1 Zaa 1 - Nouveau Testament bété de Gagnoa

Lagɔ 'na bhulɛweli 'nyɛ -lɔ zikpɛ

¹ Weli -ɛ 'nyɛ zikpɛ, "ne 'ɛ -le 'awɔ "kle zikpɛ 'na "kucidɛku 'ye -a 'sɛle -lɔ 'anye. -A no- "me, "ne -anyɛɛ 'yli 'ye- 'ylime, -a -wolo "ku 'tee, "ne -a sɛ- kɔ.

² 'Diɛɛ, zikpɛ -tua -ɛyi 'nyakpa 'ylime, "ne -a 'ye- 'ylime, 'ɛnɛɛ -wayeɛdɛ 'ye -a -noɔ -lɔ, "ɛ Lagɔzikpɛ -ɛ -ka "kubhiɛ 'na 'de 'ye -a 'sɛle -lɔ 'anye. 'Ɛ -ko 'awɔ To yɔko, "ne 'ɛ yi -lɔ -anye 'ɛyi 'tua-.

³ "Ɛ zikpɛ ne, -a 'ye- 'ylime, "ne -a 'no- -me 'ɛ 'de. -A 'sɛle me 'lelee 'anye 'ɛnɛɛ 'de. Sɔbhɔ "ku, 'anye 'wɔ "bhaa, -a "kɛ "ku 'kole-. 'Gɔme, -anye "ne To "ne 'ɔnɛɛ yu Zezu Kli "bhaa -a yi "ku 'kole-.

⁴ -A 'kɛle -ɛwɛ 'anye "ku, -se -anyɛɛ 'ŋwɛnɛ "kɛ -kɛ 'wli yiɛ.

«Lagɔ -noɔ -lɔ zle yɔ»

⁵ Weli -ye -a 'nole- Zezu Kli nu "ne -a 'sɛle 'anye 'de -noɔ -lɔ -gbɔ: Lagɔ -noɔ -lɔ zle yɔ, titiɛ "no "me -ko.

⁶ -A kɛ no -gbɔ Lagɔ "bhaa -a -kole "ku "ne -a kɛ 'lelee titiɛ "me 'nɔŋo- ne, 'yo 'ye -a 'wlɛ -lɔ, "ne -a "ne gbɛklɛklɛ "me -ko.

⁷ Lagɔ zle 'ye 'ɔ -noɔ -lɔ. Zaa, -anye 'lelee -a kɛ zle "ku 'nɔŋo-, -alua "bhaa -a -kole "ku, "ne 'ɔ yowli Zezu 'na 'dlu sɛ -anye 'nyinyonoli "me "ne 'ɛ "zoa -anye 'wlele.

⁸ -A kɛ -lalɛce no -gbɔ: «-A "ne 'nyinyonoli 'wlime -kɛ» -ayi 'ye -a no -lɔ ylo, "ne gbɛklɛklɛ "ne -anye "me -ko.

⁹ -See Lagɔ "ne 'bha 'ɔnɛɛ bhulɛweli "ku, "ne 'ɔ ŋwinɛle- "me. Zaa, -a kɛ 'anyɛɛ 'nyinyonoli 'na 'de -sɛ, 'ɔ yi 'ɛnɛɛ gbo 'yi 'tale-, "ne 'ɔ yi "nyɛnye 'klekle -ɛ -ko -anye "me -wɛ "me -sɛ.

¹⁰ -A kɛ no -gbɔ -a "ne "no 'nyinyonoli, Lagɔ 'ye -a 'ye -lɔ 'yo "me, "ne 'ɔnɛɛ bhulɛweli "ne -anye "me -ko.