na "kleyeɛ, jinyɛ "klo 'na "kleyeɛ, "ne "nowlia -gbeyia -wɛ 'na "kleyeɛ.

²⁷ 'E -no libhɔ 'na -ɛ 'kpla kpɛnyee -wɛ "ne -zle -wɛ yi "ne 'e -ka 'ŋɔŋo. Ŋɔŋo "ne 'ŋuto 'lɔbhɔ -ame, "ne 'e -ko lɔbhɔ "ne -ye 'e "kɛ li -wɛ -ka 'yleɔ-, wɔtlɔ lɔbhɔ -ame "ne 'e -ka "meplakoti yle-.

²⁸ 'E "ne -kɛ li 'na -bedi -zɛle -me. -Mɔ, Lagɔgligbɛ 'klekle 'na 'dlebhɛ "yitɛ 'lɔbhɔ -lɔ -ame, "ne 'e 'pɛ -lɔ "ku 'dle zle 'oo -zle.

²⁹ 'Nyɔkpɔ 'na 'dlekukɛlesɛ kɛ "me yɔle- ne, 'ɛ zloa me -ame, "ne -bholo kɛ 'nyinyonoli -no ne, 'ɛ 'gbapea me 'lelee -ame kpɛnyee.

³⁰ 'Ɛ -kɛ "kuziɛ yɛ ne, -se 'e "ne "me 'tɛ- 'na "ku 'ye 'e kɛ -lɔ 'ayi zia.

³¹ 'E -na yo 'wlɛ, Lagɔ, Anyinɛnyɔ Zezu Kli 'ɔ To -yi sɛ gou. 'Ɔ me 'ŋlu -godogodo!

³² -Sɔɔdɛku, 'e -ko nɛ Damase -wɛ, 'kamalenyɔ -ɔ lɔbhɔ -klɔgbɔnyɔ Aletase "ku -wɛ "zo- 'awɔ "ɛ 'du -wɛ 'na -gbanuɛ "ku 'nyakpa, -se 'wa "kɛ -ame 'sa.

³³ -Mɔ, 'wa 'jilɛ- 'awɔ -ame 'gɔdegbɛ "yitɛ "me, "ne 'klecɛnya yi -lɔ -ame "ɛ 'du -wɛ 'na -pi 'na 'ylɛwli "me 'ylɛlea-, "ne 'ɔ yi -lɔ -ame 'kwlɛ "sɛpɔ.