1 Zaa 4 - Nouveau Testament bété de Gagnoa

Lagɔ Zuzu "ne Sata 'na zuzu

¹ 'Na 'dleglɛ -titoa nye, 'a te 'se -wa no nɛɛ: «Zuzu Wlewle -ko -anye "me» -wɛ 'dleku kɛle-. -Mɔ, 'a woloa -kɛ "me 'tee, -se 'a "kɛ -kɛ 'sɛ yibhlele- -gbɔ Lagɔ Zuzu -ko -diɛnadiɛ "ɛ 'nyakpa -wɛ "me. "Naa- "guɔkwɔmenya -gbeyia 'na 'kwleyia yiɛ- -kɛ zikpɛ ne "ku.

² -See 'a "kɛ Lagɔ Zuzu yibhlele- ne lɛ: -Wa no nɛɛ: «Zezu Kli -ylile -diɛnadiɛ 'nyɔkpɔ "me» 'wayi -wɛ -ye Zuzu Wlewle -ko -lɔ "me.

³ -Mɔ, 'nyɔkpɔ 'na -ɔ "ne 'yɔbhɔ -gbɔ 'ɔ "kɛ -soɔ Zezu yibhlele- -wɛ, Lagɔ Zuzu "no "me -ko. 'Ɔyi -wɛ Klise 'na -gblenyɔ -ɔ "kɛ zikpɛ ne "ku -yi "ne 'ɔ -ko "bhle "kle 'na zuzu -ko -lɔ "me.

⁴ 'Anye, 'na yua nye, Lagɔ -noa 'ye 'a -noɔ -lɔ, "ne 'a -lu "guɔkwɔmenya -gbeyia to "me. Sɔɔbɛɛza 'a -lua to "me ne lɛ: Lagɔ Zuzu -ɛ -ko 'anye "me -wɛ -kɛ 'bhɛloɛ, "ne 'ɛ -zi zuzu -ɛ -ko zikpɛ ne "ku -wɛ "ku.

⁵ "Guɔkwɔmenya -gbeyia -wɛ, zikpɛ ne "ku -noa 'waa -lɔ. 'Ɛza, 'wa bhulɛ -lɔ zikpɛ ne "ku 'na -konya 'nasɛ, "ne zikpɛ ne "ku -noa 'foa -lɔ 'yukwli.

⁶ -Mɔ 'ɛ kɛ -anye 'waa ne, Lagɔ -noa 'ye -a -noɔ -lɔ. Zaa, -ɔ -yi Lagɔ -wɛ fo -lɔ -anye 'yukwli, -ɔ "ne Lagɔ -nɔ yɔ -wɛ "ne fo -lɔ 'anye 'yukwli. -See -a yibhlele- Lagɔ Zuzu -ɔ -noɔ gbɛklɛklɛ yɔ -wɛ, "ne zuzu -nyɛnye -ɔ -noɔ yowlɛnyɔ yɔ -wɛ -lɔ.

Lagɔ, -waleɛ yɔ -lɔ

⁷ 'Na 'dleglɛ -titoa nye, -a wawale-, sɛko -wɛ, -waleɛ, Lagɔ "me 'ye 'ɛ 'bhale -lɔ. -Wa -wa 'walua -wɛ, Lagɔ 'na yua 'waa -lɔ, "ne 'wa -yi Lagɔ.

⁸ -Wa "ne 'walua -wa -wɛ 'wa "ne Lagɔ -yi, "naa- Lagɔ -waleɛ yɔ -lɔ zɛ.

⁹ -See Lagɔ -tua -anye 'ɔnɛɛ -waleɛ 'ylime ne lɛ: 'Ɔ -nɛme 'ɔnɛɛ -bholo -yle -yu zikpɛ ne "ku, -see 'ɔyi "me -a "kɛ 'lele-.

