1 Zaa 5 - Nouveau Testament bété de Gagnoa

-A -lu -glɔnya 'dlekukɛleɛ "me

¹ -Wa -kɛ 'dleku -gbɔ Zezu -noɔ Klise yɔ -wɛ, Lagɔ 'na yua 'waa -lɔ. "Ne -wa -wa To Lagɔ -wɛ 'wa -wa -me 'lelee 'ɔnɛɛ yua.

² Sɛne 'ye -a yibhlele -lɔ sɛ nɛɛ -a -wa Lagɔ 'na yua: -Sɔɔdɛku -a -wa Lagɔ "ne -a -kɛ 'ɔnɛɛ gbagbɛ kɔ -wɛ.

³ 'Diɛɛ, Lagɔ 'na -wamaleɛ, 'ɔnɛɛ gbagbɛ 'na kɔ -kɛleɛ yɛ -lɔ. "Ne 'ɔnɛɛ gbagbɛ -wɛ 'wɔ 'na kɔkɛleɛ "ne "me 'tɛ-,

⁴ "naa- -wa -noɔ Lagɔ 'na yua 'waa -wɛ yi zikpɛ lu. "Ne -ɛ gbɔ "ne -a lu zikpɛ -wɛ -noɔ -lɔ -anyɛɛ 'dlekukɛleɛ yɛ.

⁵ -Ɔ -lu bhɔ zikpɛ 'a? 'Ɛ "mɔ 'ɔ -kɛ 'dleku -gbɔ Zezu -noɔ Lagɔ 'na 'Yu yɔ -wɛ yɔ.

Klise 'na -wayeɛdɛ

⁶ Zezu Kli, -nyɔ -nyɛ 'ŋu "ne 'dlu "bhaa -wa -yi yɔ -lɔ. -Ɔ -yi, -wɛ, 'ɛ "ne -kɛ 'ŋu 'ɛyikɔ "bhaa yɛ, -mɔ, 'ŋu "ne 'dlu "bhaa. Lagɔ 'na Zuzu -noɔ -lɔ 'ɛnɛɛ -ɔyeɛdɛ yɛ -gbɔ 'diɛɛ yɛ -lɔ. "Naa-, Lagɔ 'na Zuzu gbɛklɛklɛ yɔ -lɔ.

⁷ -Wayeɛdɛ -yle ta:

⁸ Zuzu Wlewle, 'ŋu "ne 'dlu, "ne 'wayi ta -kpɔ, 'wa -kole "ku.

⁹ 'Nyakpa kɛ -wayeɛdɛ 'waa ne -a -kɛloa 'dleku. -Mɔ, Lagɔ kɛ 'ɔyeɛdɛ yɛ, 'ɛ 'tɛ- "me "ne 'ɛ zi "ku. "Ne Lagɔ 'na 'desɛweli ne lɛ: 'Ɔyigɛsɛ -bhulɛ -lɔ 'ɔnɛɛ Yu 'na "kukoweli.

¹⁰ -Ɔ -kɛ Lagɔ Yowli 'dleku -wɛ -sule -lɔ "ɛ weli -wɛ 'dlezɔ. "Ne -ɔ "ne Lagɔ 'dleku -kɛ -wɛ, 'ɔ nyɔ -wɛ Lagɔ 'ye 'ɔ 'ye -lɔ yo "me! "Naa-, 'ɔ "ne Lagɔ 'na 'desɛweli -ye 'ɔ -bhulɛ 'ɔ Yowli za -wɛ 'dleku -kɛ zɛ.

¹¹ "Ɛ 'desɛweli ne lɛ: Lagɔ 'je- -anye zikpɛ -ɛ -ka "kubhiɛ -wɛ kɔ, "ne "ɛ zikpɛ -wɛ, 'ɔ Yowli "me 'ye 'ɛ 'bhale -lɔ.

¹² -Ɔ -kɛ Yu 'dleku -wɛ -kɛ zikpɛ, -ɔ "ne Lagɔ Yowli 'dleku -kɛ -wɛ, 'ɔ "ne zikpɛ -kɛ.

Zikpɛ -ɛ -ka "kubhiɛ

¹³ 'E kɛle- 'anye "bɔgo ne "ku -se 'a "kɛ -ɛne za 'sɛ yibhlele-: 'Anye -wa -kɛ Lagɔ Yowli 'dleku, 'a -kɛ zikpɛ 'na -ɛ -ka lɛ "kubhiɛ ne.

¹⁴ -Ɛ -gbɔ "ne -anyɛɛ 'dle 'pe- "bhle -vlee Lagɔ 'yliku ne lɛ: -A kɔ -bɛɛ' zlɛ, -ɛ kɔ -anyɛɛ za -gɛ nɛne, 'ɔ fo -anye 'yukwli.

¹⁵ -A -yi sɛ -gbɔ Lagɔ fo -anyɛɛ zlɛweli 'klekle 'yukwli. Zaa, -a kɛ 'dleku -gbɔ -ye -a zlɔ -wɛ, 'ɔ 'yi -anye kɔ 'je.

¹⁶ 'Nyɔkpɔ kɛ 'ɔ "nɔwli 'yli -gɛ -gbɔ 'ɔ no 'nyinyonoli, "ne 'ɛ "mɔ -kɛ 'nyinyonoli 'na -ɛ kɔ 'kwiɛ "me kɔme- -wɛ yɛ ne, 'ɔ 'bhubhɔ. Lɔbhɔ 'na dɛku, Lagɔ yu zikpɛ 'nyɛ, 'ɔnɛɛ 'nyinyonoli -wɛ "mɔ -kɛ 'diɛɛ 'kwiɛ "me kɔme. -Mɔ, 'nyinyonoli -bholo -ko lɔbhɔ, 'ɛ kɔme 'kwiɛ "me, 'e -na -kɛ -gbɔ 'a bhubhɔ 'ɛyi -wɛ za.

¹⁷ Nonoli -nyɛnye 'klekle 'nyinyonoli yɛ -lɔ, -mɔ, 'nyinyonoli 'na -ɛ "ne kɔme 'kwiɛ "me -le -kɛ.

¹⁸ -A -yi sɛ -gbɔ -wa -noɔ Lagɔ 'na yua 'waa -wɛ, 'wa "ne no -da 'nyinyonoli. "Naa-, Lagɔ Yowli -koa keyi, "ne Sata "noa 'bhɛle-.

¹⁹ -A -yi sɛ -gbɔ Lagɔ 'na yua 'ye -a -noɔ -lɔ, -mɔ glɔnya 'klekle -ko Sata 'na 'bhɛloɛ zɔ.

²⁰ -A -yi sɛ, Lagɔ 'na 'Yu -yi. 'Ɔ 'nyɛ -anye 'nɛnoɛ -se -a kɛ -diɛnadiɛ 'na Lagɔ yibhlele-, "ne "ɛ -diɛnadiɛ 'na Lagɔ -wɛ "bhaa -a -kole "ku 'ɔ Yowli Zezu Kli "me. 'Ɔyi, 'ɔ -noɔ -lɔ -diɛnadiɛ 'na Lagɔ yɔ, "ne 'ɔ -noɔ 'lelee -lɔ zikpɛ -ɛ -ka "kubhiɛ -wɛ yɔ.

²¹ 'Na yua 'nye, 'a 'luɔ- -kɛ! 'A te -kɛ "fu 'na Lagɔ gɛlele-!