2 Kolɛtenya 10 - Nouveau Testament bété de Gagnoa

Pɔle 'sɛ 'ɔyi gbo

¹ -Ame Pɔle, -bɛɛ' -bholo 'ye 'e 'yɔbhɔle -lɔ 'anye lo Klise 'na 'dlewɔtɛ -nyɛ 'ɔnɛɛ 'dle "namanɔ "bhaa 'na 'tɔ "me, -bedia nɛɛ: 'E kɛ 'anye 'glɛme -ko ne, 'e "gu -se 'e "kɛ 'anye bhulɛle-, -mɔ, 'e kɛ 'anye 'dɛtlole- ne, lɔbhɔ 'ye 'e 'gbɔtɔle -lɔ 'anye "ku.

² 'Ɛza, 'e bhubhɔ -lɔ 'anye -gbɔ, 'e kɛ 'anye 'glɛme -ko, 'a te -kɛ gbɔ -se 'e te kɛ 'anye "ku gbɔtɔle-. "Naa-, -bedia 'pɔ 'dle -gbɔ 'ɛ -ye 'a no ne, 'nyakpa -plesɛ 'ye 'a no -lɔ. 'Wayi -wɛ za, 'e "kɛ -lɔ gbɔtɔ- -tiaa.

³ 'Nyakpa 'ye 'a -noɔ -lɔ -diɛɛ', -mɔ, 'nyakpa sɛku 'ye -a -na 'se gwe.

⁴ -Mɔ, -anyɛɛ togweli -ye -a -su "ne -a gwe "ɛ to -wɛ, 'nyakpa 'ye 'ɛ -na "me 'bhale-. -Mɔ, Lagɔ "me 'ye 'ɛnɛɛ 'kwɛmetamaleɛ 'bhale -lɔ, "ne 'ɛ 'bhia -lɔ -ɛ 'titoa 'yliku -wɛ "ku. "Ne 'ɛ 'bhia 'lelee -lɔ 'dlepɔsɛ -nyɛnye -wɛ 'wɔ "ku.

⁵ "Ne 'ɛ "gblicia -lɔ 'bhabhanya 'na -ye 'wa bhulɛ "ne 'ɛ 'titi Lagɔ 'na yibhleleɛ 'yliku -wɛ. -A 'yɔbhɔ -gbɔ -a "kɛ 'nyakpa 'na "wugɔŋo kɔ 'bhelia- -see 'wa kɛ Klise 'plome "zo.

⁶ 'Anyɛɛ Lagɔ 'na 'plomezoɛ "kɛ 'ce -kpee -ko ne, lɔbhɔ 'na dɛku, -wa "ne "zo Lagɔ 'plome 'klekle -wɛ, -a yi gbɔ "ne 'wa yi 'wli 'je.

⁷ Zaa, -li 'na sɛko -wɛ, 'a 'wolo sɔbhɔ "ku! 'Nyɔkpɔ kɛ 'ɔyi 'dleku -kɛ -gbɔ Klise -nɔ 'ye 'ɔ -noɔ ne, 'ɔ yibhlele- 'lelee sɛ -gbɔ -anye Klise -noa 'ye -a -noɔ -me -lɔ.

⁸ 'Ɛza, Anyinɛnyɔ "nyɛ -lɔ -anye 'bhɛloɛ, -se -anyɛɛ Lagɔgligbɛ "kɛ "me "tamale, -mɔ, 'ɔ -na -kɛ no -gbɔ 'ɛ "kɛ "me yɔle-. 'E kɛ no -gbɔ 'e "kɛ nɛ -kɛ -ayi "ku zia kpɛnyee "ɛ 'bhɛloɛ ne za ne, 'zu -ka nɛ -ame lɔbhɔ.

⁹ 'A te kɛ 'dle "pɔ -gbɔ 'neɛ "bɔgo -wɛ 'wɔ -ye 'e 'pɔ- 'anye "ku -wɛ "kɛ 'anye 'gua za yɛ.

