1 Zaa 3 - Nouveau Testament bété de Gagnoa

Se-a kɛ bhɔ Lagɔ 'na yua "zo 'a?

¹ 'Na yua 'nye, 'a -gɛ 'yli -see Lagɔ -wa -anye kpɛnyee. 'Ɛnɛɛ za 'ɔ la -lɔ -anye 'ɔnɛɛ yua, "ne -diɛɛ, 'ɔnɛɛ yua 'ye -a -noɔ -lɔ. -Ɛwɛza zikpɛ ne "ku 'na 'nyakpa "ne -lɔ -anye -yi, "naa-, 'wa "ne Lagɔ -yi zɛ.

² 'Titoa -ye 'e -wa, -dɛme, Lagɔ 'na yua 'ye -a -noɔ -lɔ, -mɔ, -see -a "kɛ 'lelee bhliji "me ko -wɛ, zizɔ- -namlɛ "ku. -Ye -a -yi ne lɛ: Zle Klise kɛ -yi, -a yu 'ylime 'ye 'ɔnɛɛ -see 'ɔ -ko -wɛ, "ne -a yu 'ce 'wlole.

³ -Wa "tɛle- -ɛwɛ 'dle Klise "me -wɛ "zoa 'wayi 'wlele -see 'ɔyi 'ɔɔ -ko 'wlele -wɛ.

⁴ -Wa no 'nyinyonoli 'klekle -wɛ, Lagɔ 'na -lɔ 'ye 'wa "ne zɔ -lɔ 'plome. "Naa-, 'nyinyonoli 'na nonoɛ, Lagɔ 'na -lɔ 'na 'plomesɛɛ yɛ -lɔ.

⁵ 'A -yi sɛ, Zezu Kli -yi -se 'ɔ "kɛ 'nyinyonoli "ku 'titli, "ne 'ɔyi, 'nyinyonoli "no "me -ko.

⁶ -Wa -nyɛ 'ɔyi "bhaa 'wa -kole "ku -wɛ, 'wa no -da 'nyinyonoli. -Wa no 'nyinyonoli 'klekle -wɛ, 'wa "ne 'ye Zezu Kli 'ylime, 'wa "no 'lelee -yi.

⁷ 'Na yua 'nye, 'a 'luɔle- -kɛ 'ayi "ku. 'Wa te -kɛ 'anye 'kwlɛ bhlia-! 'Nyɔkpɔ kɛ "me 'ŋwinɛleli no, 'ɔ ŋwinɛle- "me -see Zezu Kli ŋwinɛle- "me -wɛ.

⁸ 'Nyɔkpɔ kɛ 'nyinyonoli no, Sata -nɔ yɔ -lɔ, "naa-, "kucidɛku, Sata, 'nyinyonolinonyɔ yɔ -lɔ. -Ɛwɛza, Lagɔ Yowli -yi -lɔ -se 'ɔ "kɛ Sata 'na nonoli "ku 'bhia.

⁹ -Wa -noɔ Lagɔ 'na yua 'waa -wɛ, 'wa "ne no -da 'nyinyonoli. "Naa-, Lagɔ 'na 'bhɛloɛ -koa "me sɛgbɛɛ gloglo -bɛɛ'. 'Wa "ne -da 'bhɛle- "ne 'wa kɛ 'nyinyonoli no, "naa-, Lagɔ 'na yua 'waa -lɔ zɛ.

¹⁰ -See 'wa yibhlele Lagɔ 'na yua "ne Sata 'na yua ne lɛ: -Wa "ne no "meŋwinɛleli 'klekle -wɛ, "ne -wa "ne 'wa "nowlia -wa -wɛ, 'wa "ne Lagɔ -noa 'waa.

'A 'wale-

¹¹ "Kucidɛku 'na weli -ye 'a "no- ne lɛ: -A wawale.

