2 Kolɛtenya 1 - Nouveau Testament bété de Gagnoa

Bhɛleweli

¹ -Ame Pɔle, Zezu Kli 'na "kɔlepɔnyɔ 'ye 'e -noɔ -lɔ, sɛko -wɛ, Lagɔ 'ŋunu- -lɔ "ku zɛ. 'Ɛza, 'e -nyɛ -a "nɔwli Timote "bhaa -a kɛle -lɔ Lagɔgligbɛ -ɛ -ko Kolɛte -du "me -wɛ "ku. 'E kɛle -me 'lelee -wa -noɔ Lagɔ -noa 'waa 'klekle "ne -wa -ko Akayi -du "me -wɛ "ku.

² -A To Lagɔ "ne Anyinɛnyɔ Zezu Kli 'pɔ 'anye 'ŋu, -se 'wa "nyɛ 'anye "kuwɛtɛ! Pɔle bhɛle Lagɔ

³ Lagɔ me 'ŋlu, Anyinɛnyɔ Zezu Kli 'ɔ To! 'Ɔ -noɔ -lɔ To -ɔ -kɛ 'nyɛzedle yɔ, "ne 'ɔ -noɔ -lɔ Lagɔ -ɔ "tamalea -anye 'dleku -godogodo yɔ.

⁴ 'Ɔ "tamalea- -lɔ -anye 'dleku -anyɛɛ 'gbapegbapeɛ "me. "Ɛ 'dleku -ye 'ɔ "tamalea -anye -wɛ gbɔ -lɔ "ne -a "tamalea 'lelee -lɔ -wa 'gbape -wɛ 'dleku.

⁵ -See Klise 'na 'gbapegbapeɛ -kwleyi -ylɛ -me -anye "ku -wɛ sɔbhɔ 'ye Lagɔ "tamalea -lɔ -anye 'dleku Klise "me.

⁶ Zaa, -a -kɛ 'gbape ne, 'anyɛɛ 'dlekutamaleɛ -nyɛ 'anyɛɛ 'popoɛ "bhaa za yɛ -lɔ. Lagɔ -kɛ -anye 'dleku "tamalea- ne, -a "kɛ 'anye 'dleku "tamalea- za yɛ -lɔ, -se 'gbapegbapeɛ 'na -ye -a yle ne kɛ 'anye yle- ne, 'a "kɛ kɛ 'ɛnɛɛ gbo 'ŋunu za yɛ -lɔ.

⁷ 'Dletɛleɛ -ye -a -kɛ 'anyɛɛ za "me -wɛ 'kpɔ. -Se 'anye 'wɔ "bhaa -a 'gbapele- 'gɔme -wɛ, "ɛ sɛbhele -wɛ -ye Lagɔ "kɛ -lɔ 'anye 'dlekutamaleɛ -bhele -wɛ "nyɛ me.

⁸ -Nyɔsɔwanye, -a 'yɔbhɔ -gbɔ 'a "kɛ -ɛne yibhlele-: Azi -glɔ "me 'na 'kwiɛ -ye -a 'bha- nu -wɛ 'tɛ- nɛ "me kpɛnyee "ne 'ɛ zi "ku, "ne -a "ne nɛ 'dleku -kɛ -gbɔ -a yi nɛ 'po.

⁹ "Ne -a pɔ nɛ 'dle -gbɔ -anyɛɛ 'kwiɛ 'na yli -ylɛ nɛ -lɔ. "Ɛ ylɛle- soɔ -se 'a "kɛ Lagɔ -ɔ sɛ -glukonya glu -wɛ 'dleku kɛle-. -Mɔ, -a te -kɛ -la -ayigɛsɛ -ayi 'dletɛle-.

¹⁰ "Naa-, Lagɔ -sɛ -lɔ -anye 'kwiɛ 'na -gwe "ku, "ne 'ɔ yi 'ce -anye "ɛ -soɔ 'na 'kwiɛ -wɛ 'yli -sɛ 'yiɛ. 'Ɔyi -ye -a "zo- -lɔ 'anyɛɛ 'dletɛleɛ "me, za 'ɔ yi 'ce -anye 'fuɔ 'yiɛ.

¹¹ "Ne 'anye 'lelee, 'a kɛ -anyɛɛ za bhubhɔ ne, 'kwɛle -ye 'a kwɛle -lɔ -anye. 'Ɛɛ "kɛ -lɔ gbɔ "ne -a "kɛ -lɔ Lagɔ 'na -li 'na -li yle-, 'nyakpa -kwleyia 'na bhubhɔweli "me. 'Ɛza, 'nyakpa -kwleyia "kɛ 'lelee -lɔ Lagɔ 'ŋlu -kwa -anyɛɛ za.

Pɔle 'bhelia -glɔku me -weli kɔ

¹² Sɔɔbɛɛza -a zia -ayi "ku -noɔ -lɔ nɛɛ -anyɛɛ 'dlepɔsɛ "me, -a -yi sɛ -gbɔ 'nyakpa 'glɛme, -mɔ, -tiaa 'anye 'yliku, -anyɛɛ 'nɔŋosɛ -ko gbɛklɛklɛ "ne 'ɛ ŋwinɛle- "me, -sɛko -wɛ, Lagɔ "me 'ye 'ɛ 'bhale- -lɔ, "ne 'ɔnɛɛ -jɔlo -su -lɔ -anye, -mɔ, 'nyakpa 'na "nɛnoɛ "me -ye 'ɛ -na 'bhale-.