¹⁰ Zaa, -waleɛ -se 'ɛ sɛ bhɔ zɔ 'a? -Anye "ne Lagɔ -wamale-, 'ɔyi, 'ɔ -wamale- -lɔ -anye. 'Ɔ -wamale- -anye kpɛnyee za 'ɔ -nɛme -lɔ -anye 'ɔ Yowli. 'Ɔyi, 'ɔ 'bhale- 'ɔnɛɛ zikpɛ "me -anyɛɛ za, 'ɛnɛɛ za Lagɔ 'tale -lɔ -anyɛɛ 'nyinyonoli 'na gbo 'yi.

¹¹ 'Na 'dleglɛ -titoa nye, Lagɔ -wamale- soɔ -anye za, -anye 'lelee, -a wawale- se.

¹² 'Nyɔkpɔ -na 'ce -zɛ Lagɔ 'ylime 'ye, -mɔ, -a kɛ -wawale, Lagɔ -ko -anye "me, "ne 'ɔnɛɛ -waleɛ -ɛ -ko -anye "me -wɛ -ko 'wlele.

¹³ -See -a yibhlele sɛ -gbɔ -a -ko Lagɔ "me, "ne Lagɔ -ko -anye "me ne lɛ: 'Ɔ 'je- -anye 'ɔnɛɛ Zuzu Wlewle kɔ.

¹⁴ To pɔ- 'ɔ Yowli -gwe "ku -se 'ɔ "kɛ 'nyakpa 'fuɔ. -Anye, -a 'ye- 'ylime gbɛklɛklɛ "ne -a sɛ "ɛ -ye -a 'ye- 'ylime -wɛ 'na 'de.

¹⁵ 'Nyɔkpɔ kɛ -no -gbɔ: «Zezu, Lagɔ 'na 'Yu yɔ» Lagɔ -ko "me, "ne 'ɔyi, 'ɔ -ko Lagɔ "me.

¹⁶ "Ne -anye, -a -yibhlele Lagɔ 'na -waleɛ -ye 'ɔ -kɛ -anyɛɛ za "me -wɛ, "ne -a -kɛle 'ɛ -waleɛ -wɛ 'dleku. Lagɔ -waleɛ yɔ -lɔ. -Waleɛ kɛ 'nyɔkpɔ "me -ko ne, 'ɔ -ko Lagɔ "me "ne Lagɔ -ko "me.

¹⁷ -Waleɛ -ɛ -ko 'wlele kɛ -anye "me -ko ne, -anyɛɛ 'dle -yi "bhle 'pe 'vlee, -zle Lagɔ "kɛ 'ce -anye gbo 'bhlele -wɛ. Sɔɔbɛɛza bhɔ? 'Naa- -anyɛɛ dodo ne "ku 'na zikpɛ 'wlole- Zezu Kli -nɛ.

¹⁸ -Ɔ -wa 'nyakpa -wɛ, 'ɔ "ne 'gu -la. -Waleɛ 'na -ɛ -ko 'wlele -wɛ yilia -nyanɔ guɔ. -E kɛ 'dle 'pɔ -gbɔ 'wa yi -eyi 'kle 'yea-, 'ɛyi 'ye -e 'gu -lɔ. 'Ɔ 'gu -wɛ 'na -wamalesɛ "ne -kpee -ko.

¹⁹ -Mɔ, -anye -a -wa "naa- Lagɔ -wamale -lɔ -anye tɛɛ zɛ.

²⁰ 'Nyɔkpɔ kɛ no -gbɔ: «'E -wa Lagɔ» "ne 'ɔ kɛ 'ɔ "nɔwli -gble, yowlɛnyɔ yɔ -lɔ. "Naa-, -ɔ "ne 'ɔ "nɔwli -ye 'ɔ -gɛ 'yli -wɛ -wa, 'ɔ "ne 'bhɛle- "ne 'ɔ "kɛ Lagɔ -ye 'ɔ "ne 'yli -gɛ -wɛ wamale-.

²¹ -Gbagbɛ -ye Klise 'je- -anye kɔ ne lɛ: -Ɔ -wa Lagɔ, 'ɔ wamale- 'lelee 'ɔ "nɔwli.