¹² -A te -kɛ Kayɛ 'na -li no. Sata -nɔ yɔ 'awɔ -lɔ "ne 'ɔ lɔbhɔ- 'awɔ 'ɔ "nɔwli "ne 'ɔ "ku-. Sɔɔbɛɛza, 'ɔ lɔbhɔ- 'awɔ 'a? "Naa-, Kayɛ 'na nonoli "ne 'awɔ 'nɛne, -mɔ, 'ɔ "nɔwli 'na nonoli ŋwinɛle- 'awɔ "me.

¹³ -Nyɔsɔwanye, dodo ne "ku 'na 'nyakpa kɛ 'anye -gble, 'ɛ te 'anye geji "ku sɛ.

¹⁴ -Mɔ -anye, -a wawale-. 'Ɛza -a -yi -lɔ sɛ: Bhlɛme, -a "ku- 'awɔ, -mɔ, -dɛmeda, -a -yle zikpɛ. "Naa-, -ɔ "ne 'naykpa -wa -wɛ, kwiyɛ "me 'ɔ ylɛ -lɔ 'wli.

¹⁵ -Wa -gble 'walua -wɛ, 'nyɔkpɔ lɔbhɔnya 'waa -lɔ, "ne 'a -yi sɛ, 'nyakpa lɔbhɔnyɔ "ne Lagɔ 'na zikpɛ -kɛ -godogodo 'na dɛ.

¹⁶ Sɛne 'ye -a -yibhlele -lɔ -waleɛ: Zezu 'bhale- 'ɔnɛɛ zikpɛ "me -anyɛɛ za. Zaa, -anye 'lelee, -a yi -anyɛɛ zikpɛ "me 'bhale- -me -a "nowlia 'wɔ za.

¹⁷ 'Nyɔkpɔ kɛ klɔgbɔ pɔ, "ne 'ɔ kɛ 'ɔ "nɔwli -ɔ -mea -wɛ keyi glɛ ne, 'ɔ yi bhɔ no -gbɔ 'ɔ -wa Lagɔ 'a?

¹⁸ 'Na yua nye, -a te nuɔ -gwe -fu -nyɛ 'dlepɛɛ "me wamale-, -mɔ nonoli "me "ne gbɛklɛklɛ "me.

¹⁹ -Ɛwɛ "kɛ -lɔ 'gbɔ "ne -a "kɛ -lɔ 'sɛ yibhlele- -gbɔ -a -ko gbɛklɛklɛ "me, "ne Lagɔ 'yliku -anyɛɛ 'dle yi "bhle 'pe -vlee.

²⁰ 'Dle kɛ -anye gbo bhlele- ne, -a -yi sɛ -gbɔ Lagɔ 'kpɔ- "ne 'ɔ -zi -anyɛɛ 'dle "ku, "ne 'ɔ -yi -li 'klekle.

²¹ 'Na 'dleglɛ -titoa nye, 'dle "mɔ -anye gbo bhlele- ne, Lagɔ 'yliku, -anyɛɛ 'dle 'pe- "bhle -vlee

²² "ne -ye -a zlɔ -wɛ, 'ɔ 'je 'anye kɔ. 'Naa- -a "zo 'ɔnɛɛ gbagbɛ 'plome, "ne -a no -ye 'ɔ 'yɔbhɔ -wɛ.

²³ -Ye Lagɔ 'yɔbhɔ -gbɔ -a no ne lɛ: -A kɛle- 'ɔ Yowli, Zezu Kli 'na 'tɔ "me 'dleku, -se -a wawale- -see Klise 'yɛbhɛle -anye -wɛ.

²⁴ -Ɔ "zo Lagɔ 'na gbagbɛ 'plome -wɛ, Lagɔ 'ye 'ɔ -ko -lɔ "me, "ne Lagɔ -ko -me -lɔ "me. 'Diɛɛ, Lagɔ -ko -anye "me, Zuzu Wlewle -ye 'ɔ 'nyɛ- -anye -wɛ za.