¹³ "Bɔgo -ye -a pɔ 'anye "ku -wɛ "me, -a "ne 'bhle -vinɛ "zo-, "ɛ "mɔ -ye 'a "kɛ "me zɛle "ne 'a 'cɛ "me 'no -wɛ yɛ. -Mɔ, 'e -kɛ 'dleku -gbɔ 'a yi 'ce "me 'no 'klekle.

¹⁴ -Ye 'a 'no- "me 'cibhɛ "ku -noɔ -lɔ -gbɔ Anyinɛnyɔ Zezu Kli 'na yizle, 'a yi 'ce 'ayi "ku zia -anyɛɛ za, "ne -anye 'lelee, -a yi 'ce -ayi "ku zia 'anyɛɛ za.

¹⁵ "Naa-, 'e -kɛ nɛ 'dleku -gbɔ sɛbhele -ye 'a 'pɔ nɛ -lɔ 'dle, 'ɛnɛɛ za 'e 'yɔbhɔ nɛ -lɔ -gbɔ 'e "kɛ nɛ 'anyɛɛ moɔ ylɛle- "bhuɔ, -se 'a "kɛ "kusɔ Lagɔ 'na -jɔlo yle-.

¹⁶ -Se 'e kɛ 'anyɛɛ moɔ 'bha-, 'e "kɛ Masedoane -glɔ "me me, -se 'e kɛ Masedoane -glɔ "me 'bha-, 'e "kɛ nɛ 'anyɛɛ moɔ "kusɔ yile-, -se 'a "kɛ nɛ -kɛ -ame kwɛle-, -se 'e "kɛ nɛ Zude -glɔ "me me.

¹⁷ 'E -bhulɛ "ɛ soɔ -wɛ, 'e "ne bhɔ 'dle 'pɔ- "ne 'e yi bhɔ sɔbhɔ bhulɛ- 'a? -Bɛsɛza, 'e kɛ "ɛ -soɔ bhulɛ ne, 'neɛ -ye 'e 'yɔbhɔ -wɛ 'ɛyikɔ 'ye 'e bhulɛ bhɔ 'nyakpa sɛku, 'e yi bhɔ -ɛɛ "ne 'bhɔ no?

¹⁸ 'Ɛ "ne bhɔ 'ɛyi yɛ, Lagɔ 'ɔyigɛsɛ -yi sɛ -gbɔ 'e -ka -ɛɛ "ne 'bhɔ no.

¹⁹ Silase, Timote, "ne -ame, Lagɔ Yowli, Zezu Kli 'na "kukoweli 'na 'de 'ye -a -sɛle -lɔ 'anye. "Naa-, Zezu "ne «-Ɛɛ» yɔ "ne 'ɔ "ne «'Bhɔ» yɔ, -mɔ, «-Ɛɛ 'ye 'ɔ -noɔ 'ce -lɔ -godogodo.»

²⁰ "Naa-, -ye Lagɔ no -gbɔ 'ɔ "kɛ 'nyakpa 'ylime tua 'klekle -wɛ, Zezu "me 'ye 'ɛ 'wlole- -lɔ 'yli. "Ne 'ɔ -noɔ -lɔ 'ɛnɛɛ «-ɛɛ yɔ.» 'Ɛza, Zezu "me, -a no me 'lelee -lɔ «Amɛn.» -Se -a "kɛ Lagɔ lo keyi 'dile-.

²¹ "Ne "ɛ Lagɔ 'ɔyigɛsɛ "tamalea -lɔ 'anye 'wɔ "bhaa -anye 'kwɛme Klise za. 'Ɔyi, 'ɔ "zo- -lɔ -anye -anyɛɛ tiaa dɛ.

²² "Ne 'ɔ "zo- -lɔ -anye 'ɔnɛɛ be yɔko; "ne 'ɔ yi -lɔ -anye Zuzu Wlewle 'dlezɔ "zo-, "ne "ɛ Zuzu Wlewle ne -noɔ -lɔ tɛtɛ li 'na -ɛ 'nɛne "ne 'ɔ "kɛ -anye kɔ 'je -wɛ yɔ.

²³ 'E libhi Lagɔ 'neɛ -ɔyeɛdɛ "ku "ku, 'e bhulɛ gbɛklɛklɛ. "Naa-, 'kwiɛ 'nɛne- "ne 'ɛ -zi yowlɛ "ku! 'E "ne "kusɔ Kolɛte 'wlizɔ -zile, -sɛko -wɛ, 'e te kɛ 'anye 'gbapea zɛ.

²⁴ -A -na 'se -ye -a "kɛ 'anye bhulɛle "ne 'a 'cɛ 'dleku -kɛle -wɛ siɛ tɛle. "Naa-, 'anyɛɛ 'dlekukɛleɛ 'tɛ- "me, 'ɛza, -a 'yɔbhɔ -lɔ -gbɔ 'anye 'wɔ "bhaa -a "kɛ libhɔ 'gɔme nole- 'ŋwɛnɛsɛ.