¹⁰ "Naa-, -bedia nɛɛ: «Pɔle 'na "bɔgo -wɛ 'wɔ "me 'na weli 'wɛle kɔ "ne 'ɛ 'tɛ- "me. -Mɔ, 'ɔ kɛ 'anye 'yliku -ko ne, 'ɔ -ko -bɔŋo, "ne 'ɔnɛɛ bhulɛsɛ "ne 'sa 'dle kɔ.»

¹¹ "Ne -ɔ bhulɛ "ɛ -soɔ -wɛ -kɛle 'dleku -gbɔ -see -a kɛle- -anyɛɛ "bɔgo -wɛ 'wɔ "me -wɛ, -a kɛ 'anyɛɛ moɔ -yi, "ɛ sɛbhele -wɛ -see -a kɛle- -wɛ, sɔbhɔ 'ye -a 'cɛ -lɔ no.

¹² -Bedia sɛ 'wayi-gɛsɛ 'na 'denaade kpɛnyee, -mɔ, -a "ne 'bhɛle 'na "koa -ayi 'wɔkɔle-, 'naa 'yɔbhɔ -gbaa "koa -ayi "ku 'pɛle. "Naa-, 'wa libhi 'wayi "ku sɛgbɛɛ 'wɔkɔle- -bɛɛ', "ne 'wa wɔkɔle -lɔ 'wayi-gɛsɛ 'wayi. "Nɛɛ- 'wa "ne -lɔ "nɛ-!

¹³ -Mɔ, -anye, -a "ne 'bhɛle- "ne -a "kɛ -ayi "ku zia, "ne -a "kɛ 'ɛnɛɛ "nenidɛ yɔko "me "ple. Libhɔ 'na -ye Lagɔ 'je- -anye kɔ -wɛ, 'ɔnɛɛ -dee 'ɔ 'yɔbhɔ -gbɔ -a "neni -wɛ, lɔbhɔ 'ye -a "kɛ -lɔ "neni. "Ne "ɛ libhɔ -wɛ me -kaa "ne 'ɛ -ylɛ -me 'lelee 'anyɛɛ moɔ.

¹⁴ 'Ɛza, -ye -a -me 'anyɛɛ moɔ -wɛ, -a "ne -lɔ "ɛ "nenidɛ ne "ku miɛ-. -Anye -noɔ -lɔ -diɛɛ' 'nyakpa 'na 'tɛtɛnoa -wa -yi 'anyɛɛ moɔ Klise 'na 'Denaade "bhaa 'waa.

¹⁵ -Mɔ, -a "ne "ple "ɛ "nenidɛ -wɛ yɔko "me "ne -a "kɛ -ayi "ku zia -alua 'na libhɔ za. -Bɛɛ' -bholo -ye -a tɛle- 'dle -noɔ -lɔ nɛɛ: -A 'pɔ 'dle -gbɔ 'anyɛɛ 'dlekukɛleɛ -kɛ 'kpɔmale- ne, -anyɛɛ libhɔ yi 'yuku me 'anye 'glɛme, -mɔ, -a -ka -la "ɛ "nenidɛ -wɛ yɔko "me "ple.

¹⁶ Sɛko -wɛ, -a 'yi 'lelee -glɔ 'na me tlo "ne 'ɛ -zi 'anyɛɛ moɔ "ku -wɛ 'Denaade -sɛle -ka me. 'Ɛza, -a "ne 'yɔbhɔ -gbɔ -a "kɛ libhɔ no me -bedia -no libhɔ "kle -wɛ, -se -a -kɛ -ayi "ku zia "ɛ -ye 'wa no -wɛ za.

¹⁷ Zaa, 'nyɔkpɔ kɛ -no -gbɔ 'ɔ "kɛ 'ɔyi "ku zia ne, Anyinɛnyɔ za, 'ɔ -na zia -kɛ 'ɔyi "ku.

¹⁸ -Ɔ zi bhɔ "ku 'a? 'Ɛ "ne 'nyɔkpɔ 'na -ɔ kwa 'ɔyi 'ŋlu -wɛ yɔ, -mɔ -ye Anyinɛnyɔ kwa 'ŋlu -wɛ yɔ -lɔ.